NIHEWI KƐ YIHEWI BIƆ KE
Mɛni He Je Nɛ E Sa Nɛ Ma Sɔle?
Nihewi kɛ yihewi babauu deɔ ke a sɔleɔ, se pi be fɛɛ be aloo daa ligbi nɛ a nyɛɔ peeɔ jã. Enɛ ɔ he ɔ, a kpɛti ni komɛ biɔ ke: ‘Anɛ sɔlemi ji nɔ́ ko kɛkɛ nɛ ma ha nɛ ye he nɛ jɔ mi, aloo e ji nɔ́ ko nɛ he hia wawɛɛ?’
Mɛni ji sɔlemi?
Sɔlemi ji ní sɛɛmi nitsɛnitsɛ nɛ yaa nɔ ngɛ nɔ ko kɛ Bɔlɔ ɔ a kpɛti. Mo susu he nɛ o hyɛ! Yehowa nɔ kuɔ pe adesahi ngɛ nɔ́ fɛɛ nɔ́ mi, se kɛ̃ ɔ, “e kɛ wa ti nɔ fɛɛ nɔ he kɛ we.” (Ní Tsumi 17:27) Ngɛ anɔkuale mi ɔ, Baiblo ɔ kɛ nine fɔmi klɛdɛɛ ko ha wɔ. E de ke: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.”—Yakobo 4:8.
Mɛni blɔ nɔ o maa gu kɛ hɛ mo kɛ su Mawu he?
Sɔlemi ji blɔ kake nɛ o ma nyɛ maa gu nɔ kɛ pee jã. Enɛ ɔ ji blɔ nɛ o ma nyɛ maa gu nɔ nɛ o kɛ Mawu maa sɛɛ ní.
Baiblo ɔ kasemi hu ji blɔ kpa ko nɛ o ma nyɛ maa gu nɔ kɛ hɛ mo kɛ su Mawu he. Enɛ ɔ ji blɔ nɛ Mawu guɔ nɔ nɛ e kɛ mo “tuɔ munyu.”
Ke o kɛ Mawu sɛɛ ní be fɛɛ be kɛ gu blɔ enyɔ nɛ ɔmɛ nɛ ji sɔlemi kɛ Baiblo ɔ kasemi nɔ ɔ, lɔ ɔ maa ye bua mo konɛ huɛ bɔmi nɛ ngɛ o kɛ Mawu nyɛ kpɛti ɔ mi nɛ wa.
“Yehowa nɛ ji nɔ nɛ E Nɔ Kuɔ Pe Kulaa a nɛ waa kɛ sɛɛɔ ní ɔ ji he blɔ nɛ se be nɛ wa ná.”—Jeremy.
“Ke i sɔle nɛ i de Yehowa níhi nɛ ngɛ tsui mi ɔ, lɔ ɔ haa nɛ i nuɔ he kaa i hɛ kɛ su e he wawɛɛ.”—Miranda.
Anɛ Mawu buɔ sɔlemi tue lo?
Ke o heɔ Mawu yeɔ, nɛ o sɔleɔ kɛ haa lɛ po ɔ, eko ɔ, e he ma nyɛ maa wa ha mo kaa o ma he ye kaa Mawu buɔ sɔlemi tue niinɛ. Se kɛ̃ ɔ, Baiblo ɔ tsɛɔ Yehowa ke, ‘sɔlemi tue bulɔ.’ (La 65:2) Yehowa ngɛ mo dee ke ‘o sake o yeyeeye peemi ɔmɛ tsuo ngɔ fɔ e nɔ.’ Mɛni he je? ‘Ejakaa e susuɔ o he.’—1 Petro 5:7.
Mo susu he nɛ o hyɛ: Anɛ o náa be kɛ haa o huɛ ko nɛ nyu bi ngɛ o kɛ lɛ nyɛ kpɛti ɔ, nɛ nyɛ pɔɔ ní sɛɛmi lo? Jã kɛ̃ nɛ o kɛ Mawu ma nyɛ maa sɛɛ ní be fɛɛ be. Moo sɔle kɛ ha lɛ be fɛɛ be, nɛ o tsɛ e biɛ nɛ ji Yehowa a ngɛ o sɔlemi mi. (La 86:5-7; 88:9) Ngɛ anɔkuale mi ɔ, Baiblo ɔ wo wɔ he wami kaa waa “sɔle be fɛɛ be.”—1 Tɛsalonika Bi 5:17.
“Sɔlemi ji ní sɛɛmi nɛ yaa nɔ ngɛ i kɛ ye hiɔwe Tsɛ ɔ wa kpɛti. Ke i ngɛ sɔlee ɔ, i deɔ lɛ ye susumi kɛ bɔ nɛ i ngɛ he nue ha a tsuo.”—Moises.
“I jeɔ ye tsui mi nɛ i deɔ Yehowa nɔ́ fɛɛ nɔ́ kaa bɔ nɛ i kɛ ye yayo aloo ye huɛ kpakpa ko maa sɛɛ ní ɔ.”—Karen.
Mɛni he ma nyɛ maa sɔle ngɛ?
Baiblo ɔ de ke: “Ngɛ nɔ́ fɛɛ nɔ́ mi ɔ, nyɛɛ gu sɔlemi kɛ pɛɛ kpami nɛ mi wa kɛ sina nɔ kɛ ha nɛ Mawu nɛ e le nyɛ ní bimi ɔmɛ.”—Filipi Bi 4:6.
Anɛ enɛ ɔ tsɔɔ kaa o ma nyɛ maa sɔle ngɛ o nyagbahi a he lo? Ee! Ngɛ anɔkuale mi ɔ, Baiblo ɔ de ke: ‘Ngɔɔ o haomi ɔmɛ kɛ ha Yehowa, nɛ e maa bu o he.’—La 55:22.
Ngɛ anɔkuale mi ɔ, ke wa ngɛ sɔlee ɔ, e sa nɛ waa pee babauu pe wa nyagbahi kɛkɛ nɛ wa ma de Mawu. Yiheyo ko nɛ a tsɛɛ lɛ ke Chantelle ɔ de ke, “Ke i biɔ Yehowa yemi kɛ buami kɛkɛ pɛ ɔ, lɔ ɔ be hae nɛ huɛ bɔmi kpakpa nɛ hi i kɛ lɛ wa kpɛti.” E de hu ke, “I susu kaa e sa nɛ ma na Yehowa si kekle ke i ngɛ sɔlee, kɛkɛ lɔ ɔ se ɔ, ma ngɔ be fuu kɛ wo níhi nɛ ye bua jɔ a he ɔmɛ a ta.”
Mo susu he nɛ o hyɛ: Mɛni níhi lɛ o bua jɔ he ngɛ o si himi mi? Anɛ o ma nyɛ ma kai níhi etɛ nɛ o maa suɔ nɛ o na Yehowa si ngɛ a he mwɔnɛ ɔ lo?
“Wa ma nyɛ maa sɔle kɛ na Yehowa si ngɛ ní tsɔwitsɔwi po a he, kaa eko ɔ, bɔ nɛ mɔmɔ ko ngɛ fɛu ha.”—Anita.
“Mo pue o yi mi tɛ ngɛ adebɔ níhi nɛ o bua jɔ he aloo Baiblo ngmami ko nɛ e ta o tsui he ɔ he, nɛ́ lɔ ɔ se ɔ, o na Yehowa si ngɛ he.”—Brian.