“Anɛ o le nɔ ko nɛ tsuɔ ní saminya lo? Jamɛ a nɔ ɔ, matsɛmɛ nɛ e ma sɔmɔ; pi ni guhi.”

Abɛ 22:29

“Nɔ nɛ juɔ ɔ, e ko ju hu. Se mohu e ngɔ e nguɛ nyɔngma kɛ tsu ní wawɛɛ konɛ e ná nɔ́ ko nɛ e kɛ ye bua nihi nɛ e fi mɛ.”

Efeso Bi 4:28

“E sa kaa nɔ tsuaa nɔ nɛ ye ní, nɛ e nu ní; nɛ e na bua jɔmi kɛ je níhi nɛ e gbo a he dengme ɔ mi. Mawu nike ní ji lɔ ɔ nɛ.”

Fiɛlɔ 3:13

“Nɔ nɛ suɔ fiɛmi maa ye ohia; nɔ nɛ dã, kɛ he dlami e suɔ ɔ, e be ní nae.”

Abɛ 21:17

“Ke o pa sika ngɛ nɔ ko dɛ kɛkɛ o plɛ pee e nyɔguɛ.”

Abɛ 22:7

“Ke nɔ ko ngɛ hlae nɛ e ma mɔ ɔ, kekleekle ɔ, e hii si nɛ e buu nya, nɛ e hyɛɛ kaa e ngɛ sika nɛ maa su nya gbemi lo. Ke e ya pee we ja, nɛ e je mɔ ɔ mami sisi, nɛ e ya nyɛ we nɛ e gbe nya a, nihi tsuo nɛ na nɔ́ nɛ ba a maa ye e he fɛu. A ma de ke, ‘Nyumu nɛ ɔ je mɔ mami sisi, se e nyɛ we nɛ e gbe nya.’”

Luka 14:28-30

“Benɛ mɛ tsuo a ye nɛ a tɔ ɔ, Yesu de kaseli ɔmɛ ke, ‘Nyɛ bua bibliwi nɛ piɛ ɔ nya nɛ eko kó dã.’”

Yohane 6:12

“E hi mohu kaa o maa ye ba flɔɔ ngɛ he nɛ suɔmi ngɛ, pe nɛ o maa ye na nɛ tu zɔ ngɛ he nɛ ninyɛ ngɛ.”

Abɛ 15:17

‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔ nɛ nyɛɛ ba nyɛ je mi ha, konɛ e hi ha nyɛ nitsɛmɛ.’

Yesaya 48:17

“Pi abolo kɛkɛ nɛ haa nɔmlɔ yi naa wami, se mohu munyu tsuaa munyu nɛ jee Mawu nya a.”

Mateo 4:4

“Suɔ o nyɛmi nɔmlɔ kaa bɔ nɛ o suɔ mo nitsɛ o he.”

Mateo 22:39

“Bɔ nɛ nyɛ suɔ nɛ nihi nɛ pee ngɔ ha nyɛ ɔ, nyɛ hu nyɛɛ pee ngɔ ha mɛ ja nɔuu.”

Luka 6:31

“A gbaa ni nɛmɛ nɛ nuɔ Mawu munyu ɔ, nɛ a yeɔ nɔ ɔ mohu!”

Luka 11:28

“Pi ní babauu nɛ adesa na a mi nɛ e wami ngɛ.”

Luka 12:15

“Lɔ ɔ he ɔ, ke wa ngɛ nya mi ngma, kɛ heha ní kɛkɛ ɔ, e hiɛ ha wɔ hluu.”

1 Timoteo 6:8

“Gbaami ngɛ nɔ́ hami mi pe nɔ́ hemi.”

Bɔfo Ɔmɛ A Ní Tsumi 20:35

‘Ngɔɔ o haomi ɔmɛ kɛ ha Yehowa, nɛ e maa bu o he. Nɔ nɛ peeɔ nɔ́ nɛ da a, Mawu be blɔ ngmɛe kɔkɔɔkɔ nɛ he nyɛlɔ nɛ ye e nɔ kunimi.’

La 55:22

“Nɔ nɛ bɔɔ mɔde kɛ toɔ níhi a blɔ nya saminya a, e naa ní babauu; se nɔ nɛ esɔ kɛkɛ e heɔ ɔ, e be nɔ́ kpakpa ko náe pe ohia.”

Abɛ 21:5

“Koo ye gbeye. I kɛ mo ngɛ! Ko ha nɛ nɔ́ ko nɛ wo o he gbeye. Imi ji o Mawu ɔ nɛ! Ma wo mo he wami; ma piɛ o he; Ma bu o he, nɛ ma baa o yi.”

Yesaya 41:10

“Nyɛ ti mɛnɔ kɛ yeyeeye peemi ma nyɛ tsɔ e kami nya nine kpɔ mi kami kake?”

Mateo 6:27

“Lɔ ɔ he ɔ, nyɛ ko hao nyɛ he ha hwɔɔ; ejakaa hwɔɔ hu ma kɛ lɛ nitsɛ e haomihi babauu. Haomihi nɛ baa daa ligbi ɔ, e hia we kaa waa ngɔ ekpa ko kɛ ba piɛ ligbi ko nɔ́ he hu.”

Mateo 6:34

“Nyɛɛ hyɛ nyɛ je mi bami nɛ hi! Nyɛ ko hi si kaa nihi nɛ li nɔ́ ko nɔ́ ko, se mohu kaa ní leli. Nɔ́ tsuaa nɔ́ nɛ hia kaa a pee ɔ, nyɛɛ pee.”

Efeso Bi 5:15, 16

“Nyɛ ko hao ngɛ nɔ́ ko nɔ́ ko he; se mohu nɔ́ tsuaa nɔ́ mi ɔ, nyɛɛ kɛ sɔlemi, kɛ pɛɛ kpami, kɛ sina nɛ wo nyɛ hiami ní ɔmɛ a ta ha Mawu. Nɛ Mawu he jɔmi nɛ pã adesa juɛmi tsuo ɔ maa bu nyɛ tsui, kɛ nyɛ juɛmi he ngɛ Kristo Yesu mi.”

Filipi Bi 4:6, 7

HUNOMƐ/TSƐMƐ

“Jã nɔuu kɛ̃, e sa kaa nyumu nɛ suɔ e yo kaa bɔ nɛ e suɔ lɛ nitsɛ e he. Ke nyumu ko suɔ e yo ɔ, ngɛ blɔ ko nɔ ɔ, e suɔ lɛ nitsɛ e he. Nɔ ko nyɛ́ lɛ nitsɛ e he lo, se mohu e lɛɛ e nɔmlɔ tso ɔ, nɛ e baa e yi saminya . . . E sa kaa nyɛ ti nɔ tsuaa nɔ nɛ suɔ e yo kaa bɔ nɛ e suɔ lɛ nitsɛ e he.”

Efeso Bi 5:28, 29, 33

‘Tsɛmɛ, nyɛ ko wo nyɛ bimɛ ɔmɛ a mi mi la; se mohu nyɛ tsɔse mɛ, nɛ nyɛɛ wo mɛ ga kpakpa nɛ maa sa Yehowa hɛ mi.’

Efeso Bi 6:4

YIGBAYIHI

“Yogbayo tsuaa yogbayo nɛ bu e huno.”

Efeso Bi 5:33

“Yigbayi, nyɛɛ ba nyɛ he si ha nyɛ hunomɛ, ejakaa nɔ́ nɛ sa nyɛ peemi kaa Nyɔmtsɛ ɔ se nyɛɛli ji nɛ ɔ nɛ.”

Kolose Bi 3:18

BIMƐ

“Bimɛ, nyɛɛ bu nyɛ fɔli tue kaa nihi nɛ ngɛ Nyɔmtsɛ ɔ sɔmɔe, ejakaa nɔ́ nɛ sa nyɛ peemi ji nɛ ɔ nɛ. Mawu mlaa nyɔngma amɛ ɔ, kekleekle nɔ́ nɛ siwo piɛɛ he ji, ‘Buu o tsɛ kɛ o nyɛ, konɛ e hi ha mo, nɛ o se nɛ kɛ ngɛ je mi.’”

Efeso Bi 6:1-3

“Bimɛ, nyɛɛ bu nyɛ fɔli ngɛ nɔ́ tsuaa nɔ́ mi, ejakaa enɛ ɔ saa Mawu hɛ mi saminya.”

Kolose Bi 3:20