“Wa Ná Kã Kɛ Bua Jɔmi Kulaa Pe Kekle ɔ”

SOHA mɔtu ko ngɛ September 1922 ɔ mi ɔ, je ɔ mi bɔni la dɔmi bɔɔbɔɔbɔɔ, nɛ nihi 8,000 bua a he nya ngɛ asa ngua ko nɔ. Sɛ nɔ hilɔ ɔ fia adafi kaa fã nɛ wa su ɔ he hia wawɛɛ, enɛ ɔ he ɔ, ke nɔ ko suɔ nɛ e je ɔ, e ma nyɛ maa pee jã, se e be nyɛe maa kpale ba sɛ mi ekohu.

A la “Yi Jemi Lahi” kɛ je sisi, nɛ lɔ ɔ se ɔ, Joseph F. Rutherford ba da munyu tumi okplɔɔ ɔ se. Tue buli ɔmɛ a kpɛti nihi fuu hii si dii kɛ ngɛ nɔ́ nɛ e ma de ɔ blɔ hyɛe. Se a kpɛti nihi bɔɔ ngɛ nyɛɛe kɛ ngɛ yae kɛ ngɛ bae kɛ a he latsa. Munyu tulɔ ɔ kpa mɛ pɛɛ kaa mɛ tsuo a hla he ko nɛ a hi, nɛ a bu lɛ tue. Benɛ e je munyu ɔ sisi ɔ, nihi to he hɛ kaa a koklo bo ngua ko saminyayoo nɛ e kplaa si ngɛ hiɔwe.

Nyɛminyumu Rutherford tu munyu ko nɛ e yi ji “The kingdom of heaven is at hand” (Hiɔwe matsɛ yemi ɔ su si ta). Maa pee kaa ngmlɛfia kake kɛ fã a, nɔ́ nɛ a ngɛ nue pɛ ji Nyɛminyumu Rutherford gbi nɛ ngɛ pɛe wawɛɛ, nɛ lɔ ɔ ha nɛ lejɛ ɔ tsuo ngɛ mimiɛe. Jamɛ a be ɔ, e ngɛ bɔ nɛ gbali nɛ a hi si blema a kɛ kã fiɛɛ Matsɛ Yemi nɛ ma a he munyu tue. Kɛ yaa e munyu ɔ nyagbe ɔ, e bi si ke, “Anɛ nyɛ he ye kaa Matsɛ nɛ e hɛ mi ngɛ nyami ɔ bɔni nɔ yemi lo?” Tue buli ɔmɛ he nɔ kɛ gbi nɛ he wa ke: “Ee!”

Nyɛminyumu Rutherford kɛ gbi nɛ he wa de ke, “Ke jã a, lɛɛ nyɛɛ kpale kɛ sɛ ngmɔ ɔ mi, nyɛ nɛ nyɛ ji Mawu hiɔwe no ɔ bimɛ! Nyɛɛ hyɛ, Matsɛ ɔ ngɛ nɔ yee! Nyɛ ji e gɔgɔ fiali. Enɛ ɔ he ɔ, nyɛɛ fia, nyɛɛ fia, nyɛɛ fia Matsɛ ɔ kɛ e Matsɛ Yemi ɔ he gɔgɔ.”

Benɛ e de jã pɛ ɔ, a pɛne bo ɔ blɛuu, nɛ munyu nɛ ngɛ nɔ ji: “Nyɛɛ fia Matsɛ ɔ kɛ e matsɛ yemi ɔ he gɔgɔ.”

Ray Bopp de ke: “Tue buli ɔmɛ tsuo a bua jɔ hluu nɛ a li bɔ nɛ a maa pee ha.” Anna Gardner tsɔɔ kaa “dade tso ɔmɛ nɛ a kɛ bli tsu ɔ bɔni mimiɛmi benɛ a ngɛ a dɛ mi gbɔe ɔ.” Fred Twarosh de ke, “Tue buli ɔmɛ tsuo te da si fiee.” Evangelos Scouffas hu de ke, “E ngɛ kaa nɔ́ nɛ he wami ko nɛ nya wa hue wa nɔ kɛ je wa sɛ ɔmɛ a nɔ, nɛ wa te da si, nɛ wa hɛngmɛ nɔ da vo nyu.”

Nihi fuu nɛ a ba kpe ɔ bɔni Matsɛ Yemi ɔ he sane kpakpa a fiɛɛmi momo. Se kɛ̃ ɔ, a na yi mi tomi ehe nɛ lɔ ɔ he je ɔ, e sa nɛ a kɛ kã nɛ fiɛɛ. Ethel Bennecoff tsɔɔ kaa be nɛ Baiblo Kaseli ɔmɛ maa je ɔ, ‘a ná kã kɛ bua jɔmi kulaa pe kekle ɔ.’ Benɛ nyɛmiyo ko nɛ a tsɛɛ lɛ ke Odessa Tuck nɛ e ye jeha 18 jamɛ a be ɔ maa je kpe ɔ sisi ɔ, e fia e pɛɛ si kaa e maa ngɔ e he kɛ ha ngɛ nine fɔmi nɛ a kɛ ha ke “Mɛnɔ maa ya?” a he je. E de ke: “Jamɛ a be ɔ, i li he nɛ ma ya, aloo nɔ́ nɛ ma ya pee, aloo bɔ nɛ ma pee lɛ ha. Se nɔ́ kake pɛ nɛ i le ji kaa i suɔ nɛ ma pee ye ní kaa Yesaya. Yesaya de ke, ‘I ngɛ hiɛ ɔ! Moo tsɔ mi!’” (Yes. 6:8) Ralph Leffler de ke, “Jamɛ a ligbi ɔ nɛ a je Matsɛ Yemi ɔ he gɔgɔ fiami ɔ sisi nitsɛnitsɛ, nɛ amlɔ nɛ ɔ, e kpe je ɔ mi tsuo.”

E be nyakpɛ kaa kpe nɛ a pee ngɛ jeha 1922 ɔ mi ngɛ Cedar Point, ngɛ Ohio ɔ ba pee nɔ́ titli ko ngɛ wa teokrase yi nɔ sanehi a mi! George Gangas de ke, “Jamɛ a kpe ɔ ha nɛ i ba yɔse kaa e sɛ nɛ ma ha kpe ko nɛ be ye yi.” Ngɛ anɔkuale mi ɔ, e kai we kaa kpe ko be ngɛ e yi hyɛ. Julia Wilcox ngma ke: “Be fɛɛ be nɛ a maa tu kpe nɛ wa pee ngɛ Cedar Point ngɛ jeha 1922 ɔ mi ɔ he munyu ngɛ wa womi ɔmɛ a mi ɔ, bua jɔmi nɛ i náa hi kalemi. Be fɛɛ be ɔ, i deɔ ke: ‘Yehowa i naa mo si kaa o ha nɛ i ya kpe nɛ ɔ eko.’”

Eko ɔ, wa kpɛti nihi fuu nɛ wa ngɛ mwɔnɛ ɔ ma kai kpe ko nɛ wa ya nɛ e ha nɛ wa bua jɔ wawɛɛ. E ha nɛ wa ná kã, nɛ wa ná suɔmi kɛ ha wa Mawu Ope ɔ, kɛ e Matsɛ ɔ. Ke wa kai behi kaa jã a, lɔ ɔ haa nɛ wɔ hu wa deɔ ke, “Yehowa i naa mo si kaa o ha nɛ i ya kpe nɛ ɔ eko.”