Israel bi ɔmɛ je Yehowa se nɛ a ya bɔni lakpa mawuhi jami ekohu. Midian bi ɔmɛ ju Israel bi ɔmɛ a lohwehi, nɛ a puɛ a ngmɔhi jeha kpaago. Enɛ ɔ he ɔ, Israel bi ɔmɛ ya laa a he ngɛ tɛ puɔhi a mi kɛ yokuhi a nɔ, konɛ Midian bi ɔmɛ nɛ a ko ná a he blɔ. Israel bi ɔmɛ kpa Yehowa pɛɛ kaa e ye bua mɛ. Lɔ ɔ he ɔ, Yehowa tsɔ bɔfo ko kɛ ya niheyo ko nɛ a tsɛɛ lɛ ke Gideon ɔ ngɔ. Bɔfo ɔ de lɛ ke: ‘Yehowa hla mo kaa tatsɛ kpanaa.’ Gideon bi lɛ ke: ‘Anɛ imi nɛ ɔ, ma nyɛ ma kpɔ̃ Israel lo? Tsa pi nɔ ko kulaa ji mi.’

Kɛ Gideon ma plɛ kɛ le kaa Yehowa hla lɛ kɛɛ? E ngɔ to he womi kɛ fɔ zugba, nɛ e de Yehowa ke: ‘Ke i te si mɔtu, nɛ i na kaa bɔ́ nɛ kɛ pue to he womi ɔ nɔ, se zugba a lɛɛ e gbli ɔ, lɛɛ ma na kaa o suɔ nɛ ma kpɔ̃ Israel.’ E nɔ jena a, to he womi ɔ pɔ se zugba a lɛɛ e gbli! Se Gideon kpale de Yehowa ke, e maa suɔ kaa ke je na a, to he womi ɔ nɛ gbli, konɛ zugba a mohu nɛ pɔ. Benɛ Yehowa ha nɛ e ba mi jã pɛpɛɛpɛ ɔ, Gideon he ye kaa Yehowa hla lɛ niinɛ. E bua e ta buli ɔmɛ a nya konɛ a kɛ Midian bi ɔmɛ nɛ ya hwu ta.

Yehowa de Gideon ke: ‘Ma ha nɛ Israel bi ɔmɛ maa ye kunimi. Se akɛnɛ o ta buli ɔmɛ a he hiɛ he je ɔ, nyɛ ma susu kaa nyɛ nitsɛmɛ nyɛ he wami nya nɛ nyɛ ye kunimi. Lɔ ɔ he ɔ, de mɛ ke, nɔ fɛɛ nɔ nɛ ngɛ gbeye yee ɔ nɛ kpale kɛ ho we mi ya.’ Enɛ ɔ he ɔ, ta buli 22,000 kpale a se kɛ ho a wehi a mi ya, nɛ e piɛ nimli 10,000. Yehowa kpale de Gideon ke: ‘Loloolo ɔ, ta buli ɔmɛ a he hiɛ tsɔ. Mo kpaka mɛ kɛ ba pa a nya, nɛ o de mɛ nɛ a nu nyu ngɛ pa a mi. Ke a ngɛ nyu ɔ nue ɔ, moo to nihi nɛ a hɛ ngɛ a he nɔ, nɛ a ngɛ a he nyɛli ɔmɛ blɔ hyɛe ɔ a he hɛ, nɛ o hla mɛ pɛ.’ Benɛ a ngɛ nyu ɔ nue ɔ, nimli 300 pɛ nɛ a hɛ ngɛ a he nɔ. Yehowa wo si kaa e ma ha nɛ nimli nɛ ɔmɛ nɛ a he pi ɔ maa ye Midian ta buli 135,000 ɔmɛ a nɔ kunimi.

Jamɛ a nyɔ ɔ mi ɔ, Yehowa de Gideon ke: ‘Be nɛ e sa kaa o tua Midian bi ɔmɛ ji nɛ ɔ nɛ!’ Gideon ha e ta buli ɔmɛ a ti nɔ fɛɛ nɔ bɛ, kɛ buɛ nguahi nɛ jatɛ ngɛ mi. E de mɛ ke: ‘Nyɛɛ hyɛ mi, nɛ bɔ nɛ ma pee ɔ, nyɛ hu nyɛɛ pee jã nɔuu.’ Gideon kpa e bɛ ɔ, nɛ e ngɔ buɛ ɔ nɛ e hɛɛ ngɛ e dɛ ɔ kɛ fia si, kɛkɛ nɛ e wo jatɛ ɔ nɔ, nɛ e kpa ngmlaa ke: ‘Yehowa kɛ Gideon klaate ɔ ji nɛ ɔ nɛ!’ Nimli 300 nɛ piɛɛ e he ɔ hu pee jã nɔuu. Midian bi ɔmɛ a tsui po, nɛ a tu fo kɛ gu he slɔɔtoslɔɔtohi. Lejɛ ɔ pee gidigidi, nɛ Midian bi ɔmɛ sɔuu hia klaate kɛ wo a sibi a he. Yehowa kpale ye bua Israel bi ɔmɛ nɛ a ye a he nyɛli ɔmɛ a nɔ kunimi ekohu.

Israel no ko hi si nɛ a tsɛɛ lɛ ke Ɛlkana. E ngɛ yihi enyɔ. A biɛ ji Hana kɛ Pɛnina. Ɛlkana suɔ Hana pe Pɛnina. Pɛnina fɔ bimɛ fuu se Hana lɛɛ e fɔ we. Enɛ he ɔ, Pɛnina yeɔ Hana he fɛu be fɛɛ be. Daa jeha a, Ɛlkana kɛ e weku ɔ yaa Yehowa we ɔ ngɛ Shilo, nɛ a ya jaa Mawu. Be ko nɛ a ngɛ lejɛ ɔ, Ɛlkana yɔse kaa e yo nɛ e suɔ lɛ wawɛɛ nɛ ji Hana a pee mɔbɔmɔbɔ. E de Hana ke: ‘Hana, i kpa mo pɛɛ, ko fo ya. O le kaa o nɔ́ ji mi, nɛ i suɔ mo.’

Pee se ɔ, Hana je nɛ e ya sɔle. Benɛ e ngɛ sɔlee ɔ, e ngɛ ya foe kɛ ngɛ Yehowa pɛɛ kpae konɛ e ye bua lɛ. E wo Yehowa si ke: ‘Yehowa, ke o ha nɛ i fɔ binyumu ɔ, ma ngɔ lɛ kɛ ha mo, nɛ e ma sɔmɔ mo e wami be tsuo.’

Benɛ Osɔfo Nɔkɔtɔma Eli na Hana nɛ e ngɛ ya foe ɔ, e susu kaa e de dã. Hana de lɛ ke: ‘Ye nyɔmtsɛ, i nui dã. Nɔ́ ko lɛ ngɛ mi haoe wawɛɛ, nɛ i ngɛ Yehowa dee.’ Eli na kaa nɔ́ nɛ e susuɔ dɛ. Lɔ ɔ he ɔ, e de Hana ke: ‘Mawu nɛ ha mo nɔ́ nɛ o ngɛ hlae ɔ.’ Hana tsui nɔ e mi, nɛ e je. E sui jeha nɛ Hana fɔ binyumu, nɛ e wo lɛ biɛ ke Samuɛl. Hyɛ bɔ nɛ Hana bua maa jɔ ha.

Hana hɛ ji si nɛ e wo Yehowa a nɔ. Benɛ e po Samuɛl nyɔ nɔuu ɔ, e ngɔ lɛ kɛ ho Yehowa we ɔ ya konɛ e ya sɔmɔ ngɛ lejɛ ɔ. Hana de Eli ke: ‘Binyumu nɛ i sɔle kɛ bi Mawu ke e ha mi ɔ ji nɛ ɔ nɛ. I ngɔ lɛ kɛ ba ha Yehowa konɛ e sɔmɔ lɛ e wami be tsuo.’ Daa jeha a, Ɛlkana kɛ Hana ya slaa Samuɛl nɛ a haa lɛ tade ehe. Yehowa jɔɔ Hana nɛ e fɔ binyumuhi etɛ, kɛ yihi enyɔ kɛ piɛɛ he.