Bɔ Nɛ Wa Ma Plɛ Kɛ Dla Pɛhi Nɛ Tee Si Ngɛ Ní Tsumi Mi Ha

Bɔfo Paulo tu Kristofohi nɛ samaa a nyɛmimɛ Kristofohi ngɛ kojomi he ɔ he munyu ngɛ 1 Korinto Bi 6:1-8. E hao lɛ wawɛɛ kaa Kristo se nyɛɛli komɛ nɛ ngɛ Korinto ɔ ngɔ a kɛ a nyɛmimɛ a ‘sane ya ha nihi nɛ ja we Mawu nɛ a ye ha mɛ.’ (Kuku 1) Paulo tsɔɔ yi mi tomi kpakpahi a he je nɛ e sɛ kaa Kristofohi ya samaa a nyɛmimɛ ngɛ kojomi he, mohu ɔ, e sa kaa a dla munyu ɔ ngɛ asafo ɔ mi. Ha nɛ wa susu yi mi tomi he je nɛ a ngɔ ga womi nɛ je Mawu ngɔ nɛ ɔ kɛ ha a he, konɛ wa susu si fɔfɔɛ kpahi nɛ ga womi ɔ kɔ we a he tutuutu ɔ hu he.

Ke ní tsumi mi sane ko te si ngɛ waa kɛ wa nyɛmi Kristofo no ko wa kpɛti ɔ, e sa kaa waa bɔ mɔde kaa wa ma tsu he ní ngɛ Yehowa blɔ tsɔɔmi nya, se pi bɔ nɛ wɔ nitsɛmɛ wa suɔ. (Abɛ 14:12) Kaa bɔ nɛ Yesu tsɔɔ ɔ, e hi kaa wa ma dla waa kɛ nihi wa kpɛti pɛ amlɔ nɔuu loko e ba plɛ pee sane agbo. (Mateo 5:23-26) Se aywilɛho sane ji kaa Kristo se nyɛɛli komɛ pee a he masɔ yeli, nɛ a ngɔɔ sanehi po kɛ yaa kojomi hehi konɛ a ye ha mɛ. Paulo de ke: “Kaa nyɛ nyɛ nɛ nyɛɛ kɛ nyɛ he ngɛ munyu yee ɔ, lɔ ɔ kɛkɛ tsɔɔ kaa nyɛ je mi bami sɛ́ Kristo se nyɛɛli sãasãa.” Mɛni he je? Yi mi tomi titli he je ji kaa munyu yemi ngɛ kojomi he ɔ ma ha nɛ nihi maa tu asafo ɔ kɛ Mawu nɛ wa jaa lɛ ɔ he munyu yaya. Enɛ he ɔ, wa suɔ mohu kaa waa nyɛɛ ngɛ Paulo munyu ɔ nya. E de ke: ‘Ke nyɛ ha nɛ ni kpahi pee nyɛ yayami mohu ɔ, jinɛ e ko hi!’​—Kuku 7.

Paulo tsɔɔ nya hu kaa Mawu to blɔ nya kpakpa nɛ a da nɔ kɛ dla pɛhi nɛ maa te si ngɛ asafo ɔ mi. Asafo mi nikɔtɔma amɛ ji Kristofohi nɛ ná Ngmami ɔ mi anɔkuale nile, nɛ Paulo de kaa a ma nyɛ maa ‘hyɛ nyɛmimɛ a kpɛti sanehi nɛ tee si ɔ a mi ha mɛ.’ (Kuku 3-5) Yesu tsɔɔ blɔ etɛ nɛ e sa kaa waa gu nɔ kɛ dla sanehi nɛ a mi wa kaa nɔ he guɛ gbemi, kɛ nɔ ojo fiami. E tsɔɔ kaa kekleekle ɔ, e sa kaa ni ɔmɛ nitsɛmɛ nɛ a bɔ mɔde kaa a ma dla a kpɛti. Enyɔne ɔ, ke mɛ nitsɛmɛ a pee nɛ e hí ɔ, a ngɔ odase kake loo enyɔ kɛ piɛɛ a he, nɛ ke lɔ ɔ hu tsu we ní ɔ, a ngɔ munyu ɔ kɛ ya ha asafo mi nikɔtɔma amɛ.​—Mateo 18:15-17.

Enɛ ɔ tsɔɔ we kaa asafo mi nikɔtɔma amɛ maa pee a ní kaa mlaa yeli loo ní tsumi he ga woli. Pi a blɔ nya ji kaa a tsɔɔ nyɛmimɛ nɔ́ tutuutu nɛ a pee kɛ dla a ní tsumi mi pɛhi. Mohu ɔ, a bɔɔ mɔde kaa a maa ye bua ni enyɔ ɔmɛ nɛ a ngɔ Ngmami ɔ kɛ tsu ní, nɛ́ a dla pɛ ɔ, konɛ tue mi jɔmi nɛ ba a kpɛti. Se eko ɔ, ke sane ɔ mi wa a, a ma bi kpɔ mi nɔ hyɛlɔ ɔ loo Yehowa Odasefohi asafo ɔ ní tsumi kɔni ɔ yemi kɛ buami. Se si fɔfɔɛ komɛ hu ngɛ nɛ Paulo tui a he munyu ngɛ e ga womi ɔ mi. Mɛni ji ekomɛ?

Be komɛ ɔ, bɔ nɛ pee nɛ tue mi jɔmi nɛ ba he je ɔ, nihi ngɔɔ sanehi kɛ yaa kojomi hehi. Kaa nɔ hyɛmi nɔ́ ɔ, si fɔfɔɛhi nɛ nyɛɛ se nɛ ɔ ma nyɛ ma bi nɛ nɔ ko nɛ ngɔ sane kɛ ya kojomi he. Ke nɔ ko suɔ kaa e maa po gba mi ngɛ mlaa nya, ke fɔlɔ ko suɔ kaa a ha lɛ he blɔ konɛ e bimɛ nɛ ba hi e ngɔ, ke nɔ ko suɔ kaa e he piɛɛlɔ nɛ e kɛ lɛ po gba mi ɔ nɛ wo lɛ blɔ, ke nɔ ko suɔ kaa e nine nɛ su insurance ko nɔ, ke nɔ ko suɔ kaa a ngɔ lɛ kɛ piɛɛ nihi nɛ ní tsumi ko nɛ gbee si ye mɛ hiɔ ɔ a he, loo ke nɔ ko suɔ kaa e maa hyɛ kaa gbosi ní he womi ko nɛ a pee ɔ da loo e dɛ. Behi hu ngɛ nɛ ke nɔ ko ya sama nyɛmi ko ɔ, nyɛmi ɔ hu ya samaa nɔ ɔ konɛ e kɛ fã e he.a

Ke pi juɛmi yaya ko he je nɛ nɔ ko ya sama nɔ ko ngɛ kojomi he ɔ, lɛɛ e ti si kɛ wui Paulo ga womi nɛ je Mawu ngɔ ɔ.b Se kɛ̃ ɔ, oti nɛ e sa kaa Kristofo no nɛ kɛ ma e hɛ mi ji kaa e ma tsɔ Yehowa biɛ ɔ he, nɛ́ e baa tue mi jɔmi kɛ kake peemi nɛ ngɛ asafo ɔ mi ɔ yi. Kristo se nyɛɛli a kadimi nɔ́ titli ji suɔmi, nɛ ‘suɔmi fo we lɛ nɔ kake too e nɔ́ mi.’​—1 Korinto Bi 13:4, 5; Yohane 13:34, 35.