Wa be osɔfohi ngɛ wa asafo ɔ mi nɛ a woɔ mɛ hiɔ. Mohu ɔ, a hlaa nɔ hyɛli nɛ sa konɛ a ‘hyɛ Mawu asafo ɔ nɔ,’ kaa bɔ nɛ e ji benɛ a to Kristofohi asafo ɔ sisi ehe ɔ. (Bɔfo Ɔmɛ A Ní Tsumi 20:28) Asafo mi nikɔtɔma nɛ ɔmɛ ji nyumuhi nɛ a nane pi si ngɛ Mawu jami mi nɛ a nyɛɛɔ asafo ɔ hɛ mi nɛ a hyɛɔ asafo ɔ nɔ. A jeɔ a tsui mi kɛ peeɔ enɛ ɔ se pi nɛ a ‘nyɛɔ a nɔ loo hiɔwo nɛ a ma ná a he je nɛ a peeɔ jã ngɛ, se mohu akɛnɛ a ngɛ nɔ́ nɛ a ngɛ pee ɔ he bua jɔmi ɔ he je.’ (1 Petro 5:1-3) Mɛni a peeɔ ha wɔ?

A hyɛɛ wa nɔ nɛ a buu wa he. Asafo mi nikɔtɔma amɛ kudɔɔ asafo mi bimɛ ɔmɛ nɛ a buɔ a he konɛ huɛ bɔmi kpakpa nɛ hi a kɛ Yehowa a kpɛti. Akɛnɛ nikɔtɔma amɛ le kaa Mawu nɛ e ha mɛ blɔ nya nɛ he hia nɛ ɔ he je ɔ, a yi Mawu we bi a nɔ, mohu ɔ, a haa nɛ wa náa si himi kpakpa kɛ bua jɔmi. (2 Korinto Bi 1:24) Kaa bɔ nɛ to hyɛlɔ susuɔ e to ɔmɛ eko tsuaa eko he wawɛɛ ɔ, jã kɛ̃ nɛ nikɔtɔma amɛ hu bɔɔ mɔde kaa a maa le nɔ tsuaa nɔ nɛ ngɛ asafo ɔ mi ɔ.​—Abɛ 27:23.

A tsɔɔ wɔ bɔ nɛ wa ma plɛ kɛ pee Mawu suɔmi nya ní ha. Daa otsi ɔ, nikɔtɔma amɛ hyɛɛ asafo mi kpehi a nɔ konɛ a kɛ ha nɛ wa hemi kɛ yemi ɔ mi nɛ wa. (Bɔfo Ɔmɛ A Ní Tsumi 15:32) Nyumu nɛ ɔmɛ nɛ a kɛ a he ha a nyɛɛɔ wa hɛ mi kɛ fiɛɛɔ sane kpakpa a hulɔ, nɛ a kɛ wɔ tsuɔ ní, nɛ a tsɔseɔ wɔ ngɛ sɔmɔmi ní tsumi ɔ fã amɛ tsuo a mi.

A woɔ wa ti nɔ tsuaa nɔ he wami. Asafo mi nikɔtɔma amɛ slaa wɔ ngɛ wa wehi a mi aloo a kɛ wɔ tuɔ munyu ngɛ Matsɛ Yemi Asa a nɔ, konɛ a da Ngmami ɔ nɔ kɛ ye bua wɔ aloo nɛ a wo wa bua nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa.​—Yakobo 5:14, 15.

Ngɛ ní nɛ asafo mi nikɔtɔmahi tsuɔ ngɛ asafo ɔ mi ɔ tsuo se ɔ, a kpɛti nihi fuu tsuɔ he lo nya ní tsumi, nɛ weku mi blɔ nya ní tsumihi hu fɔɔ si ngɛ a kuɛ nɔ nɛ e biɔ nɛ a ná be kɛ deka kɛ tsu a he ní. E sa nɛ wa je bumi kpo kɛ tsɔɔ nyɛmimɛ nyumu nɛ ɔmɛ nɛ a tsuɔ ní wawɛɛ ɔ.​—1 Tesalonika Bi 5:12, 13.

• Mɛni ji asafo mi nikɔtɔma amɛ a blɔ nya ní tsumi?

• Mɛni blɔhi a nɔ nikɔtɔma amɛ guɔ kɛ jeɔ suɔmi kpo kɛ tsɔɔ wa ti nɔ tsuaa nɔ?

Baiblo ɔ tu kuu enyɔ nɛ ji ‘asafo nya dali, kɛ sɔmɔli’ nɛ a ji Kristofohi nɛ a tsuɔ asafo mi ní tsumi hi a he munyu. (Filipi Bi 1:1) Behi fuu ɔ, asafo mi nikɔtɔmahi kɛ asafo mi sɔmɔli hiɔ asafo tsuaa asafo mi. Mɛni asafo mi sɔmɔli ɔmɛ peeɔ ha wɔ nɛ wa náa he se?

A yeɔ bua asafo mi nikɔtɔma amɛ a kuu ɔ. Nyumuhi nɛ a wa kɛ ni nɛmɛ nɛ a wɛ tsuo nɛ́ a sɔmɔɔ kaa asafo mi sɔmɔli ɔ ji nihi nɛ a nane pi si ngɛ Mawu jami mi, nɛ́ a hɛ dɔɔ ngɛ ní tsumi he, nɛ nihi kɛ a hɛ ma nyɛ maa fɔ a nɔ. Behi fuu ɔ, a tsuɔ asafo ɔ mi ní tsumihi nɛ a he hia nɛ́ kɔɔ níhi a he blɔ nya tomi kɛ Matsɛ Yemi Asa a he ɔ he ní. Enɛ ɔ haa nɛ asafo mi nikɔtɔma amɛ náa deka kɛ tsɔɔ nyɛmimɛ ɔmɛ ní, nɛ a slaa mɛ nɛ a woɔ mɛ he wami.

A peeɔ níhi nɛ wa náa he se. A haa nɛ asafo mi sɔmɔli ɔmɛ ekomɛ sɔmɔɔ kaa nibwɔhi a kpeeli nɛ a haa nihi nɛ a baa kpehi ɔ sɛ. Eko ɔ, a ti ni komɛ hyɛɛ munyu tumi klama a, womihi a gbami, asafo ɔ sika blɔ nya tomi, kɛ zugba kpɔhi a gbami kɛ ha nihi nɛ a ngɛ asafo ɔ mi ɔ nɔ. A yeɔ bua kɛ dlaa Matsɛ Yemi Asa a nɔ kɛ e he hulɔ. Nikɔtɔmahi ma nyɛ ma de mɛ konɛ a ye bua nihi nɛ a bwɔ ɔ. Nihi tsuo nɛ a ngɛ asafo ɔ mi ɔ buu asafo mi sɔmɔli ɔmɛ ngɛ a tsui mi nɛ a jeɔ kɛ tsuɔ blɔ nya ní tsumi nɛ ɔmɛ a he ní ɔ he.​—1 Timoteo 3:13.

A ji nyumuhi nɛ peeɔ nɔ hyɛmi nɔ́ kpakpa. Mawu jami mi su kpakpahi a nɔ nɛ a daa kɛ hlaa asafo mi sɔmɔli. Ke a ha mɛ ní tsumi ngɛ kpehi a sisi nɛ a tsu he ní ɔ, e haa nɛ hemi kɛ yemi nɛ wa ngɛ ɔ mi waa. Ke a kɛ kã tsu fiɛɛmi ní tsumi ɔ, lɔ ɔ woɔ wɔ he wami nɛ wɔ hu waa kɛ kã fiɛɛɔ. Akɛnɛ a kɛ nikɔtɔma amɛ a kuu ɔ peeɔ kake he je ɔ, lɔ ɔ ha nɛ kake peemi kɛ bua jɔmi ngɛ asafo ɔ mi. (Efeso Bi 4:16) Ngɛ be nɛ sa mi ɔ, mɛ hu a he ma nyɛ maa su konɛ a sɔmɔ kaa asafo mi nikɔtɔmahi.

• Mɛnɔmɛ kikɛ ji asafo mi sɔmɔli ɔmɛ?

• Mɛni blɔ nɔ asafo mi sɔmɔli ɔmɛ guɔ kɛ yeɔ bua nɛ níhi yaa nɔ pɛpɛɛpɛ ngɛ asafo ɔ mi?

A pɔɔ Barnaba kɛ Paulo a ta womi ngɛ Kristofohi a Hela Ngmami ɔ mi. Nyumu nɛ ɔmɛ sɔmɔ kaa nɔ hyɛli nɛ a hiaa blɔ kɛ ya slaa asafohi ngɛ kaseli ɔmɛ a be ɔ mi. Mɛni he je? A jeɔ a tsui mi nɛ a susuɔ huɛ bɔmi nɛ ngɛ a nyɛmimɛ Kristofohi kɛ Yehowa a kpɛti ɔ he. Paulo de ke e suɔ nɛ e ‘kpale kɛ ya slaa nyɛmimɛ ɔmɛ’ konɛ e hyɛ bɔ nɛ a ngɛ ha. E suɔ kaa e maa hia blɔ si tomi lafahi abɔ konɛ e ya wo nyɛmimɛ ɔmɛ he wami. (Bɔfo Ɔmɛ A Ní Tsumi 15:36) Jã nɔuu nɛ mwɔnɛ ɔ hu wa kpɔ mi nɔ hyɛli ɔmɛ hu suɔ kaa a wo wɔ he wami.

A ba woɔ wɔ he wami. Kpɔ mi nɔ hyɛlɔ tsuaa kpɔ mi nɔ hyɛlɔ slaa asafohi maa pee 20 si enyɔ daa jeha, nɛ a yeɔ otsi ngɛ asafo tsuaa asafo mi. Wa ma nyɛ ma ná nyɛmimɛ nyumu nɛ ɔmɛ kɛ a yihi​—ke ji a ngɛ yihi​—a níhi a si kpamihi a he se wawɛɛ nitsɛ. A bɔɔ mɔde kaa a maa le jokuɛwi kɛ nikɔtɔmahi tsuo, nɛ a suɔ wawɛɛ kaa a maa piɛɛ wa he kɛ ya fiɛɛmi konɛ a piɛɛ wa he kɛ ya pee wa Baiblo mi ni kasemihi. Nɔ hyɛli nɛ ɔmɛ piɛɛɔ asafo mi nikɔtɔma amɛ a he kɛ ya slaa nyɛmimɛ nɛ a woɔ mɛ he wami. A tuɔ munyuhi kɛ tsɔɔ wɔ ngɛ asafo mi kpehi, kpɔ mi kpehi kɛ kpokpa nɔ kpehi a sisi konɛ a kɛ wo wɔ he wami.​—Bɔfo Ɔmɛ A Ní Tsumi 15:35.

A jeɔ suɔmi kpo kɛ tsɔɔ nɔ tsuaa nɔ. Kpɔ mi nɔ hyɛli suɔ kaa huɛ bɔmi kpakpa nɛ hi nɔ tsuaa nɔ nɛ ngɛ asafo ɔ mi ɔ kɛ Yehowa a kpɛti. A kɛ asafo mi nikɔtɔma amɛ kɛ asafo mi sɔmɔli kpeɔ kɛ susuɔ bɔ nɛ nyɛmimɛ ngɛ asafo ɔ mi ɔ ngɛ nɔ yae ha a he, nɛ a kɛ ga womi nɛ sa haa mɛ konɛ a nyɛ nɛ a tsu a blɔ nya ní tsumi ɔmɛ a he ní. A yeɔ bua blɔ gbali konɛ a nyɛ nɛ a tsu a sɔmɔmi ní tsumi ɔ saminya, nɛ a bua jɔɔ kaa a maa le ni hehi nɛ a kɛ asafo ɔ ba bɔni bɔmi ɔ konɛ a le bɔ nɛ a ngɛ nɔ yae ha ngɛ asafo ɔ mi. Nyɛmimɛ nyumu nɛ ɔmɛ a ti nɔ tsuaa nɔ jeɔ e tsui mi nɛ e kɛ e he haa kaa e ‘maa piɛɛ wa he kɛ tsu ní konɛ e hi ha wɔ.’ (2 Korinto Bi 8:23) E sa nɛ waa kase a hemi kɛ yemi kɛ a tsui mi nɛ a je kɛ ngɛ Mawu suɔmi nya ní pee ɔ.​—Hebri Bi 13:7.

• Mɛni he je nɛ kpɔ mi nɔ hyɛli ya slaa asafohi?

• Kɛ o ma plɛ kɛ ná slaami nɛ a ya slaa asafo ɔmɛ ɔ he se kɛɛ?

Ke oslaa ba a, Yehowa Odasefohi toɔ blɔ nya amlɔ nɔuu nɛ a yeɔ bua nihi nɛ oslaa a ba a nɔ ɔ. Mɔde nɛ wa bɔɔ kɛ peeɔ jã a tsɔɔ kaa wa ngɛ suɔmi nitsɛnitsɛ kɛ ha wa sibi. (Yohane 13:34, 35; 1 Yohane 3:17, 18) Mɛni blɔhi a nɔ nɛ wa guɔ kɛ yeɔ bua wa nyɛmimɛ?

Waa kɛ sika yeɔ bua. Benɛ hwɔ ngua ko ba Yudea a, Kristofohi nɛ a ngɛ Antiokia a mane sika kɛ ya ye bua a nyɛmimɛ Kristofohi nɛ a ngɛ Yudea a. (Bɔfo Ɔmɛ A Ní Tsumi 11:27-30) Jã nɔuu kɛ̃ nɛ ke wa ná le kaa wa nyɛmimɛ nɛ a ngɛ ma kpahi a nɔ kɛ si himi nɛ mi wa ngɛ kpee ɔ, waa kɛ sika maneɔ kɛ guɔ asafohi nɛ wa ngɛ mi ɔ a nɔ nɛ a kɛ tsuɔ wa nyɛmimɛ nɛ e hia mɛ ɔ a he lo nya hiami níhi a he ní kɛ haa mɛ.​—2 Korinto Bi 8:13-15.

Wa tsuɔ nɔ́ pɔtɛɛ nɛ hia mɛ ɔ he ní ha mɛ. Asafo mi nikɔtɔmahi nɛ ngɛ he nɛ oslaa a ba ngɛ ɔ bɔɔ mɔde kaa a ma hla asafo mi no tsuaa asafo mi no nɛ oslaa ba e nɔ ɔ, nɛ a ye bua lɛ. Yemi kɛ buami kuu hyɛɛ nɛ a haa wa nyɛmimɛ ɔmɛ niye ní, nyu nɛ mi tsɔ, he hami níhi, hwɔ he, nɛ a yeɔ bua mɛ ngɛ hiɔ tsami blɔ fa mi. Odasefohi babauu nɛ a le nine nya ní tsumihi kɛ a he haa faa nɛ a kɛ mɛ nitsɛmɛ a sika hiaa blɔ nɛ a ya yeɔ bua nihi nɛ oslaa ná mɛ, aloo a ya dlaa wehi kɛ Matsɛ Yemi Asahi nɛ a puɛ. Kake peemi nɛ ngɛ wa kpɛti kaa asafo, kɛ kake nɛ wa peeɔ kɛ tsuɔ níhi a he ní ɔ yeɔ bua wɔ nɛ wa toɔ níhi nɛ hia kɛ ní tsuli a he blɔ nya oya ngɛ fimi behi a mi. E ngɛ mi kaa wa yeɔ bua “nihi nɛ waa kɛ mɛ hɛɛ hemi kɛ yemi kake ɔ” mohu lɛɛ, se wa yeɔ bua nihi nɛ a ngɛ jami kpahi a mi ɔ hulɔ, ke e he hia kaa waa pee jã.​—Galatia Bi 6:10.

Waa kɛ Ngmami ɔ yeɔ bua mɛ nɛ wa woɔ a bua. Nɔ́ nɛ nihi nɛ oslaa ba a nɔ hia titli ji bua womi. Ngɛ behi kaa kikɛ ɔ mi ɔ, Yehowa nɛ ji “Mawu nɛ woɔ nɔ bua ngɛ nɔ́ tsuaa nɔ́ mi” ɔ woɔ wɔ he wami. (2 Korinto Bi 1:3, 4) Waa kɛ bua jɔmi deɔ nihi nɛ a hao ɔ Baiblo ɔ mi si womi ɔmɛ, nɛ wa maa nɔ mi kɛ haa mɛ kaa e be kɛe nɛ Mawu Matsɛ Yemi ɔ maa po níhi tsuo nɛ kɛ piimi kɛ nɔ́ nami baa a se.​—Kpojemi 21:4.

• Mɛni he je nɛ Odasefohi nyɛɔ nɛ a toɔ níhi a he blɔ nya mla kɛ ya yeɔ bua nihi nɛ oslaa ba a nɔ ɔ?

• Mɛni Ngmami ɔ mi munyuhi nɛ́ woɔ nɔ bua wa ma nyɛ maa tu kɛ tsɔɔ nihi nɛ oslaa ba a nɔ nɛ a je mi slɔkee ɔ?

Benɛ e piɛ bɔɔ nɛ Yesu ma gbo ɔ, e kɛ e kaseli eywiɛ nɛ ji, Petro, kɛ Yakobo, kɛ Yohane, kɛ Andrea pɛ susu nɔ́ ko he. Benɛ Yesu ngɛ mɛ bami nɛ e maa ba kɛ nyagbe ligbi ɔmɛ a he okadi tsɔɔe ɔ, e bi sane ko nɛ he hia ke: ‘Mɛnɔ ji tsɔlɔ anɔkualetsɛ kɛ ní lelɔ ɔ nɛ e Nyɔmtsɛ ɔ ngɔ lɛ ngɔ to tsɔli kpa amɛ a nya, konɛ e ha mɛ a nya mi ngma ngɛ be nɛ sa mi ɔ?’ (Mateo 24:3, 45; Marko 13:3, 4) Yesu ngɛ nɔ mi mae ha e kaseli ɔmɛ kaa, lɛ nɛ́ e ji a “nyɔmtsɛ ɔ,” e maa hla nihi konɛ a ha e se nyɛɛli ɔmɛ mumi mi niye ní be tsuaa be ngɛ nyagbe be ɔ mi. Mɛnɔmɛ maa pee tsɔlɔ nɛ ɔ?

A ji Yesu se nyɛɛli nɛ a pɔ mɛ nu ɔ a kpɛti nihi bɔɔ ko. “Tsɔlɔ” ɔ ji Yehowa Odasefohi a Blɔ Tsɔɔmi Ajla Toli ɔmɛ ɔ nɛ. A ngɛ a nyɛmimɛ Yehowa sɔmɔli a mumi mi niye ní hae ngɛ be nɛ sa mi. Waa kɛ wa hɛ fɔɔ tsɔlɔ anɔkualetsɛ ɔ nɔ kaa e ma ha wɔ “niye ní ngɛ be nɛ sa mi.”​—Luka 12:42.

A hyɛɛ Mawu we ɔ mi bimɛ ɔmɛ a nɔ. (1 Timoteo 3:15) Yesu kɛ ní tsumi ngua ko wo tsɔlɔ ɔ dɛ kaa a hyɛ Yehowa blɔ nya tomi ɔ fã nɛ ngɛ zugba a nɔ ɔ nɔ, lɔ ɔmɛ ji, he lo nya níhi nɛ asafo ɔ ngɛ, fiɛɛmi ní tsumi ɔ, kɛ ní nɛ a tsɔɔ wɔ ngɛ wa we asafo ɔmɛ a mi. Enɛ ɔ he ɔ, bɔ nɛ pee nɛ “tsɔlɔ anɔkualetsɛ kɛ ní lelɔ ɔ” nɛ e nyɛ nɛ e ha wɔ níhi nɛ wa hia ngɛ be nɛ sa mi ɔ, a gbaa mumi mi niye ní kɛ guɔ womihi nɛ waa kɛ tsuɔ ní ngɛ wa fiɛɛmi ní tsumi ɔ mi, kɛ níhi nɛ a tsɔɔ wɔ ngɛ kpehi kɛ he nya buamihi a sisi ɔ nɔ.

Tsɔlɔ ɔ kɛ anɔkuale yemi ngɛ Baiblo ɔ mi anɔkuale ɔ kɛ fami nɛ a fã lɛ kaa e fiɛɛ sane kpakpa a he ní tsue, nɛ e kɛ nile ngɛ Kristo níhi nɛ a ngɛ zugba a nɔ ɔ a nɔ hyɛe. (Bɔfo Ɔmɛ A Ní Tsumi 10:42) Yehowa ha nɛ nihi fuu ba ngɛ e we odasefohi a he piɛe, nɛ e ngɛ tsɔlɔ ɔ ye buae kɛ ngɛ Baiblo mi anɔkuale ɔ gbɛe kɛ ngɛ fiae.​—Yesaya 60:22; 65:13.

• Mɛnɔ ji nɔ nɛ Yesu hla kaa é lɛ e kaseli ɔmɛ ngɛ mumi mi ɔ?

• Ngɛ mɛni blɔ nɔ tsɔlɔ ɔ ji anɔkualetsɛ kɛ ní lelɔ?

Ngɛ kaseli ɔmɛ a be ɔ mi ɔ, kuu nyafii ko nɛ ji, ‘bɔfo ɔmɛ kɛ nikɔtɔma amɛ ngɛ Yerusalem’ ɔ sɔmɔ kaa blɔ tsɔɔmi ajla toli nɛ da Kristofohi nɛ a pɔ mɛ nu ɔ a we asafo ɔ tsuo nane mi kɛ mwɔ yi mi kpɔ ngɛ sanehi nɛ a he hia a he. (Bɔfo Ɔmɛ A Ní Tsumi 15:2) Ke a susu Ngmami ɔ he nɛ a ha nɛ mumi klɔuklɔu ɔ kudɔ mɛ ɔ, a peeɔ kake kɛ mwɔɔ yi mi kpɔ ngɛ sanehi a he. (Bɔfo Ɔmɛ A Ní tsumi 15:25) Jã nɔuu nɛ a peeɔ mwɔnɛ ɔ.

Mawu kɛ mɛ ngɛ ní tsue konɛ a pee e suɔmi nya ní. Nyɛmimɛ nyumuhi nɛ a pɔ mɛ nu nɛ a ngɛ sɔmɔe kaa Blɔ Tsɔɔmi Ajla Toli ɔ bua jɔ Mawu Munyu ɔ he wawɛɛ, nɛ a ngɛ níhi a si kpami fuu nɛ a kɛ nyɛɔ tsuɔ Mawu jami mi sanehi kɛ sane kpahi nɛ a he hia a he ní. A kpeɔ daa otsi kɛ susuɔ níhi nɛ a he hia nyɛmimɛ nɛ a ngɛ je kɛ wɛ ɔ a he. Kaa bɔ nɛ blɔ tsɔɔmi ajla toli ɔmɛ pee ngɛ Yesu kaseli ɔmɛ a be ɔ mi ɔ, mwɔnɛ ɔ hu ɔ, a haa wɔ Baiblo mi blɔ tsɔɔmihi kɛ guu sɛ womihi nɛ a ngmaa, loo kpokpa nɔ hyɛli, loo ni kpahi a nɔ. Enɛ ɔ ha nɛ Mawu we bi a susumi kɛ a ní peepeehi sɔ. (Bɔfo Ɔmɛ A Ní Tsumi 16:4, 5) Blɔ Tsɔɔmi Ajla Toli ɔmɛ hyɛɛ mumi mi niye ní ɔ he blɔ nya tomi nɔ, nɛ a woɔ wɔ he wami ngɛ Matsɛ Yemi fiɛɛmi ní tsumi ɔ mi, nɛ a hyɛɛ nyɛmimɛ nyumuhi nɛ́ a kɛ sɔmɔmi he blɔhi woɔ a dɛ ngɛ asafo ɔ mi ɔ a hlami nɔ.

A haa nɛ Mawu mumi ɔ tsɔɔ mɛ blɔ. Blɔ Tsɔɔmi Ajla Toli ɔmɛ hlaa blɔ tsɔɔmi kɛ jeɔ Yehowa nɛ ji Je Mluku ɔ Matsɛ ɔ, kɛ Yesu nɛ ji asafo ɔ Yi ɔ a ngɔ. (1 Korinto Bi 11:3; Efeso Bi 5:23) Blɔ Tsɔɔmi Ajla Toli ɔmɛ bui a he kaa a ji Mawu we bi a nya dali. A kɛ Kristofohi nɛ a pɔ mɛ nu ɔ tsuo ‘nyɛɛɔ To Bi nɛ ji Yesu ɔ se kɛ yaa he tsuaa he nɛ e yaa.’ (Kpojemi 14:4) Blɔ Tsɔɔmi Ajla Toli ɔmɛ a bua jɔɔ sɔlemi nɛ wa sɔleɔ kɛ haa mɛ ɔ he wawɛɛ.

• Mɛnɔmɛ nɛ a sɔmɔ kaa blɔ tsɔɔmi ajla toli ngɛ kaseli ɔmɛ a be ɔ mi?

• Mɛni blɔ nɔ Blɔ Tsɔɔmi Ajla Toli ɔmɛ guu kɛ hlaa blɔ tsɔɔmi kɛ jeɔ Mawu ngɔ mwɔnɛ ɔ?

Hebri munyu nɛ ji Betel ɔ sisi ji “Mawu We.” (1 Mose 28:17, 19) E da blɔ kaa a tsɛɔ tsuhi nɛ Yehowa Odasefohi ma ngɛ je ɔ mi tsuo nɛ a jeɔ lejɛ ɔ kɛ hyɛɔ fiɛɛmi ní tsumi ɔ nɔ ɔ ke Betel. Blɔ Tsɔɔmi Ajla Toli ɔmɛ sɔmɔɔ ngɛ asafo ɔ ní tsumi he yi ɔ ngɛ New York State, U.S.A., nɛ a hyɛɛ ní tsumihi nɛ yaa nɔ ngɛ asafo ɔ ní tsumi kɔnihi nɛ a ngɛ mahi fuu a nɔ ɔ nɔ. A tsɛɛ nihi nɛ a sɔmɔɔ ngɛ asafo ɔ ní tsumi kɔni nɛ ɔmɛ ɔ ke Betel weku ɔ mi bimɛ. Kaa bɔ nɛ weku mi bimɛ peeɔ a ní ɔ, mɛ hu a hiɔ he kake, a blaa kɛ tsuɔ ní, a blaa kɛ yeɔ ní, nɛ a peeɔ kake kɛ kaseɔ Baiblo ɔ.​—La 133:1.

Betel pɛ ji he nɛ nihi blaa kɛ hiɔ si ngɛ kaa weku, nɛ a jeɔ a tsui mi kɛ tsuɔ ní. Ngɛ Betel ní tsumi he tsuaa ní tsumi he ɔ, o maa na nyumuhi kɛ yihi nɛ a ji Kristofohi, nɛ a je a tsui mi kɛ ngɛ Mawu suɔmi nya ní pee, nɛ a kɛ a be tsuo ngɛ Matsɛ Yemi ɔ he níhi tsue. (Mateo 6:33) A wui a ti nɔ ko nɔ ko hiɔ, se a haa nɔ tsuaa nɔ hwɔ he, kɛ niye ní, kɛ sika bɔɔ konɛ lɔ ɔ nɛ ye bua lɛ kɛ tsu e hiami níhi a he ní. Nɔ tsuaa nɔ nɛ ngɛ Betel ɔ ngɛ ní tsumi nɛ e tsuɔ; ni komɛ tsuɔ ní ngɛ ɔfisi, nɛ ni komɛ tsuɔ ní ngɛ kpata mi, loo ní yemi he. Ni komɛ tsuɔ ní ngɛ he nɛ a fiaa womihi aloo he nɛ a kpɛɔ womihi ngɛ, loo he nɛ a fɔɔ níhi a he ngɛ, loo he nɛ a dlaa níhi ngɛ. Ni komɛ dlaa nihi a tsu mi, nɛ ni komɛ hu tsuɔ ní tsumi kpahi.

He ko nɛ a tsuɔ ní wawɛɛ kɛ fĩɔ Matsɛ Yemi fiɛɛmi nítsumi ɔ se ngɛ. Nɔ́ titli nɛ a tsuɔ ngɛ Betel tsuaa Betel ji yemi kɛ buami nɛ a kɛ haa nihi fuu konɛ a kase Baiblo ɔ mi anɔkuale ɔ. Womiyo nɛ ɔ ji nɔ hyɛmi nɔ́ kake nɛ tsɔɔ jã. Blɔ Tsɔɔmi Ajla Toli ɔmɛ nɛ ha nɛ a ngma, nɛ a kɛ mane kɛ gu kɔmpiuta nɔ kɛ ya ha gbi sisi tsɔɔmi kuu lafahi abɔ nɛ a ngɛ je kɛ wɛ nɛ a tsɔɔ sisi. Lɔ ɔ se ɔ, ní fiami klamahi nɛ a he sɔɔ wawɛɛ nɛ ngɛ Betel ní tsumi hehi fuu ɔ fia, nɛ a kɛ mane asafohi nɛ a hiɛ pe 110,000. Ngɛ enɛ ɔmɛ tsuo a peemi mi ɔ, Betel weku mi bimɛ ɔmɛ yeɔ bua kɛ fiɔ ní tsumi nɛ e he hia nɛ ji, sane kpakpa fiɛɛmi ní tsumi ɔ se.​—Marko 13:10.

• Mɛnɔmɛ nɛ a sɔmɔɔ ngɛ Betel, nɛ mɛni blɔ nyahi a to kɛ ha mɛ?

• Mɛni ní tsumi nɛ he hia nɛ Betel tsuaa Betel fiɔ se?

Betel weku ɔ mi bimɛ tsuɔ ní ngɛ ní tsumi he slɔɔtoslɔɔtohi, nɛ a hyɛɛ fiɛɛmi ní tsumi ɔ nɔ ngɛ ma kake aloo mahi nɛ a hiɛ pe jã a nɔ. A ti ni komɛ ma nyɛ ma tsu ní ngɛ gbi sisi tsɔɔmi kuuhi a mi, loo womi tɛtlɛɛhi a fiami he, loo womihi a kpɛmi he, loo he nɛ a kɛ womihi ya pueɔ, loo he nɛ a peeɔ video loo a nuɔ munyuhi kɛ fɔɔ kpa nɔ ngɛ, aloo he kpahi.

Asafo ɔ Nítsumi Kɔni Ajla Toli nɛ a hyɛɛ nítsumi ɔ nɔ. Blɔ Tsɔɔmi Ajla Toli ɔmɛ to ní tsumi nɛ a tsuɔ ngɛ asafo ɔ ní tsumi kɔni ɔ kɛ wo Asafo ɔ Ní Tsumi Kɔni Ajla Toli, nɛ ji asafo mi nikɔtɔmahi nɛ sa etɛ loo nɔ́ nɛ hiɛ pe jã a dɛ. Ajla toli nɛ ɔmɛ haa nɛ Blɔ Tsɔɔmi Ajla Toli ɔmɛ leɔ nɔ́ nɛ ngɛ nɔ yae ngɛ mahi nɛ mɛ ajla toli ɔmɛ ngɛ nɔ hyɛe ɔ a nɔ, nɛ a haa nɛ Blɔ Tsɔɔmi Ajla Toli ɔmɛ leɔ nyagbahi nɛ ma nyɛ maa ba. Enɛ ɔ ha nɛ Blɔ Tsɔɔmi Ajla Toli ɔmɛ leɔ níhi nɛ hwɔɔ se ɔ, a maa ngma ngɛ wa womi ɔmɛ a mi, aloo níhi nɛ a ma ha nɛ wa susu he ngɛ kpehi kɛ he nya buami slɔɔtohi a sisi. Blɔ Tsɔɔmi Ajla Toli ɔmɛ tsɔɔ a nane mi dali daa nɛ a ya slaa asafo ɔ ní tsumi kɔnihi, nɛ a yeɔ bua Asafo ɔ Ní Tsumi Kɔnihi Ajla Toli konɛ a nyɛ nɛ a tsu ní tsumi nɛ a kɛ wo a dɛ ɔ. (Abɛ 11:14) A toɔ blɔ nya klɛdɛɛ nɛ asafo ɔ ní tsumi yi ɔ nane mi dalɔ tuɔ munyu kɛ woɔ nihi nɛ a ngɛ ma nɛ asafo ní tsumi kɔni ɔ ngɛ mi ɔ he wami.

A yeɔ bua asafo ɔmɛ. Nyɛmimɛ nyumuhi nɛ a kɛ sɔmɔmi he blɔ wo a dɛ nɛ a ngɛ sɔmɔe ngɛ asafo ɔ ní tsumi kɔni ɔ hyɛɛ nɛ a toɔ asafo ehehi sisi. Jehanɛ se hu ɔ, nyɛmimɛ nyumuhi nɛ a ngɛ sɔmɔe ngɛ asafo ɔ ní tsumi kɔni ɔ hyɛɛ blɔ gbali, ma se sane kpakpa fiɛɛli, kɛ kpɔ mi nɔ hyɛli nɛ a sɔmɔɔ ngɛ ma nɛ asafo ɔ ní tsumi kɔni ɔ hyɛɛ nɔ ɔ a ní tsumihi a nɔ. A toɔ kpe wawi kɛ kpe nguahi a he blɔ nya, nɛ a hyɛɛ Matsɛ Yemi Asa ehehi a mami nɔ, nɛ a hyɛɛ hu kaa asafohi a nine su womihi nɛ sa kaa a kɛ mane mɛ ɔ a nɔ. Nɔ́ tsuaa nɔ́ nɛ a tsuɔ ngɛ asafo ɔ ní tsumi kɔni ɔ yeɔ bua nɛ wa nyɛɔ nɛ wa tsuɔ fiɛɛmi ní tsumi ɔ ngɛ blɔ nya tomi nya.​—1 Korinto Bi 14:33, 40.

• Mɛni blɔ nɔ Asafo ɔ Ní Tsumi Kɔni Ajla Toli ɔmɛ guɔ kɛ yeɔ bua Blɔ Tsɔɔmi Ajla Toli ɔmɛ?

• Mɛni blɔ nya ní tsumihi a he ní nɛ a tsuɔ ngɛ asafo ɔ ní tsumi kɔni ɔ?

Bɔ nɛ pee nɛ wa nyɛ nɛ waa fiɛɛ “sane kpakpa” a kɛ ha “nihi nɛ a ngɛ je ɔ mi, mahi kɛ wɛtsohi, kɛ gbihi kɛ nimli tsuo” ɔ, wa peeɔ womihi ngɛ gbihi nɛ a hiɛ pe 750 mi. (Kpojemi 14:6) Kɛ wa peeɔ kɛ tsuɔ ní tsumi nɛ he wa nɛ ɔ ha kɛɛ? Wa nyɛɔ nɛ wa peeɔ enɛ ɔ kɛ guu nihi nɛ a ji ní ngmali kɛ gbi sisi tsɔɔli nɛ a kɛ a he ha ngɛ je kɛ wɛ, nɛ mɛ tsuo a ji Yehowa Odasefohi ɔ a yemi kɛ buami nɔ.

Kekleekle ɔ, a ngmaa womi ɔmɛ ngɛ Blɛfo gbi mi. Blɔ Tsɔɔmi Ajla Toli ɔmɛ hyɛɛ Ní Tsumi He Nɛ Hyɛɛ Womihi A Ngmami Nɔ ɔ nɔ ngɛ asafo ɔ yi ɔ. Ní Tsumi He Nɛ Hyɛɛ Womihi A Ngmami Nɔ ɔ toɔ ní ngmali ɔmɛ tsuo nɛ ngɛ asafo ɔ yi ɔ kɛ nihi tsuo nɛ a ngɛ asafo ɔ ní tsumi kɔni ɔmɛ ɔ a ní tsumihi a he blɔ nya. Akɛnɛ wa ní ngmali ɔmɛ ngɛ ma slɔɔtohi a nɔ he je ɔ, lɔ ɔ haa munyuhi nɛ a ngmaa a kɔɔ níhi ekpaekpahi a he, nɛ lɔ ɔ haa nɛ nihi nɛ a ngɛ je kɛ wɛ ɔ a bua jɔɔ wa womi ɔmɛ a he.

A kɛ níhi nɛ a ngmaa a maneɔ gbi sisi tsɔɔli ɔmɛ. Ke a hyɛ níhi nɛ a ngma a mi fitsofitso nɛ a kplɛɛ nɔ kaa e hi ɔ, a kɛ maneɔ gbi sisi tsɔɔli a kuuhi nɛ a ngɛ je kɛ wɛ ɔ kɛ guɔ kɔmpiuta nɔ. Gbi sisi tsɔɔli nɛ ɔmɛ tsɔɔ gbi ɔ sisi, a hyɛɔ kaa bɔ nɛ a tsɔɔ gbi ɔ sisi ha a da, nɛ a kaneɔ mi kɛ hyɛɔ kaa e ngɔ lo. A bɔɔ mɔde kaa a kɛ ‘anɔkuale munyuhi nɛ a da’ nɛ a kɛ sisi numi nɛ ngɛ Blɛfo gbi ɔ mi ɔ kɔ ɔ ma tsu ní.​—Fiɛlɔ 12:10.

Kɔmpiuta haa nɛ ní tsumi ɔ sɔɔ. Kɔmpiuta ko be nyɛe ma tsu ní tsumi nɛ ní ngmali kɛ gbi sisi tsɔɔli tsuɔ ɔ. Se kɛ̃ ɔ, munyunguhi a sisi tsɔɔmi womihi, kɛ ní kpahi nɛ yeɔ bua ngɛ gbihi a sisi tsɔɔmi kɛ níhi a mi hlami mi nɛ a kɛ wo kɔmpiuta nɔ ɔ, haa nɛ ní ngmali kɛ gbi sisi tsɔɔli ɔmɛ a ní tsumi ɔ sɔɔ. Yehowa Odasefohi pee kɔmpiuta blɔ nya tomi ko nɛ e biɛ ji Multilanguage Electronic Publishing System (MEPS). E ji blɔ nya tomi nɛ haa nɛ a nyɛɔ fiaa ningma okadihi ngɛ gbi lafahi abɔ mi, nɛ a kɛ fonihi nyɛɔ woɔ mi, nɛ a toɔ he blɔ nya konɛ a nyɛ nɛ a fia.

Mɛni he je nɛ wa gboɔ dengme wawɛɛ, nɛ wa tsɔɔ Blɛfo gbi ɔ sisi kɛ yaa gbihi po nɛ nihi akpehi bɔɔ ko pɛ tuɔ ɔ mi ɔ? Ejakaa Yehowa suɔ kaa “nimli tsuo nɛ le anɔkuale ɔ, konɛ a he a yi wami.”​—1 Timoteo 2:3, 4.

• Mɛni blɔ nɔ a guɔ kɛ ngmaa wa womi ɔmɛ?

• Mɛni he je nɛ wa tsɔɔ wa womi ɔmɛ a sisi kɛ yaa gbihi fuu a mi ɔ?

Daa jeha a, wa asafo ɔ peeɔ Baiblohi kɛ womi kpahi ayɔ lafahi abɔ nɛ a gbaa kɛ haa nihi nɛ wa jua we ha mɛ. Wa maa Matsɛ Yemi Asahi kɛ asafo ɔ ní tsumi kɔnihi nɛ wa hyɛɔ a nɔ. Wa hyɛɔ nihi nɛ a tsuɔ ní ngɛ Betel kɛ ma se sane kpakpa fiɛɛli akpehi abɔ a nɔ, nɛ wa ya yeɔ bua nihi nɛ oslaa ná mɛ hulɔ. Enɛ ɔ he ɔ, eko ɔ, o ma bi ke, ‘Jije wa náa sika ngɛ kɛ tsuɔ ní tsumi nɛ ɔmɛ tsuo?’

Wa wui mi dlami nyɔngma, wa pui hiɔ ha nihi, nɛ waa kɛ tsesi hu bi ngɛ nihi a hɛ mi kaa a wo mi nɔ́ ko. E ngɛ mi kaa sika nɛ waa kɛ tsuɔ wa fiɛɛmi ní tsumi ɔ kle mohu lɛɛ, se wa bɛ sika ngɛ nihi a dɛ. Jeha lafa kɛ se ji nɛ ɔ, Hwɔɔmi Mɔ womi tɛtlɛɛ ɔ enyɔne nɛ a pee ɔ de ke, wa heɔ yeɔ kaa Yehowa fĩ wa se, lɔ ɔ he je ɔ, “wa be sika bae kɛ je nihi a dɛ kɔkɔɔkɔ.” Wa pee we jã hyɛ hulɔ!​—Mateo 10:8.

Nihi jeɔ a tsui mi kɛ yeɔ bua wa fiɛɛmi ní tsumi ɔ. Nihi babauu a bua jɔɔ wa Baiblo tsɔsemi ní tsumi ɔ he nɛ a haa yemi kɛ buami kɛ fiɔ se. Odasefo ɔmɛ nitsɛmɛ hu kɛ bua jɔmi ngɔɔ a be, a he wami, a sika, kɛ ní kpahi nɛ a ngɛ ɔ kɛ fiɔ Mawu suɔmi nya ní nɛ a ngɛ pee ngɛ zugba a nɔ tsuo ɔ se. (1 Kronika 29:9) A kɛ yemi kɛ buami dakahi ma Matsɛ Yemi Asa a nɔ kɛ kpehi nɛ wa peeɔ ɔ a sisi, konɛ nihi nɛ a suɔ kaa a ye bua a, nɛ a kɛ sika nɛ wo mi. Aloo a ma nyɛ maa pee jã ngɛ wa wɛbsaiti ɔ nɔ ngɛ jw.org. Behi fuu ɔ, nihi nɛ a haa yemi kɛ buami nɛ ɔ ji nihi nɛ a be nɔ́ ko tsɔ. A ngɛ kaa yalɔyo ohiatsɛ nɛ e kɛ sika nɛ a yeɔ ɔ mi nyafii enyɔ ya wo sɔlemi we tó tsumi daka a mi nɛ Yesu je e yi ɔ. (Luka 21:1-4) Lɔ ɔ he ɔ, be tsuaa be ɔ, nɔ tsuaa nɔ ma nyɛ ma ‘je sika ko kɛ to,’ nɛ e “ha bɔ nɛ e to kaa e ma ha.”​—1 Korinto Bi 16:2; 2 Korinto Bi 9:7.

Wa ngɛ nɔ mi mami kaa Yehowa maa ya nɔ ma ha nɛ nihi nɛ a suɔ kaa a maa ‘ngɔ a ní babauu kɛ wo e hɛ mi nyami’ ɔ, maa pee jã kɛ fĩ Matsɛ Yemi ní tsumi ɔ se, konɛ nɔ́ nɛ e suɔ ɔ nɛ ba mi.​—Abɛ 3:9.

• Mɛni ha nɛ wa asafo ɔ ngɛ slɔɔto ngɛ jami kpahi a he ɔ?

• Mɛni a kɛ sika nɛ nihi jeɔ a tsui mi kɛ haa a tsuɔ?

Kaa bɔ nɛ biɛ Matsɛ Yemi Asa a tsɔɔ ɔ, Baiblo mi munyu titli nɛ a susuɔ he ngɛ lejɛ ɔ kɔɔ Mawu Matsɛ Yemi ɔ, nɛ ji munyu titli nɛ Yesu fiɛɛ ɔ he.​—Luka 8:1.

A ji hehi ngɛ ma a mi nɛ a kaseɔ anɔkuale jami he ní ngɛ. Lejɛ ɔmɛ ji hehi nɛ a toɔ Matsɛ Yemi ɔ he sane kpakpa a fiɛɛmi he blɔ nya ngɛ. (Mateo 24:14) E slo Matsɛ Yemi Asa tsuaa Matsɛ Yemi Asa klemi, kɛ bɔ nɛ a ma eko tsuaa eko ha mohu, se a kle bɔ nɛ sa, nɛ a be kɛ̃tsɛ̃ɛ, nɛ asafohi nɛ hiɛ pe kake kpeɔ ngɛ fuu mi. Akɛnɛ fiɛɛli a he ngɛ hiɛe fuu ngɛ asafo ɔmɛ a mi he je ɔ, lingmi nɛ ɔ, wa ma Matsɛ Yemi Asa akpe nyɔngmahi abɔ (ke a bua Matsɛ Yemi Asahi nɛ a ma a tsuo nya nɛ a gba mi ɔ, daa ligbi ɔ, a maa Matsɛ Yemi Asahi maa pee enuɔ) konɛ asafo ɔmɛ nɛ a ná he ko nɛ a kpe ngɛ. Mɛni blɔ nɔ a guu kɛ peeɔ enɛ ɔ?​—Mateo 19:26.

A kɛ yemi kɛ buami nɛ nyɛmimɛ nɛ a ngɛ je kɛ wɛ ɔ haa a nɛ maa. A kɛ sika a maneɔ asafo ɔ ní tsumi kɔni ɔ, nɛ a kɛ haa asafohi nɛ a ngɛ hlae nɛ a ma Matsɛ Yemi Asahi aloo a dla a Matsɛ Yemi Asahi ɔ.

Nihi nɛ a je he slɔɔtoslɔɔtohi ngɔɔ a he kɛ haa faa nɛ a maa nɛ a wui mɛ hiɔ. A to Matsɛ Yemi Asa Mami Kuuhi ngɛ mahi fuu a nɔ. Nihi nɛ a sɔmɔɔ ngɛ kuu nɛ ɔmɛ a mi kɛ ni kpahi nɛ mɛ hu a kɛ a he ha faa a hiaa blɔ kɛ yaa asafo kpahi kɛ kɔpehi po a mi. A ya yeɔ bua asafohi kɛ maa Matsɛ Yemi Asahi. Ngɛ ma kpahi a nɔ ɔ, a hla Odasefohi nɛ a le tsu mami he ga konɛ a hyɛ Matsɛ Yemi Asahi a mami kɛ a dlami nɔ ngɛ kpokpa ko nɛ a kɛ wo a dɛ ɔ mi. E ngɛ mi kaa nihi nɛ a le nine nya ní tsumihi ngɛ kpokpa a mi ɔ hu jeɔ a tsui mi kɛ yeɔ bua mohu lɛɛ, se ngɛ he tsuaa he ko nɛ a ya maa tsu ɔ ngɛ ɔ, asafo ɔ mi bimɛ ɔmɛ nɛ a ngɛ lejɛ ɔ a ti nihi hiɛhiɛɛ kɛ a he woɔ ní tsumi ɔ mi. Yehowa mumi ɔ, kɛ mɔde nɛ Yehowa we bi jeɔ a tsui mi nɛ a bɔɔ ɔ nɛ ha nɛ ní tsumi nɛ ɔ ngɛ nɔ yae ɔ nɛ.​—La 127:1; Kolose Bi 3:23.

• Mɛni he je nɛ a tsɛɔ hehi nɛ wa jaa ngɛ ɔ ke Matsɛ Yemi Asahi ɔ?

• Mɛni ha a nyɛɔ maa Matsɛ Yemi Asahi ngɛ je kɛ wɛ?

Mawu biɛ klɔuklɔu ɔ ngɛ Yehowa Odasefohi a Matsɛ Yemi Asahi tsuo a he. Enɛ ɔ he ɔ, wa buu Matsɛ Yemi Asa a nɔ kɛ e he nɛ wa ma dla, nɛ wa ma ha nɛ e he ma tsɔ, nɛ wa maa hyɛ nɔ, nɛ wa ma dla níhi nɛ puɛ ngɛ he ɔ kaa he blɔ ngua nɛ wa ná, nɛ enɛ ɔ nɛ wa peeɔ ɔ ji wa jami klɔuu ɔ fã ko nɛ he hia wawɛɛ. Nɔ tsuaa nɔ kɛ e he ma nyɛ maa wo mi.

Ke a kpa kpe ɔ, moo ye bua kɛ dla asa a nɔ. Be tsuaa be nɛ a ma kpa asafo mi kpe ɔ, nyɛmimɛ nyumuhi kɛ yihi kɛ bua jɔmi dlaa Matsɛ Yemi Asa a nɔ kɛ e he, kɛ zami zimi kɛ niase yami he ɔ bɔɔ. Ngɛ he komɛ ɔ, a dlaa Matsɛ Yemi Asa a nɔ kɛ e he saminya si kake daa otsi, aloo si kake daa nyɔhiɔ. Asafo mi nɔkɔtɔma loo asafo mi sɔmɔlɔ nɛ hyɛɛ ní tsumi ɔ nɔ, nɛ e kɛ blɔ tsɔɔmi nɛ kɔɔ bɔ nɛ e sa kaa a dla lejɛ ɔ ha a he ɔ tsuɔ ní. Ke Matsɛ Yemi Asa a nɔ kɛ e he dlami ma bi nɛ ni komɛ nɛ a bɛɛ nɛ a tsu aloo a sa zugba, a tsu bunyuku ngɛ níhi a he, a je anani yahi, a to sɛhi saminya, a kɛ tsopahi nɛ dla zami zimi kɛ niase yami he ɔ, a tsu saflɛhi a nya kɛ ahuhuɛhi a hɛ mi, a kɛ dwɔmi nɛ pue he, loo a dla kpo ɔ nɔ ɔ, nyɛmimɛ kɛ a he haa nɛ a peeɔ jã. Ke e hí kulaa a, si kake ngɛ jeha mi ɔ, a toɔ be ya dlaa lejɛ ɔ saminya. Ke wa ha nɛ wa bimɛ ɔmɛ piɛɛ wa he kɛ tsu ní tsumi komɛ ɔ, lɔ ɔ tsɔɔ kaa wa ngɛ mɛ tsɔɔe nɛ a bu wa jami he ɔ.​—Fiɛlɔ 5:1.

Moo ye bua kɛ dla níhi nɛ a he hia kaa a dla a. Daa jeha a, nihi ba hyɛɔ bɔ nɛ Matsɛ Yemi Asa a nɔ kɛ e he ɔ tsuo ngɛ ha. Enɛ ɔ haa nɛ be tsuaa be ɔ, a dlaa níhi nɛ a puɛ ngɛ asa a nɔ kɛ e he ɔ, nɛ enɛ ɔ peemi gbɔɔ sika nɛ a puɛɔ ngɛ asa a he ɔ nɔ. (2 Kronika 24:13; 34:10) Matsɛ Yemi Asa nɛ he tsɔ nɛ a hyɛɔ nɔ saminya a, sa kɛ ha wa Mawu ɔ jami. Ke waa kɛ wa he wo ní tsumi nɛ ɔ mi ɔ, lɔ ɔ tsɔɔ bɔ nɛ wa suɔ Yehowa ha, kɛ bɔ nɛ wa jami he ɔ hu he jua wa ha wɔ ha. (La 122:1) Enɛ ɔ hu haa nɛ nihi nɛ a ngɛ wa kpɔ ɔ mi ɔ buu wɔ saminya.​—2 Korinto Bi 6:3.

• Mɛni he je nɛ e sa nɛ waa hyɛ he nɛ wa jaa Mawu ngɛ ɔ nɔ saminya a?

• Mɛni blɔ nya a toɔ kɛ dlaa Matsɛ Yemi Asa a nɔ kɛ e he konɛ lejɛ ɔ nɛ tsɔ?

Anɛ o suɔ kaa o ma hla níhi a mi konɛ nile nɛ o ngɛ ngɛ Baiblo ɔ mi ɔ nɛ ya hɛ mi lo? Anɛ o suɔ nɛ o nu ngmami ko sisi, aloo o le nɔ ko nɛ a tu e he munyu ngɛ Baiblo ɔ mi, aloo ma ko, aloo ní komɛ nɛ a wo a ta ngɛ Baiblo ɔ mi ɔ a he sanehi fuu lo? Aloo o ngɛ hlae maa le ke ji Mawu Munyu ɔ ma nyɛ maa ye bua mo konɛ o nyɛ nɛ o tsu o nyagba ko he ní lo? Lɛɛ moo ya womihi a to he nɛ ngɛ Matsɛ Yemi Asa a nɔ ɔ.

Níhi nɛ a kɛ hlaa níhi a mi ngɛ lejɛ ɔ. Eko ɔ, o be womihi nɛ Yehowa Odasefohi da Baiblo ɔ nɔ kɛ ngma ngɛ o je gbi ɔ mi ɔ tsuo mohu, se ní nɛmɛ nɛ a pee lingmi nɛ ɔ fuu ngɛ womihi a to he nɛ ngɛ Matsɛ Yemi Asa a nɔ ɔ. Jehanɛ se hu ɔ, eko ɔ, Baiblo sisi tsɔɔmi slɔɔtohi, kɛ munyunguhi a sisi tsɔɔmi womi nɛ hi, kɛ níhi a mi hlami womi kpahi nɛ a he hia ngɛ womihi a to he nɛ ngɛ Matsɛ Yemi Asa a nɔ ɔ. O ma nyɛ ma ya kane womihi nɛ a ngɛ womihi a to he nɛ ngɛ Matsɛ Yemi Asa a nɔ ɔ faa. O ma nyɛ maa pee enɛ ɔ loko a maa je asafo mi kpehi a sisi loo ke a kpa asafo mi kpehi. Ke kɔmpiuta ko ngɛ womihi a to he ɔ, lɛɛ eko ɔ, a kɛ Watchtower Library fɔ nɔ. Watchtower Library ji kɔmpiuta nɔ blɔ nya tomi ko nɛ a pee nɛ a kɛ wa womihi fuu wo nɔ, nɛ e kɛ níhi a mi hlami yi. O ma nyɛ maa da munyutso, munyunguhi, aloo ngmamihi a nɔ kɛ hla níhi a mi ngɛ nɔ.

Nihi nɛ a haa mɛ sukuu bi a ní tsumi ngɛ Si Himi Kɛ Sɔmɔmi Ní Tsumi Kpe ɔ mi ɔ ma nyɛ ma ná he se wawɛɛ. O ma nyɛ maa ya womihi a to he nɛ ngɛ Matsɛ Yemi Asa a nɔ ɔ konɛ o ya kase ní tsumi nɛ a ha mo ɔ ngɛ lejɛ ɔ. Si Himi Kɛ Sɔmɔmi Ní Tsumi Kpe ɔ nɔ hyɛlɔ ɔ ji nɔ nɛ hyɛɛ womihi a to he ɔ nɔ. E blɔ nya ní tsumi ji kaa e hyɛ nɛ a kɛ womi ehehi nɛ ya to lejɛ ɔ nɛ́ a to mɛ saminya. Sukuu nɔ hyɛlɔ ɔ aloo nɔ nɛ e kɛ mo kaseɔ Baiblo ɔ ma nyɛ maa tsɔɔ mo bɔ nɛ o ma plɛ kɛ na munyuhi nɛ he hia mo ha. Se e sɛ nɛ nɔ ko nɛ je womi ko ngɛ womihi a to he nɛ ngɛ Matsɛ Yemi Asa a nɔ ɔ kɛ ho we mi ya. E sa nɛ waa hɛɛ womi nɛ ɔmɛ saminya nɛ wa ko ngma ní ngɛ a mi.

Baiblo ɔ tsɔɔ nya kaa loko wa ‘ma ná Mawu he nile’ ɔ, e sa nɛ waa je wa tsui mi nɛ wa hla nile nɛ ɔ ‘kaa bɔ nɛ a hlaa juetli nɛ a ngɔ kɛ laa’ a. (Abɛ 2:1-5) Womihi a to he nɛ ngɛ Matsɛ Yemi Asa a nɔ ɔ ma nyɛ maa ye bua mo kɛ je o níhi a mi hlami ɔ sisi.

• Mɛni níhi nɛ a kɛ hlaa níhi a mi nɛ a ngɛ womihi a to he nɛ ngɛ Matsɛ Yemi Asa a nɔ ɔ?

• Mɛnɔmɛ nɛ a ma nyɛ maa ye bua mo kɛ hla níhi a mi ngɛ womihi a to he nɛ ngɛ Matsɛ Yemi Asa a nɔ ɔ?

Yesu Kristo de e se nyɛɛli ɔmɛ ke: “Nyɛ ha nyɛ la a nɛ tso ngɛ nimli a hɛ mi jã nɔuu, konɛ a na ní kpakpahi nɛ nyɛ ngɛ pee ɔ, nɛ a wo nyɛ Tsɛ nɛ ngɛ hiɔwe ɔ hɛ mi nyami.” (Mateo 5:16) Enɛ ɔ he ɔ, waa kɛ Intanɛti ɔ kɛ klamahi a he nile nɛ ba mwɔnɛ ɔ ngɛ ní tsue saminya. Ke o ngɛ Yehowa Odasefohi a hemi kɛ yemi kɛ a ní tsumihi a he sanehi hlae ngɛ Intanɛti ɔ nɔ ɔ, he nɛ o maa na ngɛ ji wa wɛbsaiti ɔ nɔ ngɛ jw.org. Mɛni ji ní komɛ nɛ ngɛ lejɛ ɔ?

Hetohi nɛ Baiblo ɔ kɛ ha ngɛ sanehi nɛ nihi pɔɔ bimi ɔ a he. O ma nyɛ maa na hetohi kɛ ha sanehi nɛ a he hia wawɛɛ nɛ nihi biɔ ɔ ngɛ lejɛ ɔ. Kaa nɔ hyɛmi nɔ́ ɔ, a pee dɛ womi nɛ ji, Anɛ Nɔ́ Nami Se Maa Po Ligbi Ko Lo? kɛ Anɛ Nihi Nɛ A Gbo ɔ Maa Ba Wami Mi Ekohu Niinɛ Lo? ɔ ngɛ gbihi nɛ hiɛ pe 600 a mi. Jehanɛ se hu ɔ, o ma nyɛ maa na New World Translation Baiblo ɔ ngɛ gbihi nɛ hiɛ pe 130 mi, kɛ Baiblo kasemi womi kpahi fuu nɛ́ Mɛni Baiblo ɔ Ma Nyɛ Maa Tsɔɔ Wɔ? womi ɔ kɛ Hwɔɔmi Mɔ kɛ Awake! womi tɛtlɛɛ ehehi hu piɛɛ he ɔ ngɛ Intanɛti ɔ nɔ. O ma nyɛ maa kane womi nɛ ɔmɛ ngɛ Intanɛti ɔ nɔ aloo o ma nyɛ maa gbla ngɛ blɔ nɔ tomi nɛ nyɛɛ se nɛ ɔmɛ a mi, MP3, PDF, aloo EPUB. O ma nyɛ maa fia ba fa bɔɔ ko kɛ pue womi nɔ konɛ o kɛ ha nɔ ko nɛ e bua jɔ munyu ɔ he ngɛ lɛ nitsɛ e je gbi mi! A pee womihi fuu a he videohi ngɛ mumuihi a gbihi a mi. O ma nyɛ maa gbla Baiblo kanemi dramahi, Baiblo mi sanehi a he dramahi, kɛ la ngɔngɔɛhi ngɛ Intanɛti ɔ nɔ konɛ o bu tue ngɛ o he jɔɔmi behi a mi.

Anɔkuale munyuhi nɛ kɔɔ Yehowa Odasefohi a he. Ní kpahi hu nɛ a kɛ wo Intanɛti ɔ nɔ ji, video kpitikpitihi kɛ amaniɛ bɔmi ehehi nɛ kɔɔ wa je kɛ wɛ sɔmɔmi ní tsumi ɔ he, níhi nɛ saa Yehowa Odasefohi a he, kɛ yemi kɛ buamihi nɛ waa kɛ haa nihi nɛ oslaa ná mɛ. O ma nyɛ maa na munyuhi nɛ kɔɔ kpe nguahi nɛ a maa pee kɛ bɔ nɛ o ma plɛ nɛ o nine maa su wa asafo ɔ ní tsumi kɔni ɔmɛ a nɔ ɔ hu ngɛ nɔ.

Kɛ gu blɔ nɛ ɔmɛ a nɔ ɔ, wa ha nɛ wa la a ngɛ tsoe kɛ ngɛ zugba a nɔ he tsuaa he sue. Nihi nɛ a ngɛ zugba a nɔ he tsuaa he nɛ Antarctica bi hu piɛɛ he ɔ ngɛ he se náe. Wa ngɛ sɔlee nɛ ‘Yehowa munyu ɔ nɛ ya nɔ nɛ e gbɛ kɛ fia’ mlamlaamla kɛ ya su zugba a nɔ he tsuaa he, konɛ a kɛ wo Mawu hɛ mi nyami.​—2 Tesalonika Bi 3:1.

• Ngɛ mɛni blɔ nɔ nɛ jw.org ɔ ngɛ nihi fuu ye buae konɛ a nyɛ nɛ a kase Baiblo ɔ mi anɔkuale ɔ?

• Mɛni o maa suɔ kaa o hla ngɛ wa wɛbsaiti ɔ nɔ?