Mɛni O Maa Pee Kɛ Dla O He Kɛ Ha Kaimi ɔ?

Ke je jeha nɛ ɔ kɛ yaa a, wa maa ngɔ be babauu kɛ dla wa he kɛ ha Kristo gbenɔ ɔ Kaimi ɔ. Ke Kaimi ligbi ɔ ya da ligbi ko nɔ ngɛ otsi ɔ mi ɔ, a be Si Himi Kɛ Sɔmɔmi Kpe ɔ pee kulaa. Ke Kaimi ligbi ɔ ya da otsi ɔ nyagbe ɔ, a be magbɛ nɔ munyu kɛ Hwɔɔmi Mɔ ɔ mi Ní Kasemi ɔ pee. Anɛ o maa to blɔ nya konɛ o ngɔ jamɛ a be ɔ kɛ tsu ní saminya lo? Kaa bɔ nɛ e ji ngɛ kaseli ɔmɛ a be ɔ mi ɔ, e sa nɛ a to ní komɛ a he blɔ nya kɛ ha ní peemi klɛdɛɛ nɛ ɔ. (Luk 22:7-13; km-E 3/15 1) Se ní kpahi komɛ ngɛ nɛ e sa kaa wɔ tsuo waa pee konɛ wa ná ní peemi nɛ ɔ he se. Mɛni ji ní nɛ ɔmɛ ekomɛ?

• Mo susu se nami nɛ e ngɛ he kaa o maa ya a he.​—1Ko 11:23-26

• Moo sɔle nɛ o susu huɛ bɔmi nɛ ngɛ o kɛ Yehowa nyɛ kpɛti ɔ he.​—1Ko 11:27-29; 2Ko 13:5

• Moo kane Ngmamihi kɛ womihi nɛ a tu Kaimi ɔ he munyu ngɛ mi ɔmɛ nɛ o pue o yi mi tɛ ngɛ a he.​—Yo 3:16; 15:13

Fiɛɛli komɛ kaneɔ Kaimi ɔ he Baiblo kanemi nɛ e ngɛ Mo Susu Ngmami ɔ He Daa Ligbi ɔ mi ɔ nɛ a pue ɔ a yi mi tɛ ngɛ a he. Ni komɛ hu kaneɔ ngmamihi nɛ ngɛ munyu nya tsɔɔmi daka a mi ɔ. Jehanɛ hu ɔ, ni komɛ kpale kaseɔ Hwɔɔmi Mɔ ɔ mi ní kasemihi nɛ a tu Kaimi ɔ kɛ suɔmi nɛ Yehowa kɛ e Bi Yesu je kpo ha wɔɔ he munyu ɔ. E ba kaa blɔ nya tomi nɛ ɔ eko fɛɛ eko nɛ o kɛ ma tsu ní ɔ nɛ ye bua mo konɛ huɛ bɔmi nɛ ngɛ o kɛ Yehowa kɛ e Bi ɔ nyɛ kpɛti ɔ mi nɛ wa wawɛɛ.