Níhi A Si Kpami

O Mi Mi Nɛ Sã Mo Ngɛ Nihi Tsuo A He

Ligbi ko ɔ, nyɛmiyo ko hyɛ video ko ngɛ jw.org ɔ nɔ. Ngɛ video ɔ mi ɔ, a tsɔɔ kaa Yehowa mi mi sãa lɛ ngɛ wa he, se pi lɔ ɔ pɛ, e peeɔ níhi kɛ tsɔɔ jã hulɔ. (Yes. 63:​7-9) Enɛ ɔ he ɔ, nyɛmiyo ɔ ma e juɛmi nya si kaa e kɛ nɔ́ nɛ e kase ɔ ma tsu ní, nɛ e pee ní pɔtɛɛ komɛ kɛ tsɔɔ kaa e mi mi sãa lɛ ngɛ nihi a he. Pee se ngɛ jamɛ a ligbi ɔ mi ɔ, e kɛ yo ko kpe be mi nɛ e ngɛ ní hee ngɛ tsuapo ko mi. Yo nɛ ɔ hwɔɔ gbɛjegbɛ he be fɛɛ be, ejakaa e be hwɔ he. Nyɛmiyo ɔ de yo ɔ kaa e suɔ nɛ e he niye ní kɛ ha lɛ, nɛ yo ɔ kplɛɛ nɔ. Benɛ nyɛmiyo ɔ ngɔ niye ní ɔ kɛ ya ha yo ɔ, e ye lɛ odase bɔɔ, nɛ e ha lɛ dɛ womi nɛ ji Anɛ Nɔ́ Nami Se Maa Po Ligbi Ko Lo?

Enɛ ɔ ha nɛ yo ɔ bɔni ya fomi, nɛ e de nyɛmiyo ɔ kaa a tsɔse lɛ kaa Odasefo no, se e je anɔkuale ɔ mi jeha babauu ji nɛ ɔ. E tsɔɔ hu kaa lingmi nɛ ɔ, e sɔle wawɛɛ kaa Yehowa nɛ ye bua lɛ nɛ e kpale kɛ ba e ngɔ. Nyɛmiyo ɔ ha yo ɔ Baiblo, nɛ e to blɔ nya kaa e kɛ lɛ maa kase Baiblo ɔ.a

Ke wa mi mi sãa wɔ ngɛ wa weku li kɛ wa nyɛmimɛ Kristofohi kɛ ni kpahi a he ɔ, lɔ ɔ tsɔɔ kaa wa ngɛ Yehowa kasee. Jehanɛ hu ɔ, ke wa pee nɔ́ fɛɛ nɔ́ nɛ wa ma nyɛ nɛ wa fiɛɛ kɛ ha nihi ɔ, lɔ ɔ tsɔɔ kaa wa mi mi sãa wɔ.