NÍ KASEMI 03
Anɛ O Ma Nyɛ Ma He Baiblo ɔ Ye Lo?
Si womihi kɛ ga womihi fuu ngɛ Baiblo ɔ mi. Eko ɔ, o suɔ nɛ o le níhi nɛ Baiblo ɔ tsɔɔ ɔ, se jamɛ a be ɔ mi nɔuu ɔ, e yee ha mo kaa o ma he Baiblo ɔ ye. Anɛ e sa nɛ o he si womihi kɛ ga womihi nɛ ngɛ blema womi nɛ ɔ mi ɔ ye lo? Anɛ e sa nɛ o he níhi nɛ Baiblo ɔ de kɛ kɔ bua jɔmi nɛ o ma ná amlɔ nɛ ɔ kɛ hwɔɔ se he ɔ ye lo? Nimli ayɔhi abɔ he ye, nɛ mo hu o ma nyɛ ma he ye.
1. Anɛ Baiblo ɔ mi munyu ɔmɛ ji anɔkuale aloo nyaziahi?
Munyuhi nɛ́ a ngma ngɛ Baiblo ɔ mi ɔ ji ‘anɔkuale munyuhi sɔuu.’ (Fiɛlɔ 12:10) Baiblo ɔ tu níhi nɛ ya nɔ nitsɛnitsɛ, kɛ nihi nɛ a hi si hyɛ ɔ a he munyu. (Kane Luka 1:3; 3:1, 2.) Yi nɔ sane ngmali kɛ nihi nɛ a tsuaa si kɛ hlaa níhi a mi ɔ ma nɔ mi kaa behi, kɛ nihi, kɛ mahi, kɛ níhi nɛ́ ya nɔ nɛ Baiblo ɔ tu a he munyu ɔ ji anɔkuale.
2. E ngɛ mi kaa Baiblo ɔ se kɛ mohu lɛɛ, se mɛni he je nɛ loloolo ɔ, e he ngɛ se nami ɔ?
Baiblo ɔ de níhi fuu nɛ́ jinɛ nihi nɛ a hi si blema a li. Kaa nɔ hyɛmi nɔ́ ɔ, e tu níhi nɛ kɔɔ je mi si kpami he ɔ he munyu. Nihi fuu je nɔ́ nɛ Baiblo ɔ de kɛ kɔ ní nɛ ɔmɛ a he ɔ he atsinyɛ. Se mwɔnɛ ɔ, níhi a mi hlami tsɔɔ kaa níhi nɛ Baiblo ɔ de ɔmɛ ji anɔkuale. E mi munyu ɔmɛ ji anɔkuale, nɛ a “ngɛ kɛ yaa neneene.”—La 111:8.
3. Mɛni he je nɛ wa ma nyɛ ma he nɔ́ nɛ Baiblo ɔ de kɛ kɔ hwɔɔ se he ɔ maa ye?
Baiblo ɔ gba “níhi nɛ na we nɛ a ba lolo” ɔ po kɛ fɔ si. (Yesaya 46:10) E sɛ hlami nɛ e tu ní komɛ a he munyu kɛ fɔ si momoomo loko a ba mi. E tu níhi nɛ ngɛ nɔ yae ngɛ wa be nɛ ɔ mi ɔ he munyu fitsofitso kɛ fɔ si. Wa ma susu gbamihi nɛ ngɛ Baiblo ɔ mi ɔ ekomɛ a he ngɛ ní kasemi nɛ ɔ mi. Bɔ nɛ a plɛ kɛ ba mi ha a ngɛ nyakpɛ wawɛɛ!
MOO KASE BABAUU
Moo kase bɔ nɛ Baiblo ɔ kɛ je mi si kpami kpaa gbi ha, nɛ o hyɛ nyakpɛ blɔ nɔ nɛ Baiblo ɔ mi gbami komɛ gu kɛ ba mi.
4. Baiblo ɔ kɛ je mi si kpami kpaa gbi
Blema a, nihi fuu susu kaa je ɔ maa si ngɛ nɔ́ ko nɔ. Mo je VIDEO ɔ.
Moo hyɛ nɔ́ nɛ a ngma ngɛ Hiob womi ɔ mi maa pee jeha 3,500 nɛ be ɔ. Nyɛɛ kane Hiob 26:7, nɛ nyɛ susu sane bimi nɛ ɔ he:
Anɛ lingmi nɛ ɔ pɛ nɛ a ngma kaa je ɔ ‘kplaa si nɛ nɔ́ ko hɛɛ we lɛ’ lo, nɛ mɛni he je nɛ e ngɛ nyakpɛ ɔ?
Pu ɔ haa nɛ nyu nɛ ngɛ wo ɔ mi ɔ dɔɔ la bɔ nɛ sa, lɔ ɔ se ɔ, e tsakeɔ kɛ yaa kɔɔhiɔ mi nɛ e ya peeɔ bɔku. Pee se ɔ, e plɛɔ peeɔ hiɔmi, nɛ e nɛɔ kɛ pueɔ zugba a nɔ, nɛ e ya sɛɔ wo ɔ mi ekohu. Maa pee jeha 200 nɛ be ɔ loko je mi si kpali ba nu nyu he blɔ nya tomi nɛ ɔ sisi saminya. Se mo kadi nɔ́ nɛ Baiblo ɔ de jeha akpehi abɔ nɛ be ɔ. Nyɛɛ kane Hiob 36:27, 28, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni he je nɛ nyu he blɔ nya tomi nɛ a tsɔɔ mi kpiti nɛ ɔ ngɛ nyakpɛ ɔ?
Anɛ ngmami nɛ ɔmɛ nɛ o kane ɔ ha we nɛ o he Baiblo ɔ ye wawɛɛ lo?
5. Baiblo ɔ gba ní komɛ nɛ a he hia nɛ a ya nɔ blema a kɛ fɔ si
Nyɛɛ kane Yesaya 44:27–45:2, nɛ nyɛ susu sane bimi nɛ ɔ he:
Mɛni ji ní komɛ nɛ sa kadimi nɛ Baiblo ɔ gba kɛ fɔ si jeha 200 loko a kpata Babilon ma a hɛ mi?
Yi nɔ sane tsɔɔ kaa Persia Matsɛ Sirus kɛ e tabo ɔ ya kpata Babilon ma a hɛ mi ngɛ jeha 539 ɔ mi loko a fɔ Kristo. A gba dɔ ha nyu nɛ bɔle ma a, nɛ nyu ɔ fã. Akɛnɛ a bli ma a agbo ɔmɛ kɛ fɔ si he je ɔ, ta buli ɔmɛ sɛ ma a mi, nɛ a ya ngɔ ma a be mi nɛ a kɛ ma a mi bi ɔmɛ hwui ta. Amlɔ nɛ ɔ, maa pee jeha 2,500 be, se loloolo ɔ, Babilon ma a pee ma doku. Mo kadi Baiblo ɔ gbami nɛ kɔɔ ma nɛ ɔ he ɔ.
Nyɛɛ kane Yesaya 13:19, 20, nɛ nyɛ susu sane bimi nɛ ɔ he:
Kɛ gbami nɛ ɔ plɛ kɛ ba mi ha kɛɛ?
Babilon nɛ e pee ma doku ngɛ Iraq
6. Baiblo ɔ gba níhi nɛ ngɛ nɔ yae mwɔnɛ ɔ kɛ fɔ si
Baiblo ɔ ha nɛ wa le kaa wa ngɛ “nyagbe ligbi ɔmɛ” a mi. (2 Timoteo 3:1) Mo kadi nɔ́ nɛ Baiblo ɔ de kɛ kɔ níhi nɛ maa ya nɔ ngɛ wa be nɛ ɔ mi ɔ he.
Nyɛɛ kane Mateo 24:6, 7, nɛ nyɛ susu sane bimi nɛ ɔ he:
Mɛni ji ní titli komɛ nɛ Baiblo ɔ de ke a maa ya nɔ ngɛ nyagbe ligbi nɛ ɔmɛ a mi?
Nyɛɛ kane 2 Timoteo 3:1-5, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni suhi nɛ Baiblo ɔ tsɔɔ kaa nihi ma je kpo ngɛ nyagbe ligbi ɔmɛ a mi?
Su nɛ ɔmɛ a kpɛti te nɛɛ nɛ o naa nɛ nihi jeɔ kpo?
NI KOMƐ DEƆ KE: “Nyaziahi kɛ lakpa munyuhi sɔuu nɛ ngɛ Baiblo ɔ mi.”
Mɛni ji nɔ́ tutuutu nɛ haa nɛ o náa nɔ mi mami kaa o ma nyɛ ma he Baiblo ɔ maa ye?
NYA MWƆMI
Yi nɔ sanehi, je mi si kpami, kɛ gbamihi tsuo tsɔɔ kaa o ma nyɛ ma he Baiblo ɔ maa ye.
Mi Nylɔmi
Anɛ Baiblo ɔ mi munyu ɔmɛ ji anɔkuale aloo nyaziahi?
Mɛni ji ní komɛ nɛ Baiblo ɔ kɛ je mi si kpami kpa gbi ngɛ a he?
Anɛ o he ye kaa Baiblo ɔ ma nyɛ maa tsɔɔ nɔ́ nɛ maa ba hwɔɔ se lo? Mɛni he je nɛ o de jã a?
NÍ KPAHI NƐ MAA YE BUA MO
Anɛ je mi si kpami kɛ Baiblo ɔ kpa we gbi ngɛ ní komɛ a mi lo?
“Anɛ Baiblo ɔ Kɛ Je Mi Si Kpami Kpa Gbi Lo?” (Munyu nɛ ɔ ngɛ Intanɛti ɔ nɔ)
Mɛni ji níhi nɛ maa nɔ mi kaa wa ngɛ “nyagbe ligbi ɔmɛ a mi”?
“Baiblo Gbamihi 6 Komɛ Nɛ́ A Ngɛ Mi Bae Mwɔnɛ ɔ” (Hwɔɔmi Mɔ, May 1, 2011)
Moo hyɛ bɔ nɛ Baiblo ɔ mi gbami nɛ kɔɔ Hela Nɔ Yemi ɔ he ɔ ba mi ha.
Moo hyɛ bɔ nɛ gbamihi nɛ ngɛ Baiblo ɔ mi ɔ tsake nyumu ko juɛmi ngɛ Baiblo ɔ he ha.