Anɛ O Ma Nyɛ Maa Ya Fiɛɛmi Daa Hɔgba Lo?
1. Mɛni wa ma nyɛ maa kase ngɛ bɔnɛ Paulo kɛ e huɛmɛ ɔmɛ pee a ní ha ngɛ Filipi ma a mi ɔ he?
1 Ligbi nɛ ɔ ji Hejɔɔmi Ligbi, nɛ Yudabi fuu nɛ a ngɛ Filipi ɔ ngɛ a he jɔɔe. Paulo kɛ e huɛmɛ ɔmɛ ngɛ a ma se sane kpakpa fiɛɛmi nítsumi ɔ nɔ kɛ ya su Filipi ma a mi. Mɛ hu a ngɛ he blɔ nɛ a jɔɔ a he jamɛ a ligbi ɔ, enɛ ɔ he ɔ, ke a jɔɔ a he ɔ, nɔ ko be munyu tue kɛ si mɛ. Se a le kaa Yudabi ɔmɛ ya bua a he nya ngɛ ma a se konɛ a sɔle, lɔɔ he ɔ, a ya a ngɔ nɛ a ya fiɛɛ kɛ tsɔɔ mɛ. Paulo kɛ e huɛmɛ ɔmɛ a bua jɔ wawɛɛ nitsɛ benɛ Lidia bu mɛ tue nɛ e ha nɛ a baptisi e kɛ e we ɔ tsuo ɔ! (Níts. 16:13-15) Akɛnɛ mwɔnɛ ɔ, nihi fuu jɔɔ a he Hɔgba heje ɔ, mɛni heje nɛ o kɛ be ko ngɛ ligbi nɛ ɔ mi fiɛɛ we kɛ ha mɛ?
2. Mɛni haomihi lɛ Yehowa webi nyɛ nɛ a da nya bɔnɛ pee nɛ a nyɛ nɛ a fiɛɛ ngɛ Hɔgba ligbi ɔ nɔ nɛ nɔ ko nɛ ko hao mɛ?
2 Haomi Nɛ Yehowa Webi Kɛ Kpe Ngɛ Hɔgba Fiɛɛmi Yami He: A wo Yehowa webi he wami ngɛ jeha 1927 kaa a kɛ be bɔɔ nɛ ya fiɛɛmi daa Hɔgba. E kɛ we nɛ enɛ ɔ ha nɛ nihi te si kɛ wo mɛ. A wo nihi fuu tsu ngɛ United States kaa a yi Hɔgba Hejɔɔmi Ligbi yemi mlaahi a nɔ, nɛ a ha we nɛ tue mi jɔmi hu nɛ hi ma a mi, nɛ a ngɛ ní juae be mi nɛ a ngmɛ́ mɛ blɔ kaa a jua ní. Se enɛ ɔ ha we nɛ Yehowa webi nɛ a kpa fiɛɛmi. Ngɛ jeha 1930 ɔmɛ a mi ɔ, Yehowa webi to blɔ nya ko nɛ́ a tsɛɛ ke “divisional campaigns”; blɔ nya tomi nɛ ɔ biɔ nɛ asafohi nɛ a ngɛ he kake ɔ nɛ a bla kɛ fiɛɛ ngɛ zugba kpɔ ko mi. Be komɛ ngɛ nɛ ke ma nikɔtɔmahi ngɛ hlae kaa a nu fiɛɛli ɔmɛ ɔ, akɛnɛ a he hiɛ babauu heje ɔ, ma nikɔtɔma amɛ nyɛ we nɛ a nu mɛ. Anɛ o bua jɔ níhi nɛ nyɛmimɛ nɛ ɔmɛ nɛ a hi United States ɔ kɛ sã afɔle konɛ a nyɛ nɛ a fiɛɛ ngɛ Hɔgba ligbi ɔ nɔ nɛ nɔ ko nɛ ko hao mɛ ɔ he nitsɛnitsɛ lo?
3. Mɛni heje nɛ Hɔgba ligbi ɔ ji ligbi nɛ hi kɛ ha fiɛɛmi yami ɔ?
3 Ligbi Nɛ Hi Saminya Kɛ Ha Fiɛɛmi Yami: Nihi fuu hii we mi nɛ a yɛ nítsumi Hɔgba. A pɔɔ a he jɔɔmi ngɛ jamɛ a ligbi ɔ nɔ. Eko ɔ, a kpɛti ni komɛ nɛ a yaa sɔlemi ɔ maa suɔ nɛ a sɛɛ Mawu he ní ngɛ jamɛ a ligbi nɔ. Ke wa yaa asafo mi kpe ngɛ Hɔgba ligbi ɔ nɔ ɔ, lɛɛ waa kɛ bɔnɛ wa dlaa wa he kɛ yaa kpe ɔ ha a ma nyɛ maa ya fiɛɛmi, enɛ ɔ heje ɔ, mɛni heje nɛ o tui blɔ nya konɛ o ya fiɛɛmi loko a je asafo mi kpe ɔ sisi aloo ke a kpa? Ke e maa hi ɔ, mo hla niye ní bɔɔ kɛ to o dɛ.
4. Ke wa yaa fiɛɛmi bɔɔ ngɛ Hɔgba ligbi ɔ nɔ ɔ, mɛni bua jɔmi lɛ wa ma nyɛ ma ná?
4 Ke wa yaa fiɛɛmi bɔɔ ngɛ Hɔgba ligbi ɔ nɔ po ɔ, loloolo ɔ, wa ma nyɛ ma ná be nɛ wa kɛ jɔɔ wa he kaa bɔnɛ wa ngɛ hlae ɔ. Akɛnɛ wa ngɔ wa he kɛ wo sɔmɔmi klɔuu mi heje ɔ, ke wa ngɛ wa he jɔɔe ɔ, wa tsui maa nɔ wa mi. (Abɛ 19:23) Eko ɔ, wa maa na nɔ ko nɛ e ngɛ kaa Lidia nɛ lɔɔ ma ha nɛ wa ma ná bua jɔmi!