Ngɛ gbiɛ be mi ngɛ jeha 30 ɔ mi ɔ, Yesu ya Yerusalɛm. Nihi fuu ba ma a mi konɛ a ba ye He Tsɔmi gbijlɔ ɔ. A kɛ lohwehi sã afɔle ngɛ sɔlemi we ɔ kɛ ye gbijlɔ ɔ. Ni komɛ ngɔɔ lohwehi kɛ baa, se ni komɛ hu ba heɔ lohwe ɔmɛ ngɛ Yerusalɛm.

Benɛ Yesu ya sɔlemi we ɔ, e na kaa nihi ngɛ lohwehi juae ngɛ lejɛ ɔ, nɛ a ngɛ sika náe ngɛ Yehowa we ɔ! Mɛni Yesu pee ngɛ he? E lo kpa nɛ e kɛ fiee jijɔ ɔmɛ kɛ na amɛ kɛ je sɔlemi we ɔ. E plɛ sika tsakeli ɔmɛ a we okplɔɔ ɔmɛ ngɔ bu si, nɛ e plɛ a sika amɛ kɛ pue si. Yesu de nihi nɛ a ngɛ lahuɛ ɔmɛ juae ɔ ke: ‘Nyɛɛ ngɔ ní nɛ ɔmɛ kɛ je hiɛ ɔ kɛ ho! Nyɛ ko ngɔ ye Tsɛ ɔ we ɔ kɛ pee jua yemi he!’

Nihi nɛ a ngɛ sɔlemi we ɔ nya kpɛ a he ngɛ nɔ́ nɛ Yesu pee ɔ he je. E kaseli ɔmɛ kai gbami ko nɛ kɔɔ Mesia a he ɔ. Gbami ɔ ke: ‘Ye hɛ maa dɔ wawɛɛ ngɛ Yehowa we ɔ he.’

Pee se ngɛ jeha 33 ɔ mi ɔ, Yesu ya tsu sɔlemi we ɔ he ekohu. E ha we nɛ nɔ ko nɛ wo e Tsɛ we ɔ he mu.

Benɛ He Tsɔmi gbijlɔ ɔ ba nyagbe ɔ, Yesu kɛ e kaseli ɔmɛ gu Samaria kɛ ho Galilea ya. Benɛ e piɛ bɔɔ nɛ a maa su Saika ma a mi ɔ, Yesu ya jɔɔ e he ngɛ he ko. A tsɛɔ lejɛ ɔ ke Yakɔb vu. Benɛ e ngɛ e he jɔɔe ɔ, e kaseli ɔmɛ ho ma a mi ya konɛ a ya he niye ní.

Yo ko ba vu ɔ he konɛ e ba sá nyu. Yesu de lɛ ke: “Ha mi nyu ɔ eko nɛ ma nu.” Yo ɔ de lɛ ke: ‘Mɛni he je nɛ o kɛ mi ngɛ munyu tue? Samaria no ji mi. Yuda bi kɛ Samaria bi tui munyu.’ Yesu de lɛ ke: ‘Kaa o le nɔ nɛ i ji ɔ, jinɛ o ko bi mi nyu, nɛ ma ha mo wami nyu.’ Yo ɔ bi lɛ ke, ‘Kɛ o ngɛ tsɔɔe kɛɛ? Goga po o be eko.’ Yesu de lɛ ke: ‘Nɔ fɛɛ nɔ nɛ e maa nu nyu nɛ ma ha lɛ ɔ, kuma be lɛ yee hu gblegbleegble.’ Yo ɔ de lɛ ke: “Etsɛ, ha mi jamɛ a nyu ɔ eko.”

Kɛkɛ nɛ Yesu de lɛ ke: ‘Yaa nɛ o ya tsɛ o huno ɔ kɛ ba hiɛ ɔ.’ Yo ɔ de lɛ ke: ‘I be huno.’ Yesu de lɛ ke: ‘O tu anɔkuale. O kɛ nyumuhi enuɔ hi si momo, nɛ nyumu nɛ o kɛ lɛ ngɛ amlɔ nɛ ɔ hu tsa pi o huno ji lɛ.’ Yo ɔ de lɛ ke: ‘I na kaa gbalɔ ji mo. Ye ma a mi bi ɔmɛ he ye kaa wa ma nyɛ ma ja Mawu ngɛ yoku nɛ ɔ nɔ, se Yuda bi ɔmɛ lɛɛ a deɔ ke Yerusalɛm pɛ nɛ e sa kaa a ja Mawu ngɛ. I he ye kaa ke Mesia a ba a, e maa tsɔɔ wɔ bɔ nɛ e sa kaa wa ja Mawu ha.’ Kɛkɛ nɛ Yesu de lɛ nɔ́ ko nɛ e de we nɔ ko hyɛ. E de lɛ ke: ‘Imi ji Mesia a nɛ.’

Yo ɔ ho ma a mi ya esɔesɔ nɛ e ya de Samaria bi ɔmɛ ke: ‘E peeɔ mi kaa i na Mesia a. E le ye he nɔ́ fɛɛ nɔ́. Waa ho nɛ nyɛ ya hyɛ!’ A nyɛɛ e se kɛ ya vu ɔ he nɛ Yesu tsɔɔ mɛ ní, nɛ a bu lɛ tue.

Samaria bi ɔmɛ suɔ kaa Yesu nɛ hi a ma a mi. E hi ma a mi ligbi enyɔ, nɛ e tsɔɔ mɛ ní, nɛ nihi fuu ná hemi kɛ yemi ngɛ e mi. A de Samaria yo ɔ ke: ‘Benɛ wa bu nyumu nɛ ɔ tue ɔ, wa na kaa lɛ ji je ɔ yi wami helɔ ɔ niinɛ.’