Benɛ Yesu fiɛɛ maa pee jeha kake kɛ fã se ɔ, e he ba hia nɛ e pee juɛmi ko nɛ he hia. Mɛnɔmɛ nɛ e maa hla konɛ a piɛɛ e he kɛ tsu ní? Mɛnɔmɛ nɛ e ma tsɔse konɛ a hyɛ Kristofohi asafo ɔ nɔ? Yesu suɔ nɛ Yehowa nɛ tsɔɔ lɛ blɔ konɛ e le nɔ́ nɛ e maa pee ngɛ ní nɛ ɔmɛ a he. Enɛ ɔ he ɔ, lɛ nɔ kake too ya yoku ko nɔ, nɛ e ya sɔle hluu kɛ je nyɔ mi kɛ ya si mɔtu. Mɔtu ɔ, Yesu tsɛ e kaseli ɔmɛ ekomɛ kɛ ba e ngɔ, nɛ e hla nihi 12 kaa e bɔfohi. A kpɛti mɛnɔmɛ nɛ o kai a biɛ? Mɛ ji Petro, Andrea, Yakobo, Yohane, Filipo, Batolomeo, Toma, Mateo, Alfeo bi Yakobo, Tadeo, Simon, kɛ Yudas Iskariɔt.

He fɛɛ he nɛ Yesu maa hia blɔ kɛ ya a, ni Nyɔngma Kɛ Enyɔ nɛ ɔmɛ maa piɛɛ e he. Benɛ Yesu tsɔse mɛ ta a, e tsɔ mɛ konɛ a ya fiɛɛ. Yehowa ha mɛ he wami konɛ a hia mumi yayamihi nɛ a tsa hiɔtsɛmɛ.

Yesu tsɛ e bɔfo Nyɔngma Kɛ Enyɔ ɔmɛ ke e huɛmɛ, nɛ e ná he kɛ nɔ fɔmi ngɛ a mi. Farisi bi ɔmɛ lɛɛ a susu kaa bɔfo ɔmɛ yɛ sukuu nɛ a ji nimli guhi kɛkɛ. Se Yesu tsɔse mɛ konɛ a nyɛ nɛ a tsu ní tsumi nɛ e kɛ wo a dɛ ɔ. A maa piɛɛ Yesu he ngɛ behi nɛ he hia wawɛɛ mi, kaa nɔ hyɛmi nɔ́ ɔ, loko Yesu ma gbo kɛ jehanɛ hu ngɛ e si tlemi se. Ni Nyɔngma Kɛ Enyɔ ɔmɛ a kpɛti nihi fuu je Galilea, he nɛ Yesu je ɔ. A kpɛti ni komɛ sɛ gba si himi mi.

Bɔfo nɛ ɔmɛ ji nyumuhi nɛ a tɔ̃ɔ, ejakaa a yi mluku. Ngɛ be komɛ a mi ɔ, a susuu we a yi mi loko a tuɔ munyu, nɛ a peeɔ juɛmi nɛ dɛ. Be komɛ ɔ, a tui a tsui si, nɛ a sãa nya. A ti nɔ fɛɛ nɔ susuɔ kaa e nɔ kuɔ pe e nyɛmi. Se a ji nimli kpakpahi nɛ a suɔ Yehowa. Ke Yesu je ɔ, mɛ ji nihi nɛ Yesu kɛ maa je Kristofohi asafo ɔ sisi.

Benɛ Yesu hla bɔfo 12 ɔmɛ se ɔ, e kple si kɛ je yoku ɔ nɔ kɛ ya he ko nɛ nihi fuu bua a he nya ngɛ. Ni ɔmɛ je Galilea, Yudea, Tiro, Sidon, Siria, kɛ Yɔdan pa a se kɛ ba. A ngɔ hiɔtsɛmɛ kɛ nihi nɛ mumi yayamihi ngɛ mɛ haoe kɛ piɛɛ a he kɛ ba. Yesu tsa mɛ tsuo. Jehanɛ ɔ, e ya hi si ngɛ yoku ɔ he nɛ e bɔni munyu tumi. E tsɔɔ nɔ́ nɛ e sa kaa waa pee konɛ waa pee Mawu huɛmɛ. E sa nɛ wa yɔse kaa wa hia Yehowa ngɛ wa si himi mi, nɛ e sa kaa waa suɔ lɛ. Se ke wa sume ni kpahi ɔ, wa be nyɛe maa suɔ Mawu. E sa nɛ wa je mi mi himi kpo, nɛ waa kɛ nɔ fɛɛ nɔ nɛ hi si saminya; wa he nyɛli hu piɛɛ he.

Yesu de ke: ‘Pi o huɛmɛ pɛ nɛ e sa kaa o suɔ mɛ. E sa nɛ o suɔ o he nyɛli, nɛ o je o tsui mi nɛ o ngɔ nihi a tɔmihi kɛ pa mɛ. Ke o na kaa nɔ ko mi mi fu mo ɔ, moo ya nɛ o ya kpa lɛ pɛɛ nɔuu. O kɛ nihi nɛ hi si kaa bɔ nɛ o suɔ nɛ a kɛ mo nɛ hi si ɔ.’

Yesu wo ni ɔmɛ ga kpakpa ngɛ he lo nya níhi a he. E de mɛ ke: ‘Yehowa huɛ nɛ wa maa pee ɔ he hia kulaa pe sika fuu nɛ wa ma ná. Nɔ ko ma nyɛ maa ju o sika, se nɔ ko be nyɛe maa ju huɛ bɔmi nɛ ngɛ o kɛ Yehowa nyɛ kpɛti ɔ. Mo kpa haomi ngɛ ní nɛ o maa ye, kɛ ní nɛ o maa nu, aloo tade nɛ o maa wo ɔ he. Hyɛ lohwe pɛlitsɛmɛ ɔmɛ ha. Mawu bɔɔ mɔde kaa e ma ha mɛ niye ní nɛ maa su mɛ. Ke o ngɛ haoe ɔ, lɔ ɔ be hae nɛ o ná ligbi kake kɛ piɛɛ o wami he. Mo kai kaa Yehowa le nɔ́ nɛ hia mo.’

Nimli babauu ɔ nui kaa nɔ ko tu munyu nɛ Yesu tu nɛ ɔ hyɛ. A jami nya dali ɔmɛ tsɔɔ we mɛ ní nɛ ɔmɛ. Mɛni he je nɛ Yesu le ní tsɔɔmi saminya a? Ejakaa nɔ́ fɛɛ nɔ́ nɛ e tsɔɔ ɔ je Yehowa ngɔ.