Anɛ Jamihi Tsuo Tsɔɔ Anɔkuale ɔ Lo?

1. Mɛni ji jamihi komɛ nɛ́ nihi ngɔɔ a he kɛ woɔ mi ngɛ Afrika?

NIMLI babauu nɛ ngɛ Afrika kplɛɛɔ nɔ kaa e he hia kaa a ja Mawu. Se a kpã we gbi ngɛ blɔ nɛ sa kaa a gu nɔ kɛ ja lɛ ɔ he. Nihi ya jaa ngɛ klamɔhi a jami he, nɛ nihi yaa wɔ piɛ mi. Ni komɛ hu yaa sɔlemi. Se, e dɛ kaa o ma susu kaa jamihi etɛ pɛ lɛ ngɛ Afrika. Klamɔ jali hɛɛ mlaahi, kɛ hemi kɛ yemi slɔɔtohi. Kusumi jami hu ngɛ munomuno ngɛ hehi slɔɔtohi. Mi gbami ɔ kle ngɛ sɔlemihi babauu nɛ tsɛɛ a he Kristofoli ɔ a mi po pe kulaa. Ngɛ sɔlemihi pɔtɛɛ nɛ a le ɔmɛ a se ɔ, sɔlemi kpahi nɛ tsɔ a he akpehi abɔ ngɛ Afrika he tsuaa he.

E Sa Kaa Wa Jami ɔ nɛ́ Da Anɔkuale Nɔ

2. (a) Behi fuu ɔ, mɛni haa nɔ ko sɛɛ jami ko mi? (b) Mɛni tsɔɔ we kaa wa jami sa Mawu hɛ mi?

² Mɛni ha nɛ nihi jaa ngɛ blɔ ko nɔ? Nihi fuu kplɛɛɔ a fɔli a jami nɔ. Ní komɛ nɛ ba blema lokoo ɔ hu ná jamihi nɛ nihi ngɛ mi mwɔnɛ ɔ nɔ he wami. Womi ko nɛ ji The Africans—A Triple Heritage ɔ de ke: “Ta hwumi nɔ nɛ Klamɔ Jami gu kɛ gbɛ fia ngɛ Sahara yiti je, . . . Blɔ nɛ ɔ nɔ nɔuu nɛ Kristo Jami hu gu kɛ gbɛ fia ngɛ Sahara woyi je. Bɔnɛ a ngɔ klaate kɛ wo nihi a he gbeye kɛ gbɛ Klamɔ Jami fia ngɛ Sahara yiti blɔ ɔ, jã nɔuu nɛ a ngɔ tu kɛ wo nihi a he gbeye kɛ gbɛ Kristo Jami ɔ fia ngɛ Sahara woyi blɔ.” Kɛ̃ ɔ, wa ti nihi fuu heɔ yeɔ kaa wa jami ɔ sa Mawu hɛ mi. Se, ke wa fɔli ngɛ jami ko mi, aloo ma se nɔyemi ko ngɔ jami ko kɛ fĩ wa blema nimeli a nɔ ɔ, lɔɔ tsɔɔ we kaa jamɛ a jami ɔ da.

3-5. Mɛni nɔhyɛ nɔ́ yeɔ buaa wɔ konɛ waa na kaa pi jamihi tsuo nɛ́ tsɔɔ anɔkuale ɔ?

³ Jamihi tsuo deɔ kaa a kɛ blɔ tsɔɔmihi nɛ nihi ma nyɛ maa ngɔ a he kɛ fɔ nɔ́ haa ngɛ Mawu sɔmɔmi he mohu, se a susumi ɔmɛ ngɛ ekpaekpa. A tsɔɔ níhi slɔɔtohi fuu kɛ kɔɔ nɔ nɛ Mawu ji, kɛ nɔ́ nɛ e suɔ kaa waa pee ɔ he. Mo susu enɛ ɔ he nɛ o hyɛ: Ngɔɔ lɛ kaa o ya ná nítsumi ngɛ nítsumi he ngua ko. Kekleekle ligbi nɛ o ya nítsumi ɔ, a de mo ke nítsumi nɔkɔtɔma a ho he jɔɔmi ya bɔɔ. Lɔɔ heje, o bi ní tsuli etɛ komɛ konɛ a tsɔɔ mo nɔ́ nɛ o ma tsu. Kekle ní tsulɔ ɔ de mo ke, nɔkɔtɔma a suɔ kaa o bɛɛ. Nɔ enyɔne ɔ de mo ke, o ngɔ tsopa kɛ diki tsu ɔ he. Nɛ nɔ etɛne ɔ hu de ke, o gba sɛ womihi.

⁴ Lɔɔ se ɔ, o bi mɛ munyu ngɛ́ nítsumi nɔkɔtɔma a he. Kekle nɔ ɔ de mo ke, nɔkɔtɔma a ji niheyo gagaa, nɛ e jɔɛ. Nɔ enyɔne ɔ hu de mo ke, e ji nyumu nɔkɔtɔma kpiti ko, nɛ e mi mi hi. Nɔ etɛne ɔ lɛɛ nɔ́ nɛ e de ji kaa, nɔkɔtɔma a pi nyumu kulaa, se mohu yo ji lɛ. E mi tsɔ heii kaa, o maa mwɔ sane ɔ nya kaa ní tsuli etɛ ɔmɛ tsuo de we mo anɔkuale ɔ. Ke o sume nɛ o nítsumi ɔ nɛ je o dɛ ɔ, lɛɛ eko ɔ, o ma hla níhi a mi saminya bɔnɛ pee nɛ o le nɔ tutuutu nɛ nɔkɔtɔma a ji, kɛ nɔ́ nɛ e suɔ kaa o pee.

⁵ Ja nɔuu nɛ jami hu ji. Akɛnɛ nɔ nɛ Mawu ji kɛ nɔ́ nɛ e ngɛ hlae ngɛ wa dɛ he susumihi hiɛ fuu heje ɔ, e he hia kaa waa hyɛ konɛ bɔnɛ wa jaa ha kɛ anɔkuale ɔ nɛ kpa gbi. Se mɛni blɔ nɔ wa maa gu kɛ kase Mawu he anɔkuale ɔ?