Ke O Pee O Si Himi Kpokploo ɔ, O Ma Ná Bua Jɔmi

DANIEL KƐ MIRIAM sɛ gba si himi mi ngɛ September 2000 ɔ mi, nɛ a ya hi Barcelona ngɛ Spain. Daniel de ke: “Wa ma nyɛ ma de ke wa si himi ɔ hi bɔ nɛ sa. Ní tsumi nɛ wa tsuɔ ɔ he je ɔ, wa ngɛ sika nɛ wa nyɛɔ yeɔ ní ngɛ ní yemi he kpakpahi, wa hiaa blɔ kɛ yaa ma se, nɛ wa woɔ tade kpakpahi. Wa yaa fiɛɛmi daa hulɔ.” Se nɔ́ ko ya nɔ nɛ e ha nɛ a si himi ɔ tsake.

A tu munyu ko ngɛ kpokpa nɔ kpe ko nɛ a pee ngɛ jeha 2006 mi ɔ sisi, nɛ munyu ɔ wo Daniel he wami, enɛ ɔ he ɔ e bi e he ke: “Anɛ wa ngɛ nɔ́ nɛ wa ma nyɛ tsuo pee konɛ wa kɛ ye bua nihi nɛ a ‘gbla mɛ kɛ yaa nɛ a ya gbe mɛ’ ɔ konɛ a ba nyɛɛ wami blɔ ɔ nɔ lo?” (Abɛ 24:11) Munyu nɛ a tu ɔ ma nɔ mi kaa e ji wa blɔ nya ní tsumi kaa wa ma ha nɛ nihi nɛ a le Baiblo ɔ mi sɛ gbi nɛ haa nɔ wami ɔ. (Níts. 20:26, 27) Daniel de ke, “E pee mi kaa imi lɛ Yehowa kɛ ngɛ munyu tue ɔ nɛ.” Munyu ɔ ma nɔ mi hu kaa ke nɔ ko bli e sɔmɔmi ní tsumi ɔ mi ɔ, e bua jɔɔ. Daniel le kaa munyu nɛ ɔ ji anɔkuale, ejakaa e yo Miriam nɛ ngɛ sɔmɔe kaa blɔ gbalɔ ɔ ngɛ bua jɔmi.

Daniel de ke, “I yɔse kaa be su nɛ e sa kaa ma tsake ye si himi kulaa.” Nɛ e pee jã hulɔ. E gbɔ be nɛ e kɛ tsuɔ ní ɔ nɔ, e je blɔ gbami sisi, nɛ e bɔni jɔɔmi nɛ e kɛ Miriam ma ná ke ji a ya ngɛ sɔmɔe ngɛ he nɛ Matsɛ Yemi fiɛɛli fuu a he hia ngɛ ɔ he foni pomi ngɛ e juɛmi mi.

SISIJE Ɔ, WAA KƐ HAOMIHI KPE, SE PEE SE Ɔ, WA NU BUA JƆMI SANE KO

Ngɛ May 2007 ɔ mi ɔ, Daniel kɛ Miriam kpa a ní tsumi ɔ, nɛ a je kɛ ho Panama nɛ ji ma nɛ a ya slaa lejɛ ɔ hyɛ ɔ mi ya. Zugba kpɔ ehe nɛ a ha mɛ ɔ ji zugba kpɔhi nɛ wo bɔle mɛ nɛ a ngɛ Bocas del Toro Archipelago nɛ ngɛ Caribbean Wo ɔ nɔ. Nihi nɛ a ngɛ lejɛ ɔ a kpɛti nihi fuu ji nihi nɛ a tuɔ Ngabe gbi. Daniel kɛ Miriam susu kaa sika nɛ a to si ɔ ma nyɛ maa su mɛ kɛ Panama himi maa pee nyɔhiɔ kpaanyɔ.

A kɛ lɛ kɛ baisikle lɛ hiaa blɔ ngɛ zugba kpɔhi nɛ wo bɔle mɛ ɔ a nɔ. A kaiɔ kekleekle be nɛ a kɛ baisikle po si tomi maa pee 20 kɛ kuɔ yokuhi be mi nɛ pu ngɛ tsoe wawɛɛ ɔ. E piɛ nguɛ nya nɛ Daniel hɛli, ejakaa pɔ tɔ lɛ wawɛɛ. Se kɛ̃ ɔ, Ngabe bi ɔmɛ nɛ a ngɛ jamɛ a blɔ ɔ nɔ ɔ he mɛ atuu, nɛ a pee mɛ nibwɔ, titli ɔ, benɛ Daniel kɛ e yo ɔ kase munyu komɛ ngɛ Ngabe gbi ɔ mi ɔ. E kɛ we kulaa nɛ a ná Baiblo kaseli 23 ngɛ lejɛ ɔ.

Se benɛ Daniel kɛ e yo ɔ a sika a ta a, a bua jɔmi ɔ plɛ pee aywilɛho. Daniel de ke: “Aywilɛho nu wɔ, nɛ wa susu kaa e sa nɛ waa kpale kɛ ho Spain ya. E gba wa nya wawɛɛ kaa wa maa je wa Baiblo kaseli ɔmɛ a he.” Se nyɔhiɔ kake se ɔ, a nine su amaniɛ bɔmi ko nɛ ngɛ bua jɔmi nɔ. Miriam de ke: “A ha wɔ he blɔ kaa wa sɔmɔ kaa blɔ gbali klɛdɛɛ. Wa bua jɔ kaa wa ná he blɔ kaa wa maa hi wa zugba kpɔ ɔ mi nɔuu!”

BUA JƆMI NƐ PE KULAA

Ngɛ jeha 2015 ɔ mi ɔ, asafo ɔ pee tsakemi komɛ, nɛ a tsake Daniel kɛ Miriam a ní tsumi ɔ. A de mɛ ke a sɔmɔ kaa daa blɔ gbali. Jehanɛ ɔ, kɛ a maa pee kɛɛ? A ngɔ a hɛ kɛ fɔ si womi nɛ ngɛ La 37:5 ɔ nɔ. Lejɛ ɔ de ke: ‘Ngɔɔ o he kɛ ha Yehowa; ngɔɔ o hɛ kɛ fɔ e nɔ, nɛ e maa piɛɛ o he.’ A nine su he lo nya ní tsumi ko nɛ ma nyɛ maa ye bua mɛ konɛ a tsu a blɔ gbami ní tsumi ɔ nɔ, nɛ amlɔ nɛ ɔ a ngɛ sɔmɔe ngɛ asafo ko mi ngɛ Veraguas ngɛ Panama.

Daniel de ke: “Loko wa maa je Spain a, wa he we yi kaa wa ma nyɛ maa pee wa si himi kpokploo. Mwɔnɛ ɔ, wa nyɛ ngɛ jã pee, nɛ níhi nɛ a he hia wawɛɛ ngɛ si himi mi hu ɔ, wa nine suɔ nɔ. Mɛni lɛ haa nɛ a bua jɔɔ wawɛɛ? A de ke, “Ke wa ye bua he si bali nɛ a ba le Yehowa a, bua jɔmi nɛ wa náa a hí kalemi!”