-
Mɛni Ji Mawu Matsɛ Yemi ɔ?O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
-
-
NÍ KASEMI 31
Mɛni Ji Mawu Matsɛ Yemi ɔ?
Mawu Matsɛ Yemi ɔ ji nɔ́ titli nɛ Baiblo ɔ tu he munyu. Yehowa maa gu Matsɛ Yemi nɛ ɔ nɔ kɛ ha nɛ e yi mi tomi kɛ kɔ zugba a he ɔ nɛ ba mi. Mɛni ji Matsɛ Yemi nɛ ɔ? Kɛ wa plɛ kɛ le kaa e ngɛ nɔ yee amlɔ nɛ ɔ ha kɛɛ? Mɛni nɛ Matsɛ Yemi ɔ tsu momo? Nɛ mɛni nɛ e ma tsu hwɔɔ se? Ní kasemi nɛ ɔ kɛ ní kasemi enyɔ nɛ maa nyɛɛ se ɔ ma ha sane bimi nɛ ɔmɛ a heto.
1. Mɛni ji Mawu Matsɛ Yemi ɔ, nɛ mɛnɔ ji e nya Matsɛ?
Mawu Matsɛ Yemi ɔ ji nɔ yemi nɛ Yehowa Mawu nitsɛ to sisi. Yesu Kristo ji Matsɛ Yemi nɛ ɔ nya Matsɛ, nɛ e maa hi hiɔwe kɛ ye nɔ. (Mateo 4:17; Yohane 18:36) Baiblo ɔ de ngɛ Yesu he ke: ‘E maa ye Matsɛ kɛ maa ya neneene.’ (Luka 1:32, 33) Akɛnɛ Yesu ji Mawu Matsɛ Yemi ɔ nya Matsɛ he je ɔ, e maa ye nihi tsuo nɛ a ngɛ zugba a nɔ ɔ a nɔ.
2. Mɛnɔmɛ nɛ a maa piɛɛ Yesu he kɛ ye Matsɛ?
Pi Yesu pɛ nɛ e maa ye nɔ ngɛ Mawu Matsɛ Yemi ɔ mi. Nihi nɛ a je ‘wɛtso fɛɛ wɛtso kɛ lilɛ kɛ nimli kɛ je ma amɛ a mi ɔ . . . maa ye zugba a nɔ kaa matsɛmɛ.’ (Kpo Jemi 5:9, 10) Nihi enyɛmɛ nɛ a maa piɛɛ Kristo he kɛ ye nɔ? Kɛ je benɛ Yesu ba zugba a nɔ nɛ e kpale kɛ ho hiɔwe ya a, nimli ayɔhi abɔ ba pee e se nyɛɛli. Se anɛ, nimli nɛ ɔmɛ tsuo maa piɛɛ Yesu he kɛ ye nɔ lo? Dɛbi. A kpɛti nihi 144,000 pɛ nɛ a ma ya piɛɛ e he ngɛ hiɔwe kɛ ye nɔ. (Kane Kpo Jemi 14:1-4.) Kristofohi nɛ a piɛ ɔ lɛɛ a maa pee Matsɛ Yemi ɔ sisi bimɛ ngɛ zugba a nɔ.—La 37:29.
3. Mɛni he je nɛ Mawu Matsɛ Yemi ɔ hi pe adesahi a nɔ yemi ɔ?
Ke adesa nɔ yeli bɔ mɔde kaa a maa pee ní kpakpahi po ɔ, a be he wami nɛ a kɛ maa pee nɔ́ fɛɛ nɔ́ nɛ a suɔ kaa a maa pee ɔ. Kɛ yaa kɛ yaa a, nɔ yeli kpahi ba yeɔ nɔ. Se nɔ yeli nɛ ɔmɛ hu ma nyɛ maa pee nihi nɛ a foɔ mɛ pɛ a nɔ́ mi nɛ́ a susuu we ni kpahi a he. Se Yesu nɛ e ji Mawu Matsɛ Yemi ɔ nya Matsɛ ɔ lɛɛ, nɔ ko nɔ ko be lɛ jee ngɛ sɛ ɔ nɔ kɔkɔɔkɔ. Ngmami ɔ de ke, Mawu “to matsɛ yemi ko sisi, nɛ e se be poe gblegbleegble.” (Daniel 2:44) Yesu maa ye je ɔ tsuo nɔ, nɛ e be ni komɛ bue kaa a he hia pe ni komɛ. Ejakaa e ngɛ suɔmi, e mi mi jɔ, nɛ e yeɔ dami sane, nɛ e maa tsɔɔ nihi ní konɛ mɛ hu a je su kpakpa nɛ ɔmɛ nɔuu kpo.—Kane Yesaya 11:9.
MOO KASE BABAUU
Moo kase nɔ́ he je nɛ Mawu Matsɛ Yemi ɔ hi pe adesahi a nɔ yemi ɔ.
4. Mawu Matsɛ Yemi ɔ maa ye zugba a tsuo nɔ
Yesu Kristo ngɛ he wami nɛ́ e kɛ maa ye nɔ pe adesa nɔ yeli tsuo. Nyɛɛ kane Mateo 28:18 ɔ, nɛ nyɛ susu sane bimi nɛ ɔ he:
Ngɛ mɛni blɔ nɔ nɛ he blɔ nɛ Yesu ngɛ ɔ nɔ kuɔ kulaa pe he blɔ nɛ adesa nɔ yeli ngɛ ɔ?
Adesahi pɔɔ a nɔ yemi ɔmɛ tsakemi, nɛ a yeɔ ma pɔtɛɛ komɛ pɛ a nɔ hulɔ. Se Mawu Matsɛ Yemi ɔ hu nɛɛ? Nyɛɛ kane Daniel 7:14 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni he je nɛ e ji bua jɔmi sane kaa Mawu Matsɛ Yemi ɔ “se be poe gblegbleegble ɔ”?
Mɛni he je nɛ e ji bua jɔmi sane kaa Mawu Matsɛ Yemi ɔ maa ye zugba a tsuo nɔ ɔ?
5. Adesahi a nɔ yemi be nyɛe ma tsu wa nyagba amɛ a he ní
Mɛni he je nɛ e sa nɛ Mawu Matsɛ Yemi ɔ nɛ ba je adesahi a nɔ yemi ɔ? Mo je VIDEO ɔ, nɛ nyɛ susu sane bimi nɛ ɔ he.
Mɛni lɛ je adesahi a nɔ yemi mi kɛ ba?
Nyɛɛ kane Fiɛlɔ 8:9 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Anɛ o susu kaa e sa nɛ Mawu Matsɛ Yemi ɔ nɛ ba je adesa nɔ yemi kɛ je lo? Mɛni he je?
6. Nihi nɛ a maa ye nɔ ngɛ Mawu Matsɛ Yemi ɔ mi ɔ nu wɔ sisi
Akɛnɛ Yesu nɛ e ji wa Matsɛ ɔ ba hi si hyɛ kaa adesa he je ɔ, e ma nyɛ maa “nu wa gbɔjɔmi ɔmɛ a he ha wɔ.” (Hebri Bi 4:15) Nyumuhi kɛ yihi anɔkualetsɛmɛ 144,000 nɛ́ a maa piɛɛ Yesu he kɛ ye nɔ ɔ ji nihi nɛ Yehowa hla mɛ “kɛ je wɛtso fɛɛ wɛtso kɛ lilɛ kɛ nimli kɛ je ma” amɛ a mi.—Kpo Jemi 5:9.
Anɛ lemi nɛ o le kaa Yesu kɛ nihi nɛ a maa piɛɛ e he kɛ ye nɔ ɔ le nyagbahi nɛ waa kɛ ngɛ kpee kɛ bɔ nɛ wa nuɔ he ha a woɔ o bua lo? Mɛni he je?
Yehowa hla nihi nɛ a je ma slɔɔtohi a mi kaa a piɛɛ Yesu he kɛ ye nɔ
7. Mawu Matsɛ Yemi ɔ ngɛ mlaahi nɛ a nɔ kuɔ pe mlaahi nɛ adesa nɔ yemihi woɔ ɔ
Nɔ yemihi woɔ mlaahi konɛ a kɛ po a sisi bimɛ a he piɛ, nɛ́ a ná he se hulɔ. Mawu Matsɛ Yemi ɔ hu ngɛ mlaahi nɛ e sa kaa e sisi bimɛ nɛ a ye nɔ. Nyɛɛ kane 1 Korinto Bi 6:9-11 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Kɛ o susu kaa je ɔ mi maa hi ha kɛɛ ke nɔ fɛɛ nɔ kɛ je mi bami he mlaahia nɛ Mawu wo ɔmɛ tsu ní?
Anɛ o susu kaa Yehowa ngɛ he blɔ nɛ́ e hyɛɛ blɔ kaa e Matsɛ Yemi ɔ sisi bimɛ nɛ́ a ye mlaa nɛ ɔmɛ a nɔ lo? Mɛni he je?
Mɛni tsɔɔ kaa nihi nɛ a bui mlaa nɛ ɔmɛ tue ɔ ma nyɛ ma tsake?—Hyɛ kuku 11.
Nɔ yemihi woɔ mlaahi konɛ a kɛ po a sisi bimɛ a he piɛ, nɛ́ a ná he se hulɔ. Mawu Matsɛ Yemi ɔ ngɛ mlaahi nɛ́ a nɔ kuɔ. Mlaa nɛ ɔmɛ maa po Matsɛ Yemi ɔ sisi bimɛ ɔmɛ a he piɛ, nɛ a ma ná he se hulɔ
NI KOMƐ DEƆ KE: “Mawu Matsɛ Yemi ɔ ngɛ wa tsui mi?”
Kɛ o ma ha heto kɛɛ?
NYA MWƆMI
Mawu Matsɛ Yemi ɔ ji nɔ yemi nitsɛnitsɛ nɛ́ e ngɛ hiɔwe, nɛ e maa ye zugba a tsuo nɔ.
Mi Nylɔmi
Mɛnɔmɛ nɛ a maa ye nɔ ngɛ Mawu Matsɛ Yemi ɔ mi?
Mɛni he je nɛ Mawu Matsɛ Yemi ɔ nɔ kuɔ kulaa pe adesa nɔ yemihi tsuo ɔ?
Mɛni ji ní komɛ nɛ́ Yehowa ngɛ blɔ hyɛe kaa e Matsɛ Yemi ɔ sisi bimɛ nɛ a pee?
NÍ KPAHI NƐ MAA YE BUA MO
Moo hyɛ nɔ́ nɛ Yesu de kɛ kɔ he nɛ Mawu Matsɛ Yemi ɔ ngɛ ɔ he.
“Anɛ Mawu Matsɛ Yemi ɔ Ngɛ O Tsui Mi Lo?” (Munyu nɛ ɔ ngɛ Intanɛti ɔ nɔ)
Mɛni he je nɛ Yehowa Odasefohi suɔ kaa a maa ye Mawu Matsɛ Yemi ɔ anɔkuale mohu pe adesahi a nɔ yemi ɔ?
Moo hyɛ nɔ́ nɛ Baiblo ɔ de kɛ kɔ nimli 144,000 nɛ Yehowa hla mɛ kaa a piɛɛ Yesu he kɛ ye Matsɛ ɔ a he.
Mɛni lɛ ha nɛ yo ko nɛ a wo lɛ tsu ɔ ná nɔ mi mami kaa Mawu pɛ lɛ ma nyɛ ma ha nɛ je nɛ a yeɔ dami sane ngɛ mi ɔ maa ba?
“I Ba Na Nɔ́ He Je Nɛ Nihi Yi Dami Sane ɔ” (O Hɛ Nɛ Tsɛ̃!, November 2011)
-
-
Mawu Matsɛ Yemi ɔ Ngɛ Nɔ Yee Amlɔ Nɛ ɔ!O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
-
-
NÍ KASEMI 32
Mawu Matsɛ Yemi ɔ Ngɛ Nɔ Yee Amlɔ Nɛ ɔ!
Mawu Matsɛ Yemi ɔ bɔni nɔ yemi ngɛ hiɔwe ngɛ jeha 1914 ɔ mi. Jamɛ a be ɔ mi nɛ adesahi a nɔ yemihi a nyagbe be ɔ je sisi ɔ nɛ. Kɛ wa plɛ kɛ le enɛ ɔ kɛɛ? Ha nɛ wa susu bɔ nɛ Baiblo gbamihi, níhi nɛ ngɛ nɔ yae, kɛ suhi nɛ nihi ngɛ kpo jee kɛ je jeha 1914 ɔ maa enɛ ɔ nɔ mi ha.
1. Mɛni nɛ Baiblo ɔ gba kɛ fɔ si?
Daniel womi ɔ tsɔɔ kaa Mawu Matsɛ Yemi ɔ ma bɔni nɔ yemi ngɛ “jeha kpaago” aloo “be kpaago” nyagbe. (Daniel 4:16, 17) Jeha lafa komɛ a se ɔ, Yesu tu be nɛ ɔ nɔuu he munyu kaa e ji “behi nɛ a to kɛ ha je ma amɛ,” nɛ e tsɔɔ kaa be nɛ ɔ bɛ nyagbe lolo. (Luka 21:24) Wa maa na ngɛ ní kasemi nɛ ɔ mi kaa jeha kpaago aloo be kpaago ɔ ba nyagbe ngɛ jeha 1914 ɔ mi.
2. Mɛni níhi lɛ ngɛ nɔ yae ngɛ je ɔ mi, nɛ mɛni suhi nɛ nihi ngɛ kpo jee kɛ je jeha 1914 ɔ kɛ ma nɛ ɔ?
Yesu kaseli ɔmɛ bi lɛ ke: “Mɛni okadi nɛ e maa tsɔɔ kaa o ba nɛ́ ma kadi níhi a blɔ nya tomi ɔ nyagbe be ɔ?” (Mateo 24:3) Yesu ha mɛ heto nɛ e de mɛ níhi babauu nɛ maa ya nɔ ke e bɔni nɔ yemi ngɛ hiɔwe kaa Mawu Matsɛ Yemi ɔ nya Matsɛ ɔ. Ní nɛ ɔmɛ ekomɛ ji ta, hwɔ kɛ zugba mimiɛɛmi. (Kane Mateo 24:7) Baiblo ɔ hu gba kɛ fɔ si kaa su nɛ nihi ma je kpo ngɛ “nyagbe ligbi ɔmɛ a mi ɔ” ma ha nɛ si himi ɔ “nya dami maa ye.” (2 Timoteo 3:1-5) Kɛ je jeha 1914 ɔ, níhi nɛ Baiblo ɔ tsɔɔ kaa a maa ya nɔ, kɛ suhi nɛ e tsɔɔ kaa nihi ma je kpo ɔ pɔ he wawɛɛ.
3. Mɛni he je nɛ je ɔ puɛ kulaa kɛ je benɛ Mawu Matsɛ Yemi ɔ bɔni nɔ yemi ɔ?
Benɛ Yesu ba pee Mawu Matsɛ Yemi ɔ nya Matsɛ be bɔɔ se ɔ, e kɛ Satan kɛ e daimonio ɔmɛ hwu ta ngɛ hiɔwe. Yesu ye Satan nɔ kunimi ngɛ jamɛ a ta a mi. Baiblo ɔ de ke “a sake lɛ ngɔ fɔ zugba a nɔ, nɛ a sake e bɔfo ɔmɛ hu kɛ piɛɛ e he.” (Kpo Jemi 12:9, 10, 12) Satan mi mi fu wawɛɛ ejakaa e le kaa a ma kpata e hɛ mi. Enɛ ɔ he ɔ, e ngɔɔ haomi kɛ nɔ́ nami kɛ baa je ɔ mi tsuo. Lɔ ɔ he je nɛ je ɔ puɛ jã a nɛ. Mawu Matsɛ Yemi ɔ ma ba je nyagba nɛ ɔmɛ tsuo kɛ je.
MOO KASE BABAUU
Moo kase bɔ nɛ wa plɛ kɛ le kaa Mawu Matsɛ Yemi ɔ bɔni nɔ yemi kɛ je jeha 1914 ɔ, kɛ nɔ́ nɛ enɛ ɔ biɔ nɛ wɔ tsuo waa pee ɔ he ní.
4. Baiblo mi akɔtaa bumi tsɔɔ kaa Mawu Matsɛ Yemi ɔ bɔni nɔ yemi kɛ je jeha 1914 ɔ
Mawu ha nɛ Babilon Matsɛ Nebukadnezar nla nlami ko nɛ́ tsɔɔ níhi nɛ maa ba hwɔɔ se. Nlami nɛ ɔ he sane kɛ bɔ nɛ Daniel tsɔɔ sisi ha a ngɛ Baiblo ɔ mi. E ngɛ heii kaa nlami nɛ ɔ kɔɔ Nebukadnezar nɔ yemi ɔ kɛ Mawu Matsɛ Yemi ɔ he.—Nyɛɛ kane Daniel 4:17 ɔ.a
Nyɛɛ kane Daniel 4:20-26, lɔ ɔ se ɔ, nyɛɛ hyɛ daka nɛ ngɛ ba fa 133 ɔ nɔ kɛ ha sane bimihi nɛ nyɛɛ se nɛ ɔmɛ a heto:
(A) Mɛni nɛ Nebukadnezar na ngɛ e nlami ɔ mi?—Hyɛ kuku 20 kɛ 21.
(B) Mɛni maa ba tso ɔ nɔ?—Hyɛ kuku 23.
(D) Mɛni maa ya nɔ ke “jeha kpaago” aloo “be kpaago” ɔ ba nyagbe?—Hyɛ kuku 26.
Bɔ Nɛ Nlami Nɛ Kɔɔ Tso ɔ He ɔ Kɔɔ Mawu Matsɛ Yemi ɔ He Ha
GBAMI Ɔ (Daniel 4:20-36)
Nɔ yemi
(A) Tso ngua ko
Nɔ yemi ɔ se po kɛ ya si be ko
(B) “Nyɛɛ hɛ tso ɔ kɛ fɔ si,” nɛ nyɛ ha nɛ “jeha kpaago” aloo “be kpaago” nɛ be
A to nɔ yemi ɔ sisi ekohu
(D) “O ma ba ye matsɛ ekohu”
Gbami ɔ mi bami kekleekle nɔ́ . . .
(E) Mɛnɔ nɛ tso ɔ daa si kɛ ha?—Hyɛ kuku 22.
(Ɛ) Mɛni be nɛ e kpa nɔ yemi? —Kane Daniel 4:29-33.
(F) Benɛ “jeha kpaago” aloo “be kpaago” ɔ ba nyagbe ɔ, mɛni ba Nebukadnezar nɔ?—Kane Daniel 4:34-36.
GBAMI Ɔ MI BAMI KEKLEEKLE NƆ́
Nɔ yemi
(E) Babilon Matsɛ Nebukadnezar
Nɔ yemi ɔ se po kɛ ya si be ko
(Ɛ) Ngɛ jeha 606 Loko A Fɔ Kristo ɔ, Nebukadnezar nu godo nɛ e kpa nɔ yemi jeha kpaago
A to nɔ yemi ɔ sisi ekohu
(F) Nebukadnezar godo ɔ je, nɛ e bɔni nɔ yemi ekohu
Gbami ɔ mi bami enyɔne . . .
(G) Mɛnɔmɛ nɛ tso ɔ daa si kɛ ha? —Kane 1 Kronika 29:23.
(H) Mɛni be nɛ a kpa nɔ yemi? Kɛ wa plɛ kɛ le kaa a yi nɔ benɛ Yesu ngɛ zugba a nɔ ɔ ha kɛɛ? —Kane Luka 21:24.
(I) Mɛni be nɛ a to nɔ yemi nɛ ɔ sisi, nɛ jije a to sisi ngɛ?
GBAMI Ɔ MI BAMI ENYƆNE
Nɔ yemi
(G) Israel matsɛmɛ nɛ́ a ye nɔ kaa Mawu nɔ yemi ɔ nane mi dali
Nɔ yemi ɔ se po kɛ ya si be ko
(H) A kpata Yerusalem hɛ mi nɛ enɛ ɔ ha Israel matsɛmɛ ɔmɛ kpa nɔ yemi jeha 2,520
A to nɔ yemi ɔ sisi ekohu
(I) Yesu bɔni nɔ yemi ngɛ hiɔwe kaa Mawu Matsɛ Yemi ɔ nya Matsɛ
Jeha kpaago aloo be kpaago ɔ mi kɛmi
Ngmami komɛ nɛ ngɛ Baiblo ɔ mi ɔ yeɔ buaa wɔ konɛ wa nyɛ nɛ waa nu ngmami kpahi a sisi. Kaa nɔ hyɛmi nɔ́ ɔ, Kpo Jemi womi ɔ tsɔɔ kaa be etɛ kɛ fã daa si kɛ ha ligbi kakaaka 1,260. (Kpo Jemi 12:6, 14) Be etɛ kɛ fã nɛ a bɔ he enyɔ ɔ, peeɔ be kpaago aloo ligbi kakaaka 2,520. Ngɛ Baiblo ɔ mi ɔ, be komɛ ɔ, a kɛ ligbi kake daa si kɛ ha jeha kake. (Ezekiel 4:6) Enɛ ɔ he ɔ, jeha kpaago aloo be kpaago nɛ Daniel womi ɔ tu he munyu ɔ daa si kɛ ha jeha 2,520.
5. Níhi tsake kulaa ngɛ je ɔ mi kɛ je jeha 1914 ɔ
Yesu tsɔɔ níhi nɛ maa ya nɔ ngɛ je ɔ mi ke e ba pee Matsɛ ɔ. Nyɛɛ kane Luka 21:9-11 ɔ, nɛ nyɛ susu sane bimi nɛ ɔ he:
Ní nɛ ɔmɛ a kpɛti te nɛɛ lɛ o nuɔ aloo o naa nɛ́ a ngɛ nɔ yae?
Bɔfo Paulo tsɔɔ bɔ nɛ nihi maa pee a ní ha ngɛ adesahi a nɔ yemi nyagbe be ɔmɛ a mi. Nyɛɛ kane 2 Timoteo 3:1-5 ɔ, nɛ nyɛ susu sane bimi nɛ ɔ he:
Anɛ o na kaa nihi ngɛ su nɛ ɔmɛ kpo jee mwɔnɛ ɔ lo?
6. E sa kaa Mawu Matsɛ Yemi ɔ nɛ ngɛ nɔ yee ɔ nɛ wo wɔ he wami nɛ waa pee ní komɛ
Nyɛɛ kane Mateo 24:3, 14 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni ní tsumi nɛ́ he hia lɛ ngɛ nɔ yae nɛ́ tsɔɔ kaa Mawu Matsɛ Yemi ɔ ngɛ nɔ yee?
Mɛni o maa pee konɛ mo hu o tsu ní tsumi nɛ ɔ eko?
Amlɔ nɛ ɔ, Mawu Matsɛ Yemi ɔ ngɛ nɔ yee, nɛ e be kɛe nɛ e ma bɔni zugba a tsuo nɔ yemi. Nyɛɛ kane Hebri Bi 10:24, 25 ɔ, nɛ nyɛ susu sane bimi nɛ ɔ he:
Mɛni nɛ e sa kaa wa kpɛti nɔ fɛɛ nɔ nɛ e pee be mi nɛ wa na kaa “ligbi ɔ ngɛ sue ɔ”?
Ke o kase nɔ́ ko nɛ o le kaa e ma nyɛ maa ye bua nihi, nɛ e ma he a yi wami ɔ, mɛni o maa pee?
NƆ KO MA BI KE: “Mɛni he je nɛ Yehowa Odasefohi pɔɔ jeha 1914 ɔ he munyu tumi wawɛɛ ɔ?”
Ke nɔ ko bi jã a, mɛni o ma de?
NYA MWƆMI
Baiblo gbamihi, be he akɔtaa bumi, kɛ níhi nɛ ngɛ nɔ yae ɔ tsɔɔ kaa Mawu Matsɛ Yemi ɔ ngɛ nɔ yee. Ke wa fiɛɛɔ Mawu Matsɛ Yemi ɔ he sane kpakpa a, nɛ wa yaa asafo mi kpehi ɔ, wa ngɛ tsɔɔe kaa wa he enɛ ɔ ye.
Mi Nylɔmi
Mɛni lɛ ya nɔ benɛ jeha kpaago aloo be kpaago nɛ a tu he munyu ngɛ Daniel womi ɔ mi ɔ ba nyagbe ɔ?
Mɛni lɛ ha nɛ o ná nɔ mi mami kaa Mawu Matsɛ Yemi ɔ bɔni nɔ yemi kɛ je jeha 1914 ɔ?
Mɛni o maa pee kɛ tsɔɔ kaa o he ye kaa Mawu Matsɛ Yemi ɔ ngɛ nɔ yee amlɔ nɛ ɔ?
NÍ KPAHI NƐ MAA YE BUA MO
Moo hyɛ níhi nɛ yi nɔ sane ngmali kɛ ni kpahi de kɛ kɔ tsakemihi nɛ ya nɔ ngɛ je ɔ mi kɛ je jeha 1914 ɔ he.
“Be Nɛ Adesahi A Je Mi Bami Bɔni Puɛmi Wawɛɛ” (O Hɛ Nɛ Tsɛ̃!, April 2007)
Moo kane bɔ nɛ gbami nɛ ngɛ Mateo 24:14 ɔ ná nyumu ko nɔ he wami ha.
Kɛ wa plɛ kɛ le kaa gbami nɛ a tu he munyu ngɛ Daniel yi 4 ɔ kɔɔ Mawu Matsɛ Yemi he ha kɛɛ?
“Mɛni Be Nɛ Mawu Matsɛ Yemi ɔ Bɔni Nɔ Yemi? (Fã 1)” (Hwɔɔmi Mɔ, October 1, 2014)
Mɛni lɛ tsɔɔ kaa “jeha kpaago” aloo be kpaago nɛ Daniel yi 4 ɔ tu he munyu ɔ ba nyagbe ngɛ jeha 1914 ɔ?
“Mɛni Be Nɛ Mawu Matsɛ Yemi ɔ Bɔni Nɔ Yemi? (Fã 2)” (Hwɔɔmi Mɔ, November 1, 2014)
a Moo hyɛ nyagbe munyuhi enyɔ nɛ ngɛ Ní Kpahi Nɛ Maa Ye Bua Mo blɔ he ɔ nɛ́ e ngɛ ní kasemi nɛ ɔ mi ɔ.
-
-
Nɔ́ Nɛ Mawu Matsɛ Yemi ɔ Ma TsuO Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
-
-
NÍ KASEMI 33
Nɔ́ Nɛ Mawu Matsɛ Yemi ɔ Ma Tsu
Amlɔ nɛ ɔ, Mawu Matsɛ Yemi ɔ ngɛ nɔ yee ngɛ hiɔwe. E be kɛe nɛ́ e maa ye zugba a nɔ, nɛ e ma ha nɛ si himi ngɛ zugba a nɔ ɔ maa pee kpakpa. Ha nɛ waa hyɛ ní komɛ nɛ Matsɛ Yemi ɔ ma tsu.
1. Ngɛ mɛni blɔ nɔ nɛ Mawu Matsɛ Yemi ɔ ma ha nɛ tue mi jɔmi kɛ dami sane yemi maa ba zugba a nɔ?
Yesu nɛ e ji Mawu Matsɛ Yemi ɔ nya Matsɛ ɔ ma kpata yiwutsotsɛmɛ, kɛ adesa nɔ yemihi tsuo a hɛ mi ngɛ Harmagedon ta a mi. (Kpo Jemi 16:14, 16) Jamɛ a be ɔ mi ɔ, Baiblo ɔ mi si womi nɛ nyɛɛ se nɛ ɔ maa ba mi. Lɔ ɔ ji: “E piɛ bɔɔ nɛ o be yayami peeli nae hu.” (La 37:10) Yesu maa gu Matsɛ Yemi nɛ ɔ nɔ kɛ ha nɛ tue mi jɔmi kɛ dami sane yemi nɛ hi zugba a nɔ he fɛɛ he.—Kane Yesaya 11:4.
2. Ke a ngɛ Mawu suɔmi nya ní pee ngɛ zugba a nɔ ɔ, kɛ si himi ɔ maa hi ha kɛɛ?
Ngɛ Mawu Matsɛ Yemi ɔ sisi ɔ, “nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.” (La 37:29) Moo po he foni kaa o ngɛ je ko nɛ nihi tsuo peeɔ nɔ́ nɛ da, nɛ́ a suɔ Yehowa kɛ a sibi ɔ mi! Nɔ ko nɔ ko be hiɔ nue hu, nɛ nɔ fɛɛ nɔ maa hi si kɛ maa ya neneene.
3. Ke a kpata yayami peeli a hɛ mi se ɔ, mɛni Mawu Matsɛ Yemi ɔ ma tsu?
Ke a kpata yayami peeli a hɛ mi se ɔ, Yesu maa ye nɔ kaa Matsɛ jeha 1,000. Jamɛ a be ɔ mi ɔ, Yesu kɛ nihi 144,000 nɛ a maa piɛɛ e he kɛ ye nɔ ɔ maa ye bua nihi nɛ a ngɛ zugba a nɔ ɔ konɛ a pee nihi nɛ a ye mluku nɛ yayami ko be a he. Ngɛ jeha akpe ɔ nyagbe ɔ, zugba a maa pee paradeiso, nɛ nihi nɛ a ngɛ zugba a nɔ ɔ a bua maa jɔ ejakaa a ngɛ Yehowa mlaa amɛ a nɔ yee. Lɔ ɔ se ɔ, Yesu maa ngɔ Matsɛ Yemi ɔ kɛ ha Yehowa nɛ ji e Tsɛ ɔ ekohu. A ma “tsɔ” Yehowa “biɛ ɔ he” ngɛ blɔ nɛ pe kulaa nɔ. (Mateo 6:9, 10) Jamɛ a be ɔ mi ɔ, e maa pee heii kaa Yehowa ji Nɔ Yelɔ kpakpa nɛ́ e susuɔ e sisi bimɛ a he. Lɔ ɔ se ɔ, Yehowa ma kpata Satan, daimonio ɔmɛ, kɛ nihi tsuo nɛ a teɔ si kɛ woɔ Yehowa nɔ yemi ɔ a hɛ mi. (Kpo Jemi 20:7-10) Si himi kpakpa nɛ Mawu Matsɛ Yemi ɔ maa ngɔ kɛ ba a maa hi si kɛ maa ya neneene.
MOO KASE BABAUU
Moo kase nɔ́ he je nɛ wa ma nyɛ ma ná nɔ mi mami kaa Mawu maa gu e Matsɛ Yemi ɔ nɔ kɛ ha nɛ e si womihi tsuo nɛ ngɛ Baiblo ɔ mi ɔ maa ba mi hwɔɔ se ɔ he ní.
4. Mawu ma ha nɛ adesahi a nɔ yemihi tsuo se maa po
Baiblo ɔ tsɔɔ kaa: ‘Ni komɛ ngɔɔ blɔ nya nɛ a ná a kɛ yeɔ a nyɛmimɛ awi.’ (Fiɛlɔ 8:9) Yehowa maa gu e Matsɛ Yemi ɔ nɔ kɛ ma ha nɛ dami sane nɛ a yi nɛ ɔ se maa po.
Nyɛɛ kane Daniel 2:44 kɛ 2 Tɛsalonika Bi 1:6-8 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni nɛ Yehowa kɛ e Bi Yesu maa pee adesa nɔ yeli kɛ nihi tsuo nɛ a fĩɔ a se ɔ?
Kɛ nɔ́ nɛ o kase ngɛ Yehowa kɛ Yesu he ɔ ha nɛ o na kaa a maa ye dami sane ngɛ nɔ́ nɛ a maa pee ɔ mi ha kɛɛ?
5. Yesu ji Matsɛ nɛ se be
Yesu nɛ e ji Mawu Matsɛ Yemi ɔ nya Matsɛ ɔ maa pee níhi fuu kɛ ha nihi nɛ a maa hi zugba a nɔ ɔ. Mo je VIDEO ɔ, nɛ o hyɛ bɔ nɛ níhi nɛ Yesu pee ɔ tsɔɔ kaa e suɔ nɛ e ye bua nihi ha. Jehanɛ se hu ɔ, o maa na kaa Mawu ha lɛ he wami konɛ e kɛ pee jã.
Níhi nɛ Yesu pee benɛ e ngɛ zugba a nɔ ɔ tsɔɔ níhi nɛ Matsɛ Yemi ɔ ma tsu hwɔɔ se. Jɔɔmihi nɛ nyɛɛ se nɛ ɔmɛ a kpɛti te nɛɛ lɛ o ngɛ blɔ hyɛe wawɛɛ? Nyɛɛ kane ngmamihi nɛ a tsɛ se nɛ́ a tu jɔɔmi nɛ ɔmɛ a he munyu ngɛ mi ɔ.
BENƐ YESU NGƐ ZUGBA A NƆ Ɔ . . .
AMLƆ NƐ Ɔ NƐ YESU NGƐ HIƆWE Ɔ, E MA . . .
e kudɔ adebɔ níhi.—Maako 4:36-41.
dla níhi tsuo nɛ a puɛ ngɛ zugba a nɔ ɔ.—Yesaya 35:1, 2.
e ha nimli akpehi abɔ niye ní ngɛ nyakpɛ blɔ nɔ.—Mateo 14:17-21.
ha nɛ hwɔ se maa po ngɛ je ɔ mi tsuo.—La 72:16.
e tsa nihi babauu.—Luka 18:35-43.
ha nɛ nɔ fɛɛ nɔ ma ná nɔmlɔ tso mi he wami kpakpa.—Yesaya 33:24.
e tle nihi nɛ a gbo ɔ si kɛ ba wami mi.—Luka 8:49-55.
je nyagba nɛ gbenɔ ngɔ kɛ ba a tsuo kɛ je.—Kpo Jemi 21:3, 4.
6. Mawu Matsɛ Yemi ɔ maa ngɔ si himi kpakpa kɛ ba hwɔɔ se
Matsɛ Yemi ɔ ma ha nɛ yi mi nɛ Yehowa to kɛ ha adesahi ɔ maa ba mi. A maa hi si kɛ ya neneene ngɛ paradeiso zugba a nɔ. Mo je VIDEO ɔ, nɛ o hyɛ bɔ nɛ Yehowa gu e Bi Yesu nɔ kɛ ngɛ ní tsue ha konɛ e yi mi tomi ɔ nɛ ba mi.
Nyɛɛ kane La 37:4 ɔ, nɛ nyɛ susu sane bimi nɛ ɔ he:
Kɛ lemi nɛ o ba le kaa Yehowa “ma ha mo níhi nɛ o tsui suɔ” ɔ haa nɛ o nuɔ he ha kɛɛ?
NI KOMƐ DEƆ KE: “Ke wɔ tsuo wa pee kake ɔ, wa ma nyɛ ma tsu nyagbahi nɛ ngɛ je ɔ mi ɔ he ní.”
Mɛni nyagbahi nɛ adesa nɔ yemihi nyɛ we nɛ a tsu he ní se Mawu Matsɛ Yemi ɔ lɛɛ e ma tsu a he ní?
NYA MWƆMI
Mawu Matsɛ Yemi ɔ ma ha nɛ Mawu yi mi tomi ɔmɛ maa ba mi. E ma ha nɛ zugba a maa pee paradeiso, nɛ nihi nɛ a ma sɔmɔ Yehowa a maa hi nɔ kɛ maa ya neneene.
Mi Nylɔmi
Mɛni blɔ nɔ Mawu Matsɛ Yemi ɔ maa gu kɛ ha nɛ Yehowa biɛ ɔ he nɛ tsɔ?
Mɛni he je nɛ wa ma nyɛ ma he ye kaa Mawu Matsɛ Yemi ɔ ma ha nɛ si womihi nɛ ngɛ Baiblo ɔ mi ɔ maa ba mi ɔ?
Ní kpakpahi nɛ Mawu Matsɛ Yemi ɔ ma tsu ɔ, a kpɛti te nɛɛ nɛ o ngɛ blɔ hyɛe wawɛɛ?
NÍ KPAHI NƐ MAA YE BUA MO
Moo hyɛ nɔ́ nɛ Harmagedon tsɔɔ.
Moo hyɛ níhi nɛ maa ya nɔ ngɛ “amanehlu ngua“ a nɛ Yesu tu he munyu ɔ mi.—Mateo 24:21.
Moo hyɛ bɔ nɛ wekuhi ma nyɛ ma bla kɛ susu jɔɔmihi nɛ Mawu Matsɛ Yemi ɔ kɛ maa ba hwɔɔ se ɔ he ha.
Moo kane munyu nɛ e yi ji, “I Bi Ye He Sanehi Fuu” ɔ, nɛ o hyɛ bɔ nɛ nyumu ko nɛ e tsɔɔ atuã kɛ siɔ ma kudɔmi blɔ nya tomihi ɔ na nɔ́ nɛ e ngɛ hlae ɔ.
“Baiblo ɔ Tsakeɔ Nihi A Si Himi” (Hwɔɔmi Mɔ, January 1, 2012)
-