Sɛ Womi Nɛ Je Nɔyemi Kuu ɔ Ngɔ
Nyɛmimɛ Suɔli Yehowa Odasefoli:
Wa bua jɔ nitsɛ kaa wa maa ngma nyɛ wa nyɛmimɛ nɛ wa suɔ womi nɛ ɔ! E peeɔ wɔ kaa bɔnɛ e pee bɔfo Yohane benɛ e de ke e “suɔ” e nyɛmimɛ nɛ ngɛ hemi kɛ yemi ɔ mi, nɛ e bua jɔ kaa a “baa a je mi ngɛ anɔkuale ɔ nya” a. (2 Yoh. 1, 4) Hyɛ bɔnɛ wa ná anɔkuale ɔ he se ha! Anɔkuale ɔ ha wa ye wa he ngɛ Babilon Ngua a kɛ e tsɔɔmihi kɛ e kusumihi nɛ gbee Mawu he guɛ ɔ a he. Anɔkuale ɔ nya nɛ wa baa wa je mi ngɛ ɔ ye bua wɔ nɛ wa plɛ pee nihi nɛ ngɛ suɔmi, mi mi jɔmi, kɛ mɔbɔ nami. Nɛ anɔkuale ɔ bli blɔ ha wɔ nɛ wa ná si dami kpakpa ngɛ Mawu hɛ mi, kɛ neneene wami hɛ kɛ nɔ fɔmi.
Wa naa Yehowa si hu kaa e ngɔ e mumi ɔ kɛ ngɛ wɔ blɔ tsɔɔe nɛ e ngɛ wɔ he wami woe daa ligbi! Wa heɔ yeɔ kaa nyɛ bua jɔ bɔnɛ “Mawu Mumi ɔ Tsɔɔ Wɔ Blɔ” Kpe Ngua a ha nɛ wa na blɔ slɔɔtohi a nɔ nɛ Yehowa guu e mumi ɔ nɔ kɛ tsɔɔ wɔ blɔ nɛ e woɔ wɔ he wami ɔ he. Akɛnɛ níhi a mi ngɛ wae daa ngɛ je ɔ mi heje ɔ, e he hia kaa waa ngɔ wa he kɛ fɔ Yehowa mumi nɛ ngɛ he wami ɔ nɔ konɛ e tsɔɔ wɔ blɔ kɛ gblee ligbihi nɛ mi wa nɛ ma ngɛ wa hɛ mi ɔ mi.
Wa heɔ yeɔ kaa benɛ nyɛ kane bɔnɛ wa nyɛmimɛ na nɔ́ ngɛ a hemi kɛ yemi ɔ he ha ngɛ Yearbook ɔ mi ɔ, e wo nyɛ he wami. Nɛ e ngɛ nyakpɛ kaa anɔkualetsɛmɛ nɛ ɔmɛ a kpɛti nihi babauu ji nihi nɛ a baptisi mɛ be bɔɔ pɛ nɛ haomi ɔmɛ te si, aloo a baptisii we mɛ lolo. Wa suɔ mɛ saminya ngɛ a we anɔkuale yemi kɛ dami ní peemi ɔmɛ a he! Ngɛ anɔkuale mi ɔ, nɔhyɛ nɔ́ kpakpa nɛ a pee ɔ wo wa yi mi kpɔ nɛ wa mwɔ kaa wa maa ya nɔ maa ye Matsɛ Yemi ɔ anɔkuale ɔ mi he wami, e kɔ we he eko haomihi nɛ waa kɛ maa kpe.—1 Tes. 1:6-8.
Wa nyɛmimɛ nyumuhi kɛ yihi, wa le kaa e biɔ kaa nyɛ tsu ohia kɛ haomi kpahi nɛ nyɛɛ kɛ ngɛ kpee ɔ a he ní, bɔnɛ pee nɛ nyɛ weku ɔmɛ nɛ pee kake kɛ hi si ngɛ suɔmi mi. Ngɛ nyɛ ti ni komɛ nyɛ blɔ fa mi ɔ, e he wa ha nyɛ kaa nyɛ maa ya fiɛɛmi kɛ nikasemi daa. Enɛ ɔ heje nɛ benɛ waa kɛ sɔlemi susu níhi a he ɔ, wa pee tsakemi komɛ ngɛ asafo ɔ nikasemi yami blɔ nya tomi ɔ mi kɛ je January 1, 2009 ɔ nɛ. Wa heɔ yeɔ kaa nyɛ maa ngɔ blɔ nya tomi nɛ ɔmɛ kɛ tsu ní bɔnɛ sa konɛ nyɛ ná be fuu kɛ pee nyɛ dɛhe nikasemi kɛ weku nikasemi.
Wa bua jɔ kaa wa na nihi babauu nɛ a baptisi mɛ ngɛ kpehi slɔɔtohi nɛ a pee jeha nɛ be ɔ mi. Ni ɔmɛ a kpɛti ni komɛ ji jokuɛwi. Nyɛ fɔli, nyɛ sa yi jemi kaa nyɛ tsɔse nyɛ bimɛ ɔmɛ nɛ a ba ná hɛsa ha anɔkuale ɔ, nɛ nyɛ wo mɛ he wami nɛ a jɔɔ a he nɔ ha Yehowa kaa a ma sɔmɔ lɛ kɛ je a jokuɛwi a si. Jokuɛwi kpakpa nɛ ɔmɛ kɛ kahi slɔɔtohi ngɛ kpee ngɛ sukuu, se kɛ̃ ɔ, a bɔ mɔde nɛ a he su kɛ ha baptisimi. Enɛ ɔ tsɔɔ kaa nyɛ tsɔse mɛ saminya.—La 128:1-6.
Jehanɛ se wa suɔ kaa waa wo bɔnɛ Baiblo mi nikasemi ya hɛ mi ha a ta. Wa ma se sane kpakpa fiɛɛli ɔmɛ kɛ blɔ gbali klɛdɛɛ ɔmɛ a mɔde bɔmi titli lɛ ha wa ná nɔ yami nɛ ɔ nɛ. Wɔ nihi tsuo nɛ wa ngɛ Nɔyemi Kuu ɔ mi ɔ, wa bua jɔ wawɛɛ kaa nyɛmimɛ nyumuhi kɛ yihi nɛ ngɛ je kɛ wɛ ngɛ nítsumi nɛ he hia tsue kɛ ngɛ tsui kpakpatsɛmɛ nɛ kuma ngɛ mɛ yee ɔ dee ke, a “Ba!” konɛ á ‘ba yɛ wami nyu ɔ yaka gu.’ (Kpoj. 22:17) Waa kɛ bua jɔmi ngɛ nimli 289,678 nɛ jɔɔ a he nɔ nɛ a baptisi mɛ jeha nɛ be ɔ he nyae kɛ ba piɛɛ wa je kɛ wɛ nyɛmimɛ asafo ɔ he!
E hi kaa wa ma kai bɔfo Yohane munyu nɛ ɔ daa. E ngma ke: “Je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa. Se nɔ nɛ peeɔ Mawu suɔmi nya ní ɔ, lɛɛ e ngɛ kɛ yaa neneene.” (1 Yoh. 2:17) Be nɛ wa ngɛ mi ɔ, e be kɛe nɛ je nɛ ɔ maa ‘be kɛ ho’! E ji nile blɔ kaa wa maa ngɔ Mawu suɔmi nya ní peemi kɛ pee nɔ́ titli ngɛ wa si himi mi nɛ waa ‘ya nɔ nɛ waa hwɔɔ.’ (Mat. 24:42) Ke wa pee jã a, wa be wa he piae kɔkɔɔkɔ, nɛ wa ma ná Yehowa suɔmi nɛ ngɛ daa a he se.—Yes. 63:7.
Wa he ye kaa sanehi nɛ je ma slɔɔtohi a nɔ nɛ taa nɔ tsui he fuu nɛ ngɛ Yearbook ɔ mi ɔ maa wo nyɛ tsuo he wami konɛ nyɛɛ ngɔ Matsɛ Yemi ɔ kɛ pee oti ngɛ nyɛ si himi mi. Nyɛ ná nɔ mi mami kaa wa susuɔ nyɛ he daa, wa sɔleɔ kɛ haa nyɛ daa, nɛ wa suɔ nyɛ saminya. Yehowa nɛ jɔɔ nyɛ babauu.
Nyɛ nyɛmimɛ,
Yehowa Odasefoli A Nɔyemi Kuu