NÍ KASEMI 52
Nɔ́ He Je Nɛ E He Hia Nɛ Waa Hyɛ Tadehi Nɛ Wa Woɔ Kɛ Wa He Dlami Saminya
Wɔ tsuo wa suɔ kaa wa maa hla tadehi nɛ wa maa wo kɛ bɔ nɛ wa ma dla wa he ha. Ke waa kɛ Baiblo sisi tomi mlaahi tsu ní ɔ, wa ma nyɛ maa hla tadehi nɛ wa suɔ kaa wa maa wo, se kɛ̃ ɔ, e maa sa Yehowa hɛ mi hulɔ. Nyɛ ha nɛ wa susu sisi tomi mlaa nɛ ɔmɛ ekomɛ a he.
1. Mɛni Baiblo sisi tomi mlaahi lɛ maa ye bua wɔ konɛ waa mwɔ wa yi mi kpɔ ngɛ tadehi nɛ wa maa wo, kɛ bɔ nɛ wa ma dla wa he ha a he?
E sa nɛ waa kɛ ‘humi peemi kɛ juɛmi nɛ mi tsɔ nɛ dla wa he bɔ nɛ sa,’ nɛ wa ha nɛ tadehi nɛ wa woɔ kɛ bɔ nɛ wa dlaa wa he ha a nɛ hi hɛngmɛ nɔ be fɛɛ be kɛ ‘tsɔɔ kaa wa ji nihi nɛ a jaa Mawu.’ (1 Timoteo 2:9, 10) Ha nɛ wa susu sisi tomi mlaa eywiɛ nɛ ɔmɛ a he: (1) E sa nɛ tadehi nɛ wa maa wo ɔ nɛ hi “bɔ nɛ sa.” Kaa bɔ nɛ o na ngɛ Yehowa we bi a kpehi a sisi ɔ, wa ti nɔ fɛɛ nɔ dlaa e he ngɛ blɔ ekpaekpa nɔ. Se tadehi nɛ wa woɔ, kɛ bɔ nɛ wa sɛɛ wa yi ha loo wa peeɔ wa yi ha a tsɔɔ kaa wa ngɛ bumi kɛ ha wa Mawu ɔ. (2) “Humi peemi” nɛ waa kɛ ma dla wa he ɔ tsɔɔ kaa wa be tadehi nɛ ma tle bɔmi nami he akɔnɔ si ngɛ nihi a mi loo e maa gbla nihi a juɛmi kɛ ba wa nɔ tsɔ ɔ woe. (3) ke wa nyɛɛ we tadehi kɛ he dlami nɛ ba nɔ ɔ eko fɛɛ eko se ɔ, lɔ ɔ tsɔɔ kaa waa kɛ “juɛmi nɛ mi tsɔ” dlaa wa he. (4) E sa nɛ be fɛɛ be ɔ, wa he dlami nɛ “tsɔɔ kaa wa jaa Mawu,” konɛ nihi nɛ a na kaa anɔkuale Mawu ɔ wa ngɛ jae ɔ nɛ.—1 Korinto Bi 10:31.
2. Kɛ tadehi nɛ wa woɔ kɛ bɔ nɛ wa dlaa wa he ha a ma nyɛ ma ha nɛ wa nyɛmimɛ nɛ a nu he ha kɛɛ?
E ngɛ mi kaa wa ngɛ he blɔ nɛ wa hlaa tade nɛ wa suɔ kaa wa maa wo mohu lɛɛ, se e sa nɛ wa susu bɔ nɛ ni kpahi maa nu he ha a he. Wa bɔɔ mɔde kaa wa be nɔ́ ko pee nɛ ma gba nɔ ko nya, mohu ɔ, wa peeɔ nɔ́ nɛ maa “sa [wa] nyɛmi hɛ mi konɛ e hi ha lɛ, nɛ e fia lɛ kɛ ma si.”—Kane Roma Bi 15:1, 2.
3. Mɛni blɔ nɔ nɛ bɔ nɛ wa dlaa wa he ha a ma nyɛ ma ha nɛ ni kpahi a bua nɛ jɔ he kaa a maa kase Yehowa he ní?
E ngɛ mi kaa wa bɔɔ mɔde kaa wa ma dla wa he saminya be fɛɛ be mohu lɛɛ, se ke wa yaa asafo mi kpe loo wa yaa fiɛɛmi ɔ, e sa nɛ waa hyɛ bɔ nɛ wa dlaa wa he ha a saminya. Wa sume nɛ wa he dlami nɛ je nihi a juɛmi kɛ je sɛ gbi nɛ wa fiɛɛɔ ɔ nɔ. Mohu ɔ, wa suɔ nɛ wa he dlami nɛ ha nɛ ni kpahi a bua nɛ jɔ he kaa a maa kase Mawu he ní, nɛ́ ‘wa Yi Wami Helɔ ɔ tsɔɔmi ɔ he nɛ pee fɛu.’—Tito 2:10.
MOO KASE BABAUU
Moo hyɛ blɔ nɔ nɛ wa ma nyɛ maa gu kɛ ha nɛ tadehi nɛ wa woɔ kɛ wa he dlami nɛ tsɔɔ kaa wa ji Kristofohi.
Wa he dlami ma nyɛ maa tsɔɔ ke ji wa buɔ adesahi nɛ a hɛɛ blɔ nyahi loo wa bui mɛ. E ngɛ mi kaa Yehowa naa nɔ́ nɛ ngɛ wa tsui mi mohu lɛɛ, se e sa nɛ wa he dlami nɛ tsɔɔ kaa wa ngɛ bumi kɛ ha lɛ
4. Ke wa he dlami hi saminya a, e tsɔɔ kaa wa buɔ Yehowa
Mɛni yi mi tomi titli he je nɛ e sa nɛ wa ha nɛ wa he dlami nɛ hi hɛngmɛ nɔ ɔ? Nyɛɛ kane La 47:2, nɛ́ nyɛ susu sane bimi nɛ ɔmɛ a he:
Ke wa kai kaa bɔ nɛ wa dlaa wa he ha a saa bɔ nɛ nihi naa Yehowa ha a he ɔ, mɛni yi mi kpɔ nɛ lɔ ɔ maa ye bua wɔ nɛ waa mwɔ ngɛ wa he dlami he?
Anɛ o susu kaa nile ngɛ mi kaa wa maa hyɛ bɔ nɛ wa dlaa wa he ha a saminya ke wa maa ya asafo mi kpe loo fiɛɛmi lo? Mɛni he je nɛ o de jã a?
5. Mɛni maa ye bua wɔ konɛ wa nyɛ nɛ waa mwɔ yi mi kpɔ nɛ da ngɛ tade nɛ wa maa wo kɛ bɔ nɛ wa ma dla wa he ha a he?
Ke tade nɛ wa ngɛ ɔ he jua wa jio, e he jua wɛ jio, e sa nɛ e he nɛ tsɔ, nɛ́ e sa he nɛ wa maa wo kɛ ya a. Nyɛɛ kane 1 Korinto Bi 10:24 kɛ 1 Timoteo 2:9, 10. Lɔ ɔ se ɔ, nyɛ susu nɔ́ he je nɛ e sɛ nɛ waa wo tadehi nɛ nyɛɛ se nɛ ɔmɛ a he . . .
tadehi nɛ a he tsɔ we loo a be hɛngmɛ nɔ.
tadehi nɛ a miaa nɔ wawɛɛ loo a jeɔ nɔmlɔ tso ɔ he komɛ kpo loo a tleɔ bɔmi nami he akɔnɔ si ngɛ nihi a mi.
E ngɛ mi kaa Kristofohi be Mose Mlaa a sisi mohu lɛɛ, se e yeɔ bua wɔ nɛ wa leɔ Yehowa susumi. Nyɛɛ kane 5 Mose 22:5, nɛ́ nyɛ susu sane bimi nɛ ɔ he:
Mɛni he je nɛ e sa nɛ wa kua tadehi kɛ he dlamihi nɛ haa nɛ nyumuhi peeɔ kaa yihi aloo yihi peeɔ kaa nyumuhi ɔ?
Nyɛɛ kane 1 Korinto Bi 10:32, 33, kɛ 1 Yohane 2:15, 16, nɛ́ nyɛ susu sane bimi nɛ ɔmɛ a he:
Mɛni he je nɛ e sa nɛ waa hyɛ ke ji wa he dlami gbaa nihi nɛ a ngɛ wa kpɔ ɔ mi loo asafo ɔ mi ɔ a nya a?
Mɛni tadehi kɛ he dlamihi lɛ pɔ he ngɛ he nɛ o ngɛ ɔ?
Ke o hyɛ ɔ, anɛ e sa kaa Kristofo no nɛ wo jamɛ a tade ɔmɛ aloo e dla e he jã lo? Mɛni he je nɛ o de jã a?
Wa ma nyɛ maa wo tade slɔɔtohi nɛ wa dla wa he ngɛ blɔ slɔɔtohi a nɔ nɛ́ loloolo ɔ, waa sa Yehowa hɛ mi
NI KOMƐ DEƆ KE: “I ngɛ he blɔ nɛ i woɔ tade fɛɛ tade nɛ i suɔ.”
O kɛ mɛ kpa gbi lo? Mɛni he je?
NYA MWƆMI
Ke wa mwɔ yi mi kpɔ nɛ da ngɛ tade nɛ wa maa wo kɛ bɔ nɛ wa ma dla wa he ha a he ɔ, wa tsɔɔ kaa wa ngɛ bumi kɛ ha Yehowa kɛ ni kpahi.
Mi Nylɔmi
Mɛni he je nɛ tade nɛ wa maa wo, kɛ bɔ nɛ wa ma dla wa he ha a he hia Yehowa a?
Mɛni sisi tomi mlaahi lɛ sa nɛ e kudɔ yi mi kpɔhi nɛ wa maa mwɔ ngɛ tade nɛ wa maa wo kɛ bɔ nɛ wa ma dla wa he ha a he?
Kɛ tadehi nɛ wa woɔ kɛ bɔ nɛ wa dlaa wa he ha a maa sa bɔ nɛ nihi naa anɔkuale jami ha a he ha kɛɛ?
NÍ KPAHI NƐ MAA YE BUA MO
Moo hyɛ nɔ́ nɛ nihi ma susu ngɛ o he ke a na tadehi nɛ o woɔ ɔ.
Moo hyɛ nɔ́ he je nɛ e sa nɛ o susu níhi a he saminya loko o tatuu o he.
“Mɛni Baiblo ɔ De Kɛ Kɔ Tatuu He?” (Munyu nɛ ɔ ngɛ Intanɛti ɔ nɔ)
Moo hyɛ sisi tomi mlaa kpahi nɛ ma nyɛ ma kudɔ yi mi kpɔhi nɛ wa mwɔɔ ɔ.
“Anɛ O He Dlami Woɔ Mawu Hɛ Mi Nyami Lo?” (Hwɔɔmi Mɔ, September 2016)
Ngɛ mɛni blɔ nɔ nɛ yo ko nɛ e suɔ kaa e maa sa Mawu hɛ mi ɔ, ba ná juɛmi nɛ da ngɛ bɔ nɛ ni kpahi hla kaa a ma dla a he ha a he?
“He Dlami Ji Nɔ́ Nɛ Tsi Mi Blɔ” (O Hɛ Nɛ Tsɛ̃!, December 22, 2003)