Yosɛf kɛ e yo Maria kɛ a bi Yesu, kɛ a bimɛ kpahi hi Nazarɛt. Yosɛf tsuɔ ní kaa kapitɛ kɛ hyɛɔ e weku ɔ. E tsɔɔ e weku ɔ Yehowa he ní, kɛ Yehowa Mlaa a hulɔ. Yosɛf kɛ e weku ɔ yaa kpe he ɔ be fɛɛ be, nɛ a ya jaa Mawu ngɛ lejɛ ɔ. Daa jeha a, a yaa Yerusalɛm nɛ a ya yeɔ He Tsɔmi ɔ.

Benɛ Yesu ye jeha 12 ɔ, weku ɔ hia blɔ gagaa kɛ ho Yerusalɛm ya kaa bɔ nɛ a pɔɔ peemi ɔ. Nihi je hehi fuu kɛ ba ma a mi konɛ a ba ye He Tsɔmi ɔ, enɛ ɔ he ɔ, nihi hiɛ ngɛ ma a mi wawɛɛ nitsɛ. Benɛ a ye He Tsɔmi ɔ ta nɛ Yosɛf kɛ Maria kpale kɛ yaa a ma mi ɔ, a susu kaa Yesu ngɛ a weku li nɛ a kɛ mɛ yaa a kpɛti. Se benɛ a bɔni Yesu hlami ngɛ ni ɔmɛ a kpɛti ɔ, a nɛ lɛ.

Yosɛf kɛ Maria kpale a se kɛ ho Yerusalɛm ya, nɛ a kɛ ligbi etɛ sɔuu ya hla a bi ɔ. Benɛ a hla lɛ hluu nɛ a nɛ́ lɛ ɔ, a ho sɔlemi we ɔ ya. A ya na Yesu nɛ e hii si ngɛ tsɔɔli ɔmɛ a kpɛti. E ngɛ tsɔɔli ɔmɛ tue bue saminya, nɛ e ngɛ mɛ sanehi nɛ a he hia bie. Tsɔɔli ɔmɛ a bua jɔ Yesu he wawɛɛ, enɛ ɔ he ɔ, a bɔni lɛ sanehi fuu bimi. Yesu ha a sane bimi ɔmɛ tsuo heto. Nɔ́ nɛ ɔ pee mɛ nyakpɛ wawɛɛ nitsɛ. A na kaa e nu Yehowa Mlaa a sisi saminya.

Yosɛf kɛ Maria hao wawɛɛ nitsɛ. Maria bi Yesu ke: ‘Ye bi, wa hla mo ngɛ he fɛɛ he! Jije o ho?’ Yesu de ke: ‘Anɛ nyɛ li kaa e sa nɛ ma hi hiɛmɛ nɛ ɔ ngɛ ye Papaa we ɔ lo?’

Yesu kɛ e fɔli ɔmɛ kpale kɛ ho Nazarɛt ya. Yosɛf tsɔɔ Yesu kapitɛ ní tsumi ɔ. Benɛ Yesu wɛ ɔ, kɛ o susu kaa e peeɔ e ní ha kɛɛ? Benɛ Yesu ngɛ wae ɔ, e juɛmi mi ngɛ kuɔe, nɛ Mawu kɛ nimli tsuo a bua jɔ e he.

Benɛ Yohane nɛ ji Zakaria kɛ Elizabɛt a binyumu ɔ wa a, e ba pee gbalɔ. Yehowa gu Yohane nɔ kɛ tsɔɔ nihi kaa Mesia a ma. Se Yohane tsɔɔ we ní ngɛ kpe he ɔmɛ loo ngɛ ma amɛ a mi, se mohu e fiɛɛ ngɛ nga a nɔ. Nihi fuu je Yerusalɛm kɛ Yudea kɛ ba Yohane ngɔ konɛ e tsɔɔ mɛ ní. E tsɔɔ mɛ kaa loko a ma nyɛ maa sa Mawu hɛ mi ɔ, ja a kpa ní yayamihi peemi. Benɛ a bu Yohane tue se ɔ, a kpɛti nihi fuu tsake a tsui, nɛ Yohane baptisi mɛ ngɛ Yɔdan Pa a mi.

Yohane pee e si himi kpokploo. E wo tade nɛ a kɛ afukpɔngɔ he bwɔmi lɛ pee, nɛ ní nɛ e yeɔ ji baalɛhi kɛ nga nɔ hwo. Nihi suɔ nɛ a maa le nɔ nɛ Yohane ji. Farisi bi kɛ Saduki bi nɛ a woɔ a he nɔ ɔ po ba e ngɔ. Yohane de mɛ ke: ‘E sa nɛ nyɛ dla nyɛ blɔ ɔmɛ nɛ nyɛ tsake nyɛ tsui. Nyɛ ko susu kaa nimli titli ji nyɛ ejakaa nyɛ deɔ ke Abraham bimɛ ji nyɛ. Enɛ ɔ tsɔɔ we kaa Mawu bimɛ ji nyɛ.’

Nihi fuu ba Yohane ngɔ nɛ a bi lɛ ke: ‘Mɛni e sa kaa waa pee konɛ waa sa Mawu hɛ mi?’ Yohane de Yuda bi ɔmɛ ke: ‘Nɔ nɛ ngɛ tade enyɔ ɔ nɛ ngɔ kake kɛ ha nɔ nɛ hia eko.’ Anɛ o le nɔ́ he je nɛ e de jã a lo? E ngɛ hlae nɛ e kaseli ɔmɛ nɛ a le kaa loko a ma nyɛ maa sa Mawu hɛ mi ɔ, ja a suɔ ni kpahi.

Yohane de tó tsuli ɔmɛ ke: ‘Nyɛɛ ye anɔkuale nɛ nyɛ ko sisi nihi.’ E de ta buli ɔmɛ ke: ‘Nyɛ ko he nyɔ mi ní, nɛ nyɛ ko ye lakpa.’

Osɔfo ɔmɛ kɛ Levi bi ɔmɛ hu ba Yohane ngɔ nɛ a bi lɛ ke: ‘Mɛnɔ ji mo? Ni ɔmɛ tsuo suɔ kaa a maa le.’ Yohane ha heto ke: ‘Imi ji gbi ko nɛ ngɛ pɛe ngɛ nga a nɔ ɔ nɛ. Gbi ɔ ngɛ nihi blɔ tsɔɔe kɛ yaa Yehowa ngɔ kaa bɔ nɛ gbalɔ Yesaya de ɔ.’

Nihi a bua jɔ níhi nɛ Yohane ngɛ mɛ tsɔɔe ɔ he. Enɛ ɔ he ɔ, nihi fuu susu kaa eko ɔ, Yohane ji Mesia a nɛ. Se e de mɛ ke: ‘Nɔ ko nɛ e nɔ kuɔ pe mi ma ngɛ ye se. E tokota nɔ kpã tete po, i sɛ nɔ nɛ e pɛneɔ. Imi lɛɛ i ngɔ nyu kɛ baptisi nyɛ, se jamɛ a nɔ ɔ lɛɛ e maa ngɔ mumi klɔuklɔu kɛ baptisi nyɛ.’