YI 5
Matsɛ ɔ Ha Nɛ La Kpɛ Ngɛ Matsɛ Yemi ɔ Nɔ
1, 2. Mɛni blɔ nɔ Yesu tsɔɔ kaa e ji blɔ tsɔɔlɔ nɛ le ní ngɛ?
NGƆƆ lɛ kaa nɔ ko nɛ e le bɔ nɛ a kɛ nibwɔhi slaa si ha a kɛ mo kɛ ni komɛ ngɛ si slaae ngɛ ma ko nɛ ngɛ fɛu mi. O kɛ nihi nɛ a piɛɛ o he ɔ li ma a mi, lɔ ɔ he ɔ, nyɛɛ kɛ nɔ́ tsuaa nɔ́ nɛ blɔ tsɔɔlɔ ɔ ma de nyɛ ɔ tsuɔ ní. Ke e ngɛ mi hluu ɔ, nyɛ poɔ ma a mi ní komɛ nɛ a ngɛ fɛu nɛ nyɛ nɛ́ lolo ɔ he foni ngɛ nyɛ juɛmi mi. Ke nyɛ bi nɔ nɛ kɛ nyɛ ngɛ si slaae ɔ ní nɛ ɔmɛ a he sane ɔ, e de we nɔ́ ko, nɛ behi fuu ɔ, e tuɔ jamɛ a ní ɔmɛ a he munyu ke nyɛ yaa su jamɛ a ní ɔmɛ a he. Pee se ɔ, nyɛ bua ba jɔ nile nɛ e kɛ tsu ní ɔ he wawɛɛ, ejakaa e deɔ nyɛ nɔ́ nɛ e sa kaa nyɛɛ le ngɛ be nɛ sa mi.
2 Anɔkuale Kristofohi ngɛ si fɔfɔɛ ko nɛ ngɛ kaa si slaali ɔmɛ a nɔ́ ɔ mi. Waa kɛ bua jɔmi ngɛ ma nɛ ngɛ fɛu wawɛɛ pe mahi tsuo ɔ he ní kasee. Ma nɛ ɔ ‘ngɛ sisi tomi nɛ he wa,’ nɛ lɔ ɔ ji Mawu Matsɛ Yemi ɔ. (Heb. 11:10) Benɛ Yesu ngɛ zugba a nɔ ɔ, e ye bua e se nyɛɛli ɔmɛ nɛ a le Matsɛ Yemi ɔ he níhi nɛ a mi kuɔ ɔ. Anɛ e ha mɛ a sane bimihi tsuo heto, nɛ e de mɛ Matsɛ Yemi ɔ he níhi tsuo si kake lo? Dɛbi. E de ke: “I ngɛ níhi fuu nɛ piɛ nɛ ma de nyɛ, se nyɛ be nyɛe he pɛtɛmi amlɔ nɛ ɔ.” (Yoh. 16:12) Yesu nɛ ji blɔ tsɔɔlɔ nɛ le ní pe kulaa a kɛ níhi nɛ e sui be kaa e kaseli ɔmɛ maa le ɔ gba we a nya.
3, 4. (a) Mɛni blɔ nɔ Yesu ya nɔ nɛ e tsɔɔ anɔkualetsɛmɛ Mawu Matsɛ Yemi ɔ he níhi ngɛ? (b) Mɛni he wa ma susu ngɛ yi nɛ ɔ mi?
3 Yesu tu munyu nɛ a ngma ngɛ Yohane 16:12 ɔ ngɛ e nyagbe gbɔkuɛ ngɛ zugba a nɔ ɔ. Mɛni blɔ nɔ e maa gu nɛ e tsɔɔ nihi nɛ a yeɔ anɔkuale ɔ Mawu Matsɛ Yemi ɔ he ní ngɛ e gbenɔ se? E ma nɔ mi kɛ ha e kaseli ɔmɛ kaa: ‘Anɔkuale mumi ɔ . . . maa tsɔɔ nyɛ anɔkuale ɔ tsuo.’ (Yoh. 16:13) Wa ma nyɛ maa ngɔ mumi klɔuklɔu ɔ kɛ to blɔ tsɔɔlɔ nɛ toɔ e tsui si he. Yesu guu mumi ɔ nɔ kɛ tsɔɔ e kaseli nɔ́ saisaa nɛ e sa kaa a le ngɛ Mawu Matsɛ Yemi ɔ he ngɛ be nɛ e sa kaa a le ɔ mi.
4 Nyɛ ha nɛ wa susu bɔ nɛ mumi klɔuklɔu ɔ yeɔ bua anɔkuale Kristofohi nɛ a nuɔ Matsɛ Yemi ɔ he níhi a sisi saminya ha a he nɛ waa hyɛ. Kekleekle ɔ, wa ma susu bɔ nɛ wa plɛ kɛ le be nɛ Mawu Matsɛ Yemi ɔ je nɔ yemi sisi ha a he. Ngɛ lɔ ɔ se ɔ, wa ma susu nɔ́ nɛ kadiɔ nihi nɛ a maa ye nɔ ngɛ Matsɛ Yemi ɔ mi, kɛ Matsɛ Yemi ɔ sisi bi, kɛ hɛ nɔ kami nɛ a ngɛ ɔ he. Nyagbe ɔ, wa ma susu bɔ nɛ Kristo se nyɛɛli ba nu nɔ́ nɛ anɔkuale nɛ a maa ye Matsɛ Yemi ɔ tsɔɔ sisi ɔ he.
Bɔ Nɛ A Plɛ Kɛ Le Jeha Klɛdɛɛ ɔ
5, 6. (a) Mɛni susumi nɛ dɛ nɛ Baiblo kaseli ɔmɛ ná ngɛ Matsɛ Yemi ɔ sisi to mi, kɛ ngma kpami be ɔ he? (b) Mɛni he je nɛ e sɛ kaa susumi nɛ dɛ nɛ ɔ nɛ ha nɛ wa yi mi nɛ pee wɔ enyɔɔnyɔ kaa Yesu nɛ ngɛ e se nyɛɛli blɔ tsɔɔe ɔ?
5 Kaa bɔ nɛ wa na ngɛ womi nɛ ɔ Yi 2 ɔ mi ɔ, Baiblo Kaseli ɔmɛ kɛ jehahi abɔ tu jeha 1914 ɔ he munyu kaa e maa pee jeha klɛdɛɛ nɛ Baiblo gbami ko maa ba mi. Se ngɛ jamɛ a be ɔ mi ɔ, a he ye kaa Kristo ba ngɛ jeha 1874, nɛ e je e nɔ yemi ɔ sisi ngɛ jeha 1878, nɛ a maa to Matsɛ Yemi ɔ sisi nitsɛnitsɛ ngɛ October 1914 ɔ mi. Ngma kpami ɔ maa ya nɔ ngɛ jeha 1874 kɛ ya si jeha 1914 ɔ mi, kɛkɛ lɔ ɔ se ɔ, a ma bua nihi nɛ a pɔ mɛ nu ɔ a nya kɛ ho hiɔwe ya. Anɛ e sa kaa susumi nɛ dɛ nɛ ɔ nɛ ha nɛ wa yi mi nɛ pee wɔ enyɔɔnyɔ kaa Yesu kudɔ anɔkualetsɛmɛ nɛ ɔmɛ kɛ gu mumi klɔuklɔu ɔ nɔ lo?
6 Dɛbi kulaa! Mo susu nɔ́ hetomi nɔ́ nɛ waa kɛ je yi nɛ ɔ sisi ɔ he ekohu. Anɛ sanehi nɛ si slaali ɔmɛ bi nɛ blɔ tsɔɔlɔ ɔ ha we mɛ heto mla a tsɔɔ kaa a be nyɛe maa ngɔ a he kɛ fɔ e nɔ lo? Dɛbi! E ngɛ mi kaa Mawu we bi nɛ a ngɛ mwɔnɛ ɔ bɔɔ mɔde kaa a maa nu Yehowa yi mi tomi komɛ a sisi loko e su be nɛ mumi ɔ maa tsɔɔ mɛ jamɛ a anɔkuale ɔmɛ a sisi mohu lɛɛ, se e ngɛ heii kaa Yesu ngɛ mɛ blɔ tsɔɔe. Anɔkualetsɛmɛ nɛ ɔmɛ kplɛɛ nɛ a dla mɛ, nɛ a je he si bami mi nɛ a pee tsakemi ngɛ bɔ nɛ a nu níhi a sisi ha a he.—Yak. 4:6.
7. Mɛni mumi mi la nɛ kpɛ ha Mawu we bi?
7 Ngɛ jeha 1919 ɔ se ɔ, mumi mi la a kpɛ wawɛɛ kɛ ha Mawu we bi. (Kane La 97:11.) Ngɛ jeha 1925 ɔ mi ɔ, a ngma munyu ko ngɛ Hwɔɔmi Mɔ ɔ mi nɛ e yi ji, “Ma a Sisi Tomi.” Womi ɔ ma nɔ mi kaa a to Mesia Matsɛ Yemi ɔ sisi ngɛ jeha 1914 ɔ mi, nɛ gbami nɛ ngɛ Kpojemi yi 12 nɛ peeɔ Mawu hiɔwe yo nɛ e fɔ ɔ he foni ɔ ba mi.a Womi ɔ tsɔɔ hu kaa yi mi wami kɛ haomihi nɛ ba Mawu we bi a nɔ ngɛ ta be ɔ mi ɔ ji okadi nɛ ngɛ heii nɛ tsɔɔ kaa a sake Satan ngɔ fɔ he, nɛ “e mi mi fu wawɛɛ, ejakaa e le kaa be bɔɔ kɛkɛ nɛ piɛ ha lɛ.”—Kpoj. 12:12.
8, 9. (a) Mɛni blɔ nɔ nɛ a ma bɔ nɛ Mawu Matsɛ Yemi ɔ he hia ha a nɔ mi ngɛ? (b) Mɛni sane bimihi a he nɛ wa ma susu?
8 Kɛ Matsɛ Yemi ɔ he hia ha kɛɛ? Ngɛ jeha 1928 ɔ mi ɔ, Hwɔɔmi Mɔ ɔ bɔni nɔ mi mami kaa Matsɛ Yemi ɔ he hia kulaa pe wa yi wami nɛ a ma he kɛ gu kpɔmi nɔ́ ɔ nɔ ɔ. Ngɛ anɔkuale mi ɔ, Yehowa ma tsɔ e biɛ ɔ he kɛ gu Mesia Matsɛ Yemi ɔ nɔ, nɛ e maa ye je ɔ tsuo nɔ, nɛ e ma tsu e yi mi tomi kɛ ha adesahi ɔ he ní.
9 Mɛnɔmɛ nɛ a kɛ Kristo maa ye Matsɛ ngɛ Matsɛ Yemi ɔ mi? Mɛnɔmɛ maa pee Matsɛ Yemi ɔ sisi bimɛ ngɛ zugba a nɔ? Mɛni ji ní tsumi titli nɛ e sa kaa Kristo se nyɛɛli nɛ a tsu?
Ní Kpami Ní Tsumi ɔ Kɛ Juɛmi Ma Nihi Nɛ A Pɔ Mɛ Nu ɔ A Nɔ
10. Mɛni nɛ Mawu we bi nu sisi kɛ kɔ nimli 144,000 ɔ he kɛ je blema?
10 Loko jeha 1914 ɔ maa su ɔ, anɔkuale Kristofohi le momo kaa nihi 144,000 nɛ a ji Kristo se nyɛɛli anɔkualetsɛmɛ kɛ Kristo maa ye matsɛ ngɛ hiɔwe.b Baiblo Kaseli ɔmɛ na kaa yibɔ nɛ ɔ ji yibɔ nitsɛ, nɛ Mawu bɔni nihi hlami kɛ je kaseli ɔmɛ a be ɔ mi.
11. Mɛni blɔ nɔ nɛ nihi nɛ a ma ba pee Kristo ayɛflo ɔ ba le ní tsumi nɛ a ma tsu ngɛ zugba a nɔ?
11 Mɛni e sa kaa nihi nɛ a maa pee Kristo ayɛflo ɔ nɛ a pee be mi nɛ a ngɛ zugba a nɔ ɔ? A na kaa Yesu ma bɔ nɛ fiɛɛmi ní tsumi ɔ he hia ha a nɔ mi, nɛ e kɛ to ní kpami be he. (Mat. 9:37; Yoh. 4:35) Kaa bɔ nɛ wa na ngɛ Yi 2 ɔ mi ɔ, be ko ɔ, jinɛ a he ye kaa ní kpami be ɔ maa ye jeha 40, nɛ ke a ngɔ nihi nɛ a pɔ mɛ nu ɔ kɛ ho hiɔwe ya a, kɛkɛ ní kpami be ɔ ba nyagbe. Se akɛnɛ jeha 40 be nɛ ní tsumi ɔ bɛ nyagbe he je ɔ, e he ba hia nɛ a nu níhi a sisi saminya. Amlɔ nɛ ɔ, wa le kaa ní kpami be ɔ—be nɛ a ma je ngma a, nɛ ji Kristofohi nɛ a pɔ mɛ nu ɔ kɛ je hu ɔ, nɛ ji lakpa Kristofohi a he ɔ je sisi ngɛ jeha 1914. Be su nɛ e sa kaa a kɛ juɛmi nɛ ma nihi nɛ a maa ya hiɔwe ɔ a kpɛti nihi nɛ piɛ ngɛ zugba a nɔ ɔ a nya buami nɔ!
Jeha 1914 nɛ ní kpami be ɔ je sisi (Hyɛ kuku 11)
12, 13. Kɛ Yesu nɔ́ hetomi nɔ́ nɛ kɔɔ yihewi nyɔngma amɛ, kɛ sika nɛ nyɔmtsɛ ko kɛ ha e tsɔli ɔ ba mi ha kɛɛ ngɛ nyagbe ligbi nɛ ɔmɛ a mi?
12 Kɛ je jeha 1919 kɛ ma nɛ ɔ, Kristo ngɛ tsɔlɔ anɔkualetsɛ kɛ ní lelɔ ɔ kudɔe konɛ e ma bɔ nɛ fiɛɛmi ní tsumi ɔ he hia ha a nɔ mi. E to ní tsumi nɛ ɔ sisi ngɛ kaseli ɔmɛ a be ɔ mi ɔ. (Mat. 28:19, 20) Jehanɛ hu e tsɔɔ su nɛ e sa kaa e se nyɛɛli nɛ a pɔ mɛ nu ɔ nɛ a ná konɛ a nyɛ nɛ a tsu fiɛɛmi ní tsumi ɔ. Ngɛ mɛni blɔ nɔ? Ngɛ nɔ́ hetomi nɔ́ nɛ kɔɔ yihewi nyɔngma amɛ a he ɔ mi ɔ, Yesu tsɔɔ kaa e sa nɛ nihi nɛ a pɔ mɛ nu ɔ a hɛ nɛ hi a he nɔ, nɛ a hwɔɔ ngɛ mumi mi ke a suɔ nɛ a ya yo kpeemi okplɔɔ ngua a sisi ngɛ hiɔwe benɛ Kristo kɛ e we “ayɛflo” nɛ ji nihi 144,000 ɔ maa hi si ɔ. (Kpoj. 21:2) Lɔ ɔ se ɔ, ngɛ nɔ́ hetomi nɔ́ nɛ kɔɔ sika tsu ɔ he ɔ mi ɔ, Yesu tsɔɔ kaa e sɔmɔli nɛ a pɔ mɛ nu ɔ ma tsu fiɛɛmi ní tsumi nɛ e kɛ wo a dɛ ɔ saminya.—Mat. 25:1-30.
13 Ngɛ jeha lafa nɛ be ɔ mi ɔ, nihi nɛ a pɔ mɛ nu ɔ hwɔɔ ngɛ mumi mi nɛ a tsu ní wawɛɛ. Enɛ ɔ he ɔ, a maa jɔɔ mɛ kokooko! Se, anɛ ní kpami ní tsumi ngua a ma kɔ nihi 144,000 nɛ a kɛ Kristo maa ye Matsɛ ɔ a nya buami pɛ he lo?
Matsɛ Yemi ɔ Ngɛ E Sisi Bimɛ Nɛ A Maa Hi Zugba a Nɔ ɔ A Nya Buae!
14, 15. Mɛni kuu slɔɔtohi eywiɛ nɛ The Finished Mystery womi ɔ tu a he munyu?
14 Anɔkualetsɛmɛ kɛ be gagaa hyɛ blɔ kaa a maa le nihi nɛ “nimli asafo” nɛ Kpojemi 7:9-14 tu a he munyu ɔ ji. Enɛ ɔ he ɔ, e be nyakpɛ kaa níhi nɛ Mawu we bi sɛ hlami de kɛ kɔ nimli asafo ɔ he ɔ gba kulaa ngɛ anɔkualehi nɛ a mi tɛ̃, nɛ wa le mwɔnɛ ɔ he loko Kristo je anɔkualehi nɛ kɔɔ nimli asafo ɔ he ɔ kpo.
15 Womi nɛ a pee ngɛ jeha 1917 nɛ ji, The Finished Mystery ɔ tsɔɔ kaa “kuu slɔɔto enyɔ maa ya hiɔwe, nɛ kuu slɔɔto enyɔ hu maa hi zugba a nɔ.” Mɛnɔmɛ ji kuu eywiɛ nɛ ɔmɛ nɛ a ngɛ hɛ nɔ kami slɔɔtohi ɔ? Kekleekle ɔ, nihi 144,000 kɛ Kristo maa ye matsɛ. Enyɔne ɔ, nimli asafo ɔ. Ngɛ jamɛ a be ɔ mi ɔ, a susu kaa nimli asafo ɔ ji nihi nɛ a tsɛɛ a he ke Kristofohi nɛ a ngɛ sɔlemi ɔmɛ a mi ɔ. A ngɛ hemi kɛ yemi, se a nyɛ we nɛ a fĩ anɔkuale ɔ se kpɛii. Lɔ ɔ he ɔ, a ma ha mɛ blɔ nya nɛ ba si ngɛ hiɔwe. Se ngɛ nihi nɛ a maa hi zugba a nɔ ɔ a blɔ fa mi ɔ, a susu kaa “blematsɛmɛ nɛ a ye anɔkuale” kaa Abraham, Mose kɛ ni kpahi ma ná blɔ nya ngɛ zugba a nɔ, nɛ a maa ye kuu eywiɛne nɛ ji nimli nɛ piɛ ngɛ je ɔ mi ɔ a nɔ.
16. Mɛni la nɛ kpɛ ngɛ jeha 1923 kɛ 1932 ɔ mi?
16 Mɛni blɔ nɔ mumi klɔuklɔu ɔ ye bua Kristo se nyɛɛli nɛ a nu anɔkualehi nɛ wa le mwɔnɛ ɔ sisi ngɛ? Kɛ gu mumi klɔuklɔu ɔ nɔ ɔ, anɔkuale la a kpɛ bɔɔbɔɔbɔɔ kɛ ha mɛ. Ngɛ jeha 1923 ɔ mi tɔɔ nɛ Hwɔɔmi Mɔ ɔ tu kuu ko nɛ a maa hi zugba a nɔ ngɛ Kristo nɔ yemi sisi nɛ a be hɛ nɔ kami kaa a maa ya hiɔwe ɔ he munyu. Ngɛ jeha 1932 ɔ mi ɔ, Hwɔɔmi Mɔ ɔ tu Yonadab (Yehonadab), nɛ fĩ Israel Matsɛ Yehu nɛ Mawu pɔ lɛ nu ɔ se kɛ hwu ta kɛ si lakpa jami ɔ he munyu. (2 Ma. 10:15-17) Womi ɔ tsɔɔ kaa kuu ko ngɛ wa be nɛ ɔ mi nɛ a ngɛ kaa Yonadab, nɛ e tsɔɔ hu kaa Yehowa maa ngɔ kuu nɛ ɔ kɛ “gblee Harmagedon haomi ɔ mi,” nɛ a maa hi zugba a nɔ.
17. (a) Mɛni la nɛ kpɛ ngɛ jeha 1935 ɔ mi? (b) Kɛ Kristofohi anɔkualetsɛmɛ pee a ní ha kɛɛ ngɛ níhi a sisi numi ehe nɛ kɔɔ nimli asafo ɔ he? (Hyɛ daka nɛ ji, “A Tsui Nɔ A Mi Wawɛɛ.”)
17 Mumi mi la ko kpɛ ngɛ jeha 1935 ɔ mi. Ngɛ kpe nɛ a pee ngɛ Washington, D.C. ɔ sisi ɔ, a na kaa nimli asafo ɔ ji nihi nɛ a maa hi zugba a nɔ, nɛ mɛ nɔuu ji jijɔhi nɛ a ngɛ Yesu nɔ́ hetomi nɔ́ nɛ kɔɔ jijɔhi kɛ apletsihi a he ɔ mi ɔ nɛ. (Mat. 25:33-40) Nimli asafo ɔ ji ‘to kpa amɛ’ nɛ Yesu de ngɛ a he ke: “Ma ngɔ mɛ hu kɛ ba” a nɛ. (Yoh. 10:16) Benɛ J. F. Rutherford de ke: “Nihi tsuo nɛ a ngɛ hɛ nɔ kami kaa a maa hi zugba a nɔ kɛ ya neneene ɔ, wa kpa nyɛ pɛɛ nɛ nyɛɛ te si kɛ da si” ɔ, nihi nɛ a ngɛ kpe ɔ sisi ɔ a kpɛti nihi fuu te si kɛ da si! Kɛkɛ nɛ J. F. Rutherford de ke: “Nyɛɛ hyɛ! Nimli asafo ɔ!” Nihi fuu a bua jɔ kaa a ba le hɛ nɔ kami nɛ a ngɛ kɛ ha hwɔɔ se.
18. Mɛni blɔ nɔ Kristo se nyɛɛli kɛ a juɛmi ma fiɛɛmi ní tsumi ɔ nɔ ngɛ, nɛ mɛni je mi kɛ ba?
18 Kɛ je jamɛ a be ɔ mi kɛ ma nɛ ɔ, Kristo kudɔ e we bi, nɛ a kɛ a juɛmi ma nimli asafo ɔ nɛ a maa gblee amanehlu ngua a mi slɔkee ɔ a nya buami nɔ. Sisije ɔ, e pee kaa nɔ́ nɛ nimli asafo ɔ nɛ a ngɛ a nya buae ɔ a he be hiɛe. Nyɛminyumu Rutherford de ke: “E ngɛ kaa nɔ́ nɛ ‘nimli asafo’ ɔ a he be hiɛe po.” Ngɛ anɔkuale mi ɔ, wa le bɔ nɛ Yehowa jɔɔ ní kpami ɔ nɔ ha kɛ je jamɛ a be ɔ mi! Ngɛ Yesu kɛ mumi klɔuklɔu ɔ blɔ tsɔɔmi nya a, nihi nɛ a pɔ mɛ nu ɔ kɛ ‘to kpa amɛ’ ba pee “kuu kake,” nɛ a ngɛ sɔmɔe ngɛ “hyɛlɔ kake” sisi kaa bɔ nɛ Yesu gba kɛ fɔ si ɔ.
Nyɛminyumu Rutherford nyɛ we nɛ e na bɔ nɛ nimli asafo ɔ a he ma ba hiɛ ha (Kɛ je muɔ nɔ kɛ yaa hiɔ nɔ: Nathan H. Knorr, Joseph F. Rutherford, kɛ Hayden C. Covington)
19. Mɛni blɔ nɔ wa maa gu kɛ ná nimli asafo ɔ a nya buami mi blɔ fa mi nɔ́ ngɛ?
19 Nihi babauu nɛ a ji anɔkualetsɛmɛ maa hi paradeiso zugba a nɔ kɛ maa ya neneene, nɛ Kristo kɛ e he piɛɛli 144,000 ɔ maa ye a nɔ. Ke o susu bɔ nɛ Kristo ye bua Mawu we bi nɛ a ná hɛ nɔ kami nɛ daa si ngɛ Ngmami ɔ nɔ he ɔ, anɛ o bua jɔɛ lo? E ji he blɔ agbo nɛ wa ná kaa wa maa tu hɛ nɔ kami nɛ ɔ he munyu kɛ tsɔɔ nihi ngɛ fiɛɛmi mi! Nyɛ ha nɛ waa kɛ kã nɛ tsu fiɛɛmi ní tsumi ɔ bɔ nɛ pee nɛ nimli asafo ɔ a he nɛ hiɛ, konɛ a je Yehowa biɛ ɔ yi!— Kane Luka 10:2.
Nimli asafo ɔ a he ngɛ hiɛe daa
Nɔ́ Nɛ Anɔkuale Nɛ Wa Maa Ye Matsɛ Yemi ɔ Tsɔɔ
20. Mɛni ji níhi nɛ peeɔ Satan blɔ nya tomi ɔ fã a ekomɛ, nɛ kɛ e ma nyɛ maa sa anɔkuale nɛ Kristofo no ko yeɔ he ha kɛɛ?
20 Be mi nɛ Mawu we bi yaa nɔ nɛ a kaseɔ Matsɛ Yemi ɔ he ní ɔ, a nuɔ nɔ́ nɛ anɔkuale nɛ a maa ye kɛ ha Mawu nɔ yemi ɔ tsɔɔ ɔ sisi saminya. Enɛ ɔ he ɔ, ngɛ jeha 1922 ɔ mi ɔ, Hwɔɔmi Mɔ ɔ tsɔɔ kaa blɔ nya tomi enyɔ nɛ ngɛ je ɔ mi nɛ ji, Yehowa blɔ nya tomi kɛ Satan blɔ nya tomi, nɛ Satan blɔ nya tomi ɔ fã ji jua yemi, jami, kɛ ma kudɔmi. E sɛ kaa nihi nɛ a yeɔ Mawu Matsɛ Yemi ɔ nɛ Kristo ngɛ nɔ yee ɔ anɔkuale ɔ nɛ a ngɔ a he kɛ wo Satan blɔ nya tomi ɔ eko mi. (2 Kor. 6:17) Mɛni lɔ ɔ tsɔɔ?
21. (a) Tsɔlɔ anɔkualetsɛ ɔ bɔ Mawu we bi kɔkɔ ngɛ ní tsumi nguahi a he ngɛ mɛni blɔ nɔ? (b) Ngɛ jeha 1963 ɔ mi ɔ, mɛni Hwɔɔmi Mɔ ɔ de ngɛ ‘Babilon Ngua a’ he?
21 Mumi mi niye ní nɛ je tsɔlɔ anɔkualetsɛ ɔ ngɔ ɔ kpaa nɔ sisimi nɛ yaa nɔ ngɛ ní tsumi nguahi a mi ɔ he bo, nɛ e bɔɔ Mawu we bi kɔkɔ ngɛ he lo nya níhi a se dimi he. (Mat. 6:24) Jã nɔuu kɛ̃ nɛ wa womi ɔmɛ yaa nɔ nɛ a kpaa Satan blɔ nya tomi ɔ fã nɛ ji jami ɔ he bo. Ngɛ jeha 1963 ɔ mi ɔ, Hwɔɔmi Mɔ ɔ tsɔɔ mi heii kaa, pi nihi nɛ a tsɛɛ a he ke Kristofohi ɔ nɛ ‘Babilon Ngua a’ daa si kɛ ha, mohu ɔ, e daa si kɛ ha lakpa jamihi tsuo nɛ ngɛ je ɔ mi ɔ. A ye bua Mawu we bi nɛ a je mahi kɛ kusumi slɔɔtohi a mi ɔ, nɛ a “je kpo ngɛ e mi,” nɛ a je a he ngɛ lakpa jami ní peepeehi tsuo a he. Wa maa kase enɛ ɔ he ní babauu ngɛ Yi 10 mi.—Kpoj. 18:2, 4.
22. Ngɛ kekleekle Je Mi Ta a mi ɔ, kɛ Mawu we bi nu ga womi nɛ ngɛ Roma Bi 13:1 ɔ sisi ha kɛɛ?
22 Satan blɔ nya tomi ɔ fã nɛ ji ma kudɔmi hu nɛɛ? Anɛ anɔkuale Kristofohi ma nyɛ maa ngɔ a he kɛ wo tahi kɛ mahi a kpɛti pɛhi a mi lo? Ngɛ kekle Je Mi Ta a mi ɔ, Baiblo Kaseli ɔmɛ nu sisi kaa e sɛ nɛ Kristo se nyɛɛli nɛ a gbe a nyɛmi nɔmlɔ. (Mat. 26:52) Se ngɛ a ti nihi fuu a blɔ fa mi ɔ, ga womi nɛ ngɛ Roma Bi 13:1 nɛ a tsɔɔ sisi ngɛ New World Translation ɔ mi kaa nɔ tsuaa nɔ nɛ ba e he si ha “nɔ yeli nɛ a nɔ kuɔ” ɔ tsɔɔ kaa e sa nɛ a tsu tabuli a ní tsumi, a wo tabuli a tadehi, nɛ a hɛɛ tu po; se ke a de mɛ kaa a gbe he nyɛlɔ ko ɔ, e sa nɛ a fia tu ɔ kɛ wo kɔɔhiɔ mi.
23, 24. Kɛ wa nu Roma Bi 13:1 ɔ sisi ha kɛɛ ngɛ Je Mi Ta enyɔne ɔ mi, nɛ pee se ɔ, kɛ Kristo se nyɛɛli ɔmɛ ba nu Ngmami nɛ ɔ sisi ha kɛɛ?
23 Benɛ Je Mi Ta enyɔne ɔ fɛ ngɛ jeha 1939 ɔ mi ɔ, Hwɔɔmi Mɔ ɔ tsɔɔ bɔ nɛ e sɛ nɛ Kristofohi kɛ a he nɛ wo ma kudɔmi sanehi a mi ɔ mi fitsofitso. Womi ɔ tsɔɔ mi heii kaa Kristo se nyɛɛli kɛ a he be tahi kɛ basabasa peemi nɛ ngɛ nɔ yae ngɛ Satan je ɔ mi ɔ mi woe. E ji blɔ tsɔɔmi ngɛ e be nya niinɛ! Lɔ ɔ po Kristo se nyɛɛli a he piɛ, nɛ a yí muɔ he fɔ ngɛ jamɛ a ta a mi kaa je ma amɛ. Ngɛ jeha 1929 ɔ sisije ɔ, wa womi ɔmɛ tsɔɔ kaa nɔ yeli nɛ a nɔ kuɔ nɛ a tu a he munyu ngɛ Roma Bi 13:1 kaa bɔ nɛ e ngɛ New World Translation ɔ mi ɔ kɔ we ma nɔ yeli a he kulaa, mohu ɔ, e kɔɔ Yehowa kɛ Yesu a he. Enɛ ɔ he ɔ, e he ba hia nɛ a ná Ngmami nɛ ɔ he sisi numi nɛ da.
24 Ngɛ jeha 1962 ɔ mi ɔ, mumi klɔuklɔu ɔ ye bua Kristo we bi nɛ a tsake bɔ nɛ a nu níhi a sisi ha a benɛ November 15 kɛ December 1 Hwɔɔmi Mɔ ɔ tsɔɔ Roma Bi 13:1-7 ɔ mi ɔ. Nyagbe ɔ, Mawu we bi nu sisi tomi mlaa nɛ ngɛ Yesu munyu nɛ ji: “Nyɛɛ ngɔ Kaisare ɔ nɔ́ ngɔ ha Kaisare ɔ, nɛ nyɛɛ ngɔ Mawu nɔ́ ngɔ ha Mawu!” ɔ sisi. (Luka 20:25) Amlɔ nɛ ɔ, anɔkuale Kristofohi le kaa nɔ yeli nɛ a nɔ kuɔ ɔ ji ma nɔ yeli nɛ a ngɛ je nɛ ɔ mi, nɛ e sa kaa Kristofohi nɛ a ba a he si kɛ ha mɛ. Se huzu ngɛ jamɛ a he si bami ɔ he. Ke ma nɔ yeli de wɔ kaa waa pee nɔ́ ko nɛ kɛ Yehowa Mawu mlaa a kɔ we ɔ, lɛɛ wa deɔ kaa bɔ nɛ kaseli ɔmɛ nɛ a hi si blema a de ɔ, a de ke: “E sa kaa waa bu Mawu mohu tue, se pi nimli.” (Níts. 5:29) Ngɛ womi nɛ ɔ Yi 13 kɛ 14 ɔ mi ɔ, wa maa kase sisi tomi mlaa nɛ kɔɔ ma kudɔmi sanehi nɛ Kristofohi kɛ a he wui mi nɛ Mawu we bi kɛ tsu ní ɔ he ní babauu.
E ji he blɔ ngua nɛ wa ná kaa wa maa fiɛɛ neneene wami he hɛ nɔ kami nɛ Baiblo ɔ tu he munyu ɔ kɛ tsɔɔ nihi!
25. Mɛni he je nɛ o bua jɔ mumi klɔuklɔu ɔ kudɔmi nɛ ha nɛ wa nu Mawu Matsɛ Yemi ɔ sisi ɔ he ɔ?
25 Mo susu nɔ́ nɛ Kristo tsɔɔ e se nyɛɛli ngɛ Matsɛ Yemi ɔ he jeha lafa kɛ se ji nɛ ɔ he nɛ o hyɛ. Wa kase be nɛ a to Matsɛ Yemi ɔ sisi ngɛ hiɔwe, kɛ bɔ nɛ Matsɛ Yemi ɔ he hia ha a he ní. Wa le kaa nihi nɛ a yeɔ Mawu anɔkuale ɔ a kpɛti ni komɛ maa hi hiɔwe, nɛ ni komɛ hu maa hi zugba a nɔ. Jehanɛ se hu ɔ, wa yeɔ Mawu Matsɛ Yemi ɔ anɔkuale, nɛ wa baa wa he si kɛ haa je ɔ mi nɔ yeli bɔ nɛ sa. Mo bi o he ke, ‘Anɛ i ko le anɔkualehi nɛ a he jua wa nɛ ɔmɛ ke Yesu Kristo tsɔɔ we e tsɔlɔ anɔkualetsɛ nɛ e ngɛ zugba a nɔ ɔ anɔkuale nɛ ɔmɛ a sisi lo?’ E ji jɔɔmi nitsɛ nɛ wa ná kaa Kristo kɛ mumi klɔuklɔu ɔ ngɛ wɔ blɔ tsɔɔe!
a Loko jamɛ a be ɔ, Baiblo Kaseli ɔmɛ susu kaa gbami ɔ tsɔɔ kaa ta maa ya nɔ ngɛ Roma wɔ jali kɛ Roma Katoliki jami ɔ mi bi a kpɛti.
b Ngɛ June 1880 ɔ mi ɔ, Hwɔɔmi Mɔ ɔ tsɔɔ kaa nihi 144,000 ɔ maa pee helo nya Yuda bi nɛ a ma tsake ba pee anɔkuale Kristofohi loko jeha 1914 ɔ maa ba nyagbe. Se pee se ngɛ jeha 1880 ɔ mi ɔ, a pee womi ko, nɛ a kɛ pee tsakemi ngɛ bɔ nɛ a nu níhi a sisi ha a mi, nɛ e kɛ bɔ nɛ wa nu níhi a sisi ha mwɔnɛ ɔ kɔ.