Anɛ O le Lo?

Mɛni ye bua kaselɔ Steven nɛ e pee kpoo benɛ a ngɛ lɛ yi mi wae ɔ?

A NGƆ Steven kɛ ya da nyumu komɛ a hɛ mi. Nyumu nɛ ɔmɛ ji kojomi he ngua nɛ ngɛ Israel, nɛ a tsɛɛ ke Sanhedrin ɔ mi bi. Kojoli 71 nɛ ɔmɛ ji nyumuhi nɛ a hɛɛ blɔ nya ngua ngɛ ma a mi. Mɛ ji nihi nɛ a kpe ngɛ Osɔfo Nɔkɔtɔma Kayafa we ɔ mi, nyɔhiɔ bɔɔ ko nɛ sɛ hlami loko a bu Yesu gbenɔ fɔ ɔ nɛ. (Mat. 26:57, 59; Níts. 6:8-12) Benɛ a ngɛ lakpa munyuhi poe kɛ ngɛ Steven nɔ fɔe ɔ, a to nɔ́ ko nɛ ngɛ nyakpɛ he hɛ. A na kaa e hɛ mi “pee kaa Mawu bɔfo ko hɛ mi.”​—Níts. 6:13-15.

Mɛni ye bua Steven nɛ e nyɛ to e tsui si benɛ e kɛ si fɔfɔɛ nɛ ngɛ gbeye nɛ ɔ kpe ɔ? Loko a maa nu Steven kɛ ya Sanhedrin ɔ, Mawu mumi ɔ ye bua lɛ nɛ e kɛ e he wo fiɛɛmi ní tsumi ɔ mi wawɛɛ. (Níts. 6:3-7) Benɛ a ngɛ e sane ɔ yee ɔ, Mawu mumi nɛ ɔ nɔuu ye bua lɛ. Mawu mumi ɔ wo e bua, nɛ e kai lɛ níhi. (Yoh. 14:16) Akɛnɛ Steven pee kã he je ɔ, mumi klɔuklɔu ɔ ye bua lɛ nɛ e nyɛ nɛ e kai munyuhi maa pee 20 kɛ je Hebri Ngmami ɔ mi kaa bɔ nɛ a ngma ngɛ Ní Tsumi yi 7 ɔ. (Yoh. 14:26) Benɛ Steven na Yesu nɛ daa si ngɛ Mawu hiɔ nɔ ngɛ nina mi ɔ, nɔ́ nɛ ɔ hu wo e hemi kɛ yemi ɔ mi he wami wawɛɛ.​—Níts. 7:54-56, 59, 60.

Eko ɔ, ligbi ko maa ba nɛ wɔ hu waa kɛ si temi kɛ womi maa kpe. (Yoh. 15:20) Ke wa kase Mawu Munyu ɔ be fɛɛ be, nɛ waa kɛ wa he wo fiɛɛmi ní tsumi ɔ mi ɔ, Yehowa maa ngɔ e mumi ɔ kɛ ye bua wɔ. Wa ma nyɛ ma ná he wami kɛ da si temi kɛ womi nya, nɛ wa bua maa jɔ ngɛ wa mi.​—1 Pet. 4:12-14.