Yehowa Odasefohi enyɛmɛ o le? Eko ɔ, o kɛ a kpɛti ni komɛ ngɛ kpɔ mi, loo o kɛ mɛ tsuɔ ní, loo o kɛ mɛ ngɛ sukuu tsu kake mi. Aloo eko ɔ, waa kɛ mo susu Baiblo ɔ mi munyuhi a he hyɛ. Mɛnɔmɛ tutuutu ji wɔ, nɛ mɛni he je nɛ wa fiɛɛɔ níhi nɛ wa heɔ yeɔ ɔ kɛ haa nihi?

Slɔɔto ko be waa kɛ adesa kpahi wa kpɛti. Wa je he slɔɔtohi kɛ si himi slɔɔtohi a mi. Be ko nɛ be ɔ wa kpɛti ni komɛ ngɛ jami ekpaekpahi a mi, nɛ wa kpɛti ni komɛ hu he we yi kaa Mawu ngɛ. Se loko wa ba plɛ Odasefohi ɔ, wɔ tsuo wa ngɔ be kɛ kase Baiblo ɔ mi tsɔɔmi ɔmɛ saminya. (Bɔfo Ɔmɛ A Ní Tsumi 17:11) Wa kplɛɛ nɔ́ nɛ wa kase ɔ nɔ, nɛ lɔ ɔ se ɔ, wɔ nitsɛmɛ wa hla kaa wa ma ja Yehowa Mawu.

Wa náa Baiblo ɔ nɛ wa kaseɔ ɔ he se. Kaa bɔ nɛ adesahi tsuo yi mluku nɛ a kɛ haomihi kpeɔ ɔ, jã nɔuu nɛ wɔ hu wa yi mluku nɛ waa kɛ haomihi kpeɔ. Se Baiblo sisi tomi mlaahi nɛ wa bɔɔ mɔde kaa waa kɛ ma tsu ní ngɛ wa si himi mi daa ligbi ɔ ha nɛ wa si himi pee kpakpa bɔ nɛ sa. (La 128:1, 2) Enɛ ɔ ji yi mi tomi kake he je nɛ wa tuɔ ní kpakpahi nɛ wa kaseɔ ngɛ Baiblo ɔ mi ɔ a he munyu kɛ tsɔɔ nihi ɔ nɛ.

Waa kɛ Baiblo sisi tomi mlaahi tsuɔ ní. Kaa bɔ nɛ Baiblo ɔ tsɔɔ ɔ, sisi tomi mlaa nɛ ɔmɛ kɛ su komɛ kaa anɔkuale yemi kɛ mi mi jɔmi haa nɛ wa si himi peeɔ kpakpa nɛ wa jeɔ bumi kpo kɛ haa nihi. Sisi tomi mlaa nɛ ɔmɛ haa nɛ wa peeɔ wa he mabi kpakpahi, nɛ kake peemi hii wa wekuhi a mi, nɛ wa baa wa je mi saminya hulɔ. Akɛnɛ wa ngɛ nɔ mi mami kaa “Mawu hyɛ we nɔ hɛ mi” he je ɔ, waa kɛ wa nyɛmimɛ nɛ ngɛ je kɛ wɛ ɔ peeɔ kake kɛ jaa Mawu, nɛ wa ha we nɛ ma nɛ nɔ ko je mi, kɛ ma kudɔmi ní peepee ko nɛ gba wa mi. E ngɛ mi kaa wɔ hu adesahi ji wɔ mohu lɛɛ, se wa ngɛ slɔɔto.​—Bɔfo Ɔmɛ A Ní Tsumi 4:13; 10:34, 35.

• Mɛni blɔ nɔ Yehowa Odasefohi ngɛ kaa adesahi tsuo ngɛ?

• Mɛni sisi tomi mlaahi nɛ Odasefohi kase ngɛ Baiblo ɔ mi?

Nihi babauu susu kaa biɛ Yehowa Odasefohi ɔ ji jami ehe ko biɛ. Se jeha 2,700 nɛ be ɔ, a tsɛɔ nihi nɛ a sɔmɔɔ anɔkuale Mawu kake ɔ ke Mawu we ‘odasefohi.’ (Yesaya 43:10-12) Biɛ nɛ a kɛ tsɛ wɔ hluu kɛ ba si 1931 ɔ ji Baiblo Kaseli. Mɛni he je nɛ wa tsake wa biɛ kɛ pee Yehowa Odasefohi ɔ?

Biɛ nɛ ɔ haa nihi leɔ Mawu nɛ wa jaa. Kaa bɔ nɛ blema Baiblo nɛ a kɛ nine ngma a tsɔɔ ɔ, Mawu biɛ nɛ ji Yehowa a jeɔ kpo ngɛ Baiblo ɔ mi si akpehi abɔ. Ngɛ Baiblo sisi tsɔɔmihi fuu a mi ɔ, a je biɛ nɛ ɔ nɛ a kɛ sablaihi kaa Nyɔmtsɛ aloo Mawu to nane mi. Se kɛ̃ ɔ, anɔkuale Mawu ɔ je e biɛ nitsɛ nɛ ji Yehowa a kpo kɛ tsɔɔ Mose nɛ e de lɛ ke: “Biɛ nɛ ɔ ji ye biɛ kɛ yaa neneene.” (2 Mose 3:15) E gu blɔ nɛ ɔ nɔ kɛ tsɔɔ kaa e slo lɛ ngɛ lakpa mawuhi tsuo a he. Wa bua jɔ kaa a kɛ Mawu biɛ klɔuklɔu nɛ ɔ tsɛɔ wɔ.

Biɛ nɛ ɔ tsɔɔ nítsumi nɛ wa tsuɔ. Kɛ je Habel nɔ ɔ, dali babauu nɛ a hi si blema a ye hemi kɛ yemi nɛ a ngɛ ngɛ Yehowa mi ɔ he odase kɛ tsɔɔ nihi. Noa, Abraham, Sara, Mose, David, kɛ ni kpahi nɛ a hi si jeha lafahi abɔ nɛ be ɔ, piɛɛ ‘odasefohi babauu kaa bɔku’ ɔ a he. (Hebri Bi 11:4–12:1) Kaa bɔ nɛ nɔ ko ma nyɛ maa ye odase kɛ ha nɔ ko nɛ́ e yi fɔ ngɛ kojomi he ɔ, jã nɔuu nɛ wɔ hu wa ma wa juɛmi nya si kaa wa ma ha nɛ nihi nɛ a le anɔkuale munyu nɛ kɔɔ Mawu he ɔ.

Wa ngɛ Yesu kasee. Baiblo ɔ tsɛɔ Yesu ke, ‘odasefo no anɔkualetsɛ.’ (Kpojemi 3:14) Yesu nitsɛ de ke e ‘ha nɛ nihi le Mawu biɛ ɔ,’ nɛ e ya nɔ nɛ e ye “anɔkuale” nɛ kɔɔ Mawu he ɔ he odase. (Yohane 17:26; 18:37) Enɛ ɔ he ɔ, e sa nɛ a kɛ Yehowa biɛ ɔ nɛ tsɛ Kristo se nyɛɛli anɔkualetsɛmɛ ɔmɛ, konɛ mɛ hu a tsɔɔ ni kpahi biɛ nɛ ɔ. Enɛ ɔ ji nɔ́ nɛ Yehowa Odasefohi bɔɔ mɔde kaa a maa pee.

• Mɛni he je nɛ Baiblo Kaseli ɔmɛ tsake a biɛ kɛ pee Yehowa Odasefohi ɔ?

• Mɛni be ji nɛ ɔ nɛ Yehowa ná e we odasefohi ngɛ zugba a nɔ?

• Mɛnɔ ji Yehowa we Odasefo no nɛ pe kulaa?