Matsɛmɛ nɛ a ye Israel wɛtso nyɔngma amɛ a nɔ ɔ a kpɛti nihi fuu pee ní yayahi. Se Ahab lɛɛ, e pee yayami pe mɛ tsuo. Ahab ngɔ yo yiwutsotsɛ ko nɛ e jaa Baal. A tsɛɛ e yo ɔ ke Jezebɛl. Ahab kɛ Jezebɛl ha nɛ nihi fuu ja Baal, nɛ a gbe Yehowa gbali ɔmɛ. Mɛni Yehowa pee? Yehowa ngɔ sɛ gbi ko kɛ ha gbalɔ Eliya konɛ e ya de Ahab.

Eliya de Matsɛ Ahab kaa akɛnɛ e peeɔ ní yayahi he je ɔ, hiɔmi be nɛe ngɛ Israel. Hiɔmi nɛ́ jeha etɛ kɛ se. Níhi nɛ a du ɔ hu gbo, nɛ hwɔ ba ma a mi. Pee se ɔ, Yehowa tsɔ Eliya kɛ ya Ahab ngɔ ekohu. Matsɛ Ahab de Eliya ke: ‘O ngɛ mi haoe! Mo lɛ o ngɔ ní nɛ ɔmɛ tsuo kɛ ba.’ Eliya de Ahab ke: ‘Tsa pi imi nɛ i ha nɛ hiɔmi nɛ́. Baal nɛ o ngɛ jae he je nɛ hiɔmi ɔ nɛ́ ɔ nɛ. Waa pee nɔ́ ko nɛ waa hyɛ. Mo bua ma a kɛ Baal jali ɔmɛ a nya ngɛ Kamɛl Yoku ɔ nɔ.’

Ni ɔmɛ bua a he nya ngɛ yoku ɔ nɔ. Eliya de mɛ ke: ‘Nyɛɛ ma nyɛ juɛmi nya si. Ke Yehowa ji anɔkuale Mawu ɔ, lɛɛ nyɛɛ nyɛɛ e se. Ke Baal hu ɔ, nyɛɛ nyɛɛ e se. Nɔ́ nɛ i suɔ nɛ waa pee ji nɛ ɔ nɛ. Nyɛ ha nɛ Baal gbali 450 ɔmɛ nɛ a gbe lohwe, nɛ a kɛ fɔ afɔle sami la tɛ nɔ, nɛ a tsɛ a mawu ɔ. Konɛ imi hu ma gbe lohwe kɛ fɔ afɔle sami la tɛ nɔ, nɛ ma tsɛ Yehowa. Nɔ nɛ ma ha nɛ la ma ba sã afɔle ɔ ji anɔkuale Mawu ɔ nɛ.’ Ni ɔmɛ tsuo kplɛɛ nɔ.

Baal gbali ɔmɛ gbe lohwe kɛ fɔ la tɛ ɔ nɔ. A kpa ngmlaa kɛ tsɛ a mawu ɔ ligbi ɔ tsuo, nɛ a de ke: ‘Baal lee, moo bu wɔ tue oo!’ Benɛ Baal ha we heto ɔ, Eliya ye Baal he fɛu. E de ke: ‘Nyɛ kpa ngmlaa wawɛɛ kɛ tsɛ lɛ. Eko ɔ, e hwɔ mahe, ja nɔ ko tsɛ̃ɛ̃ lɛ.’ Baal gbali ɔmɛ kpa ngmlaa hluu kɛ ya si gbɔkuɛ. Se loloolo ɔ, Baal ha we mɛ heto.

Eliya hu ngɔ e lohwe ɔ kɛ fɔ afɔle sami la tɛ ko nɔ, nɛ e plɛ nyu kɛ pue nɔ. Eliya sɔle nɛ e de Yehowa ke: ‘Yehowa, i kpa mo pɛɛ, ha nɛ ni ɔmɛ nɛ a na kaa mo ji anɔkuale Mawu ɔ nɛ.’ Amlɔ nɔuu ɔ, Yehowa ha nɛ la je hiɔwe ba sã afɔle ɔ. Ni ɔmɛ de ke: ‘Yehowa ji anɔkuale Mawu ɔ nɛ!’ Eliya de ni ɔmɛ ke: ‘Nyɛ ko ha nɛ Baal gbali ɔmɛ nɛ a tu fo!’ Jamɛ a ligbi ɔ, a gbe Baal gbali 450 ɔmɛ tsuo.

Benɛ Eliya na bɔku nyafii ko ngɛ wo ɔ nɔ ɔ, e de Ahab ke: ‘Hiɔmi ngua ko ma. Moo sɛ o zugba lɛ ɔ mi nɛ o ho we mi ya.’ Bɔku yumu ko ha hiɔwe, nɛ kɔɔhiɔ bɔni fiami, nɛ hiɔmi bɔni nɛmi wawɛɛ. Jehanɛ lɛɛ sapu ɔ se po. Ahab wo e zugba lɛ ɔ fo wawɛɛ. Yehowa ye bua Eliya nɛ e tu fo pe zugba lɛ ɔ po! Se anɛ Eliya haomi ɔmɛ tsuo a se po lo? Ha waa hyɛ.

Benɛ Jezebɛl nu nɔ́ nɛ ba Baal gbali ɔmɛ a nɔ ɔ, e mi mi fu wawɛɛ. E sɛ ke a ya de Eliya ke: ‘Hwɔ ɔ, o ma gbo kaa bɔ nɛ Baal gbali ɔmɛ gbo ɔ.’ Eliya tsui po wawɛɛ nɛ e ma fo kɛ ho nga a nɔ ya. E sɔle ha Yehowa ke: ‘Yehowa, I be nyɛe hu. Ha nɛ ma gbo kɛkɛ.’ Pɔ tɔ Eliya he, lɔ ɔ he ɔ, e ya hi tso ko sisi nɛ e hwɔ mahe.

Bɔfo ko tsɛ̃ɛ̃ lɛ, nɛ e de lɛ ke: ‘Tee si nɛ o ye ní.’ Eliya na nyu kɛ kplu, kɛ abolo nɛ fɔɔ si ngɛ tɛ ko nɛ e dɔ la nɔ. E ye ní nɛ e nu nyu, nɛ e kpale hwɔ si. Bɔfo ɔ ya tsɛ̃ɛ̃ lɛ ekohu, nɛ e de lɛ ke: ‘Moo ye ní. E sa nɛ o ná he wami konɛ o tsa o blɔ hiami ɔ nɔ.’ Enɛ ɔ he ɔ, Eliya kpale ye ní ɔ. Lɔ ɔ se ɔ, e hia blɔ ligbi 40 nyɔ kɛ pia kɛ ya si benɛ e ya su Horeb Yoku ɔ he. Benɛ Eliya ya su lejɛ ɔ, e ya sɛ tɛ puɔ ko mi konɛ e hwɔ si. Se Yehowa kɛ lɛ tu munyu. E bi lɛ ke: ‘Eliya, mɛni o ngɛ pee ngɛ hiɛ ɔ?’ Eliya de Yehowa ke: ‘Israel bi ɔmɛ yi si nɛ a wo mo ɔ nɔ. A ku o we afɔle sami la tɛ ɔmɛ, nɛ a gbe o gbali ɔmɛ. Piɔ lɛɛ a ngɛ hlae nɛ a maa gbe mi.’

Yehowa de Eliya ke: ‘Yaa nɛ o ya da si ngɛ yoku ɔ nɔ.’ Kekleekle ɔ, kɔɔhiɔ ngua ko fia kɛ be ngɛ tɛ puɔ ɔ he. Lɔ ɔ se ɔ, zugba mimiɛ, nɛ la bɔni tsomi. Jehanɛ ɔ, Eliya nu gbi blɛuu ko. E ngɔ e tade ɔ kɛ tsi e hɛ mi, nɛ e ya da si ngɛ tɛ puɔ ɔ nya. Yehowa bi Eliya nɔ́ he je nɛ e ma fo ɔ. Eliya de Yehowa ke: ‘Imi nɔ kake too lɛ piɛ.’ Se Yehowa de Eliya ke: ‘Tsa pi mo nɔ kake too nɛ o piɛ. Nimli 7,000 ngɛ Israel nɛ a ngɛ mi sɔmɔe loloolo. Yaa nɛ o ya pee Elisha gbalɔ ngɛ o nane mi.’ Amlɔ nɔuu ɔ, Eliya ya pee nɔ́ nɛ Yehowa de lɛ ke e pee ɔ. Ke Yehowa de mo ke o pee nɔ́ ko, nɛ o pee ɔ, anɛ o susu kaa Yehowa maa ye bua mo lo? Ee, e maa ye bua mo. Ha nɛ waa hyɛ nɔ́ ko nɛ ba ngɛ sapu be ɔ mi.