Mɛni Blɔ Nɔ O Maa Gu kɛ Kase Mawu He Anɔkuale Ɔ?

1, 2. Mɛni nɔhyɛ nɔ́ tsɔɔ kaa e he hia nɛ́ a ná tɛ ko nɛ a po fɔ si kɛ ha jami mi sanehi a nya hlami?

MƐNI blɔ nɔ wa maa gu kɛ le Mawu? Anɛ e he hia kaa waa kpa jami mi tsɔɔmihi babauu ɔ tsuo mi lo? E be hie peemi jã. Nɛ keji kaa wa ma nyɛ maa pee jã po ɔ, kɛ wa ma plɛ kɛ le tsɔɔmi ɔ nɔ́ nɛ ji dadɛ ɔ kɛɛ?

² Akɛnɛ susumihi nɛ nihi hɛɛ ngɛ Mawu he hiɛ fuu heje ɔ, e he hia wawɛɛ kaa waa le nɔ́ nɛ ji anɔkuale ɔ, nɛ́ ji tɛ ko nɛ a po fɔ si nɛ nihi ma nyɛ maa kplɛɛ nɔ. Kaa nɔhyɛ nɔ́ ɔ: Ngɔɔ lɛ kaa atsinyɛ jemi ba bo ko kami he ngɛ jua mi. Bo jualɔ ɔ de ke bo ɔ kami ji kuku kake kɛ fa, se nɔ́ helɔ ɔ hu ke e sui jã. Mɛni blɔ nɔ a maa gu kɛ na sane ɔ nya? Ja a ngɔ nɔ́ susumi kpa kɛ susu bo ɔ.

3. Mɛni heje a ngma Baiblo ɔ?

³ Anɛ a po tɛ ko fɔ si, konɛ a da nɔ kɛ hla jami sanehi a nya lo? Ee, lɛ ji Baiblo ɔ. Mawu ha nɛ a ngma Baiblo ɔ bɔnɛ pee nɛ nihi nɛ ngɛ he tsuaa he a nyɛ nɛ a kase anɔkuale nɛ kɔɔ e he ɔ. A pee Baiblo ayɔ akpehi abɔ. A tsɔɔ Baiblo mluku ɔ, aloo e fa sisi kɛ ya gbihi nɛ hiɛ pe 2,100 mi. Enɛ ɔ haa nihi babauu he blɔ konɛ a nyɛ nɛ a kane Mawu he anɔkuale ɔ ngɛ mɛ nitsɛmɛ a je gbihi a mi.

4. Mɛni munyuhi lɛ ngɛ Baiblo ɔ mi?

⁴ Baiblo ɔ ji nike ní ko nɛ he jua wa nɛ je Mawu ngɔ. E tsɔɔ wɔ sanehi komɛ nɛ jinɛ wa ko li ɔ a mi. E deɔ wɔ nihi nɛ ngɛ mumihi a je ɔ he sane. E jeɔ Mawu susumihi, e su, kɛ e yi mi tomi kpo kɛ haa wɔ. E tsɔɔ bɔnɛ e kɛ nihi hi si ha jeha akpehi abɔ nɛ be. E tuɔ níhi nɛ maa ba hwɔɔ se hu he munyu. Nɛ e tsɔɔ wɔ bɔnɛ wa maa pee ha kɛ na blɔ ɔ nɛ yaa neneene wami mi ɔ.

Nɔ́ Heje nɛ O Ma Nyɛ Ma He Baiblo ɔ Ye

5. Mɛni nɔhyɛ nɔ́ tsɔɔ kaa Baiblo ɔ kɛ adebɔ he ní kasemi ngɛ gbi kpami?

⁵ Wa ma nyɛ ma he Baiblo ɔ ye kaa e ji Mawu Munyu ngɛ yi mi tomihi fuu a heje. Nɔ́ kake heje ji kaa, Baiblo ɔ kɛ adebɔ he ní kasemi kpaa gbi. Blema lokoo ɔ, nihi susu kaa zugba a maa si ngɛ nɔ́ ko nɔ. Nɔhyɛ nɔ́ ji kaa, ngɛ Afrika Bonyoku blɔ ɔ, nihi he ye kaa zugba a maa si ngɛ sinɔ ko nɛ́ bɔ kla nɔ. A tsɔɔ kaa e koklo e he si 3,500 ngɛ zugba a sisi kɛ 3,500 ngɛ hiɔwe je hulɔ. Se, Baiblo ngmalɔ ko ngma kɛ fɔ si pe jeha 3,500 kaa, Mawu ‘ngɔ zugba a ngɔ kpla si nɛ nɔ́ ko hɛɛ we lɛ,’ nɛ enɛ ɔ kɛ adebɔ he ní kasemi kpaa gbi.—Hiob 26:7.

6. Mɛni ji odase yemi nɛ kle pe kulaa nɛ tsɔɔ kaa Baiblo ɔ je Mawu ngɔ?

⁶ Odase yemi nɛ kle pe kulaa nɛ tsɔɔ kaa Baiblo ɔ je Mawu ngɔ ji kaa, e mi ningmahi nɛ kɔɔ gbami he ɔ da kɛ pi si. Mawu le nɔ́ nɛ maa ba hwɔɔ se, e be kaa adesahi nɛ a gbamihi bɛ́ mi; nɔ́ tsuaa nɔ nɛ e deɔ baa mi.

7. Mɛni ji Baiblo mi gbamihi komɛ nɛ ba mi blema a?

⁷ Baiblo mi gbamihi babauu ba mi ngɛ blema be ɔ mi. Nɔhyɛ nɔ́ kake ji kaa, Baiblo ɔ gba pɛpɛɛpɛ jeha 700 kɛ sɛ hlami, kaa a ma fɔ Yesu ngɛ Betlehem, nɛ e ba mi. (Mika 5:2; Mateo 2: 3-9) Baiblo ɔ gba kɛ piɛɛ gbami kpahi fuu ɔmɛ a he hu kaa yomiyo nɛ ma fɔ Yesu, nɛ nyagbe mi ɔ, a maa ngɔ sika hiɔ 30 kɛ tsɔɔ e se blɔ. Gbami nɛ ɔmɛ hu ba mi. E fɔɔ si heii kaa adesa ko be nyɛe maa gba enɛ ɔmɛ!—Yesaya 7:14; Zakaria 11:12, 13; Mateo 1:22, 23; 27:3-5.

8. Mɛni ji Baiblo mi gbamihi komɛ nɛ ngɛ mi bae mwɔnɛ ɔ, nɛ mɛni a tsɔɔ?

⁸ Baiblo mi gbamihi fuu ngɛ mi bae ngɛ wa be nɛ ɔ mi. Hyɛ a kpɛti bɔɔ komɛ:

• “Ma maa te si ngɔ wo ma [kɛ ta hwumi], nɛ matsɛ yemi maa te si ngɔ wo matsɛ yemi. Zugba ma mimiɛ; hwɔ, kɛ gbenɔ hiɔ maa ba ngɛ he tsuaa he.”—Luka 21:10, 11.

• “Mlaa kuami maa hiɛ.”—Mateo 24:12, Somi He Ɔ.

• “Nyagbe ligbi ɔmɛ a mi ɔ, . . . nimli ma plɛ a he hesuɔli, sika suɔli, . . . fɔli a nɔ tue gboli, . . . nihi nɛ nyɛ we a akɔnɔ nɔ nɛ a ye, nihi nɛ a hɛ jɔɛ, nihi nɛ sume nɔ́ kpakpa, . . . he nɔ woli, nihi nɛ suɔ fiɛmi nɛ ngɔɔ pe Mawu.”—2 Timoteo 3:1-5, Somi He Ɔ.

Anɛ o kplɛɛ we nɔ kaa ní nɛ ɔmɛ tsuo ngɛ nɔ yae mwɔnɛ ɔ lo? Bɔnɛ Baiblo gbamihi da saminya, nɛ a baa mi pɛpɛɛpɛ ɔ hu tsɔɔ kaa pi womi gu ko kɛkɛ ji Baiblo ɔ. Mohu ɔ, e ji Mawu Munyu nɛ a je mumi mi kɛ ngma!—2 Timoteo 3:16.

Anɛ A Tsake Baiblo ɔ Lo?

9, 10. Mɛni tsɔɔ kaa Mawu ngmɛ́ blɔ nɛ́ adesahi a tsake Baiblo ɔ?

⁹ Ngɔɔ lɛ kaa mo ji nítsumitsɛ ko nɛ o ngɔ mlaahi kɛ mata si ha o ní tsuli ɔmɛ. Ke henyɛlɔ ko ba tsake níhi nɛ́ o ngma a, mɛni o maa pee? Anɛ o be nɔ́ nɛ a tsake ɔ dlae lo? Jã kɛ̃, Yehowa kplɛɛ we nɛ nihi nɛ tsake e we anɔkuale munyu, nɛ́ ji Baiblo ɔ.

¹⁰ Nihi nɛ ka kaa a ma tsake Mawu Munyu ɔ mi tsɔɔmi ɔmɛ yi manye. Ke wa ngɔ Baiblo nɛ ngɛ mwɔnɛ ɔ kɛ to blema nɔ́ ɔ he ɔ, a sɔ pɛpɛɛpɛ. Enɛ ɔ tsɔɔ kaa a tsakee we Baiblo ɔ ngɛ jehahi abɔ nɛ be ɔ tsuo mi.