Muɔ nɔ: Yemi kɛ buami níhi nɛ a kɛ je Switzerland nɛ a kɛ ya ha wa nyɛmimɛ nɛ a ngɛ Germany ngɛ jeha 1946; hiɔ nɔ: Matsɛ Yemi Asa ko nɛ a ngɛ mae ngɛ Japan benɛ zugba mimiɛ ngɛ wo mi ɔ se ngɛ jeha 2011
FÃ 6
Matsɛ Yemi ɔ Se Fimi—Tsu Mami Kɛ Ha Mawu Jami Kɛ Yemi Kɛ Buami Ngɛ Oslaa Be Mi
O YA nyɛ Matsɛ Yemi Asa a nɔ, nɛ o na kaa lejɛ ɔ tsake kulaa. O bua jɔ nyɛ Matsɛ Yemi Asa a he saminya. Eko ɔ, o kai benɛ o ye bua nɛ a kɛ ma Asa a jeha komɛ nɛ be ɔ. Se amlɔ nɛ ɔ, o bua jɔ wawɛɛ ejakaa a kɛ Matsɛ Yemi Asa a ma tsu ní be bɔɔ kɛ ye bua nihi nɛ oslaa ná mɛ. Lingmi nɛ ɔ, hiɔmi kɛ ahumi puɛ ní ngɛ kpokpa a nɔ. Oya nɔuu nɛ Asafo ɔ Ní Tsumi Kɔni Ajla Toli ɔmɛ to blɔ nya konɛ nihi nɛ oslaa ba a nɔ ɔ nɛ a ná niye ní, tade, nyu, kɛ ní kpahi nɛ he maa hia mɛ. A to níhi nɛ nyɛmimɛ je a suɔmi mi nɛ a kɛ ba ha konɛ a kɛ ye bua nihi nɛ oslaa ná mɛ ɔ nya saminya ngɛ Matsɛ Yemi Asa a nɔ. Nyɛmimɛ nyumuhi kɛ yihi nɛ oslaa ná mɛ ɔ ba ngɛ níhi nɛ hia mɛ ɔ ngɔe, nɛ a bua jɔ.
Yesu tsɔɔ kaa nɔ́ titli nɛ a kɛ maa le e se nyɛɛli ji suɔmi nɛ a ngɛ kɛ ha a sibi ɔ. (Yoh. 13:34, 35) Ngɛ fã nɛ ɔ mi ɔ, wa ma susu bɔ nɛ tsuhi nɛ Yehowa Odasefohi ma, kɛ yemi kɛ buami nɛ a kɛ ha a nyɛmimɛ nɛ oslaa ná mɛ ɔ tsɔɔ kaa a suɔ a sibi ɔ he. Suɔmi nɛ wa jeɔ kpo ɔ ji odase nitsɛ nɛ tsɔɔ kaa wa ngɛ Yesu Matsɛ Yemi ɔ sisi.