Nɔ He Nɛ Ba Piɛɛ Blɔ Tsɔɔmi Ajla Toli Ɔmɛ A He

SƆ Mɔtu, January 24, 2018 ɔ, a fia adafi klɛdɛɛ ko kɛ ha Betel wekuhi nɛ a ngɛ United States kɛ Canada a kaa: Nyɛminyumu Kenneth Cook, Jr. ba piɛɛ Yehowa Odasefohi A Blɔ Tsɔɔmi Ajla Toli Ɔmɛ a he.

A fɔ Nyɛminyumu Cook ngɛ Pennsylvania ngɛ U.S.A, nɛ lejɛ ɔ nɛ e hi kɛ wa. Benɛ e piɛ bɔɔ nɛ e maa gbe nɔ tsami sukuu nya a, e kase anɔkuale ɔ ngɛ e sukuu bi ɔmɛ a ti nɔ ko ngɔ, nɛ a baptisi lɛ June 7, 1980. Ngɛ September 1, 1982 ɔ mi ɔ, e kɛ e be tsuo bɔni sɔmɔmi kaa daa blɔ gbalɔ. Jeha enyɔ se ɔ, a fɔ lɛ nine kɛ ya Betel, nɛ October 12, 1984 ɔ, e bɔni sɔmɔmi ngɛ Wallkill Betel ɔ ngɛ New York.

Nyɛminyumu Cook kɛ jeha 25 tsu ní tsumi slɔɔtohi ngɛ womi fiami he ɔ kɛ Betel Ɔfisi ɔ. E kɛ Jamie sɛ gba si himi mi ngɛ jeha 1996 mi, nɛ Jamie ya piɛɛ e he ngɛ Wallkill Betel ɔ. Ngɛ December 2009 ɔ mi ɔ, a je Nyɛminyumu kɛ Nyɛmiyo Cook kɛ ya Watchtower Educational Center nɛ ngɛ Patterson ngɛ New York ɔ, nɛ a ha nɛ Nyɛminyumu Cook tsu ní ngɛ Writing Correspondence Department ɔ. Ngɛ April 2016 mi ɔ, Nyɛminyumu kɛ Nyɛmiyo Cook kpale kɛ ho asafo ɔ ní tsumi kɔni ɔ nɛ ngɛ Wallkill ɔ ya be bɔɔ, nɛ lɔ ɔ se ɔ, a je mɛ kɛ ya Brooklyn ngɛ New York. Nyɔhiɔ enuɔ se ɔ, a hia kɛ ho asafo ɔ ní tsumi yi nɛ ngɛ Warwick ngɛ New York ɔ ya. Ngɛ January 2017 ɔ mi ɔ, a hla Nyɛminyumu Cook kaa e ye bua Ajla Toli Nɛ A Hyɛɛ Womihi A Ngmami Nɔ ɔ.