Benɛ a wo Solomon matsɛ ngɛ Israel ɔ, Yehowa bi lɛ ke: ‘Mɛni o suɔ kaa ma ha mo?’ Solomon de Yehowa ke: ‘I wɛ, nɛ i li nɔ́ nɛ i ngɛ pee. I kpa mo pɛɛ mo ha mi nile nɛ ma kɛ hyɛ o ma a nɔ.’ Yehowa de Solomon ke: ‘Akɛnɛ o bi ke ma ha mo nile he je ɔ, o maa le ní pe nɔ fɛɛ nɔ ngɛ zugba a nɔ. O ma ná sika, nɛ ke o bu mi tue ɔ, o se maa kɛ loko o ma gbo.’

Solomon je sɔlemi we ɔ mami sisi. A kɛ sika tsu, sika hiɔ, tsohi, kɛ tɛhi nɛ a he jua wa lɛ ma tsu ɔ. Nyumuhi kɛ yihi akpehi abɔ nɛ a le ga ní tsumihi lɛ a ma sɔlemi we ɔ. Jeha kpaago se ɔ, a ma tsu ɔ ta. Be su nɛ a maa jɔɔ sɔlemi ɔ we ɔ nɔ kɛ ha Yehowa. Afɔle sami la tɛ ngɛ sɔlemi we ɔ. A ngɔ níhi nɛ a kɛ maa sã afɔle kɛ pue afɔle sami la tɛ ɔ nɔ. Solomon kpla si ngɛ afɔle sami la tɛ ɔ hɛ mi nɛ e sɔle ke: ‘Oo Yehowa, sɔlemi we nɛ ɔ klee we ha mo, nɛ e be fɛu bɔ nɛ e maa sa o hɛ mi, se wa kpa mo pɛɛ, ke wa ba ja mo ngɛ hiɛ ɔ, loo wa ba hiɛ ɔ nɛ wa sɔle ha mo ɔ, moo bu wɔ tue.’ Kɛ Yehowa na sɔlemi we ɔ, kɛ sɔlemi nɛ Solomon sɔle ɔ ha kɛɛ? Benɛ Solomon sɔle ta pɛ, kɛkɛ nɛ la je hiɔwe ba sã afɔle ɔ ngɛ afɔle sami la tɛ ɔ nɔ. Enɛ ɔ tsɔɔ kaa Yehowa bua jɔ sɔlemi we ɔ he. Benɛ Israel bi ɔmɛ na nɔ́ nɛ ya nɔ ɔ, a bua jɔ.

Israel bi ɔmɛ tsuo kɛ nihi nɛ a ngɛ ma kpahi a nɔ po ba le Matsɛ Solomon ejakaa e ngɛ nile wawɛɛ. Nihi nɛ a ngɛ nyagbahi yaa Solomon ngɔ nɛ e yeɔ bua mɛ. Sheba manyɛ ɔ po ya Solomon ngɔ nɛ e ya bi lɛ sanehi nɛ a mi wa konɛ e hyɛ kaa Solomon ma nyɛ ma ha lɛ heto lo. Benɛ Solomon ha lɛ heto ɔ, e de ke: ‘Benɛ a de mi o he sane ɔ, i he we yi. Se piɔ lɛɛ imi nitsɛ i na kaa o le ní pe bɔ nɛ a de ɔ po. Yehowa o Mawu ɔ jɔɔ mo.’ Níhi ya nɔ saminya ha Israel bi ɔmɛ, nɛ mɛ tsuo a bua jɔ. Se níhi ba tsake.

Benɛ Solomon ngɛ Yehowa sɔmɔe ɔ, Israel bi ɔmɛ ngɛ tue mi jɔmi. Se Solomon ya ngɔ yihi fuu nɛ a je ma kpahi a nɔ. Yi nɛ ɔmɛ jaa amagahi. Bɔɔbɔɔbɔɔ ɔ, Solomon tsake, nɛ lɛ hu e bɔni amaga jami. Yehowa mi mi fu, nɛ e de Solomon ke: ‘Pi o weku ɔ pɛ nɛ maa ye Israel ma a nɔ. Ma gba Israel ma a mi enyɔ. O tsɔli ɔmɛ a ti nɔ kake maa ye ma nɛ kle ɔ nɔ, nɛ o weku ɔ maa ye ma nyafii ɔ nɔ.’

Yehowa pee nɔ́ ko kɛ tsɔɔ kaa nɔ́ nɛ e de ɔ maa ba mi. Be ko nɛ Solomon tsɔli ɔmɛ a ti nɔ kake nɛ a tsɛɛ lɛ ke Yeroboam hia blɔ ɔ, e kɛ gbalɔ Ahiya ya kpe. Ahiya gba lɛ nitsɛ e tade nɛ e wo ɔ mi 12, nɛ e de Yeroboam ke: ‘Yehowa ma kpɔ̃ Israel ma a kɛ je Solomon weku ɔ dɛ, nɛ e ma gba mi enyɔ. Moo ngɔ tade nɛ i gba mi ɔ kakaaka nyɔngma ejakaa o maa ye wɛtso nyɔngma nɔ.’ Benɛ Matsɛ Solomon nu sane ɔ, e pee e juɛmi kaa e maa gbe Yeroboam! Enɛ ɔ he ɔ, Yeroboam tu fo kɛ ho Ijipt ya. Pee se ɔ, Solomon ba gbo, nɛ e bi Rehoboam ba ye matsɛ. Yeroboam na kaa e ma nyɛ maa kpale kɛ ho Israel ya.

Israel ma a mi nikɔtɔma amɛ de Rehoboam ke: ‘Ke o kɛ ma mi bi ɔmɛ hi si saminya a, nɔ́ fɛɛ nɔ́ nɛ o ma de mɛ ɔ, a maa pee.’ Se Rehoboam huɛmɛ nihewi ɔmɛ de lɛ ke: ‘E sa nɛ o wa mɛ yi mi! Ha nɛ a tsu ní wawɛɛ pe kekle ɔ po!’ Rehoboam bu nɔ́ nɛ e huɛmɛ ɔmɛ de ɔ tue. E wa ma mi bi ɔmɛ yi mi, nɛ mɛ hu a tsɔ atua. Yeroboam ba pee matsɛ kɛ ha wɛtso nyɔngma amɛ, nɛ ji Israel matsɛ yemi ɔ. Wɛtso enyɔ nɛ piɛ ɔ ji Yuda matsɛ yemi ɔ nɛ. Mɛɛ lɛɛ a ti si kɛ wui Rehoboam. Jehanɛ lɛɛ Israel wɛtso 12 ɔ mi gba.

Yeroboam sume nɛ e ma mi bi ɔmɛ nɛ a ya ja Mawu ngɛ Yerusalɛm, ejakaa Yerusalɛm ngɛ Rehoboam nɔ yemi ɔ sisi. O le nɔ́ he je lo? Yeroboam ye gbeye kaa e ma mi bi ɔmɛ ma kua lɛ, nɛ a ma ya fĩ Rehoboam se. Enɛ ɔ he ɔ, e pee sika tsu na bi enyɔ, nɛ e de e ma mi bi ɔmɛ ke: ‘Yerusalɛm kɛ tsɔ. Nyɛ ma nyɛ ma ja Mawu ngɛ hiɛ ɔ.’ Ma mi bi ɔmɛ bɔni sika tsu na bi ɔmɛ jami nɛ a hɛ je Yehowa nɔ ekohu.