Nyɛ Nihi Nɛ Nyɛ Wa Ngɛ Jeha Mi—Nyɛ He Jua Wa Kɛ Ha Asafo ɔ

Eko ɔ, mo hu o ngɛ wae ngɛ jeha mi, nɛ o nyɛ we níhi fuu peemi hu kaa be ko nɛ be ɔ. E ngɛ mi kaa o kɛ anɔkuale yemi ngɛ Yehowa sɔmɔe jehahi babauu ji nɛ ɔ mohu lɛɛ, se akɛnɛ amlɔ nɛ ɔ, o wa ngɛ jeha mi he je ɔ, eko ɔ, o maa susu kaa o bɔɛ o he mɔde. Kaa nɔ hyɛmi nɔ́ ɔ, eko ɔ, o kɛ nɔ́ nɛ o nyɛɔ peeɔ amlɔ nɛ ɔ maa hi níhi nɛ o nyɛ pee be ko nɛ be ɔ he toe nɛ lɔ ɔ ma nyɛ ma ha nɛ o kɔni mi ma jɔ̃. Ke e ba jã a, mɛni ma nyɛ maa ye bua mo kɛ da si fɔfɔɛ ko kaa jã a nya?

NƆ́ NƐ YEHOWA NGƐ BLƆ HYƐE NGƐ O DƐ

Mo bi o he ke, ‘Mɛni Yehowa ngɛ blɔ hyɛe kaa ma pee?’ Munyu nɛ ngɛ 5 Mose 6:5 ɔ ma nyɛ maa wo o bua. Lejɛ ɔ de ke: “Moo suɔ Yehowa o Mawu ɔ kɛ o tsui tsuo, kɛ o klaa tsuo, kɛ o he wami tsuo.”

Kaa bɔ nɛ ngmami ɔ tsɔɔ, Yehowa ngɛ blɔ hyɛe kaa o kɛ o tsui tsuo, o klaa tsuo kɛ o he wami tsuo ma sɔmɔ lɛ. Munyu nɛ ɔ ma nyɛ maa ye bua mo konɛ o ko ngɔ o he kɛ to ni kpahi a he. Jehanɛ hu ɔ, e maa ye bua mo konɛ o ko ngɔ níhi nɛ o nyɛɛɔ peeɔ amlɔ nɛ ɔ kɛ to níhi nɛ o nyɛ pee be ko nɛ be ɔ he.

Mo susu enɛ ɔ he nɛ o hyɛ: Benɛ o ji niheyo loo yiheyo ɔ, o kɛ o nyɛmi tsuo sɔmɔ Yehowa, aloo pi jã? Niinɛ, Yehowa sɔmɔli fuu ma de kaa a ngɔ a nyɛmi tsuo kɛ sɔmɔ lɛ ngɛ a nihe loo a yihe mi. Se jamɛ a be ɔ mi ɔ, nɔ́ nɛ o si fɔfɔɛ ngmɛ mo blɔ nɛ́ o nyɛ pee ji lɔ ɔ nɛ. Amlɔ nɛ ɔ, mɛni lɛ o nyɛ nɛ o ngɛ pee ha Yehowa? Eko ɔ, o ngɛ nɔ́ nɛ o si fɔfɔɛ maa ngmɛ mo blɔ nɛ o pee amlɔ nɛ ɔ pee. Ke o naa níhi jã a, lɛɛ e ma nyɛ maa ye bua mo konɛ o na kaa o ngɛ nɔ́ nɛ o he wami ma nyɛ tsuo pee ngɛ Yehowa sɔmɔmi mi kaa bɔ nɛ o pee be ko nɛ be ɔ nɔuu. O sɔmɔ Yehowa bɔ nɛ o he wami ma nyɛ, nɛ amlɔ nɛ ɔ hu ɔ, o ngɛ lɛ sɔmɔe bɔ nɛ o he wami ma nyɛ.

NI KPAHI MA NYƐ MA NÁ O HE SE WAWƐƐ

Wa susu sane ɔ he ngɛ blɔ nɛ ɔ hu nɔ nɛ waa hyɛ: Amlɔ nɛ ɔ nɛ o wa ngɛ jeha mi ɔ, o ma nyɛ maa hi he blɔhi fuu nɛ o ngɛ nɛ o kɛ maa ye bua ni kpahi ɔ he susue mohu pe nɛ o maa hi níhi nɛ o be nyɛe peemi hu ɔ he susue. Kaa Kristofono nɛ e wa ngɛ jeha mi ɔ, e ngɛ heii kaa amlɔ nɛ ɔ, o ma nyɛ maa pee ní komɛ nɛ benɛ o ji niheyo loo yiheyo ɔ, o nyɛ we peemi. Kaa nɔ hyɛmi nɔ́ ɔ, o ma nyɛ maa pee níhi nɛ nyɛɛ se nɛ ɔmɛ:

Mo de ni kpahi o níhi a si kpamihi. Mo susu Baiblo mi munyuhi nɛ nyɛɛ se nɛ ɔmɛ a he nɛ o hyɛ:

Matsɛ David: “Kɛ je ye nihe mi kɛ ba si ye bwɔmi si nɛ ɔ, i nɛ kaa Mawu kua dalɔ ko gblee, nɛ e bimɛ hu, i nɛ kaa a ngɛ niye ní bae.”—La 37:25.

Yoshua: “Amlɔ nɛ ɔ, nyɛɛ hyɛ, e piɛ bɔɔ nɛ ma gbo, nɛ nyɛ le kɛ nyɛ tsui tsuo kɛ nyɛ klaa tsuo kaa, ní kpakpahi tsuo nɛ Yehowa nyɛ Mawu ɔ wo nyɛ si kaa e maa pee ha nyɛ ɔ, kake ngmelu po be nɛ e bɛ mi. Lɛ tsuo ba mi ha nyɛ pɛpɛɛpɛ. Ekoeko be nɛ bɛ mi.”—Yosh. 23:14.

Eko ɔ, mo hu o tu munyuhi komɛ kaa kikɛ hyɛ. Akɛnɛ David kɛ Yoshua se kɛ ngɛ je mi nɛ a kɛ si fɔfɔɛ slɔɔtohi kpe he je ɔ, a ná níhi a si kpamihi fuu ngɛ a si himi mi. Enɛ ɔ he ɔ, nɔ́ nɛ a de ɔ ma nyɛ ma ná wa nɔ he wami wawɛɛ nitsɛ.

Ke o ngɛ Yehowa sɔmɔe jehahi babauu ji nɛ ɔ, mo hu o ma nyɛ maa tu ní kpakpahi nɛ Yehowa pee kɛ ha mo kɛ ni kpahi ɔ he munyu. Anɛ o kai be ko nɛ Yehowa ye bua e sɔmɔli ngɛ blɔ klɛdɛɛ ko nɔ ɔ lo? Ke o kai nɔ́ ko kaa jã a, o kɛ ni kpahi nɛ sɛɛ he ní faa! Ke o pee jã a, o ma yɔse kaa ni kpahi ma nyɛ ma ná he se wawɛɛ. Jã kɛ̃ nɛ ke ni kpahi ba le bɔ nɛ o kɛ anɔkuale yemi sɔmɔ Yehowa ha a, e ma nyɛ maa wo mɛ he wami wawɛɛ.—Rom. 1:​11, 12.

Blɔ kpa ko nɛ o ma nyɛ maa gu nɔ kɛ wo ni kpahi he wami ji kaa, o maa ya asafo mi kpe ngɛ Matsɛ Yemi Asa a nɔ ke o si fɔfɔɛ maa ngmɛ mo blɔ. Ke o pee jã a, o kɛ nyɛmimɛ ɔmɛ tsuo ma ná he blɔ kɛ wo nyɛ sibi he wami. Connie, nɛ wa tu e he munyu kɛ sɛ hlami ɔ de ke: “Ke i ya asafo mi kpe ɔ, e yeɔ buaa mi nɛ ye kɔni mi jɔ̃ we. Bɔ nɛ nyɛmimɛ ɔmɛ jeɔ suɔmi kpo kɛ tsɔɔ mi ngɛ Matsɛ Yemi Asa a nɔ ha a, woɔ ye bua wawɛɛ. I bɔɔ mɔde kaa ma ke nyɛmimɛ ɔmɛ ní tsɔwitsɔwi komɛ kɛ tsɔɔ kaa ye hɛ sa nɔ́ nɛ a peeɔ kɛ haa mi ɔ. Be fɛɛ be ɔ, i bɔɔ mɔde kaa i kɛ ye he maa wo Mawu jami mi níhi a mi konɛ i kɛ nyɛmimɛ ɔmɛ waa wo wa sibi he wami.”

YEHOWA HƐ SA NÍHI TSUO NƐ O PEEƆ KƐ HAA LƐ Ɔ

Baiblo ɔ tu ni komɛ nɛ a si fɔfɔɛ ngmɛ́ mɛ blɔ nɛ a pee babauu kɛ ha Yehowa, se kɛ̃ ɔ, Yehowa je suɔmi kpo kɛ tsɔɔ mɛ ɔ he munyu. Kaa nɔ hyɛmi nɔ́ ɔ, mo susu Simeon nɛ e wa ngɛ jeha mi nɛ e ji Israelno ɔ he nɛ o hyɛ. Benɛ a fɔ Yesu ɔ, jamɛ a be ɔ mi ɔ, e ngɛ wami mi loloolo. Ke Simeon ya sɔlemi we ɔ, atsinyɛ jemi ko be he kaa e naa nihewi nɛ a ngɛ ní tsumi nɛ he hia wawɛɛ tsue ngɛ lejɛ ɔ. Se Simeon nitsɛ hu nɛɛ? Ngɛ e susumi nya a, eko ɔ, e maa pee lɛ kaa e wa ngɛ jeha mi nɛ lɔ ɔ he ɔ, e be nyɛe ma sɔmɔ Yehowa kaa bɔ nɛ nihewi ɔmɛ ngɛ pee ɔ. Se Yehowa lɛɛ, e nɛ lɛ jã. E na Simeon kaa “dalɔ ji lɛ, nɛ e yeɔ Mawu gbeye,” nɛ e jɔɔ Simeon kɛ gu he blɔ nɛ e ná kaa e maa na Yesu ɔ nɔ. Yehowa gu Simeon nɔ po kɛ gba kaa Yesu ji nɔ nɛ e ma ba pee Mesia a nɛ! (Luka 2:​25-35) E ngɛ heii kaa, Yehowa kɛ e juɛmi ma we Simeon nɔmlɔ tso nɛ gbɔjɔ ɔ nɔ, mohu ɔ, e na lɛ kaa nɔ ko nɛ e hemi kɛ yemi mi wa, “nɛ mumi klɔuklɔu ɔ ngɛ e nɔ.”

Mo hu o ma nyɛ ma ná nɔ mi mami kaa, Yehowa kɛ e juɛmi ma we o gbɔjɔmihi a nɔ, mohu ɔ, o he jua wa kɛ ha lɛ ejakaa o yeɔ lɛ anɔkuale. Yehowa lɛɛ, ‘ke nɔ ko suɔ wawɛɛ nɛ e je nɔ́ nɛ e ngɛ ɔ mi kɛ ha se pi nɔ́ nɛ e be ɔ mi ɔ, lɔ ɔ lɛ saa e hɛ mi saminya.’—2 Kor. 8:12.

Enɛ ɔ he ɔ, moo ngɔ o juɛmi kɛ ma nɔ́ nɛ o ma nyɛ maa pee ɔ nɔ. Kaa nɔ hyɛmi nɔ́ ɔ, moo hyɛ fiɛɛmi ní tsumi ɔ fã slɔɔto ɔmɛ a kpɛti nɔ́ nɛ o ma nyɛ ma tsu. Nɛ ke be bɔɔ ko pɛ lɛ o kɛ ma tsu po ɔ, moo pee jã. O ma nyɛ ma tsɛ ni kpahi ngɛ tɛlifoo nɔ nɛ o wo mɛ he wami, aloo o maa ngma he wami womi munyu ko ngɛ kaadi nɔ kɛ mane mɛ. Ke nɔ ko nɛ e kɛ be kɛkɛɛ ngɛ Yehowa sɔmɔe ɔ je suɔmi kpo kɛ tsɔɔ e nyɛmimɛ Kristofohi ɔ, e náa a nɔ he wami wawɛɛ nitsɛ.

Nihi nɛ a wa ngɛ jeha mi ɔ, a kpɛti ni komɛ be nɔmlɔ tso mi he wami kpakpa ko. Moo hyɛ nyɛmiyo ko nɛ e je East Afriaka a níhi a si kpa mi nɛ ngɛ daka nɛ ji, “E Ba Pee Wami Kɛ Ha Lɛ” ɔ.

Mo kai kaa, anɔkuale nɛ o ye jehahi babauu kɛ hemi kɛ yemi nɛ o ngɛ ɔ ma nyɛ maa wo ni kpahi he wami. O pee si fimi he nɔ hyɛmi nɔ́, nɛ o ma nyɛ ma ná nɔ mi mami kaa, ‘Mawu ɔ, pi nɔ nɛ e dɛ ji lɛ nɛ e hɛ maa je o ní tsumi kɛ suɔmi nɛ o je kpo ngɛ e biɛ ɔ he kɛ gu sɔmɔmi nɛ o ngɛ ni klɔuklɔu ɔmɛ sɔmɔe nɛ o ya nɔ nɛ o ngɛ mɛ sɔmɔe ɔ nɔ.’—Heb. 6:10.

MOO BƆ MƆDE KAA O MAA YE BUA NI KPAHI BE FƐƐ BE

Níhi a mi hlami tsɔɔ kaa, nihi fuu nɛ a wa ngɛ jeha mi nɛ a yeɔ buaa ni kpahi be fɛɛ be ɔ náa nɔmlɔ tso mi he wami kpakpa, a susuɔ níhi a he saminya, nɛ a wami se kɛɔ.

Ngɛ anɔkuale mi ɔ, ke o peeɔ ni kpahi kpakpa a, lɔ ɔ be haomihi nɛ o kɛ maa kpe ngɛ o bwɔmi si ɔ tsuo jee kɛ je. Mawu Matsɛ Yemi ɔ pɛ lɛ ma nyɛ ma je nyagbahi nɛ waa kɛ kpeɔ ngɛ wa bwɔmi si, gbenɔ, kɛ yayami nɛ wa ná kɛ je Adam ngɔ ɔ tsuo kɛ je.—Rom. 5:12.

Sɔmɔmi nɛ o sɔmɔɔ Yehowa, nɛ nihi nɛ o yeɔ bua konɛ a ba le lɛ ɔ hu piɛɛ he ɔ, maa wo o hɛ kɛ nɔ fɔmi ɔ mi he wami. Jehanɛ hu ɔ, e ma nyɛ maa ye bua mo ngɛ o nɔmlɔ tso mi he wami nami mi hulɔ. Nyɛ nihi nɛ nyɛ wa ngɛ jeha mi, wa kpa nyɛ pɛɛ nɛ nyɛ ná nɔ mi mami kaa nɔ́ nɛ nyɛ peeɔ ngɛ Mawu jami mi ɔ he jua wa kɛ ha Yehowa. Nɛ asafo ɔ hu bua jɔ nyɛ hemi kɛ yemi he nɔ hyɛmi nɔ́ kpakpa a he.