Benɛ Isak ye jeha 40 ɔ, e ngɔ yo. A tsɛɛ e yo ɔ ke Rebeka. Isak suɔ Rebeka wawɛɛ. Pee se ɔ, a fɔ binyumuhi enyɔ. A ji hawi.

Nɔkɔtɔma a biɛ ji Esau, nɛ wayoo ɔ biɛ ji Yakɔb. Esau pɔɛ we mi himi, nɛ e le de dami saminya. Se Yakɔb lɛɛ daa nɛ ɔ, e ngɛ we mi.

Jamɛ a be ɔ mi ɔ, ke bitsɛ ko ngɛ weto ní komɛ kaa zugba kɛ sika nɛ e gbo ɔ, a gbaa kɛ haa e bimɛ. Bitɛte ɔ náa fuu pe e nyɛmimɛ ɔmɛ. A tsɛɔ weto ní nɛ a gbaa a ke gbosi ní. Ngɛ Isak weku ɔ mi ɔ, si nɛ Yehowa wo Abraham ɔ hu piɛɛ gbosi ní nɛ bitɛte ɔ ma ná a he. Esau nɛ́ kaa si nɛ Yehowa wo Abraham ɔ he hia. Se Yakɔb lɛɛ, e le kaa a he hia wawɛɛ.

Ligbi ko ɔ, benɛ Esau je de dami kɛ ba we mi ɔ, pɔ tɔ e he wawɛɛ. Jamɛ a be ɔ mi ɔ, Yakɔb ngɛ ní hooe. Esau nu niye ní ɔ he via, lɔ ɔ he ɔ, e de Yakɔb ke: ‘Hwɔ ngɛ mi yee! Ha mi nɔ́ tsutsu nɛ ɔ eko ma ye!’ Yakɔb de lɛ ke: ‘Yoo, ma ha mo. Se loko ma ha mo ɔ, ja o wo mi si kaa o kɛ gbosi ní nɛ o ma ná a ma ha mi.’ Esau de Yakɔb ke: ‘Pi ye kɔmɔ ji gbosi ní ɔ! Ke o suɔ ɔ, o ma nyɛ ma wo. Imi lɛɛ niye ní kɛkɛ i ngɛ hlae nɛ ma ye.’ Anɛ o susu kaa nile ngɛ nɔ́ nɛ Esau pee ɔ mi lo? Dɛbi, nile be mi kulaa. Esau ngɔ nɔ́ ko nɛ e he jua wa saminya kɛ tsake niye ní bɔɔ ko.

Isak ba pee nɔmoyo, nɛ be su nɛ e sa kaa e jɔɔ e bitɛte ɔ. Se Rebeka ye bua Yakɔb nɛ ji Esau senɔ ɔ, nɛ lɛ mohu e ná jɔɔmi ɔ. Benɛ Esau ná le enɛ ɔ, e mi mi fu wawɛɛ, nɛ e to kaa e maa gbe e nyɛmi ɔ. Akɛnɛ Isak kɛ Rebeka suɔ kaa a maa bu Yakɔb he konɛ Esau nɛ ko gbe lɛ he je ɔ, a de Yakɔb ke: ‘Yaa o nyɛ nyɛminyumu Laban ngɔ, nɛ o hi lejɛ ɔ kɛ ya si benɛ Esau tsui maa ba si.’ Yakɔb bu e fɔli ɔmɛ tue, nɛ e tu fo kɛ je konɛ e nyɛmi ɔ ko gbe lɛ.

Yehowa wo Yakɔb si kaa e maa bu e he kaa bɔ nɛ e bu Abraham kɛ Isak he ɔ. Yakɔb ya hi ma ko nɛ a tsɛɛ ke Haran. E ngɔ yo ngɛ lejɛ ɔ, nɛ e ba ná weku agbo, kɛ weto ní fuu.

Pee se ɔ, Yehowa de Yakɔb ke: ‘Moo kpale kɛ ho o ma a mi ya.’ Enɛ ɔ he ɔ, Yakɔb kɛ e weku ɔ mwɔɔ a níhi, nɛ a pue blɔ. Benɛ a yaa ngɛ blɔ ɔ nɔ ɔ, ni komɛ ba de Yakɔb ke: ‘O nyɛmi Esau kɛ nyumuhi 400 ma ngɛ blɔ ɔ nɔ.’ Yakɔb ye gbeye, ejakaa e susu kaa Esau ma nɛ e ba ye e kɛ e weku ɔ awi. Yakɔb sɔle ha Yehowa. E de Yehowa ke: ‘I kpa mo pɛɛ, ko ha nɛ ye nyɛmi ɔ nɛ ye mi awi.’ E nɔ jena a, Yakɔb ya ke Esau ní. E ha lɛ jijɔhi, apletsihi, nahi, afukpɔngɔhi, kɛ tejihi fuu.

Jamɛ a nyɔ ɔ mi benɛ Yakɔb pɛ ngɛ he ko ɔ, e na bɔfo ko! Bɔfo ɔ ba tua Yakɔb, nɛ mɛ ni enyɔ ɔmɛ tsuo a nu a sibi pani nya. A hɛɛ mi jã hluu kɛ ya si makɛ. E ngɛ mi kaa Yakɔb plaa mohu lɛɛ, se e ngmɛɛ we bɔfo ɔ he. Bɔfo ɔ de lɛ ke: ‘Ngmɛɛ ye he nɛ ma je.’ Se Yakɔb de bɔfo ɔ ke: ‘Ja o jɔɔ mi loko ma ngmɛɛ o he.’

Nyagbenyagbe ɔ, bɔfo ɔ jɔɔ Yakɔb. Lɔ ɔ se ɔ, Yakɔb na kaa Yehowa be hae nɛ Esau nɛ ye lɛ awi.

Jamɛ a mɔtu ɔ, Yakɔb na kaa Esau kɛ nyumuhi 400 nɛ piɛɛ e he ɔ ma ngɛ tsitsaa. Yakɔb sɛ e weku ɔ hlami nɛ e ya kpla si ha e nyɛminyumu ɔ si kpaago. Esau ma fo kɛ ya ná Yakɔb, nɛ e pee lɛ atuu. Mɛ ni enyɔ ɔmɛ tsuo a bɔni ya fomi. Jehanɛ lɛɛ tue mi jɔmi ba a kpɛti. Anɛ o susu kaa Yehowa bua jɔ bɔ nɛ Yakɔb plɛ kɛ tsu sane nɛ ɔ he ní ha a he lo?

Pee se ɔ, Esau ho e we mi ya, nɛ Yakɔb hu ho e we mi ya. Yakɔb fɔ binyumuhi 12. Mɛ ji Ruben, Simeon, Levi, Yuda, Dan, Naftali, Gad, Asha, Isaka, Zebulɔn, Yosɛf, kɛ Benyamin. Yehowa gu Yakɔb binyumu ɔmɛ a kpɛti nɔ kake nɔ kɛ baa e we bi a yi. E biɛ ji Yosɛf. Anɛ o le blɔ nɔ nɛ e gu kɛ pee jã lo? Ha nɛ waa hyɛ.