Israel bi ɔmɛ kpale kua Yehowa nɛ a ya bɔni lakpa mawuhi jami. Se benɛ Amon bi ɔmɛ ba tua Israel bi ɔmɛ nɛ a kɛ mɛ hwu ta a, jamɛ a lakpa mawu ɔmɛ nyɛ we nɛ a ye bua mɛ. Israel bi ɔmɛ na nɔ́ jeha babauu. Nyagbenyagbe ɔ, a de Yehowa ke: ‘Wa pee yayami kɛ si mo. Wa kpa mo pɛɛ nɛ o kpɔ̃ wɔ kɛ je wa he nyɛli ɔmɛ a dɛ mi.’ Israel bi ɔmɛ ku amagahi nɛ a ngɛ jae ɔ tsuo, nɛ a bɔni Yehowa jami ekohu. Yehowa sume nɛ a na nɔ́ hu.

Yehowa hla tatsɛ ko nɛ a tsɛɛ lɛ ke Yefta kaa e nyɛɛ Israel bi ɔmɛ a hɛ mi nɛ a kɛ Amon bi ɔmɛ nɛ ya hwu ta. Yefta de Yehowa ke: ‘I ngɛ mo si woe kaa ke o ye bua wɔ nɛ wa ye kunimi ngɛ ta nɛ ɔ mi, nɛ i ba su we mi ɔ, kekleekle nɔ nɛ maa je kpo kɛ je ye we ɔ mi kɛ ba kpee mi ɔ, ma ngɔ lɛ kɛ ha mo.’ Yehowa bu Yefta sɔlemi ɔ tue, nɛ e ye bua lɛ nɛ e ye kunimi ngɛ ta a mi.

Benɛ Yefta ma we mi ɔ, e biyo, nɛ ji bi kake too nɛ e ngɛ ɔ ji kekleekle nɔ nɛ je kpo kɛ ba kpee lɛ. E biyo ɔ ngɛ akasawa fiae nɛ e ngɛ doe. Kɛ Yefta maa pee kɛɛ? E kai si nɛ e wo ɔ, nɛ e de ke: ‘Ao! Ye biyo. O tsɔ ye tsui kpa. I wo Yehowa si. Lɔ ɔ he ɔ, e sa nɛ ma ngɔ mo kɛ ya Yehowa we ɔ ngɛ Shilo, konɛ o ya sɔmɔ ngɛ lejɛ ɔ.’ Se e biyo ɔ de lɛ ke: ‘Papaa, ke o wo Yehowa si ɔ, e sa nɛ o ye nɔ. Nɔ́ nɛ i suɔ nɛ o pee ha mi pɛ ji kaa, o ngmɛ mi blɔ nɛ i kɛ ye huɛmɛ yihewi ɔmɛ nɛ wa ya hi yoku ɔmɛ a nɔ nyɔhiɔ enyɔ. Lɔ ɔ se ɔ, ma ya.’ Daa jeha a, Yefta biyo ɔ huɛmɛ ɔmɛ ya slaa lɛ ngɛ Shilo. E ye anɔkuale, nɛ e sɔmɔ ngɛ Yehowa we ɔ kɛ ya si benɛ e gbo.

Osɔfo Nɔkɔtɔma Eli ngɛ binyumuhi enyɔ. Mɛ hu a sɔmɔ kaa osɔfohi ngɛ Yehowa we ɔ. A tsɛɛ mɛ ke Hofni kɛ Finihas. A yi Yehowa mlaa amɛ a nɔ, nɛ a peeɔ ni ɔmɛ ní yayamihi. Ke Israel bi ɔmɛ ma afɔle sami ha Yehowa a, Hofni kɛ Finihas jeɔ lo kpakpa amɛ nɛ a yeɔ. Eli nuɔ níhi tsuo nɛ e binyumu ɔmɛ peeɔ ɔ, se e de we mɛ nɔ́ ko. Anɛ Yehowa maa ngmɛ blɔ nɛ nɔ́ nɛ ɔ nɛ hi nɔ yae lo?

E ngɛ mi kaa Hofni kɛ Finihas wa pe Samuɛl kulaa mohu lɛɛ, se Samuɛl pee we e ní kaa mɛ. Yehowa suɔ Samuɛl sane. Ligbi ko nɛ Samuɛl hwɔɔ si nyɔ mi ɔ, e nu nɛ gbi ko tsɛ lɛ. Kɛkɛ nɛ e tu fo kɛ ho Eli ngɔ ya, nɛ e de lɛ ke: ‘I ba!’ Se Eli de lɛ ke: ‘I tsɛ we mo. Moo kpale ya hwɔ si.’ Samuɛl kpale ya hwɔ si. Gbi ɔ tsɛ lɛ si enyɔne, nɛ Eli kpale de lɛ ke e ya hwɔ si. Benɛ gbi ɔ tsɛ Samuɛl si etɛne ɔ, Eli yɔse kaa Yehowa lɛ ngɛ Samuɛl tsɛe ɔ nɛ. Eli de Samuɛl ke, ke e nu gbi ɔ ekohu ɔ, e de ke: ‘Yehowa, moo tu munyu. O tsɔlɔ ɔ ngɛ mo tue bue.’

Samuɛl kpale ya hwɔ si. Kɛkɛ nɛ e nu nɛ gbi ɔ tsɛ lɛ ke: ‘Samuɛl! Samuɛl!’ Nɛ e he nɔ ke: ‘Moo tu munyu. O tsɔlɔ ɔ ngɛ mo tue bue.’ Yehowa de lɛ ke: ‘Mo de Eli ke, ma gbla e kɛ e weku ɔ tsuo a tue. Ejakaa e le kaa e binyumu ɔmɛ ngɛ ní yayahi pee ngɛ ye we ɔ, se e pee we sane ɔ he nɔ́ ko.’ E nɔ jena a, Samuɛl ya bli sɔlemi we ɔ sinya amɛ kaa bɔ nɛ e peeɔ daa ligbi ɔ. E ye gbeye kaa e ma de osɔfo nɔkɔtɔma a nɔ́ nɛ Yehowa de lɛ ɔ. Se Eli tsɛ lɛ nɛ e bi lɛ ke: ‘Ye bi, mɛni Yehowa de mo? Mo de mi nɔ́ fɛɛ nɔ́.’ Lɔ ɔ he ɔ, Samuɛl de Eli nɔ́ fɛɛ nɔ́ nɛ Yehowa de lɛ ɔ.

Benɛ Samuɛl ngɛ wae ɔ, Yehowa si we lɛ. Israel bi ɔmɛ tsuo ba ná le kaa Yehowa hla Samuɛl kaa gbalɔ kɛ kojolɔ.