Benɛ a fia Yerusalɛm gbogbo ɔmɛ ta a, jeha 400 ba be. Osɔfo ko nɛ a tsɛɛ lɛ ke Zakaria kɛ e yo Elizabɛt hi he ko nɛ e kɛ Yerusalɛm ma a he kɛ we. A sɛ gba si himi jeha babauu se a be bi. Ligbi ko ɔ, Zakaria ya sã tsopa kɛ e he via ngɛ sɔlemi we ɔ. Benɛ e ngɛ lejɛ ɔ, bɔfo Gebriɛl je e he si kɛ tsɔɔ lɛ. Zakaria tsui po wawɛɛ. Se Gebriɛl de lɛ ke: ‘Koo ye gbeye. Yehowa ke ma ba de mo sane kpakpa ko. O yo Elizabɛt ma fɔ binyumu nɛ a ma tsɛ lɛ ke Yohane. Yehowa hla Yohane kaa e tsu ní tsumi ko nɛ e he hia wawɛɛ.’ Zakaria bi bɔfo ɔ ke: ‘Kɛ ma plɛ kɛ ná nɔ mi mami kaa nɔ́ nɛ ɔ maa ba mi kɛɛ? Imi lɛɛ i he we yi kaa wa ma nyɛ ma fɔ, ejakaa i kɛ ye yo ɔ tsuo wa bwɔ.’ Gebriɛl de lɛ ke: ‘Mawu lɛ tsɔ mi ke ma ngɔ sɛ gbi nɛ ɔ ba ha mo. Se akɛnɛ o he we mi yi he je ɔ, o be munyu tue kɛ ya si benɛ a ma fɔ bi ɔ.’

Zakaria se ya kɛ ngɛ sɔlemi we ɔ pe daa. Enɛ ɔ he ɔ, benɛ e je kpo ɔ, ni ɔmɛ nɛ a ngɛ mlɛe ngɛ kpo ɔ nɔ ɔ suɔ kaa a maa le nɔ́ he je nɛ e se ya kɛ jã a. Se Zakaria nyɛ we nɛ e tu munyu. E nine pɛ nɛ e kɛ ngɛ okadi pee ha ni ɔmɛ. Enɛ ɔ ha nɛ a na kaa Mawu kɛ Zakaria tu munyu.

Pee se ɔ, Elizabɛt ba ngɔ hɔ, nɛ e fɔ binyumu kaa bɔ nɛ bɔfo ɔ de ɔ. E huɛmɛ kɛ e weku li ba konɛ a ba hyɛ bimwɔyo ɔ ha. A bua jɔ wawɛɛ kaa e fɔ. Elizabɛt de mɛ ke: ‘A ma tsɛ lɛ ke Yohane.’ Ni ɔmɛ de lɛ ke: ‘Nɔ ko be nyɛ weku ɔ mi nɛ a tsɛɛ lɛ ke Yohane. Nyɛɛ wo lɛ e tsɛ biɛ nɛ ji, Zakaria.’ Se Zakaria ngma munyu nɛ nyɛɛ se nɛ ɔ: ‘E biɛ ji Yohane.’ Kɛkɛ nɛ Zakaria bɔni munyu tumi ekohu! Nihi nɛ a ngɛ Yudea kpokpa a nɔ ɔ nu jokuɛ ɔ he sane, nɛ nihi fuu bi ke: ‘Mɛni nɔmlɔ po nɛ jokuɛ nɛ ɔ ma ba pee hwɔɔ se?’

Kɛkɛ nɛ mumi klɔuklɔu ba Zakaria nɔ, nɛ e gba ke: ‘A je Yehowa yi. E wo Abraham si kaa e maa tsɔ yi wami helɔ ko kɛ ba. Lɛ ji Mesia a nɛ e ma ba kpɔ̃ wɔ ɔ nɛ. Yohane ma ba pee gbalɔ, nɛ e ma dla blɔ kɛ fɔ̃ si ha Mesia a.’

Elizabɛt weku no ji Maria. Nɔ́ ko nɛ ngɛ nyakpɛ ya nɔ ngɛ Maria hu e blɔ fa mi. Ha nɛ waa hyɛ nɔ́ nɛ ya nɔ ɔ ngɛ yi nɛ nyɛɛ se ɔ mi.

Elizabɛt ngɛ weku no ko nɛ a tsɛɛ lɛ ke Maria, nɛ e ji zangmayo. E hi Nazarɛt ma a mi ngɛ Galilea. Yosɛf nɛ e ji kapitɛ ɔ wo Maria si kaa e maa ngɔ lɛ. Benɛ Elizabɛt hɔ ɔ ye nyɔhiɔ ekpa a, bɔfo Gebriɛl ya je e he si kɛ tsɔɔ Maria. Gebriɛl de lɛ ke: ‘Maria, mo he manye. Yehowa jɔɔ mo wawɛɛ.’ Maria nui nɔ́ nɛ Gebriɛl de ɔ sisi. Lɔ ɔ he ɔ, Gebriɛl de lɛ ke: ‘O maa ngɔ hɔ, nɛ o ma fɔ binyumu, nɛ o maa wo lɛ biɛ ke Yesu. E maa ye Matsɛ, nɛ e Matsɛ Yemi ɔ maa hi si kɛ ya neneene.’

Maria de ke: ‘I kɛ nyumu ko ná we bɔmi hyɛ. Kɛ enɛ ɔ ma plɛ kɛ ba mi ha kɛɛ?’ Gebriɛl de lɛ ke: ‘Nɔ́ ko nɔ́ ko be nɛ Yehowa be nyɛe maa pee. Mumi klɔuklɔu maa ba o nɔ, nɛ o ma fɔ binyumu. O weku no Elizabɛt hu hɛɛ hɔ.’ Kɛkɛ nɛ Maria de ke: ‘Yehowa mawayo ji mi. E ba mi ngɛ ye blɔ fa mi kaa bɔ nɛ o de ɔ.’

Maria ya slaa Elizabɛt ngɛ ma ko nɛ ngɛ yoku nɔ. Benɛ Maria nga Elizabɛt ɔ, bimwɔyo ɔ nɛ ngɛ Elizabɛt muklii mi ɔ hua. Mumi klɔuklɔu ba Elizabɛt nɔ nɛ e de ke: ‘Maria, Yehowa jɔɔ mo. E ji he blɔ nɛ i ná kaa ye Nyɔmtsɛ ɔ yayo ba ye we ɔ mi.’ Maria de Elizabɛt ke: ‘I kɛ ye tsui tsuo ngɛ Yehowa yi jee.’ Maria hi Elizabɛt ngɔ nyɔhiɔ etɛ, nɛ e kpale kɛ ho Nazarɛt ya.

Benɛ Yosɛf ba le kaa Maria hɛɛ hɔ ɔ, Yosɛf pee e juɛmi kaa e maa ngmɛɛ Maria he. Se bɔfo ko de lɛ ngɛ nlami mi ke: ‘Koo ye gbeye kaa o maa ngɔ lɛ kɛ pee o yo. E pee we nɔ́ yayami ko.’ Enɛ ɔ he ɔ, Yosɛf ngɔ Maria kɛ pee e yo, nɛ e kɛ lɛ ho we mi ya.