Mɛni Okpɔngɔ Nɔ Hili Eywiɛ Ɔmɛ Tsɔɔ Mo?

Baiblo ɔ tu okpɔngɔhi eywiɛ kɛ a nɔ hili a he munyu. Bɔ nɛ Baiblo ɔ tu a he munyu ha a ngɛ heii nitsɛ, nɛ e sisi numi hu yi! A hɛɛ fo kɛ bee, nɛ a nane si ngɛ pɛe. Okpɔngɔ hiɔ nɛ sɛ hlami​—e nɔ hilɔ ɔ ji kunimi yelɔ kɛ matsɛ he nɛ a ha lɛ jlasi. Okpɔngɔ enyɔne nɛ nyɛɛ se ɔ tsuɔ, nɛ e nɔ hilɔ ɔ je tue mi jɔmi kɛ je zugba a tsuo nɔ. Lɔ ɔ se ɔ, okpɔngɔ yumu hu ba be, e nɔ hilɔ ɔ hɛɛ sɛni ngɛ e dɛ mi kɛ tsɔɔ hwɔ nɛ maa ba zugba a nɔ. Okpɔngɔ eywiɛne ɔ ji okpɔngɔ lazulazu ko nɛ peeɔ gbenɔ hiɔhi kɛ oslaahi a he okadi. Nɔ nɛ hii si ngɛ okpɔngɔ lazulazu nɛ ɔ nɔ ɔ ji Gbenɔ. Gbeje nyɛɛ e se haa, nɛ e ngɛ nihi nɛ gbenɔ kpata a hɛ mi ɔ tsuo a nya buae!​—Kpojemi 6:1-8.

“Kekleekle ligbi nɛ i kane okpɔngɔ nɔ hili eywiɛ nɛ ɔmɛ a he sane ɔ, i ye gbeye wawɛɛ. I susu kaa Kojomi Ligbi ɔ ma nɔuu, nɛ akɛnɛ i pee we klaalo he je ɔ, a ma kpata ye hɛ mi.”​—Crystal.

“Ye bua jɔ okpɔngɔ nɔ hili slɔɔto ɔmɛ nɛ a hii si ngɛ okpɔngɔ ekpaekpahi a nɔ ɔ a sane ɔ he. Benɛ i ba le nɔ́ nɛ nina nɛ ɔ tsɔɔ ɔ, i na kaa sisi numi ngɛ he.”​—Ed.

Benɛ Crystal kɛ Ed tsuo kane Okpɔngɔ nɔ hili eywiɛ ɔmɛ a he ní ngɛ Kpojemi womi ɔ mi ɔ, anɛ a ye gbeye loo a bua jɔ he? Mo hu nɛɛ? Si fɔfɔɛ enyɔ nɛ ɔ tsɔɔ kaa okpɔngɔ nɔ hili ɔmɛ a he sane ɔ piɛɛ níhi nɛ Kpojemi womi ɔ tu a he munyu nɛ nihi le wawɛɛ ɔ a he. Anɛ o le kaa ke o nu nina nɛ ɔ sisi ɔ, o ma nyɛ ma ná he se lo? Ngɛ mɛni blɔ nɔ? Mawu wo si kaa ke o kane níhi nɛ a ngma ngɛ gbami womi nɛ ɔ mi, nɛ o kɛ níhi nɛ o kase ngɛ mi ɔ tsu ní ɔ, o ma nyɛ ma ná bua jɔmi nitsɛnitsɛ.​—Kpojemi 1:1-3.

Ke ni komɛ kane nina nɛ kɔɔ okpɔngɔ nɔ hili eywiɛ ɔmɛ a he ɔ, e woɔ a he gbeye, se pi lɔ ɔ ji yi mi tomi nɛ a kɛ ngma. Ngɛ anɔkuale mi ɔ, nihi babauu yɔse kaa nina nɛ ɔ ha nɛ a hemi kɛ yemi mi wa, nɛ a ná hwɔɔ se he hɛ nɔ kami kpakpa. Mo hu o ma nyɛ ma ná he se! Wa kpa mo pɛɛ nɛ o tsa ní kanemi ɔ nɔ.