Mɛni Blɔ Nɔ Wa Náa Baiblo Sisi Tomi Mlaahi A He Se Ngɛ?

1. Mɛni he je nɛ wa hia blɔ tsɔɔmi ɔ?

Wa Bɔlɔ ɔ le ní kulaa pe wɔ. Kaa Tsɛ nɛ e ngɛ suɔmi ɔ, e susuɔ wa he. Jehanɛ hu ɔ, e bɔ wɔ nɛ waa hi e sisi. (Yeremia 10:23) Enɛ ɔ he ɔ, kaa bɔ nɛ jokuɛyo hia e fɔli a blɔ tsɔɔmi ɔ, jã kɛ̃ nɛ wɔ tsuo wa hia Mawu blɔ tsɔɔmi. (Yesaya 48:17, 18) Baiblo mi sisi tomi mlaahi haa wɔ blɔ tsɔɔmi, nɛ e ji nike ní nɛ je Mawu ngɔ.​—Kane 2 Timoteo 3:16.

Yehowa mlaahi tsɔɔ wɔ si himi blɔ nɛ hi pe kulaa amlɔ nɛ ɔ, nɛ e tsɔɔ wɔ bɔ nɛ wa maa pee ha kɛ ná jɔɔmi kɛ ya neneene. Akɛnɛ Mawu nɛ bɔ wɔ he je ɔ, e sa kaa waa kplɛɛ e blɔ tsɔɔmi nɔ nɛ wa bua nɛ jɔ he.​—Kane La 19:7, 11; Kpojemi 4:11.

2. Mɛni ji Baiblo mi sisi tomi mlaahi?

Baiblo mi sisi tomi mlaahi ji anɔkuale pɔtɛɛhi nɛ a tsakee we. Se mlaa lɛɛ a woɔ kɛ kɔɔ ní pɔtɛɛ komɛ a he. (5 Mose 22:8) E sa nɛ wa susu níhi a he saminya konɛ waa nu bɔ nɛ sisi tomi mlaa ko kɔɔ si himi pɔtɛɛ ko he ha a sisi. (Abɛ 2:10-12) Kaa nɔ hyɛmi nɔ́ ɔ, Baiblo ɔ tsɔɔ kaa wami ji nike ní nɛ je Mawu ngɔ. Sisi tomi mlaa nɛ ɔ ma nyɛ ma kudɔ wɔ ngɛ wa ní tsumi he, wa we mi, kɛ benɛ wa ngɛ blɔ hiae. E be hae nɛ waa pee níhi nɛ maa ngɔ wɔ nitsɛmɛ loo ni kpahi a wami kɛ wo oslaa mi.​—Kane Bɔfo Ɔmɛ A Ní Tsumi 17:28.

3. Mɛni ji sisi tomi mlaahi enyɔ nɛ a he hia wawɛɛ?

Yesu tu sisi tomi mlaahi enyɔ nɛ a he hia wawɛɛ he munyu. Kekle nɔ́ ɔ tsɔɔ wɔ nɔ́ tutuutu he je nɛ a bɔ adesa; lɔ ɔ ji nɛ́ wa maa le Mawu, nɛ́ waa suɔ lɛ, konɛ wa sɔmɔ lɛ. E sa nɛ wa susu kekle sisi tomi mlaa nɛ ɔ he ngɛ yi mi kpɔhi tsuo nɛ wa mwɔɔ ɔ mi. (Abɛ 3:6) Nihi nɛ a kɛ sisi tomi mlaa nɛ ɔ tsuɔ ní ɔ peeɔ Mawu huɛmɛ, nɛ a ma ná bua jɔmi nitsɛ kɛ neneene wami.​—Kane Mateo 22:36-38.

Sisi tomi mlaa enyɔne ɔ ma nyɛ maa ye bua wɔ konɛ waa kɛ ni kpahi nɛ hi si ngɛ tue mi jɔmi mi. (1 Korinto Bi 13:4-7) Sisi tomi mlaa enyɔne nɛ ɔ nɛ waa kɛ ma tsu ní ɔ biɔ nɛ waa kase bɔ nɛ Mawu kɛ nihi hi si ha a.​—Kane Mateo 7:12; 22:39, 40.

4. Mɛni blɔ nɔ nɛ wa náa Baiblo sisi tomi mlaahi a he se ngɛ?

Baiblo mi sisi tomi mlaahi tsɔɔ bɔ nɛ wekuhi maa pee kake kɛ hi si ngɛ suɔmi mi. (Kolose Bi 3:12-14) Jehanɛ hu sisi tomi mlaa kpa ngɛ Mawu Munyu ɔ mi nɛ poɔ wekuhi a he piɛ, lɔ ɔ ji kaa e sɛ nɛ a poɔ gba mi.​—Kane 1 Mose 2:24.

Ke waa kɛ Baiblo mi sisi tomi mlaahi tsuɔ ní ɔ, e ma nyɛ maa baa wa he lo nya níhi a yi, nɛ wa be tsui yee. Kaa nɔ hyɛmi nɔ́ ɔ, nihi nɛ a kɛ anɔkuale yemi kɛ ní nɛ a tsuɔ kɛ hɛdɔ he sisi tomi mlaahi nɛ ngɛ Baiblo ɔ mi ɔ tsuɔ ní ɔ, nitsumitsɛmɛ suɔ a sane. (Abɛ 10:4, 26; Hebri Bi 13:18) Mawu Munyu ɔ hu tsɔɔ wɔ kaa e sa nɛ wa bua nɛ jɔ níhi nɛ wa ngɛ ɔ a he, konɛ waa bu huɛ bɔmi nɛ maa hi waa kɛ Mawu wa kpɛti ɔ kaa e he hia pe he lo nya níhi.​—Kane Mateo 6:24, 25, 33; 1 Timoteo 6:8-10.

Ke waa kɛ Baiblo mi sisi tomi mlaahi tsuɔ ní ɔ, e ma nyɛ ma ha nɛ wa ná nɔmlɔ tso mi he wami kpakpa. (Abɛ 14:30; 22:24, 25) Kaa nɔ hyɛmi nɔ́ ɔ, ke wa yeɔ Mawu mlaa nɛ buɔ dã demi fɔ ɔ nɔ ɔ, e poɔ wa he piɛ kɛ jeɔ gbenɔ hiɔhi kɛ oslaahi a he. (Abɛ 23:20) Yehowa ngmɛɔ wɔ blɔ nɛ waa nu dã, se e sume nɛ waa nu kɛ be nɔ. (La 104:15; 1 Korinto Bi 6:10) Ke waa kɛ Mawu sisi tomi mlaa amɛ kudɔɔ wa ní peepeehi kɛ wa susumihi ɔ, wa náa he se. (La 119:97-100) Se, pi se nɛ anɔkuale Kristofohi ma ná a pɛ he je nɛ a yeɔ Mawu mlaahi a nɔ ngɛ. A peeɔ jã konɛ a kɛ wo Yehowa hɛ mi nyami.​—Kane Mateo 5:14-16.