FÃ 8

Mo Kua Lakpa Jami; Ngɔɔ O He kɛ Wo Anɔkuale Jami Mi

1. Mɛni ji ní hlami nɛ́ fɔɔ si ngɛ nihi a hɛ mi ngɛ jami he mwɔnɛ ɔ?

YESU de ke: “Nɔ nɛ be ye blɔ fa mi ɔ, e te si ngɔ wo mi.” (Mateo 12:30) Ke wa be Yehowa blɔ fa mi ɔ lɛɛ wa ngɛ Satan blɔ fa mi. Nihi babauu susuɔ kaa a ngɛ Mawu sɔmɔe ngɛ e suɔmi nya, se Baiblo ɔ tsɔɔ kaa Satan ngɛ ‘je mluku ɔ tsuo sisie.’ (Kpojemi 12:9) Nimli ayɔhi abɔ heɔ yeɔ kaa a ngɛ Mawu jae, se ngɛ anɔkuale mi ɔ, Abosiami lɛ a ngɛ jae! Ní hlami ko ba fɔɔ si ngɛ nimli ayɔhi abɔ a hɛ mi: E sa kaa a ja Yehowa, “Mawu anɔkualetsɛ” ɔ loo Satan, “lakpatsɛ kpanaku” ɔ.—La 31:5; Yohane 8:44.

Tsɔ O He kɛ Je Lakpa Jami He

2. Mɛni ji blɔ kake nɔ nɛ Satan bɔɔ mɔde kaa e maa gu konɛ e kɛ tsi nihi a nya ngɛ Yehowa jami he?

² Yi mi kpɔ nɛ nɔ ko mwɔɔ kaa e ma sɔmɔ Yehowa a ji ní hlami nɛ níle ngɛ mi, ní hlami nɛ haa nɔ náa Mawu nɔ kplɛɛmi. Se Satan ná we nɔ tsuaa nɔ nɛ sɔmɔɔ Mawu ɔ he bua jɔmi; e ngɔɔ haomihi kɛ baa nihi nɛ sɔmɔɔ Mawu ɔ nɔ. Blɔ kake nɔ nɛ e guu kɛ tsuɔ enɛ ɔ ji kaa, e haa nihi teɔ si kɛ woɔ mɛ nɛ a yeɔ a he fɛu hulɔ. Nɛ huɛmɛ kɛ wekuli po piɛɛ he. Yesu bɔ kɔkɔ ke: ‘Nɔ nitsɛ e we mi bi ma plɛ e henyɛli.’—Mateo 10:36.

3. Ke o wekuli aloo o huɛmɛ te si kɛ wo mo ngɛ o Mawu jami mi ɔ, mɛni o maa pee?

³ Ke enɛ ɔ ba o nɔ ɔ kɛ o maa pee o ní ha kɛɛ? Nihi fuu le kaa blɔ nɔ nɛ a gu kɛ ngɛ Mawu jae ɔ dɛ, se kɛ̃ ɔ, a he nɛ a maa tsɔ kɛ je a jami ɔmɛ a he hu pee dengme. A susumi ji kaa, jã peemi maa tsɔɔ kaa a yi a weku anɔkuale. Anɛ níle ngɛ enɛ ɔ mi lo? Ke o le kaa o wekuli kɛ tsopa yayahi ngɛ ní tsue ɔ, anɛ o be mɛ kɔkɔ bɔe kaa tsopa a maa ye mɛ awi lo? Tse o ya be a he piɛɛe, aloo o maa pee jã?

4. Mɛni Yoshua de Israelbi ɔmɛ ngɛ jami he ngɛ e be ɔ mi?

⁴ Yoshua wo Israelbi ɔmɛ he wami konɛ a ngmɛɛ a nɛmɛ a jami mi ní peepeehi kɛ kusumihi nɛ dɛ ɔmɛ a he. E de ke: “Lɔɔ he ɔ, nyɛɛ ye Yehowa gbeye nɛ nyɛ sɔmɔ lɛ kɛ pi si ngɛ anɔkuale yemi mi, nɛ nyɛ je mawu ɔmɛ nɛ nyɛ nɛmɛ ɔmɛ sɔmɔ ngɛ pa a se kɛ Mizraim ɔ ngɔ pue he, konɛ nyɛ sɔmɔ Yehowa.” (Yoshua 24:14, NW) Yoshua ye Yehowa anɔkuale, nɛ Yehowa jɔɔ lɛ. Ke wɔ hu wa ye Yehowa anɔkuale ɔ, e maa jɔɔ wɔ.—2 Samuel 22:26.

Jami mi Tsɔɔmihi—Anɔkuale ɔ kɛ Lakpa A

Triniti ɔ: Jamihi babauu tsɔɔ kaa Mawu ji Triniti. A deɔ ke, “Tsɛ ɔ Mawu ji lɛ, Bi ɔ [Yesu] Mawu ji lɛ, nɛ Mumi Klɔuklɔu ɔ hu Mawu ji lɛ, se kɛ̃ ɔ, pi Mawuhi etɛ nɛ́ ngɛ se Mawu kake lɛ ngɛ.”

Baiblo ɔ kɛ munyungu “Triniti” ɔ po tsu we ní, nɛ e tsɔɔ we hu kaa Yehowa ji nihi etɛ nɛ a bla kake. Yehowa pɛ ji Mawu. Kekle Korintobi 8:6 de ke: “Kɛ̃ ɔ, wɔɔ lɛɛ Mawu kake too nɛ ji Tsɛ ɔ, lɛ pɛ wa ngɛ.” Yehowa ji Ope ɔ nɛ. Yesu pi Mawu, mohu ɔ “Mawu Bi ji lɛ.” (1 Yohane 4:15) Ja nɔuu kɛ̃, mumi klɔuklɔu ɔ hu pi Mawu. Mumi klɔuklɔu ɔ pi nɔ po. E ji Mawu nítsumi he wami.—Bɔfo 1:8; Efesobi 5:18.
Klaa a: Jamihi babauu tsɔɔ kaa klaa a ji nɔ́ ko nɛ ngɛ nɔ mi nɛ e be nyɛe ma gbo kɔkɔɔkɔ. Baiblo ɔ tsɔɔ kaa klaa a ji nɔ ɔ nɛ, nɛ nɔ nyɛɔ gboɔ.—1 Mose 2:7; Ezekiel 18:4.
Hɛl La: Lakpa jamihi tsɔɔ kaa a piiɔ yayami peeli a klaahi ngɛ hɛl la mi kɛ yaa neneene. Baiblo ɔ de kaa gbogboe ɔmɛ “li nɔ́ ko nɔ́ ko.” (Fiɛlɔ 9:5) Baiblo ɔ tsɔɔ hu kaa “Mawu ɔ, suɔmi ji lɛ.” (1 Yohane 4:8) Yehowa, Mawu nɛ ngɛ suɔmi ɔ be nihi piie ngɛ la mi kɔkɔɔkɔ.

Daka: Mɛni Baiblo ɔ tsɔɔ ngɛ Triniti, klaa, kɛ hɛl la he?

Mo Je Níhi nɛ a kɛ Tsuɔ Lakpa Jami he Ní kɛ Je O He

5. Mɛni heje e sa kaa wa puɛ kunya yemi he níhi nɛ wa ngɛ ɔmɛ?

⁵ Wa he nɛ wa ma tsɔ kɛ je lakpa jami he tsɔɔ hu kaa wa ma puɛ kunya yemi he níhi nɛ wa ngɛ kaa sɛbɛhi, nguɛ gahi kɛ nine si gahi, kɛ ní kpahi nɛ ngɛ kaa jã amɛ. Enɛ ɔ he hia ejakaa e tsɔɔ kaa waa kɛ wa he fɔ Yehowa nɔ kulaa.

6. Kɛ kekle Kristofoli ɔmɛ pee a kunya yemi womi ɔmɛ kɛɛ?

⁶ Mo susu nɔ́ nɛ kekle Kristofoli komɛ pee benɛ a mwɔ a yi mi kpɔ kaa a maa nyɛɛ anɔkuale jami se ɔ he nɛ o hyɛ. Baiblo ɔ de ke: “Kunya tsuli ɔmɛ hu a ti nihi babauu ngɔ a womi ɔmɛ kɛ ba pue si ngɛ ni ɔmɛ tsuo a hɛ mi nɛ a sã.”—Bɔfo 19:19.

7. Mɛni wa ma nyɛ maa pee ke daimoniohi ngɛ wɔ haoe?

⁷ Daimoniohi ma nyɛ maa hao nihi nɛ ngɔ a he kɛ wo aze kpɛmi, nyuami, aloo kunya yemi ní peepeehi a mi hyɛ loko a ba bɔni Yehowa sɔmɔmi. Ke e ba jã ngɛ o blɔ fa mi ɔ, mo tsɛ Yehowa biɛ wawɛɛ ngɛ sɔlemi mi. E maa ye bua mo.—Abɛ 18:10; Yakobo 4:7.

8. Mɛni ji Kristofoli a juɛmi ngɛ amagahi, okadihi, kɛ fonihi nɛ a kɛ tsuɔ ní ngɛ lakpa jami mi ɔ he?

⁸ E sɛ nɛ nihi nɛ suɔ kaa a ma ja Yehowa nɛ́ ngɔ amaga, aloo okadi, aloo lakpa jami foni ko kɛ tsu ní, nɛ a ko ngɔ kɛ to a wehi a mi hulɔ. Anɔkuale Kristofoli ‘nyɛɛɔ ngɛ hemi kɛ yemi nya, se pi ngɛ ní nami nya.’ (2 Korintobi 5:7) A ngɛ bumi kɛ ha Mawu mlaa nɛ nyɛɔ amagahi nɛ a kɛ tsuɔ ní ngɛ jami mi ɔ.—2 Mose 20:4, 5.

O Kɛ Yehowa Webi nɛ Bɔ

9. Mɛni ga womi nɛ Baiblo ɔ kɛ ha ngɛ ní lelɔ peemi he?

⁹ Baiblo ɔ de ke: “Nɔ nɛ kɛ ní leli nyɛɛɔ ɔ, e leɔ ní. Se nɔ nɛ kɛ kuasiahi bɔɔ ɔ, haomi lɛ baa e nɔ.” (Abɛ 13:20) Ke wa suɔ nɛ waa pee ní leli ɔ, e sa kaa waa kɛ Yehowa Odasefoli nɛ bɔ. Mɛ ji nihi nɛ ngɛ nyɛɛe ngɛ blɔ nɛ yaa neneene wami mi ɔ nɔ ɔ nɛ.—Mateo 7:14.

10. Mɛni blɔ nɔ Yehowa Odasefoli ma nyɛ maa ye bua mo ngɛ konɛ o sɔmɔ Mawu?

¹⁰ Odasefoli ɔmɛ susuɔ nihi a he nitsɛ. A nítsumi ji kaa a ye bua nihi nɛ hɛɛ tsui kpakpa konɛ a ba nu Baiblo mi anɔkualehi nɛ kɛ nɔ yaa neneene wami mi ɔ sisi. A ma nyɛ maa ye bua mo kɛ gu Baiblo ɔ nɛ a kɛ mo maa kase nɛ a he we nɔ́ ko ɔ nɔ. A ma ha o sane bimi ɔmɛ a heto, nɛ a maa tsɔɔ mo bɔnɛ o maa ngɔ Baiblo mi níle kɛ tsu ní ha ngɛ o si himi mi.—Yohane 17:3.

11. Mɛni blɔ nɔ Kristofoli a kpehi maa ye bua mo ngɛ?

¹¹ Ke o ya Odasefoli ɔmɛ a kpehi nɛ a pɔɔ peemi ngɛ Matsɛ Yemi Asa nɔ ɔ, o maa kase Yehowa blɔ ɔmɛ a he ní babauu. Suɔmi nɛ o ngɛ kaa o maa ngɔ anɔkuale jami kɛ tsu ní ɔ mi maa wa. A ma tsɔse mo bɔnɛ pee nɛ mo hu o ye bua ni kpahi nɛ a ba le Baiblo mi anɔkualehi.—Hebribi 10:24, 25.

Asafo ko nɛ a k pe ngɛ Matsɛ Yemi Asa a nɔ

12. Mɛni blɔ nɔ sɔlemi ma nyɛ maa ye bua mo ngɛ konɛ o sɔmɔ Mawu?

¹² Benɛ o ngɛ Yehowa suɔmi nya ní kɛ e yi mi tomi ɔmɛ a he ní kasee babauu ɔ, e fɔɔ si faii kaa hɛsa nɛ o ngɛ ha e blɔhi nɛ suɔmi ngɛ mi ɔ hu mi maa kuɔ. E sa nɛ o ha suɔmi nɛ o ngɛ kaa o maa pee nɔ́ nɛ sa e hɛ mi ɔ mi nɛ wa, konɛ o kua níhi nɛ sɛ e hɛ mi. Mo kai hu kaa o ma nyɛ maa ya Yehowa ngɔ ngɛ sɔlemi mi nɛ o bi lɛ yemi kɛ buami, konɛ o nyɛ nɛ o pee nɔ́ nɛ da, nɛ o kua nɔ́ nɛ dɛ.—1 Korintobi 6:9, 10; Filipibi 4:6.

Weku ko nɛ a ngɛ Baiblo ɔ kanee — Mɛni blɔ nɔ o maa gu konɛ o ngɔ anɔkuale jami kɛ tsu ní?

13. Mɛni blɔ nɔ o maa gu konɛ o ha Yehowa bua nɛ jɔ?

¹³ Be komɛ a se ɔ, benɛ o ngɛ wae ngɛ Mawu jami mi ɔ, nɔ́ jemi ko be he kaa o ma yo kaa e he hia nɛ o ba plɛ Yehowa Odasefono nɛ jɔɔ e he nɔ, nɛ a mii lɛ nyu. Yehowa webi a he nɛ o maa ba piɛɛ ɔ, ma ha Yehowa bua maa jɔ. (Abɛ 27:11) O ma ba piɛɛ nimli nɛ ngɛ bua jɔmi nɛ Mawu de ngɛ a he ke: “I kɛ ye ma a maa hi si; ma pee a Mawu, nɛ mɛ hu a maa pee ye ma” a he.—2 Korintobi 6:16.

I Tsɔ Ye He kɛ Je Daimoniohi A He

Ligbi ko nyɔ mi nɛ i kɛ ye huno hwɔ mahe ngɛ sa mi ɔ, i nu nɛ gbi ko tsɛ ye biɛ si etɛ. Kɛkɛ nɛ i na nɛ tsu ɔ siaudo mi gba, nɛ nɔ́ ko kaa bɔɔlu nɛ́ ngɛ tsoe ba nɔ ye muklii nɔ. Niinɛ, ye huno ɔ lɛɛ e nɛ́ ní nɛ ɔmɛ ekoeko. Se kɛ̃ ɔ, i nu la dɔdɔɛ wawɛɛ he ngɛ ye he mi nyɔhiɔhi fuu.

Nyɔhiɔ ekpa se ɔ, gbi ɔ kpale tsɛ mi ekohu. Amlɔ nɔuu ɔ, we ɔ mi tsuo pee kaa nɔ́ nɛ hyi kɛ nyu. Aya (demi) ngua ko je kpo kɛ je nyu ɔ mi nɛ e ba bɔle ye nine he. I bɔ mɔde kaa ma huanya lɛ kɛ je ye nine ɔ he se i nyɛ we. Sawale nu mi. Jehanɛ, nyu ɔ kɛ sinɔ ɔ laa tlukaa, kɛkɛ nɛ i tsɔ kɛ fia zugba wawɛɛ. I sɛ diblii mi ngmlɛfiahi fuu. Kɛkɛ nɛ gbi ɔ de mi ke ma kpale kɛ ya mumi mi sɔlemi tsami he ko nɛ ngɛ kɔpe ɔ mi ɔ. Benɛ i bi mumi ɔ e biɛ ɔ, e ha mi biɛ ko nɛ sisi ji “niatsɛ se e be bi.” E wo mi si kaa e ma ha ma plɛ niatsɛ kɛ gu tsami he wami nɔ.

Hiɔtsɛmɛ jee kpo nya kɛ tsitsatsitsa kɛ baa ye ngɔ. Loko ni ɔmɛ maa su ye we ɔ mi ɔ, i naa mɛ ngɛ ye ahuhuɛ klɛdɛɛ ko mi. Ke nɔ ɔ ba su si ɔ, i gbaa e dɛ mi ma, kɛkɛ mumi ɔ je bɔnɛ hiɔ ɔ ji, aloo nyagba a kɛ e nya tsaba tsuo kpo kɛ tsɔɔ mi amlɔ. Mumi ɔ kɛ̃ lɛ tsɔɔ mi sika abɔ nɛ e sa kaa ni ɔmɛ a wo.

Akɛnɛ tsami ɔmɛ ngɛ nɔ yae saminya heje ɔ, i ná sika kɛ nike ní kpahi babauu. I ba plɛ “niatsɛ,” se i ba nu munyu nɛ ji “e be bi” ɔ hu sisi. Be tsuaa be nɛ ma fɔ bi kɛkɛ nɔ nɛ se nɛ i fɔ ɔ gbo. Enɛ ɔ hao mi wawɛɛ nitsɛ. Ye bimɛ ekpa gbo ngɛ jeha 12 nɛ́ i kɛ sɔmɔ mumi nɛ ɔ mi.

I ba bɔni sɔlemi ha Mawu konɛ e ye bua mi. I sɔle wawɛɛ nitsɛ. Ligbi ko ɔ, Yehowa Odasefoli ba si ye sinya a. E ngɛ mi kaa i pɔɔ mɛ fiemi mohu, se ligbi ɔ i pee ye juɛmi kaa ma bu mɛ tue. Ngɛ wa ní sɛɛmi nɛ nyɛɛ se ɔ mi ɔ, i ba ná le kaa daimonio i ngɛ sɔmɔe ɔ nɛ! I ba mwɔ ye yi mi kpɔ kaa ma kpa mumihi a tsɛmi ní peepee nɛ ɔ.

Benɛ i de mumi ɔ nɔ́ nɛ i to kaa maa pee ɔ, e bɔ mi kɔkɔ ngɛ juɛmi nɛ i pee ɔ he. Se kɛ̃ ɔ, i de lɛ ke: “I kɛ mo gbe nya.”

I sã níhi tsuo nɛ i kɛ peeɔ ní ɔ. Yehowa Odasefoli ɔmɛ kɛ mi kase Baiblo ɔ nɛ i ba plɛ Yehowa sɔmɔlɔ, nɛ a baptisi mi ngɛ 1973 mi. Amlɔ nɛ ɔ, i ngɛ bimɛ enuɔ nɛ ngɛ nɔmlɔtso mi he wami. Ye huno ɔ hu ba plɛ Odasefono nɛ́ a baptisi lɛ.—Kaa bɔnɛ Josephine Ikezu gba a.

Daka: Mɛni yo ko pee kɛ tsɔ e he kɛ je daimoniohi a he?