Anɛ O Fiɛɛmi Ní Tsumi ɔ Ngɛ Kaa Bɔ́ Lo?

WA SƆMƆMI NÍ TSUMI ɔ he hia wawɛɛ. Se tsa pi nɔ fɛɛ nɔ nɛ wa fiɛɛ kɛ haa a nɛ le jã. Ke nihi a bua jɔ Baiblo mi sɛ gbi ɔ he po ɔ, pi be fɛɛ be nɛ e peeɔ mɛ kaa e he hia nɛ waa kɛ mɛ nɛ kase Mawu Munyu ɔ.

Kaa nɔ hyɛmi nɔ́ ɔ, mo susu nyumu ko nɛ a tsɛɛ lɛ ke Gavin ɔ he nɛ o hyɛ. E yaa Asafo mi kpehi ngɛ Matsɛ Yemi Asa a nɔ, se e sume kaa a kɛ lɛ nɛ kase Baiblo ɔ. Gavin tsɔɔ kaa e li Baiblo ɔ mi tsɔ, nɛ e sume nɛ nɔ ko nɛ le kaa e li Baiblo ɔ mi. E ye gbeye kaa a maa sisi lɛ, nɛ e sume kaa e kɛ e he maa wo jami ko mi hulɔ. Kɛ o susu kɛɛ? Anɛ a ma nyɛ maa ye bua Gavin lo? Mo susu he nɛ o hyɛ bɔ nɛ níhi nɛ nɔ ko kase ngɛ Baiblo ɔ mi ɔ ma nyɛ maa ye bua lɛ ha. Yehowa de Israel bi ɔmɛ ke: ‘Ye munyu maa nɛ kaa bɔ́, nɛ e maa pee kaa hiɔmi nɛ ngɛ fiae kɛ ngɛ nga nɔ puee.’ (5 Mose 31:19, 30; 32:2) Nyɛ ha nɛ waa kase nɔ́ ko ngɛ bɔ́ he, konɛ waa ngɔ kɛ to wa sɔmɔmi ní tsumi ɔ he nɛ waa hyɛ bɔ nɛ wa ma plɛ kɛ ye bua “nimli tsuo” ha.​—1 Timoteo 2:3, 4.

MƐNI BLƆ NƆ WA SƆMƆMI NÍ TSUMI Ɔ MA NYƐ MAA PEE KAA BƆ́ NGƐ?

Bɔ́ nɛɛ blɛuu. Bɔ́ woɔ bɔɔbɔɔbɔɔ, nɛ e nɛɛ blɛuu. Ngɛ Israel bi ɔmɛ a be ɔ mi ɔ, mɛni blɔ nɔ Yehowa munyu ɔ ‘nɛ kaa bɔ́’ ngɛ? Yehowa kɛ e we bi tu munyu ngɛ mi mi jɔmi kɛ mi mi sami mi, nɛ e susu a he. Ke wa jeɔ bumi kpo kɛ haa nihi ngɛ níhi nɛ a heɔ yeɔ ɔ a he ɔ, lɔ ɔ tsɔɔ kaa wa ngɛ Yehowa kasee. Wa woɔ mɛ he wami kaa mɛ nitsɛmɛ a susu níhi a he konɛ a ma a juɛmi nya si. Ke wa susuɔ nihi a he ngɛ blɔ nɛ ɔ nɔ ɔ, lɔ ɔ ma ha nɛ a maa suɔ wawɛɛ kaa a maa kplɛɛ níhi nɛ wa deɔ mɛ ɔ nɔ, nɛ wa sɔmɔmi ní tsumi ɔ maa wo yiblii.

Bɔ́ haa nɛ nɔ he mi jɔɔ lɛ. Ke wa susu blɔ slɔɔtohi a nɔ nɛ wa ma nyɛ maa gu kɛ ye bua nihi konɛ a kase anɔkuale ɔ he ɔ, wa fiɛɛmi ní tsumi ɔ ma ha a he mi maa jɔ mɛ. Nyɛminyumu ko nɛ a tsɛɛ lɛ ke Chris ɔ kɛ Gavin kpe ngɛ fiɛɛmi mi. E de Gavin kaa e suɔ nɛ e kɛ lɛ maa kase Baiblo ɔ, se e nyɛ we Gavin nɔ. Mohu ɔ, e bɔ mɔde nɛ e hla blɔ slɔɔtohi a nɔ nɛ e maa gu kɛ ye bua Gavin konɛ e bua nɛ jɔ Baiblo ɔ kasemi he. Chris de Gavin kaa sɛ gbi ko nɛ e he hia ngɛ Baiblo ɔ mi, nɛ ke e le jamɛ a sɛ gbi ɔ, lɔ ɔ ma ha nɛ e maa nu asafo mi kpehi nɛ e yaa a sisi saminya. Lɔ ɔ se ɔ, Chris tsɔɔ lɛ nya kaa Baiblo gbamihi lɛ ha nɛ lɛ Chris ɔ ná nɔ mi mami kaa sɛ gbi nɛ ngɛ Baiblo ɔ mi ɔ ji anɔkuale ɔ nɛ. Enɛ ɔ ha nɛ Chris kɛ lɛ susu bɔ nɛ gbami komɛ plɛ kɛ ba mi ha a he. Ní nɛ a sɛɛ ɔ ha nɛ Gavin tsui nɔ e mi, nɛ nyagbe ɔ, e kplɛɛ kaa a kɛ lɛ nɛ kase Baiblo ɔ.

Bɔ́ hi ha níhi nɛ wami ngɛ a mi. Ke sapu ngɛ yee ngɛ Israel ɔ, e nyɛɔ baa kaa hiɔmi nɛ́ nyɔhiɔhi abɔ. Ke bɔ́ nɛ́ ɔ, ngahi nglaa. Yehowa gba kɛ fɔ si kaa ngɛ wa be nɛ ɔ mi ɔ, nɔ́ ko nɛ ngɛ kaa sapu maa ye. Lɔ ɔ ji kaa ‘Yehowa sɛ gbi ɔ he kuma maa ye nihi.’ (Amos 8:11) E wo si kaa nihi nɛ a pɔ mɛ nu ɔ maa pee kaa ‘bɔ́ nɛ je Yehowa ngɔ’ be mi nɛ a fiɛɛɔ Matsɛ Yemi ɔ he sane kpakpa a nɛ “to kpa” amɛ hu fĩɔ a se ɔ. (Mika 5:7; Yohane 10:16) Sɛ gbi nɛ wa fiɛɛɔ ɔ piɛɛ blɔ nya nɛ Yehowa to konɛ e kɛ ha nihi nɛ anɔkuale ɔ he kuma ngɛ mɛ yee ɔ wami ɔ he. Anɛ wa naa sɛ gbi nɛ ɔ kaa nɔ́ ko nɛ he hia lo?

Bɔ́ ji jɔɔmi nɛ je Yehowa ngɔ. (5 Mose 33:13) Wa sɔmɔmi ní tsumi ɔ ma nyɛ maa pee jɔɔmi kɛ ha nihi nɛ a buɔ wɔ tue ɔ. Baiblo ɔ nɛ Gavin kase ɔ pee jɔɔmi kɛ ha lɛ, ejakaa lɔ ɔ ha nɛ e ná sanehi fuu nɛ e bi ɔ a heto. E ya e hɛ mi mlamlaamla, nɛ e ha nɛ a baptisi lɛ, nɛ amlɔ nɛ ɔ, e kɛ e yo Joyce ngɛ Matsɛ Yemi ɔ he sane kpakpa a fiɛɛe kɛ bua jɔmi.

MOO NA O FIƐƐMI NÍ TSUMI Ɔ KAA NƆ́ KO NƐ HE HIA

Ke wa ngɔɔ wa fiɛɛmi ní tsumi ɔ kɛ toɔ bɔ́ he ɔ, lɔ ɔ hu ma nyɛ maa ye bua wa ti nɔ tsuaa nɔ konɛ e na kaa e fiɛɛmi ní tsumi ɔ he hia. Ngɛ mɛni blɔ nɔ? Hiɔmi ngu kakaaka nɛ nɔɔ si ɔ ha we nɛ zugba a pɔɔ, se ke hiɔmi nguhi ayɔhi abɔ nɛ pue si kaa bɔ́ ɔ, zugba pɔɔ. Jã kɛ̃ nɛ eko ɔ, e maa pee wɔ kaa nɔ́ ko tsɔ ko ji wa fiɛɛmi ní tsumi ɔ mi kɛ bɛ. Se mɔde nɛ Odasefohi ayɔhi abɔ ngɛ bɔe ɔ he je ɔ, wa nyɛ nɛ wa yeɔ “je ma amɛ tsuo” odase. (Mateo 24:14) Anɛ wa sɔmɔmi ní tsumi ɔ ma nyɛ maa pee jɔɔmi nɛ je Yehowa ngɔ kɛ ha nihi lo? Ee, wa sɛ gbi ɔ maa pee kaa bɔ́ nɛ nɛɛ blɛuu, nɛ haa nɔ wami, kɛ he mi jɔmi!