Mɛni He Je Nɛ Nihi Sɔleɔ?

Anɛ o sɔleɔ daa lo? Nihi fuu sɔleɔ daa. Ni nɛmɛ nɛ a he we yi kaa Mawu ngɛ ɔ po sɔleɔ. Mɛni he je nɛ nihi sɔleɔ ɔ? Ngɛ France ɔ, akɔtaa bumi ko tsɔɔ kaa be komɛ ɔ, France bi fuu sɔleɔ aloo a pueɔ a yi mi tɛ ngɛ níhi a he “bɔ nɛ pee nɛ a tsui nɛ nɔ a mi kɛkɛ.” A peeɔ a ní kaa bɔ nɛ Europa bi hu peeɔ a ní ɔ. Pi Mawu jami he je nɛ a sɔleɔ ngɛ, mohu ɔ, a sɔleɔ kɛ “woɔ a bua kɛkɛ.” Ngɛ Mawu jali komɛ hu a blɔ fa mi ɔ, ja nɔ́ ko he hia mɛ pɛ loko a sɔleɔ, nɛ ke a sɔle hu ɔ, a suɔ nɛ Mawu nɛ ha mɛ heto amlɔ nɔuu.​—Yesaya 26:16.

Mo hu nɛɛ? Anɛ o susu kaa sɔlemi ji nɔ́ ko nɛ haa nɛ nɔ susuɔ níhi a he saminya kɛkɛ lo? Ke o he ye kaa Mawu ngɛ ɔ, anɛ ke o sɔle ɔ, e haa o sɔlemi ɔ heto lo? Aloo anɛ e peeɔ mo kaa Mawu ha we o sɔlemihi a heto lo? Baiblo ɔ ma nyɛ maa ye bua mo konɛ o na sɔlemi kaa e ji blɔ kpakpa nɛ ma ha nɛ o hɛ mo kɛ su Mawu he, se pi nɔ́ ko nɛ a peeɔ nɛ haa nɔ náa bua jɔmi kɛkɛ.