Yehowa de Samuɛl ke: ‘Moo ya Jɛse we ɔ mi. E binyumu ɔmɛ a ti nɔ kake ma ba ye matsɛ ngɛ Israel.’ Lɔ ɔ he ɔ, Samuɛl ho Jɛse we ɔ mi ya. Benɛ e ya na Jɛse bi tɛte ɔ, e de e he ke: ‘I susu kaa niheyo nɛ ɔ lɛ maa pee matsɛ ɔ nɛ.’ Se Yehowa de Samuɛl ke, tsa pi nɔ nɛ ɔ. Yehowa de lɛ ke: ‘Imi lɛɛ i hyɛɛ nɔmlɔ tsui mi, se pi bɔ nɛ e nɔmlɔ tso ɔ ngɛ ha.’

Jɛse kpale ngɔ e binyumuhi kakaaka ekpa kɛ ba tsɔɔ Samuɛl. Se Samuɛl de lɛ ke: ‘Yehowa hlɛ a ti nɔ ko nɔ ko. Anɛ o ngɛ binyumu kpahi lo?’ Jɛse ha heto ke: ‘E piɛ David, lɛ ji jokuɛ ngɛ ye binyumu ɔmɛ a kpɛti. E ngɛ ye to ɔmɛ a nɔ hyɛe ngɛ nga a nɔ.’ Benɛ David ba a, Yehowa de Samuɛl ke: ‘Nɔ nɛ i hla ji nɛ ɔ nɛ!’ Samuɛl plɛ nu kɛ pue David yi mi kɛ tsɔɔ kaa e pɔ lɛ nu. Lɛ nɛ e maa ye Israel nɔ matsɛ hwɔɔ se.

Pee se ɔ, Israel bi ɔmɛ kɛ Filisti bi ɔmɛ hwu ta. A ngɛ ta bulɔ ko nɛ e je oblai. E biɛ ji Goliat. Daa ligbi ɔ, Goliat yeɔ Israel bi ɔmɛ a he fɛu. Goliat kpa ngmlaa kɛ de ke: ‘Nyɛ ha nɛ nyɛ kpɛti nɔ kake nɛ e kɛ mi nɛ ba nɔ kunɔ. Ke e gbe mi ɔ, wa ma sɔmɔ nyɛ kaa nyɔguɛhi. Se ke i ye e nɔ kunimi lɛɛ, nyɛ maa pee wa nyɔguɛhi.’

David ya he nɛ Israel ta buli ɔmɛ ngɛ ɔ, nɛ e ngɔ niye ní ya ha e nyɛmimɛ ɔmɛ. Mɛ hu ta buli ji mɛ. David nu nɔ́ nɛ Goliat de ɔ, kɛkɛ nɛ e de ke: ‘Ma nyɛ ma gbe lɛ!’ Matsɛ Sɔɔl de lɛ ke: ‘Jokuɛ ji mo.’ David ha lɛ heto ke: ‘Yehowa maa ye bua mi.’

Sɔɔl ngɔ e ta hwumi tade ɔ kɛ ha David kaa e wo, se David de lɛ ke: ‘I be nyɛe ma wo kɛ hwu ta.’ David wo e amlami ɔ, nɛ e ho pa ko nya ya. E ya kukuɔ tɛ longolongo enuɔ kɛ wo kotoku nɛ e kpla a mi. Kɛkɛ nɛ David tu fo konɛ e kɛ Goliat nɛ ya kpe. Goliat kpa ngmlaa ke: ‘Mo jokuɛ nyafii nɛ ɔ. Moo lɛɛ moo ba hiɛ ɔ, ma ngɔ mo kɛ ha lohwe pɛlitsɛmɛ kɛ pu mi lohwehi nɛ a maa ye o lo.’ Se David yi gbeye. Lɛ hu e kpa ngmlaa kɛ de ke: ‘Moo lɛɛ o ma kɛ klaate kɛ akplɔ, se imi lɛɛ i ma ngɛ Yehowa biɛ mi. Pi o kɛ wɔ nɛ ngɛ hwue, se Mawu o kɛ ngɛ hwue ɔ nɛ. Nɔ fɛɛ nɔ nɛ ngɛ hiɛ ɔ maa na kaa Yehowa ngɛ he wami kulaa pe klaate loo akplɔ. E ma ha nɛ wa maa ye nyɛ nɔ kunimi.’

David ngɔ tɛ ɔ kake kɛ wo amlami ɔ mi, nɛ e fɔ̃ wawɛɛ. Yehowa ha nɛ tɛ ɔ ya ná Goliat hɛ nya nɛ tɛ ɔ sɛ e yi mi. Goliat nɔ si, nɛ e gbo. Kɛkɛ nɛ Filisti bi ɔmɛ ma fo. Anɛ mo hu o ngɛ hemi kɛ yemi ngɛ Yehowa mi kaa David lo?

Benɛ David gbe Goliat se ɔ, Matsɛ Sɔɔl pee lɛ e ta buli ɔmɛ tsuo a nya tsɛ. David ye kunimi ngɛ tahi fuu a mi, nɛ e ba he biɛ. Be fɛɛ be nɛ David maa je ta kɛ ba a, yi ɔmɛ ma la nɛ a maa do. A laa ke: ‘Sɔɔl gbe akpehi, se David lɛɛ e gbe akpe nyɔngmahi!’ Enɛ ɔ ha nɛ Sɔɔl hɛ kɔ̃ David nɔ, nɛ e ka kaa e maa gbe lɛ.

David le saku fiami wawɛɛ nitsɛ. Ligbi ko ɔ, benɛ David ngɛ saku fiae ha Matsɛ Sɔɔl ɔ, matsɛ ɔ fɔ akplɔ konɛ e kɛ gbe David. Se David yu e he, nɛ akplɔ ɔ ya sɛ gbogbo ɔ mi. Lɔ ɔ se ɔ, Sɔɔl ka si abɔ kaa e maa gbe David. Nyagbenyagbe ɔ, David tu fo kɛ ho nga a nɔ ya, nɛ e ya laa e he ngɛ lejɛ ɔ.

Matsɛ Sɔɔl ngɔ ta buli 3,000 kɛ piɛɛ e he nɛ a ya ngɛ David hlae. Sɔɔl ya sɛ tɛ puɔ nɛ David kɛ e ni ɔmɛ laa ngɛ mi ɔ mi. David we bi ɔmɛ de kɛ wo e tue mi ke: ‘Enɛ ɔ lɛɛ o ná he blɔ nɛ o kɛ maa gbe Sɔɔl.’ David pee blɛuu nɛ e ya po matsɛ ɔ tade ɔ nya. Se Matsɛ Sɔɔl nui. Pee se ɔ, e hao David wawɛɛ kaa e bui matsɛ nɛ Yehowa pɔ lɛ nu ɔ. E kplɛɛ we nɛ e we bi ɔmɛ nɛ a gbe Sɔɔl. Benɛ Sɔɔl je kpo ngɛ tɛ puɔ ɔ mi kɛ yaa a, David tsɛ lɛ nɛ e de lɛ ke jinɛ e ná he blɔ kaa e maa gbe lɛ, se e gbi lɛ. Anɛ nɔ́ nɛ David pee ɔ ha nɛ matsɛ Sɔɔl kpa e se nyɛɛ mi lo?

Ohoo. Sɔɔl ya nɔ nɛ e hla David se blɔ konɛ e gbe lɛ. Ligbi ko nyɔ mi ɔ, David kɛ e nyɛmi Abishai ya he nɛ Sɔɔl kɛ e ta buli ɔmɛ ngɛ ɔ, se nɔ ko nɛ́ mɛ. Jamɛ be ɔ mi ɔ, Abna nɛ ji, nɔ nɛ buɔ matsɛ ɔ he ɔ hwɔ mahe. Abishai de David ke: ‘Enɛ ɔ lɛɛ wa ná he blɔ! Ha nɛ ma gbe lɛ.’ David de lɛ ke: ‘Yehowa maa gbla Sɔɔl tue. Ha nɛ wa wo e akplɔ ɔ kɛ e nyu tɔ ɔ pɛ nɛ waa je.’

Yoku ko ngɛ he nɛ Sɔɔl kɛ ta buli ɔmɛ ya to si ngɛ ɔ. David kuɔ yoku ɔ, nɛ e kpa ngmlaa kɛ de ke: ‘Abna, mɛni he je nɛ o bui o matsɛ ɔ he? Jije Sɔɔl nyu tɔ ɔ kɛ akplɔ ɔ ngɛ?’ Benɛ Sɔɔl nu David gbi ɔ, e de ke: ‘O ná he blɔ nɛ o maa gbe mi se o gbi mi. I le kaa ye se ɔ, mo nɛ o maa ye matsɛ ngɛ Israel.’ Sɔɔl kpale kɛ ho matsɛ we ɔ ya. Se tsa pi Sɔɔl weku li ɔmɛ tsuo nɛ a sume David sane.