Yesu Tsa Kpititsɛmɛ Nyɔngma, Se Nɔ Kake Pɛ Lɛ Ya Na Lɛ Si

Benɛ Sanhedrin bi ɔmɛ to kaa a maa gbe Yesu ɔ, e je kɛ ho Efraim nɛ ngɛ Yerusalem kasa nya a ya. E kɛ e kaseli ɔmɛ ya hi lejɛ ɔ bɔɔ, konɛ e he nyɛli ɔmɛ a nine ko su e nɔ. (Yohane 11:54) Se benɛ jeha 33 Hetsɔmi ɔ ngɛ sue ɔ, Yesu pee e juɛmi kaa e maa kpale kɛ ya Yerusalem, se e be lejɛ ɔ yae tɛɛ. E ma ya gu Samaria kɛ ya be ngɛ Galilea kpɔ ɔ mi loko e maa kpale kɛ ya Yerusalem. Enɛ ɔ ji nyagbe blɔ nɛ e maa hia loko e ma gbo.

Benɛ Yesu ngɛ blɔ nɔ kɛ yaa nɛ e miɔ nɛ e maa su kɔpe ko mi ɔ, e na kpititsɛmɛ nyɔngma nɛ a daa si ngɛ he ko. Kpiti ji he womi nɔ hiɔ yaya nɛ ma nyɛ ma puɛ nɔ ko nine nguɛhi, loo e nane nguɛhi, loo e tue. (4 Mose 12:10-12) Mlaa a nɛ Mawu kɛ ha Israel bi ɔmɛ ɔ tsɔɔ kaa ke kpititsɛ ko na kaa nɔ ko ma e kasa nya a, e sa nɛ e kpa ngmlaa ke, “Ye he tsɔ we oo, ye he tsɔ we!” Jehanɛ se hu ɔ, e sɛ nɛ e ya nimli a kpɛti.​​—3 Mose 13:45, 46.

Jã nɛ kpititsɛmɛ nyɔngma amɛ pee. A hɛ́ mɛ kɛ sui Yesu he haa. Se a ya nɔ nɛ a kpa ngmlaa ke: “Yesu lee! Tsɔɔlɔ lee! Naa wɔ mɔbɔ oo, naa wɔ mɔbɔ!” Benɛ Yesu na mɛ ɔ, e de mɛ ke: “Nyɛɛ ya nɛ nyɛɛ ngɔ nyɛ he ya tsɔɔ osɔfo ɔmɛ.” (Luka 17:13, 14) Nɔ́ nɛ Yesu de mɛ ke a pee ɔ tsɔɔ kaa e ngɛ bu kɛ ha Mawu Mlaa a, ejakaa mlaa a tsɔɔ kaa ke kpititsɛ ko he tsɔ ɔ, e sa nɛ e ngɔ e he kɛ ya tsɔɔ osɔfo ɔmɛ, nɛ a hyɛ kaa hiɔ ɔ jɔ niinɛ lo. Ke osɔfo ɔmɛ ma nɔ mi kaa e he tsɔ niinɛ ɔ, lɛɛ e ma nyɛ maa hi nihi a kpɛti ekohu.​​—3 Mose 13:9-17.

Kpititsɛmɛ nɛ ɔmɛ he ye kaa Yesu ma nyɛ ma tsa mɛ. Enɛ ɔ he ɔ, benɛ hiɔ ɔ ji a he lolo po ɔ, a ma blɔ nɔ konɛ a ngɔ a he kɛ ya tsɔɔ osɔfo ɔmɛ. Benɛ a ngɛ blɔ ɔ nɔ kɛ yaa a, hemi kɛ yemi nɛ a ná ngɛ Yesu mi ɔ ha nɛ a ná tsami. A na kaa a he womi nɔ tsɔ, nɛ a ná he wami!

Kpititsɛmɛ nyɔngma a nɛ a tsa mɛ ɔ, a kpɛti nihi nɛɛ ho a wehi a mi ya. Se nɔ kake nɛ e ji Samaria no ɔ lɛɛ e yɛ́. Nyumu nɛ ɔ pee e juɛmi kaa e ma ya hla Yesu se blɔ. Mɛni he je? E suɔ nɛ e ma ya na Yesu si ngɛ nɔ́ nɛ e pee ha lɛ ɔ he. Enɛ ɔ he ɔ, e “je Mawu yi kɛ ngmlaa” ejakaa e yɔse kaa Mawu he wami nya nɛ a tsa lɛ ngɛ. (Luka 17:15) Benɛ e ya na Yesu ɔ, e kpla si ngɛ Yesu nane nya nɛ e na lɛ si.

Yesu bi nihi nɛ ngɛ lejɛ ɔ ke: “Pi nyumuhi nyɔngma nɛ i tsa a! Jije nɛɛ ɔmɛ ngɛ? Mɛni he je nɛ ma se no nɛ ɔ pɛ lɛ kpale e se kɛ ba na Mawu si ɔ?” Kɛkɛ nɛ Yesu de Samaria no ɔ ke: “Tee si nɛ o ya; o hemi kɛ yemi tsa mo.”​​—Luka 17:17-19.

Kpititsɛmɛ nyɔngma amɛ nɛ Yesu tsa a ji odase nɛ tsɔɔ kaa Yehowa Mawu piɛɛ Yesu he. Jehanɛ hu ɔ, pi tsami pɛ nɛ nyumu ɔ nɛ e ya na Yesu si ɔ ná, eko ɔ, e ma ná neneene wami hulɔ. E ngɛ mi kaa Yesu tsa we nihi ngɛ nyakpɛ blɔ nɔ ngɛ wa be nɛ ɔ mi kaa bɔ nɛ e pee blema a mohu lɛɛ, se ke wa ná hemi kɛ yemi ngɛ Yesu mi ɔ, wa ma nyɛ ma ná neneene wami. Anɛ wa jeɔ hɛsa kpo kaa bɔ nɛ Samaria no ɔ pee ɔ lo?