Nihi babauu kpa sɔlemi yami ejakaa níhi nɛ a tsɔɔ mɛ ngɛ Baiblo ɔ mi ɔ wui a bua. Mɛni he je mɔ nɛ e sa nɛ o ya Kristofohi a kpehi nɛ Yehowa Odasefohi peeɔ ɔ? Mɛni o maa na ngɛ lejɛ ɔ?

O bua maa jɔ ngɛ nihi nɛ a suɔ nihi nɛ a susuɔ nɔ he ɔ a kpɛti. Blema a, a to Kristofohi a he blɔ nya kɛ wo asafohi a mi, a kpeɔ kɛ jaa Mawu, a kaseɔ Ngmami ɔ, nɛ a woɔ a sibi he wami. (Hebri Bi 10:24, 25) A buaa a he nya ngɛ suɔmi mi, nɛ a nuɔ he kaa a ngɛ a huɛmɛ nitsɛnitsɛ nɛ ji, a nyɛmimɛ nyumuhi kɛ yihi a kpɛti. (2 Tesalonika Bi 1:3; 3 Yohane 14) Wɔ hu wa peeɔ wa níhi kaa Kristofohi nɛ a hi si blema a, nɛ wa náa bua jɔmi.

O maa na kaa ke o kɛ Baiblo sisi tomi mlaahi tsu ní ɔ, o ma ná he se. Kaa bɔ nɛ a peeɔ blema a, mwɔnɛ ɔ hu nyumuhi, kɛ yihi, kɛ jokuɛwi tsuo buaa a he nya ngɛ he kake. Nihi nɛ a le ní tsɔɔmi saminya a ngɔɔ Baiblo ɔ kɛ yeɔ bua wɔ konɛ waa le bɔ nɛ waa kɛ Baiblo sisi tomi mlaahi ma tsu ní ngɛ wa si himi mi daa ligbi ha. (5 Mose 31:12; Nehemia 8:8) Tue buli ɔmɛ a ti nɔ tsuaa nɔ ko ma nyɛ ma ha sanehi nɛ a biɔ ɔ heto, nɛ e kɛ e he ma nyɛ maa wo lahi nɛ a laa a mi, nɛ enɛ ɔ haa nɛ wa nyɛɔ jeɔ Kristofohi a hɛ nɔ kami nɛ wa ngɛ ɔ kpo.​—Hebri Bi 10:23.

O maa na kaa hemi kɛ yemi nɛ o ngɛ ngɛ Mawu mi ɔ mi maa wa. Bɔfo Paulo de asafohi nɛ hi si ngɛ e be ɔ mi ɔ a kpɛti kake ke: ‘I suɔ kaa ma na nyɛ konɛ i kɛ nyɛ tsuo waa ngɔ hemi kɛ yemi nɛ wa ngɛ ɔ kɛ wo wa sibi he wami.’ (Roma Bi 1:11, 12) Ke wa ya kpehi ɔ, wa nyɛmimɛ Kristofohi nɛ waa kɛ mɛ pɔɔ ní sɛɛmi kpitikpiti ɔ haa nɛ wa hemi kɛ yemi nɛ wa ngɛ, kɛ wa yi mi kpɔ nɛ wa mwɔ kaa waa kɛ Baiblo sisi tomi mlaahi ma tsu ní ɔ mi waa.

Wa ngɛ mo nine fɔe nɛ o ba asafo mi kpe nɛ a maa pee ɔ konɛ mo nitsɛ o ba na bɔ nɛ níhi yaa nɔ ha. Wa ma nya o he kɛ bua jɔmi. Ke o ba kpehi tsuo nɛ wa peeɔ ɔ, a be nɔ́ ko hee ngɛ o dɛ.

• Mɛnɔmɛ a nɔ hyɛmi nɔ́ se wa nyɛɛɔ kɛ peeɔ wa asafo mi kpehi?

• Ke wa ya Kristofohi a kpehi ɔ, mɛni se wa ma nyɛ ma ná?

Ke Kristofohi a kpehi nɛ wa maa ya a biɔ nɛ waa nyɛɛ hue tsohi a mi aloo hiɔmi nɔ po ɔ, wa yaa daa. Mɛni he je nɛ ngɛ haomihi nɛ Yehowa Odasefohi kɛ kpeɔ ngɛ a si himi mi, kɛ pɔ nɛ e tɔɔ a he ngɛ ní nɛ a tsuɔ ngɛ ligbi ɔ mi ɔ tsuo se ɔ, a bɔɔ mɔde nɛ a kɛ a nyɛmimɛ Kristofohi bɔɔ ɔ?

E yeɔ bua wɔ. Benɛ Paulo ngɛ munyu tue kɛ kɔ nihi nɛ waa kɛ mɛ bɔɔ ngɛ asafo ɔ mi ɔ he ɔ, e ngma ke, ‘wa susu wa sibi a he.’ (Hebri Bi 10:24) Munyu nɛ ɔ tsɔɔ kaa e sa nɛ wa “susu nihi a he saminya,” aloo e sa nɛ waa le wa sibi saminya. Enɛ ɔ he ɔ, bɔfo Paulo ngɛ wɔ he wami woe kaa wa susu nihi a he. Ke wa le Kristofohi nɛ a ngɛ weku kpahi a mi ɔ, lɔ ɔ ma ha nɛ wa maa na kaa a ti ni komɛ nyɛ da haomihi nɛ wɔ hu waa kɛ ngɛ kpee ɔ nya, nɛ a ma nyɛ maa ye bua wɔ nɛ wɔ hu waa ye manye.

E haa nɛ wa náa huɛmɛ kpakpahi. Tsa pi nihi nɛ wa le mɛ kɛkɛ nɛ waa kɛ ya kpeɔ ngɛ wa kpe ɔmɛ a sisi, se mohu nihi nɛ a ji wa huɛmɛ kpakpahi. Be komɛ ɔ, wa peeɔ kake kɛ jeɔ wa hɛja ngɛ blɔ kpakpa nɔ. Mɛni se wa náa ngɛ huɛ nɛ waa kɛ wa nyɛmimɛ bɔɔ ɔ mi? E haa nɛ bumi nɛ wa ngɛ ha wa sibi ɔ mi waa, nɛ lɔ ɔ haa nɛ wa náa suɔmi kɛ haa mɛ wawɛɛ. Kɛkɛ ɔ, ke wa nyɛmimɛ ɔmɛ kɛ haomi ngɛ kpee ɔ, wa yeɔ bua mɛ amlɔ nɔuu, ejakaa huɛ bɔmi gbagbanii ngɛ waa kɛ mɛ wa kpɛti. (Abɛ 17:17) Ke waa kɛ wa nyɛmimɛ ɔmɛ tsuo nɛ ngɛ asafo ɔ mi ɔ bɔɔ ɔ, lɔ ɔ tsɔɔ kaa ‘wa nuɔ nɔ́ he ha wa sibi.’​—1 Korinto Bi 12:25, 26.

Wa ngɛ mo he wami woe konɛ o kɛ nihi nɛ a peeɔ Mawu suɔmi nya ní ɔ nɛ pee huɛ. O ma ná huɛmɛ kaa kikɛ ɔ ngɛ Yehowa Odasefohi a kpɛti. Wa kpa mo pɛɛ nɛ o kɛ wɔ nɛ bɔ, ko ha nɛ nɔ́ ko nɛ tsi o nya.

• Mɛni he je nɛ ke wa ya kpehi ɔ, se nami ngɛ he kaa waa kɛ wa nyɛmimɛ ɔmɛ maa bɔ ɔ?

• Mɛni be o maa suɔ kaa o ma ba le nihi nɛ a ngɛ wa asafo ɔ mi ɔ?

Níhi titli nɛ blema Kristofohi peeɔ ngɛ a kpehi a sisi ji, a laa, a sɔleɔ, nɛ a kaneɔ Ngmami ɔ nɛ a susuɔ he. A kɛ nɔ́ kpa ko nɛ be Ngmami ɔ mi piɛɛ we he. (1 Korinto Bi 14:26) Jã nɔuu nɛ wɔ hu wa peeɔ wa kpehi.

Níhi nɛ wa kaseɔ ɔ ngɛ Baiblo ɔ mi nɛ a kɔɔ wa si himi he. Daa Hɔ loo Hɔgba a, asafo tsuaa asafo kpeɔ nɛ a buɔ Baiblo mi munyu nɛ a kɛ hɛngmɛfia 30 tuɔ ɔ tue. A tsɔɔ wɔ bɔ nɛ waa kɛ Ngmami ɔ ma nyɛ ma tsu ní ngɛ wa si himi mi ha, kɛ bɔ nɛ e ma nyɛ maa ye bua wɔ ha ngɛ be nɛ wa ngɛ mi nɛ ɔ mi. Ke a ngɛ ngmami ko kanee ɔ, a woɔ wɔ hu he wami kaa wa bli wɔ nitsɛmɛ wa Baiblo ɔmɛ nɛ waa kane kɛ nyɛɛ se. Ke a tu munyu ɔ ta a, waa kɛ ngmlɛfia kake kaseɔ “Hwɔɔmi Mɔ” ɔ. A biɔ sane ngɛ Hwɔɔmi Mɔ nɛ wa kaseɔ ɔ mi nɛ nɔ tsuaa nɔ nyɛɔ haa heto. Enɛ ɔ yeɔ bua wɔ nɛ waa kɛ Baiblo ɔ blɔ tsɔɔmi tsuɔ ní ngɛ wa si himi mi. Hwɔɔmi Mɔ ɔ mi munyu kake ɔ nɔuu nɛ wa asafohi nɛ a hiɛ pe 110,000 ngɛ je kɛ wɛ ɔ eko tsuaa eko kaseɔ.

A yeɔ bua wɔ nɛ wa ní tsɔɔmi ɔ yaa hɛ mi. Wa buaa wa he nya gbɔkuɛ ngɛ otsi ɔ mi nɛ wa peeɔ kpe nɛ a gba mi etɛ nɛ a tsɛɛ ke Kristofohi A Si Himi Kɛ A Sɔmɔmi Ní Tsumi ɔ. Wa daa womi ko nɛ a peeɔ daa nyɔhiɔ nɛ e biɛ ji, Kristofohi A Si himi Kɛ A Sɔmɔmi Ní Tsumi ɔ Ní Kasemi Womi ɔ nɔ kɛ peeɔ kpe nɛ ɔ. Kpe nɛ ɔ kekleekle fã nɛ ji, Juetli Nɛ Ngɛ Mawu Munyu ɔ Mi yeɔ bua wɔ nɛ wa nuɔ Baiblo ɔ fã nɛ asafo ɔ kane kɛ sɛ hlami ɔ sisi. Lɔ ɔ se ɔ, ngɛ fã nɛ ji, Moo Bɔ Fiɛɛmi Ní Tsumi ɔ He Mɔde ɔ mi ɔ, a peeɔ peemi kɛ tsɔɔ slɔɔtohi konɛ a kɛ tsɔɔ wɔ bɔ nɛ wa ma plɛ nɛ waa kɛ nihi maa kase Baiblo ɔ ha. Nɔ ko ngɛ nɛ e woɔ wɔ ga nɛ maa ye bua wɔ konɛ waa ya wa hɛ mi ngɛ ní kanemi kɛ munyu tumi mi. (1 Timoteo 4:13) Nyagbe fã nɛ ji, Kristofohi A Si Himi ɔ yeɔ bua wɔ nɛ wa naa blɔ pɔtɛɛhi a nɔ nɛ wa maa gu konɛ waa ngɔ Baiblo sisi tomi mlaahi kɛ tsu ní ngɛ wa si himi mi daa ligbi. Sane bimi kɛ heto hami piɛɛ fã nɛ ɔ he konɛ waa nu Baiblo ɔ sisi saminya.

Ke o ya wa kpehi a sisi ɔ, atsinyɛ jemi ko be he kaa o bua maa jɔ Baiblo mi tsɔsemi nɛ o ngɛ náe ɔ he wawɛɛ.​—Yesaya 54:13.

• Mɛni o ma nyɛ maa hyɛ blɔ kaa o maa nu ke o ya Yehowa Odasefohi a kpehi?

• Kpehi nɛ wa peeɔ daa otsi ɔ a kpɛti te nɛ o maa suɔ kaa o maa ya nɛɛ?

Ngɛ fonihi nɛ ngɛ womiyo nɛ ɔ mi ɔ mi ɔ, anɛ o kadi bɔ nɛ Yehowa Odasefohi dlaa a he saminya ha ke a yaa asafo mi kpehi ɔ lo? Mɛni he je nɛ wa hɛ hiɔ wa tade womi kɛ wa he dlami nɔ saminya a?

Konɛ wa kɛ tsɔɔ kaa wa buɔ wa Mawu ɔ. E ji anɔkuale kaa Mawu hyɛ we bɔ nɛ wa ji ngɛ kpo nɔ blɔ. (1 Samuel 16:7) Se ke wa bua wa he nya konɛ wa ja lɛ ɔ, wa suɔ nitsɛnitsɛ kaa wa je bumi kpo kɛ tsɔɔ lɛ kɛ wa nyɛmimɛ Mawu jali kpahi hulɔ. Ke e ba kaa wa ya da kojolɔ ko hɛ mi ngɛ sane yemi he ɔ, e ngɛ heii kaa wa ma dla wa he saminya ngɛ bumi nɛ wa ngɛ kɛ ha blɔ nya nɛ kojolɔ ɔ hɛɛ ɔ he je. Jã nɔuu nɛ bɔ nɛ wa dlaa wa he kɛ yaa asafo mi kpehi ha a tsɔɔ kaa wa ngɛ bumi kɛ ha Yehowa Mawu nɛ ji “je ɔ tsuo kojolɔ ɔ,” kɛ he nɛ wa jaa lɛ ngɛ ɔ hulɔ.​—1 Mose 18:25.

Konɛ wa kɛ ha nɛ nihi nɛ a na mlaahi nɛ kudɔɔ wɔ. Baiblo ɔ woɔ Kristofohi he wami kaa a kɛ ‘humi peemi kɛ juɛmi nɛ to a he dlami he.’ (1 Timoteo 2:9, 10) Wa he nɛ wa ma dla kaa “humi” ɔ tsɔɔ kaa wa be tadehi nɛ maa gbla nihi a juɛmi kɛ ba wa nɔ woe. Tade nɛ ɔ ekomɛ ji tade kɛ̃tsɛ̃ɛhi, tadehi nɛ tleɔ bɔmi nami he akɔnɔ si, loo nɔ́ nɛ jeɔ nɔmlɔ tso ɔ he komɛ kpo. Ke waa kɛ “juɛmi” hu to wa he dlami he ɔ, lɔ ɔ be hae nɛ waa wo tadehi nɛ sɛ, loo nɔ́ nɛ ngɛ kɛ̃tsɛ̃ɛ, se mohu nɔ́ nɛ sa. Loloolo ɔ, sisi tomi mlaa nɛ ɔmɛ tsɔɔ kaa nɔ tsuaa nɔ ma nyɛ maa wo tade ekpaekpahi. Ke wa tui munyu po nɛ wa dlaa wa he saminya a, lɔ ɔ maa ‘wo Mawu kɛ wa Yi Wami Helɔ ɔ tsɔɔmi ɔ hɛ mi nyami.’ (Tito 2:10; 1 Petro 2:12) Ke wa dlaa wa he saminya kɛ yaa kpehi ɔ, lɔ ɔ haa nɛ nihi náa bumi kɛ haa Yehowa jami.

Ko ha nɛ tade nɛ o maa wo nɛ tsi mo blɔ ngɛ Matsɛ Yemi Asa a nɔ nɛ o maa ya a he. E he hia we nɛ waa wo tadehi nɛ a he jua wa nɛ a ngɛ kɛ̃tsɛ̃ɛ loko a ma de ke a hi, nɛ a he tsɔ, nɛ a ngɛ hɛngmɛ nɔ.

• Kɛ bɔ nɛ wa dlaa wa he kɛ jaa Mawu ɔ he hia ha kɛɛ?

• Mɛni sisi tomi mlaahi kudɔɔ wɔ ngɛ tadehi nɛ wa suɔ kaa waa wo kɛ wa he dlami he?

Ke o kɛ Yehowa Odasefohi a ti nɔ ko ngɛ Baiblo ɔ kasee ɔ, eko ɔ, o sɛɔ hlami nɛ o kaseɔ nɔ́ nɛ nyɛ maa kase ɔ mi. Bɔ nɛ pee nɛ o ná asafo mi kpe nɛ o maa ya a he se ɔ, e maa hi kaa o maa kase níhi nɛ a maa kase ɔ mi loko o ya, kaa bɔ nɛ o peeɔ loko a kɛ mo ba kaseɔ ní ɔ. Ke wa peeɔ jã daa a, wa ma ná he se wawɛɛ.

Moo hla be nɛ o kɛ maa kase ní ɔ kɛ he nɛ o maa kase ngɛ. Mɛni be nɛ ke o ngɛ ní kasee ɔ, nɔ́ ko be nyɛe ma je o juɛmi kɛ je nɔ́ nɛ o ngɛ kasee ɔ nɔ? Mɔtu mla loko ji o jeɔ níhi nɛ o tsuɔ ngɛ ligbi ɔ mi ɔ sisi aloo gbɔkuɛ, benɛ jokuɛwi ɔmɛ hwɔ si? Ke o be nyɛe maa kase ní be gagaaga po ɔ, o kɛ be ko nɛ ma o hɛ mi nɛ o bɔ mɔde konɛ o ko ha nɔ́ ko nɛ po mi. Mo hla he ko nɛ ngɛ dii, nɛ o gbe níhi tsuo kaa radio, tiivi, kɛ mobile phone nɛ ma nyɛ ma je o juɛmi kɛ je nɔ́ nɛ o ngɛ kasee ɔ nɔ. Ke o sɔleɔ loko o kaseɔ ní ɔ, lɔ ɔ maa ye bua mo nɛ o be o tsui yee tsɔ ngɛ nyagbahi nɛ o kɛ kpe ngɛ ligbi ɔ mi ɔ he konɛ o nyɛ nɛ o susu Mawu Munyu ɔ he saminya.​—Filipi Bi 4:6, 7.

Moo po munyu otihi a sisi nɛ́ o dla o he kaa o ma ha sane bimihi a heto. Mo susu níhi nɛ kɔɔ nɔ́ nɛ o maa kase ɔ he kekle. Mo susu munyuyi ɔ he, nɛ o hyɛ bɔ nɛ munyuyi wayo ɔmɛ eko tsuaa eko kɔɔ munyuyi ɔ he ha, nɛ o hyɛ foni ɔmɛ kɛ mi nylɔmi sane bimi ɔmɛ nɛ maa oti ɔmɛ a nɔ mi ɔ. Lɔ ɔ se ɔ, moo kane kuku tsuaa kuku nɛ́ o hla sane nɛ a bi ɔ heto. Moo kane ngmamihi nɛ a tsɛ se ɔmɛ nɛ o hyɛ bɔ nɛ a kɔ ní kasemi ɔ he ha. (Bɔfo Ɔmɛ A Ní Tsumi 17:11) Ke o na sane bimi ko heto ɔ, poo munyu oti loo munyu zã komɛ nɛ a ngɛ kuku ɔ mi nɛ a maa ye bua mo konɛ o kai heto ɔmɛ ɔ a sisi. Kɛkɛ ɔ, ke o ya asafo mi kpe ɔ, o ma nyɛ ma wo o nine nɔ, konɛ o da bɔ nɛ o nu níhi a sisi ha a nɔ kɛ ha sane nɛ a ma bi ɔ heto kpiti.

Ke o kaseɔ ní slɔɔtohi nɛ wa susuɔ he ngɛ asafo mi kpehi a sisi daa otsi ɔ, o ma ná Baiblo mi nile babauu kɛ piɛɛ níhi nɛ o le momo ɔ he.​—Mateo 13:51, 52.

• Mɛni o ma nyɛ maa pee daa konɛ o nyɛ nɛ o kase níhi nɛ a ma susu he ngɛ asafo mi kpehi a sisi ɔ?

• Mɛni blɔ nɔ o ma nyɛ maa gu kɛ dla o he kɛ ha sane heto hami ke o ya asafo mi kpe ɔ?

Kɛ je blema tɔɔ nɛ Yehowa suɔ kaa weku tsuaa weku nɛ a bua a he nya konɛ a ha nɛ huɛ bɔmi nɛ ngɛ a kɛ Mawu a kpɛti ɔ kɛ suɔmi nɛ ngɛ mɛ nitsɛmɛ a kpɛti ɔ hu mi nɛ wa. (5 Mose 6:6, 7) Enɛ ɔ he je nɛ daa otsi ɔ, Yehowa Odasefohi a wekuhi hlaa ligbi kake ko nɛ a peeɔ kake kɛ jaa Mawu ɔ nɛ​—a kɛ bua jɔmi susuɔ Mawu jami mi níhi nɛ kɔɔ a weku ɔ hiami níhi a he ɔ he. Ke mo nɔ kake too pɛ nɛ o ngɛ po ɔ, o ma nyɛ maa ngɔ be nɛ ɔ kɛ susu Mawu he kɛ gu Baiblo ɔ nɛ o maa kase ɔ nɔ.

E ji be nɛ weku ɔ kɛ hɛɛ mɛ kɛ suu Yehowa he haa. “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yakobo 4:8) Ke wa kase Yehowa suhi kɛ e ní peepeehi a he ní fitsofitso ngɛ e Munyu nɛ ji Baiblo ɔ mi ɔ, lɔ ɔ ma ha nɛ wa maa le lɛ saminya. Blɔ nɛ e yi kulaa nɛ wa maa gu nɔ kɛ je weku Mawu jami sisi ji, Baiblo ɔ nɛ wa ma wo wa gbi nɔ kɛ bla kɛ kane ɔ. Eko ɔ, wa ma nyɛ maa nyɛɛ daa otsi Baiblo kanemi he blɔ nya nɛ a to ngɛ Si Himi Kɛ Sɔmɔmi Ní Tsumi Kpe ɔ mi ɔ se. A ma nyɛ ma gba kuku ɔmɛ nɛ a maa kane ɔ kɛ ha nɔ tsuaa nɔ ngɛ weku ɔ mi, lɔ ɔ se ke a kane ta a, weku ɔ ma nyɛ ma bla kɛ susu nɔ́ nɛ a kase ngɛ Ngmami ɔ mi ɔ he.

E ji be nɛ weku mi bimɛ ɔmɛ kɛ hɛɛ mɛ kɛ suu a sibi a he. Ke hunomɛ kɛ yigbayi, kɛ fɔli kɛ a bimɛ bla kɛ kase Baiblo ɔ kaa weku ɔ, lɔ ɔ ma ha nɛ suɔmi nɛ ngɛ a kpɛti ɔ mi maa wa wawɛɛ. E sa nɛ e pee bua jɔmi kɛ tue mi jɔmi be, kɛ be nɛ nɔ tsuaa nɔ maa hyɛ blɔ ngɛ otsi ɔ mi. Fɔli ma nyɛ maa da jehahi nɛ a bimɛ ɔmɛ ye ɔ nɔ kɛ hla munyuhi nɛ maa ye bua a bimɛ ɔmɛ, eko ɔ, a ma nyɛ ma susu munyu komɛ nɛ ngɛ Hwɔɔmi Mɔ kɛ Awake! womi tɛtlɛɛ ɔmɛ a mi aloo níhi nɛ a ngɛ wa wɛbsaiti ɔ nɔ ngɛ jw.org ɔ he. A ma nyɛ maa tu haomi ko nɛ a bimɛ ɔmɛ kɛ kpe ngɛ sukuu kɛ bɔ nɛ a ma tsu he ní ha a he munyu. Mɛni he je nɛ nyɛ hyɛ we JW Broadcasting (tv.jw.org) ɔ nɔ nɔ́ ko konɛ pee se ɔ, nyɛ pee kake kɛ susu he ɔ? A ma nyɛ maa kase lahi nɛ a ma la ngɛ asafo mi kpehi a sisi ɔ, nɛ ke a gbe a weku Mawu jami ɔ nya a, a ma nyɛ ma bla kɛ nu nɔ́ ko bɔɔ kɛ jɔɔ a tsui he.

Ke weku mi bimɛ ɔmɛ tsuo ngɔ be klɛdɛɛ nɛ ɔ kɛ ja Yehowa daa otsi ɔ, lɔ ɔ ma ha a ti nɔ tsuaa nɔ ma ná Mawu Munyu ɔ kasemi he bua jɔmi, nɛ Mawu maa jɔɔ a mɔde bɔmi ɔ nɔ.​—La 1:1-3.

• Mɛni he je nɛ wa toɔ be kɛ peeɔ weku Mawu jami ɔ?

• Mɛni blɔ nɔ fɔli ma nyɛ ma ha nɛ be nɛ ɔ maa pee bua jɔmi be kɛ ha nɔ tsuaa nɔ ngɛ weku ɔ mi ngɛ?

Mɛni he je nɛ nimli nɛ ɔmɛ a bua jɔ jã a? A ngɛ wa he nya buami ɔmɛ eko sisi. Kaa bɔ nɛ Mawu fã e sɔmɔli nɛ a hi si blema a kaa a bua a he nya si etɛ ngɛ jeha mi ɔ, wɔ hu wa hyɛɔ blɔ kaa wa ma bua wa he nya kaa kuu ngua. (5 Mose 16:16) Daa jeha a, wa ngɛ he nya buamihi etɛ nɛ wa peeɔ: waa kɛ ligbi kakaaka yaa kpɔ mi kpe si enyɔ, kɛ ligbi etɛ kpokpa nɔ kpe. Mɛni se wa náa ngɛ he nya buami nɛ ɔmɛ a mi?

A haa nɛ huɛ bɔmi nɛ ngɛ waa kɛ wa nyɛmimɛ Kristofohi wa kpɛti ɔ mi waa. Kaa bɔ nɛ ke Israel bi ɔmɛ ngɛ Yehowa yi jee ngɛ ‘nimli asafo a kpɛti’ nɛ a bua jɔɔ ɔ, jã kɛ̃ nɛ wɔ hu ke wa bua wa he nya ngɛ ní peemi klɛdɛɛhi a sisi kɛ ngɛ Yehowa jae ɔ, wa bua jɔɔ. (La 26:12; 111:1) Kɛ gu he nya buami nɛ ɔmɛ a nɔ ɔ, wa nyɛɔ nɛ waa kɛ Odasefohi nɛ a ngɛ asafo kpahi a mi loo ma kpahi a nɔ kpeɔ nɛ waa kɛ mɛ bɔɔ. Ke e su piani ɔ, wɔ tsuo wa yeɔ ní ngɛ he nɛ wa bua wa he nya ngɛ ɔ, nɛ enɛ ɔ haa huɛ bɔmi nɛ hiɔ wa kpɛti ngɛ he nya buami nɛ ɔmɛ nɛ waa kɛ jaa Mawu ɔ a sisi ɔ mi waa. (Bɔfo Ɔmɛ A Ní Tsumi 2:42) Ngɛ he nya buami nɛ ɔmɛ a sisi ɔ, wɔ nitsɛmɛ wa naa suɔmi nɛ peeɔ wa ‘nyɛmimɛ nɛ a ngɛ je kɛ wɛ ɔ tsuo’ kake ɔ.​—1 Petro 2:17.

A yeɔ bua wɔ nɛ wa he waa ngɛ Mawu jami mi. A tsɔɔ Israel bi ɔmɛ Ngmami ɔ sisi fitsofitso ngɛ a he nya buami ɔmɛ a sisi hulɔ, nɛ lɔ ɔ ha nɛ a “nu nɔ́ nɛ a kane ha mɛ ɔ sisi saminya.” (Nehemia 8:8, 12) Wɔ hu wa bua jɔɔ Baiblo mi blɔ tsɔɔmi nɛ a kɛ haa wɔ ngɛ wa he nya buamihi a sisi ɔ he. A kɛ blɔ nya tomi ɔ eko tsuaa eko daa Ngmami ɔ mi munyuyi ko nɔ. Munyu ngɔngɔɛhi kɛ munyuyihi nɛ a gba mi nɛ a tuɔ, kɛ níhi a si kpamihi a he peemi kɛ tsɔɔ yeɔ bua wɔ nɛ wa kaseɔ bɔ nɛ wa ma plɛ kɛ pee Mawu suɔmi nya ní ngɛ wa si himi mi ha. Ke wa nu nyɛmimɛ komɛ a níhi a si kpamihi nɛ kɔɔ bɔ nɛ a nyɛ da haomihi nɛ a kɛ kpe ngɛ Kristofohi nɛ a ji ɔ he ɔ nya ngɛ be nɛ mi wa nɛ ɔmɛ a mi ɔ, e woɔ wɔ he wami. Dramahi nɛ a peeɔ ngɛ kpokpa nɔ kpehi a sisi ɔ haa nɛ wa nuɔ Baiblo mi sanehi a sisi fitsofitso nɛ wa kaseɔ níhi kɛ jeɔ mi. A baptisiɔ nihi nɛ a suɔ kaa a maa pee a he nɔ nɛ́ a jɔɔ ha Mawu ɔ he okadi ɔ ngɛ wa he nya buami ɔmɛ eko tsuaa eko sisi.

• Mɛni ha nɛ wa náa bua jɔmi ngɛ wa he nya buami ɔmɛ a sisi?

• Mɛni blɔ nɔ o maa gu kɛ ná he nya buami ko nɛ o maa ya a he se?

Benɛ e piɛ bɔɔ nɛ Yesu ma gbo ɔ, e fia adafi ke: “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.” (Mateo 24:14) Se mɛni blɔ nɔ a maa gu kɛ fiɛɛ kɛ kpa je ɔ mi tsuo? A ma nyɛ maa pee jã kɛ gu Yesu nɔ hyɛmi nɔ́ ɔ se nɛ a maa nyɛɛ ɔ nɔ.​—Luka 8:1.

Wa bɔɔ mɔde kaa wa maa ya nihi a ngɔ ngɛ a wehi a mi. Yesu tsɔse e kaseli ɔmɛ konɛ a fiɛɛ sane kpakpa a ngɛ wehi a mi. (Mateo 10:11-13; Bɔfo Ɔmɛ A Ní Tsumi 5:42; 20:20) A ha blema sane kpakpa fiɛɛli ɔmɛ zugba kpɔhi pɔtɛɛ nɛ a fiɛɛ ngɛ mi. (Mateo 10:5, 6; 2 Korinto Bi 10:13) Jã nɔuu kɛ̃ nɛ mwɔnɛ ɔ hu ɔ, a to wa fiɛɛmi ní tsumi ɔ he blɔ nya saminya. A ha asafo tsuaa asafo zugba kpɔ nɛ e fiɛɛ ngɛ mi. Enɛ ɔ yeɔ bua wɔ nɛ wa nyɛɔ tsuɔ fami nɛ Yesu fã wɔ kaa waa ‘fiɛɛ sane kpakpa a ngɔ tsɔɔ nihi nɛ́ waa ye mɛ odase kɛ pi si’ ɔ he ní.​—Bɔfo Ɔmɛ A Ní Tsumi 10:42.

Wa bɔɔ mɔde kaa wa maa ya he tsuaa he nɛ nihi ngɛ. Yesu pee nɔ hyɛmi nɔ́ kɛ ha wɔ kɛ gu fiɛɛmi nɛ e fiɛɛ kɛ tsɔɔ nihi ngɛ magbɛhi a nɔ kaa wo nya, aloo vu nya a nɔ hulɔ. (Marko 4:1; Yohane 4:5-15) Wɔ hu waa kɛ nihi sɛɛɔ Baiblo ɔ he ní ngɛ he tsuaa he nɛ wa ma nyɛ maa pee jã ngɛ​—gbɛjegbɛhi a he, ní tsumi hehi, hɛja jemi hehi, aloo tɛlifoo nɔ. Jehanɛ se hu ɔ, ke wa ná he blɔ nɛ sa a, wa yeɔ nihi nɛ waa kɛ mɛ ngɛ kpɔ mi, nihi nɛ waa kɛ mɛ tsuɔ ní, nihi nɛ waa kɛ mɛ ngɛ sukuu tsu kake mi, kɛ wa weku li odase. Mɔde nɛ wa bɔɔ ngɛ blɔ nɛ ɔmɛ a nɔ ɔ ha nɛ nimli ayɔhi abɔ nɛ a ngɛ je kɛ wɛ ɔ nu ‘yi wami hemi sane kpakpa a’ he.​—La 96:2.

Anɛ o le ni komɛ nɛ o maa suɔ kaa o maa fiɛɛ Mawu Matsɛ Yemi sane kpakpa a kɛ tsɔɔ mɛ nɛ o tsɔɔ mɛ níhi nɛ Matsɛ Yemi ɔ maa pee ha mɛ hwɔɔ se lo? Koo pee mɛ sɛ gbi nɛ haa nɔ hɛ kɛ nɔ fɔmi nɛ ɔ he kpɛle. O kɛ mɛ nɛ sɛɛ he ní oya nɔuu!

• Mɛni “sane kpakpa” nɛ e sa kaa a fiɛɛ?

• Mɛni blɔ nɔ Yehowa Odasefohi guɔ kɛ kaseɔ bɔ nɛ Yesu fiɛɛ ha a?

Behi fuu ɔ, a tsɛɔ nɔ ko nɛ e gbaa blɔ kɛ yaa he ko nɛ́ nɔ ko yɛ lejɛ ɔ hyɛ nɛ́ ni kpahi hu nyɛɛɔ e se ɔ ke “blɔ gbalɔ.” Yesu ngɛ kaa blɔ gbalɔ, ejakaa a tsɔ lɛ kɛ ba zugba a nɔ nɛ e ba tsu yi wami hemi sɔmɔmi ní tsumi, nɛ e kɛ bli blɔ ha adesahi konɛ a ná kpɔmi. (Mateo 20:28) Mwɔnɛ ɔ, e se nyɛɛli ɔmɛ hu ngɛ lɛ kasee nɛ a kɛ be fuu ngɛ ‘nihi kaseli pee.’ (Mateo 28:19, 20) A ti ni komɛ nyɛ ngɛ nɔ́ nɛ wa tsɛɛ ke blɔ gbami ní tsumi ɔ tsue.

Blɔ gbalɔ ji nɔ ko nɛ e kɛ e be tsuo fiɛɛɔ. Yehowa Odasefohi tsuo fiɛɛɔ sane kpakpa a. Se a kpɛti ni komɛ to a si himi he blɔ nya konɛ a sɔmɔ kaa daa blɔ gbali nɛ́ a kɛ ngmlɛfia 70 nɛ fiɛɛ daa nyɔhiɔ. Nihi fuu kpa he lo nya ní tsumihi nɛ a kɛ a be tsuo tsuɔ ɔ tsumi nɛ a hla he lo nya ní tsumi nɛ a kɛ be bɔɔ pɛ tsuɔ. A hlaa ni komɛ hu konɛ a ya sɔmɔ kaa blɔ gbali klɛdɛɛ ngɛ hehi nɛ Matsɛ Yemi fiɛɛli fuu a he hia ngɛ nɛ a kɛ ngmlɛfia 130 loo nɔ́ nɛ hiɛ pe jã fiɛɛɔ daa nyɔhiɔ. Blɔ gbali ɔmɛ a bua jɔ kaa a maa pee a si himi hlɛhlɛɛhlɛ, nɛ a ngɛ hɛ kɛ nɔ fɔmi ngɛ Yehowa mi kaa e ma ha mɛ a si himi mi hiami níhi. (Mateo 6:31-33; 1 Timoteo 6:6-8) Ke nihi nɛ a be nyɛe ma sɔmɔ kaa daa blɔ gbali loo blɔ gbali klɛdɛɛ ɔ ma nyɛ ɔ, a sɔmɔɔ kaa blɔ gbali a wali nɛ a kɛ ngmlɛfia 30 loo 50 fiɛɛɔ ngɛ nyɔhiɔ ko mi.

Nɔ́ nɛ woɔ blɔ gbalɔ he wami ji suɔmi nɛ e ngɛ kɛ ha Mawu kɛ nihi. Kaa bɔ nɛ Yesu yɔse ɔ, wɔ hu wa yɔse kaa mwɔnɛ ɔ, nihi babauu ngɛ hlae wawɛɛ kaa a maa le Mawu kɛ e yi mi tomihi a he ní. (Marko 6:34) Wa ngɛ nile nɛ ma nyɛ maa ye bua mɛ amlɔ nɛ ɔ, nɛ ma ha nɛ a ná hɛ kɛ nɔ fɔmi nitsɛnitsɛ kɛ ha hwɔɔ se. Suɔmi nɛ blɔ gbalɔ ko ngɛ ɔ woɔ lɛ he wami nɛ e jeɔ e tsui mi nɛ e kɛ e be, kɛ e he wami yeɔ bua nihi konɛ a le Mawu kɛ e yi mi tomihi. (Mateo 22:39; 1 Tesalonika Bi 2:8) Enɛ ɔ haa e hemi kɛ yemi mi waa, e hɛɛ lɛ kɛ suɔ Mawu he, nɛ e náa bua jɔmi fuu.​—Bɔfo Ɔmɛ A Ní Tsumi 20:35.

• Mɛnɔ ji blɔ gbalɔ?

• Mɛni woɔ ni komɛ he wami nɛ a sɔmɔɔ kaa daa blɔ gbali loo blɔ gbali klɛdɛɛ?

Kɛ je blema tɔɔ nɛ nihi le Yehowa Odasefohi kaa a kɛ Baiblo ɔ tsɔseɔ nihi. A pee sukuu klɛdɛɛ komɛ kɛ ha nihi nɛ a kɛ a be tsuo fiɛɛɔ Matsɛ Yemi sɛ gbi ɔ, konɛ a ‘pee Mawu sɔmɔli kpakpahi.’​—2 Timoteo 4:5.

Blɔ Gbali A Tsɔsemi Sukuu. Ke daa blɔ gbalɔ ko tsu blɔ gbami ní tsumi ɔ jeha kake ɔ, e yaa Blɔ Gbali A Tsɔsemi Sukuu nɛ ɔ eko. A kɛ ligbi ekpa nɛ peeɔ sukuu nɛ ɔ. A peeɔ ngɛ Matsɛ Yemi Asa ko nɛ e kɛ he nɛ blɔ gbalɔ ɔ ngɛ ɔ kɛ we ɔ nɔ. Yi mi tomi he je nɛ blɔ gbali yaa sukuu nɛ ɔ ji, konɛ a nyɛ nɛ a hɛ mɛ kɛ su Yehowa he, nɛ a nyɛ nɛ a fiɛɛ saminya, konɛ a ya nɔ nɛ a ye Yehowa anɔkuale.

Sukuu Kɛ Ha Matsɛ Yemi Sane Kpakpa Fiɛɛli. A kɛ nyɔhiɔ enyɔ nɛ yaa sukuu nɛ ɔ. A pee konɛ a kɛ tsɔse blɔ gbali nɛ a se kɛ saii ngɛ blɔ gbami ní tsumi ɔ mi, nɛ a suɔ kaa a maa je he nɛ a ngɛ ɔ konɛ a ya ye bua ngɛ he nɛ fiɛɛli babauu a he hia ngɛ. A ngɛ Sane Kpakpa Fiɛɛlɔ ngua pe kulaa nɛ hi zugba a nɔ hyɛ nɛ ji, Yesu Kristo ɔ kasee. Enɛ ɔ he ɔ, ngɛ blɔ ko nɔ ɔ, a ngɛ dee ke, “I ngɛ hiɛ ɔ! Moo tsɔ mi!” (Yesaya 6:8; Yohane 7:29) Akɛnɛ a maa je a wehi a mi kɛ ya hi he kpa he je ɔ, enɛ ɔ ma bi nɛ a pee a si himi kpokploo. Eko ɔ, nɔ ɔ ma ya je he ko nɛ e slo bɔ nɛ nihi peeɔ a ní ha, bɔ nɛ kɔɔhiɔ mi tsakemi ngɛ ha, kɛ bɔ nɛ a niye ní hu ngɛ ha. Eko ɔ, e ma bi nɛ nɔ ɔ nɛ kase gbi kpa. Sukuu nɛ ɔ yeɔ bua nyɛmimɛ nyumuhi kɛ yihi nɛ a sɛ gba si himi mi, kɛ ni nɛmɛ nɛ sɛ we gba si himi nɛ a ye kɛ je jeha 23 kɛ ya si 65 ɔ konɛ a ná suhi nɛ maa ye bua mɛ ngɛ a sɔmɔmi ní tsumi ɔ mi. Jehanɛ se hu ɔ, e yeɔ bua mɛ konɛ Yehowa kɛ e we asafo ɔ nɛ nyɛ nɛ e kɛ mɛ nɛ tsu ní.

Watchtower Gilead Baiblo Sukuu. Ngɛ Hebri gbi ɔ mi ɔ, munyungu nɛ ji, “Gilead” ɔ sisi ji “Odase Babauu.” A je Gilead sukuu ɔ sisi ngɛ jeha 1943 ɔ mi. Kɛ je jamɛ a jeha a mi kɛ ba si amlɔ nɛ ɔ, sukuu nɛ ɔ tsɔse ma se sane kpakpa fiɛɛli nɛ hiɛ pe 8,000. A wo mɛ blɔ konɛ a ya ye “je ɔ tsuo” odase. (Bɔfo Ɔmɛ A Ní Tsumi 13:47) Benɛ ma se sane kpakpa fiɛɛli ɔmɛ ya Peru ɔ, asafo ko be lejɛ ɔ, se amlɔ nɛ ɔ, wa ngɛ asafohi nɛ a hiɛ pe 1,000 ngɛ lejɛ ɔ. Benɛ ma se sane kpakpa fiɛɛli ɔmɛ ya Japan ɔ, Odasefohi nɛ a ngɛ lejɛ ɔ a hiɛmi sui nyɔngma. Amlɔ nɛ ɔ, a he hiɛ pe 200,000. A kɛ nyɔhiɔ enuɔ nɛ yaa sukuu nɛ ɔ. A kaseɔ Mawu Munyu ɔ saminya kɛ piɛɛ ní kpahi nɛ a kaseɔ ɔ he. Nihi nɛ a tsɛɛ mɛ kɛ yaa sukuu nɛ ɔ ji, blɔ gbali klɛdɛɛhi, ma se sane kpakpa fiɛɛli, nihi nɛ a ngɛ sɔmɔe ngɛ Betel, kɛ nihi nɛ a ngɛ sɔmɔe kaa kpɔ mi nɔ hyɛli. A ya tsɔseɔ mɛ konɛ a ha nɛ je kɛ wɛ fiɛɛmi ní tsumi ɔ nɛ ya nɔ saminya.

• Mɛni yi mi tomi he je nɛ a pee Blɔ Gbali A Tsɔsemi Sukuu ɔ?

• A pee Sukuu Kɛ Ha Matsɛ Yemi Sane Kpakpa Fiɛɛli ɔ kɛ ha mɛnɔmɛ?