Kaisare Ɔgɛsto nɛ́ e ye mahi nɛ ngɛ Roma Nɔ Yemi ɔ sisi ɔ wo mlaa kaa Yuda bi tsuo nɛ a ho a mahi a mi ya konɛ a ya ngma a biɛ. Enɛ ɔ he ɔ, Yosɛf kɛ Maria hia blɔ kɛ ho Bɛtlehɛm ya. Lejɛ ɔ lɛ Yosɛf weku li ɔmɛ ngɛ. Jamɛ a be ɔ mi ɔ, e piɛ bɔɔ nɛ Maria ma fɔ.

Benɛ a ya su Bɛtlehɛm ɔ, he ko be nɛ a maa hi, enɛ ɔ he ɔ, a ya hi lohwehi a tsu ko mi. Maria fɔ e binyumu Yesu ngɛ lejɛ ɔ. E ngɔ bo kɛ ha e he, nɛ e kɛ lɛ fɔ lohwehi a niye ní daka ko mi.

Jamɛ a be ɔ mi ɔ, to hyɛli komɛ ngɛ a tohi hyɛe ngɛ nga a nɔ ngɛ Bɛtlehɛm kasa nya. Si kake too ɔ, bɔfo ko ba da si ngɛ a hɛ mi, kɛkɛ nɛ Yehowa hɛ mi nyami ɔ kpɛ kɛ bɔle mɛ. To hyɛli ɔmɛ a tsui po, se bɔfo ɔ de mɛ ke: ‘Nyɛ ko ye gbeye. I ngɛ sane kpakpa ko nɛ ma de nyɛ. Mwɔnɛ ɔ, a fɔ Mesia a ngɛ Bɛtlehɛm.’ Jamɛ a be ɔ mi nɔuu nɛ bɔfohi fuu je a he kpo ngɛ hiɔwe, nɛ a de ke: ‘Hɛ mi nyami ha Mawu ngɛ hiɔwe lokoo, nɛ tue mi jɔmi nɛ hi nihi nɛ a ngɛ zugba a nɔ a kpɛti.’ Kɛkɛ nɛ bɔfo ɔmɛ laa. Kɛ to hyɛli ɔmɛ pee a ní ha kɛɛ?

To hyɛli ɔmɛ de a he ke: ‘Nyɛ ha waa ho Bɛtlehɛm ya nɔuu.’ A ho Bɛtlehɛm ya amlɔ nɔuu, nɛ a ya na Yosɛf kɛ Maria kɛ bimwɔyo ɔ nɛ a fɔ ɔ ngɛ lohwehi a tsu ko mi.

Nihi fuu nu nɔ́ nɛ bɔfo ɔ de to hyɛli ɔmɛ ɔ he, nɛ e pee mɛ nyakpɛ. Maria susu munyu nɛ bɔfo ɔ tu ɔ he saminya, nɛ e hɛ ji nɔ. To hyɛli ɔmɛ kpale kɛ ya hyɛ a to ɔmɛ, nɛ a na Yehowa si ngɛ níhi nɛ a na, kɛ níhi nɛ a nu ɔ he.

Ma ko hi Israel ma a Puje He blɔ. Nihi nɛ a hi lejɛ ɔ he ye kaa dodoehi ma nyɛ maa tsɔɔ mɛ blɔ. Ligbi ko nyɔ mi ɔ, nyumu komɛ nɛ a je jamɛ a ma a mi ɔ na nɔ́ ko kaa dodoe nɛ ngɛ kpɛe wawɛɛ ngɛ hiɔwe, nɛ a nyɛɛ se. A nyɛɛ “dodoe” ɔ se kɛ ho Yerusalɛm ya. Nyumu ɔmɛ bɔni nihi bimi ke: ‘Jije jokuɛ ɔ nɛ e ma ba ye Yuda bi ɔmɛ a nɔ matsɛ ɔ ngɛ? Wa ba konɛ wa ba kpla si ha lɛ.’

Jamɛ a be ɔ mi ɔ, Hɛrode ji matsɛ ngɛ Yerusalɛm. Benɛ e nu kaa a tu matsɛ ehe ko he munyu ɔ, e hao wawɛɛ. E bi osɔfo nikɔtɔma amɛ ke: ‘Jije a tsɔɔ kaa a ma fɔ matsɛ nɛ ɔ ngɛ?’ A de lɛ ke: ‘Gbali ɔmɛ tsɔɔ kaa a ma fɔ lɛ ngɛ Bɛtlehɛm.’ Enɛ ɔ he ɔ, Hɛrode tsɛ nyumu ɔmɛ nɛ a je Puje He ɔ nɛ e de mɛ ke: ‘Nyɛɛ ya Bɛtlehɛm, konɛ nyɛ ya hla jokuɛ ɔ. Ke nyɛ ya na lɛ ɔ, nyɛɛ kpale kɛ ba nɛ nyɛ ba tsɔɔ mi he nɛ e ngɛ. Imi hu i suɔ kaa ma kpla si ha lɛ.’ Se Hɛrode bua.

“Dodoe” ɔ bɔni nyɛɛmi ekohu. Nyumu ɔmɛ nyɛɛ e se kɛ ho Bɛtlehɛm ya. “Dodoe” ɔ ya da si ngɛ we ko yi mi, nɛ nyumu ɔmɛ sɛ we ɔ mi. A ya na Yesu kɛ e nyɛ Maria ngɛ we ɔ mi. A kpla si ha jokuɛ ɔ nɛ a ke lɛ sika tsu, kɛ ohɛ, kɛ mimɛ. Anɛ Yehowa lɛ tsɔ nyumu nɛ ɔmɛ kaa a ya hla Yesu lo? Dɛbi.

Jamɛ a nyɔ ɔ mi ɔ, Yehowa de Yosɛf ngɛ nlami mi ke: ‘Hɛrode ngɛ hlae nɛ e gbe Yesu. Moo ngɔ o yo ɔ, kɛ jokuɛ ɔ nɛ nyɛɛ tu fo kɛ ho Ijipt ya. Nyɛɛ hi lejɛ ɔ kɛ ya si benɛ ma de mo ke nyɛɛ kpale kɛ ba.’ Amlɔ nɔuu nɛ Yosɛf kɛ e weku ɔ je kɛ ho Ijipt ya.

Yehowa de nyumu ɔmɛ nɛ a je Puje He ɔ kaa a ko ya gu Hɛrode ngɔ. Benɛ Hɛrode na kaa nyumu ɔmɛ bɛ e ngɔ ɔ, e mi mi fu wawɛɛ. Akɛnɛ e li he nɛ Yesu ngɛ he je ɔ, e wo mlaa ke a gbe binyumuwi tsuo ngɛ Bɛtlehɛm nɛ a kɛ Yesu ji juami bimɛ. Se a nine sui Yesu nɔ, ejakaa Yesu ngɛ tsitsaa ngɛ Ijipt.

Pee se ɔ, Hɛrode ba gbo. Yehowa de Yosɛf ke: ‘Piɔ lɛɛ nyɛ ma nyɛ maa kpale kɛ ho nyɛ ma mi ya.’ Yosɛf kɛ Maria, kɛ Yesu kpale a se kɛ ho Israel ya ekohu, nɛ a ya hi Nazarɛt.