Yohane fiɛɛ ke: ‘Nɔ ko nɛ e nɔ kuɔ pe mi ma.’ Benɛ Yesu ye maa pee jeha 30 ɔ, e je Galilea kɛ ya Yɔdan Pa a nya ngɛ he nɛ Yohane baptisiɔ nihi ngɛ ɔ. Yesu suɔ nɛ Yohane nɛ baptisi lɛ, se Yohane de lɛ ke: ‘E sɛ nɛ ma baptisi mo. Mo lɛ e sa nɛ o baptisi mi.’ Yesu de Yohane ke: ‘Yehowa suɔ nɛ o baptisi mi.’ Lɔ ɔ he ɔ, a ya Yɔdan Pa a mi, nɛ Yohane ngɔ Yesu kɛ wo nyu ɔ sisi.

Benɛ Yesu je nyu ɔ mi ɔ, e sɔle. Amlɔ nɔuu nɛ hiɔwe nya bli, nɛ Mawu mumi ɔ kple si kɛ ba e nɔ kaa lahuɛ. Kɛkɛ nɛ Yehowa tu munyu kɛ je hiɔwe nɛ e de ke: “Mo ji ye Bi nɛ i suɔ; ye bua jɔ o he.”

Benɛ Yehowa mumi ɔ ba Yesu nɔ ɔ, e ba plɛ pee Kristo ɔ, loo Mesia a. Amlɔ nɛ ɔ, e maa je ní tsumi ɔ nɛ Yehowa tsɔ lɛ kɛ ba zugba a nɔ ke e ba tsu ɔ sisi.

Ngɛ Yesu baptisimi ɔ se ɔ, amlɔ nɔuu nɛ e ho nga a nɔ ya, nɛ e ya ye ligbi 40 ngɛ lejɛ ɔ. Benɛ e je nga a nɔ kɛ ba a, e ya Yohane ngɔ. Benɛ Yohane na Yesu nɛ e ma a, Yohane de ke: ‘Mawu Jijɔ Bi ɔ nɛ maa ngɔ je ɔ he yayami ɔ kɛ ho ji nɛ ɔ nɛ.’ Munyu nɛ ɔ nɛ Yohane tu ɔ ha nɛ ni ɔmɛ na kaa Yesu ji Mesia a nɛ. Benɛ Yesu ngɛ nga a nɔ ɔ, anɛ o le nɔ́ nɛ ba lo? Ha waa hyɛ nɔ́ nɛ ba.

Benɛ a baptisi Yesu se ɔ, mumi klɔuklɔu ɔ kɛ lɛ ho nga a nɔ ya. E yi ní ligbi 40, enɛ ɔ he ɔ, hwɔ ye lɛ wawɛɛ. Kɛkɛ nɛ Abosiami ba ka Yesu nɛ e de lɛ ke: ‘Ke Mawu Bi ji mo niinɛ ɔ, mo de tɛ nɛ ɔmɛ konɛ a plɛ pee abolo.’ Se Yesu ha lɛ heto kɛ je Ngmami ɔ mi. E de lɛ ke: ‘A ngma ke, pi niye ní pɛ nɛ ma ha nɛ o maa hi wami mi. E he hia nɛ o bu nɔ́ fɛɛ nɔ́ nɛ Yehowa deɔ ɔ tue.’

Enɛ ɔ se ɔ, Abosiami ka lɛ nɛ e de lɛ ke: ‘Ke mo ji Mawu Bi ɔ niinɛ ɔ, moo tu kɛ je sɔlemi we ɔ yi mi kɛ ya zugba. A ngma ke Mawu ma ha e bɔfo ɔmɛ maa nu mo.’ Se Yesu tsɛ Ngmami ɔ ekohu nɛ e de lɛ ke: ‘A ngma ke e sɛ nɛ o ka Yehowa.’

Jehanɛ ɔ, Satan ngɔ je ɔ mi matsɛ yemi ɔmɛ tsuo kɛ a hɛ mi nyami, kɛ sika kɛ tsɔɔ Yesu nɛ e de lɛ ke: ‘Ke o ja mi si kake pɛ ɔ, ma ngɔ matsɛ yemi ɔmɛ kɛ a hɛ mi nyami ɔ kɛ ha mo.’ Se Yesu ha lɛ heto ke: ‘Jee hiɛ ɔ kɛ ho, Satan! A ngma ke Yehowa pɛ lɛ e sa kaa o ja.’

Kɛkɛ nɛ Abosiami je, nɛ bɔfohi ba, nɛ a ha Yesu niye ní. Ke je lɔ ɔ se ɔ, Yesu bɔni Matsɛ Yemi ɔ he sane kpakpa a fiɛɛmi. Enɛ ɔ ji ní tsumi nɛ a tsɔ lɛ kɛ ba zugba a nɔ ke e ba tsu. Nihi a bua jɔ níhi nɛ Yesu tsɔɔ mɛ ɔ he, nɛ he fɛɛ he nɛ e yaa a, a nyɛɛɔ e se.