Ngɛ sapu be ɔ mi ɔ, Yehowa de Eliya ke: ‘Yaa Zarefat. Yalɔyo ko ngɛ lejɛ ɔ nɛ e ma ha mo niye ní.’ Benɛ Eliya ya su ma a agbo ɔ nya a, e na yalɔyo ohiatsɛ ko nɛ e ngɛ lɛ nya buae. Eliya de yalɔyo ɔ ke e ha lɛ nyu nɛ e nu. Benɛ e yaa yɛ nyu ɔ kɛ ba a, Eliya tsɛ lɛ nɛ e de lɛ ke: ‘I kpa mo pɛɛ nɛ o ha mi abolo bɔɔ ko nɛ ma ye.’ Se yalɔyo ɔ de lɛ ke: ‘Abolo be ye dɛ nɛ ma ha mo eko. Mamu kɛ nu bɔɔ ko pɛ lɛ ngɛ ye dɛ nɛ ma kɛ pee niye ní nɛ i kɛ ye binyumu ɔ waa ye.’ Eliya de yalɔyo ɔ ke: ‘Yehowa wo si kaa ke o pee abolo ha mi ɔ, o mamu ɔ kɛ o nu ɔ be tae kɛ yaa si benɛ hiɔmi maa nɛ ekohu.’

Yalɔyo ɔ ho we mi ya, nɛ e ya pee abolo ha Yehowa gbalɔ ɔ. Yehowa ha we nɛ niye ní nɛ ta yalɔyo ɔ kɛ e binyumu ɔ a dɛ kaa bɔ nɛ e wo si ɔ. Daa nɛ ɔ, e mamu tɔ ɔ kɛ e nu tɔ ɔ hyi.

Se ligbi ko ɔ, haomi ko ba yalɔyo ɔ nɔ. E binyumu ɔ nu hiɔ wawɛɛ nɛ e gbo. E kpa Eliya pɛɛ konɛ e ye bua lɛ. Eliya ngɔ jokuɛ ɔ ngɛ yo ɔ dɛ, nɛ e ngɔ lɛ kɛ ho hiɔwe tsu ko nɔ ya ngɛ yalɔyo ɔ we ɔ mi. E kɛ jokuɛ ɔ fɔ sa ko nɔ, nɛ e sɔle ke: ‘Yehowa, i kpa mo pɛɛ nɛ o ha nɛ jokuɛ ɔ nɛ kpale kɛ ba wami mi.’ Anɛ o le nɔ́ he je nɛ jokuɛ ɔ si nɛ Yehowa ma tle ɔ maa pee nihi nyakpɛ ɔ lo? Nɔ́ he je ji kaa jamɛ a be ɔ mi ɔ, nɔ ko gbo we nɛ a tle lɛ si hyɛ. Jehanɛ hu ɔ, yalɔyo ɔ kɛ e binyumu ɔ, tsa pi Israel bimɛ ji mɛ.

Se jokuɛ ɔ kpale kɛ ba wami mi, nɛ e bɔni mumi womi! Eliya de yalɔyo ɔ ke: ‘Hyɛ! O bi ɔ kpale kɛ ba wami mi.’ Yalɔyo ɔ bua jɔ wawɛɛ, nɛ e de Eliya ke: ‘Mawu nɔmlɔ ji mo niinɛ, ejakaa nɔ́ nɛ Yehowa de mo ke o de ɔ, lɔ ɔ nɛ o deɔ.’

Ligbi ko nɛ Matsɛ Ahab ngɛ e we ɔ mi ngɛ Yezreel nɛ e ngɛ e saflɛ ɔ mi hyɛe ɔ, e na wai ngmɔ ko. Ngmɔtsɛ ɔ biɛ ji Nabot. Ahab suɔ kaa wai ngmɔ ɔ nɛ pee e nɔ́. E bɔ mɔde kaa e ma ha nɛ Nabot nɛ jua wai ngmɔ ɔ ha lɛ. Se Yehowa Mlaa a ngmɛ́ blɔ kaa a jua zugba ko nɛ e ji gbo si ní. Enɛ ɔ he ɔ, Nabot kplɛɛ we kaa e maa jua ngmɔ ɔ kɛ ha Ahab. Anɛ Ahab bua jɔ Nabot he kaa e pee nɔ́ nɛ da lo? Ohoo. Ahab mi mi fu wawɛɛ. Enɛ ɔ he ɔ, e tlɔ tsu mi, nɛ e kua ní yemi.

Ahab yo ji Manyɛ Jezebɛl. Jezebɛl yi mi wa wawɛɛ. Jezebɛl de Ahab ke: ‘Mo ji matsɛ ngɛ Israel. Nɔ́ fɛɛ nɔ́ nɛ o ngɛ hlae ɔ, o nine ma nyɛ maa su nɔ. Ma ha nɛ o nine maa su zugba a nɔ.’ Jezebɛl ngma womi ya ha nikɔtɔma amɛ nɛ a ngɛ ma a mi ɔ. E ngma ngɛ womi ɔ mi kaa Nabot tu munyu kɛ si Mawu. Lɔ ɔ he ɔ, e suɔ nɛ a fiaa lɛ tɛ nɛ a gbe lɛ. Ma a mi nikɔtɔma amɛ pee nɔ́ nɛ Jezebɛl de mɛ ɔ. Jezebɛl de Ahab ke: ‘Nabot gbo. Wai ngmɔ ɔ pee o nɔ́.’

Tsa pi Nabot pɛ ji nɔ nɛ e pee we nɔ́ yayami ko nɛ Jezebɛl gbe lɛ. Jezebɛl gbe nihi fuu nɛ a suɔ Yehowa. E ji wɔ jalɔ, nɛ e pee ní yayahi fuu. Yehowa na ní yayahi tsuo nɛ Jezebɛl pee ɔ. Mɛni Yehowa pee Jezebɛl?

Benɛ Ahab gbo se ɔ, e bi Yehoram ba ye matsɛ. Yehowa tsɔ nyumu ko nɛ a tsɛɛ lɛ ke Yehu konɛ e ya gbla Jezebɛl kɛ e weku ɔ tue.

Yehu hi e zugba lɛ ɔ mi kɛ ya Yezreel nɛ ji he nɛ Jezebɛl ngɛ ɔ. Yehoram sɛ e zugba lɛ ɔ mi, nɛ e kɛ Yehu ya kpe ngɛ blɔ ɔ nɔ, nɛ e bi Yehu ke: ‘Tue mi jɔmi ngɛ wa kpɛti lo?’ Yehu ha lɛ heto ke: ‘Ní yayami ɔmɛ nɛ o nyɛ Jezebɛl ngɛ pee he je ɔ, tue mi jɔmi be nyɛe maa hi wa kpɛti.’ Yehoram ka kaa e maa tu fo kɛ je Yehu he. Se Yehu tsɛ̃ Yehoram kɛ̃ɛ̃, nɛ e gbe lɛ.

Lɔ ɔ se ɔ, Yehu ho Jezebɛl we ɔ mi ya. Se loko Yehu ma ya su lejɛ ɔ, Jezebɛl nu kaa Yehu ma e we ɔ mi. Enɛ ɔ he ɔ, Jezebɛl dla e hɛ mi, nɛ e pee e yi, nɛ e ngɛ mlɛe ngɛ e mɔ ɔ nɔ, ngɛ saflɛ ɔ nya. Benɛ Yehu ya su Jezebɛl we ɔ mi ɔ, Jezebɛl ha we lɛ hɛ mi. Yehu kpa ngmlaa kɛ tsɛ Jezebɛl sɔmɔli ɔmɛ nɛ a daa si ngɛ e kasa nya a ke: ‘Nyɛ sake lɛ kɛ fɔ zugba!’ A tsitsɛɛ Jezebɛl kɛ gu saflɛ ɔ mi, nɛ e nɔ si nɛ e gbo.

Lɔ ɔ se ɔ, Yehu gbe Ahab binyumuhi 70 ɔmɛ tsuo, nɛ e po Baal jami se ngɛ ma a mi. Tse o na kaa Yehowa le nɔ́ fɛɛ nɔ́ nɛ ngɛ nɔ yae ɔ, nɛ ke nihi ngɛ ní yayahi pee ɔ, e gblaa a tue ngɛ be nɛ sa mi.