Anɛ O Kai Lo?
Anɛ o kane munyuhi nɛ a ngɛ jeha nɛ ɔ Hwɔɔmi Mɔ ɔ mi ɔ saminya lo? Ke jã a, lɛɛ hyɛ kaa o ma nyɛ ma ha sane bimi nɛ ɔmɛ a heto lo:
Mɛni he je nɛ wa woɔ Yehowa hɛ mi nyami?
Wa peeɔ jã ejakaa wa buɔ lɛ wawɛɛ nɛ wa suɔ lɛ hulɔ. Jehanɛ hu ɔ, wa woɔ e hɛ mi nyami ejakaa wa suɔ nɛ ni kpahi nɛ a ba le lɛ.—w25.01, bf. 3.
Ke nɔ ko pee wɔ nɔdɔ nɔ́ ko ɔ, mɛni wa maa pee konɛ wa kɛ ke lɛ kɛ je wa tsui mi?
Wa be wa hɛ mae kɛ fɔ bɔ nɛ wa ngɛ he nue haa nɔ, se ke wa ngmɛɛ abofu ɔ he ɔ, e maa ye bua wɔ konɛ waa yu wa he ngɛ nyagbahi nɛ maa je abofu ɔ mi kɛ ba a he.—w25.02, bf. 15-16.
Mɛni he je nɛ wa ma nyɛ ma de ke kaselɔ Maako pee nɔ hyɛmi nɔ́ kpakpa kɛ ha nihewi nɛ a ngɛ asafo ɔ mi ɔ?
Maako je e tsui mi nɛ e kplɛɛ sɔmɔmi ní tsumi nɛ a kɛ wo e dɛ ɔ nɔ. E ngɛ mi kaa si fɔfɔɛ ko nɛ ha nɛ eko ɔ, e kɔni mi ka jɔmi mohu lɛɛ, se Maako ya nɔ nɛ e ngɔ e he kɛ ha faa. E ha nɛ huɛ bɔmi nɛ ngɛ e kɛ Paulo kɛ nyɛmimɛ kpahi nɛ a nane pi si ɔ a kpɛti ɔ mi wa wawɛɛ.—w25.04, bf. 27.
Benɛ Yesu sɔle ke: “I ha nɛ a le o biɛ ɔ,” mɛni e ngɛ tsɔɔe? (Yohane 17:26)
E kaseli ɔmɛ le Mawu biɛ ɔ momo. Se Yesu ha nɛ a le nɔ tutuutu nɛ Mawu ji, e yi mi tomihi, e ní tsumihi, kɛ e suhi.—w25.05, bf. 20-21.
Ke wa peeɔ wa he humi ɔ, mɛni lɔ ɔ ma ha nɛ wa yɔse?
E haa nɛ wa yɔseɔ kaa pi nɔ́ fɛɛ nɔ́ nɛ wa le. Kaa nɔ hyɛmi nɔ́ ɔ, wa li be nɛ nyagbe ɔ maa ba aloo bɔ nɛ Yehowa ma tsu níhi a he ní ha ngɛ jamɛ a be ɔ mi. Jehanɛ hu ɔ, wa ti nɔ ko li nɔ́ nɛ maa ba hwɔɔ se, nɛ wa li bɔ nɛ Yehowa naa wɔ ha tutuutu hulɔ.—w25.06, bf. 15-18.
Mɛni ma nyɛ maa ye bua wɔ konɛ wa ná munyu ko nɛ a ngma ngɛ wa womi ɔmɛ a mi, loo magbɛ nɔ munyu ko nɛ a tu ɔ he se?
Wa ma nyɛ ma bi wa he ke: ‘Mɛni odase ko nɛ a kɛ tsu ní kɛ plɛ tue buli ɔmɛ a yi mi? Anɛ ma nyɛ ma ngɔ nɔ́ he tomi nɔ́ ko nɛ nuɔ tso wawɛɛ kɛ tsu ní ke i ngɛ ní tsɔɔe lo? Mɛnɔmɛ lɛ a bua maa jɔ munyuyi nɛ ɔ he?’—w25.07, bf. 19.
Ke wa susu bɔ nɛ Mawu kɛ David he yayami ke lɛ ha a he ɔ, mɛni wa ma nyɛ maa kase ngɛ mi?
E ngɛ mi kaa David pee yayamihi nɛ hɛdɔ ngɛ he mohu lɛɛ, se benɛ e pia e he kɛ je e tsui mi ɔ, Yehowa kɛ e he tɔmi ke lɛ. (1 Ma. 9:4, 5) Ke Mawu ngɔ nɔ ko he tɔmi kɛ ke lɛ ɔ, e gbla we nɔ ɔ tue ngɛ jamɛ a yayami ɔ he hu.—w25.08, bf. 17.
Ke e he wa ha Baiblo kaselɔ ko kaa e maa nu nɔ́ ko nɛ nyɛ ngɛ kasee ɔ sisi ɔ, mɛni o ma nyɛ maa pee?
Ke o pee nɔ́ fɛɛ nɔ́ nɛ o ma nyɛ nɛ o kɛ Baiblo ɔ tsɔɔ Baiblo kaselɔ ɔ nɔ́ ko nya se loloolo ɔ, e nui sisi ɔ, nyɛ ma nyɛ ma tsa ni kasemi ɔ nɔ konɛ be kpa mi ɔ, o ba tsɔɔ lɛ nya ekohu.—w25.09, bf. 24.
Baiblo ɔ tsɔɔ kaa yayami ngɛ “he wami nɛ sisiɔ nɔ.” (Heb. 3:13) Mɛni enɛ ɔ tsɔɔ?
Yayami ma nyɛ maa sisi wɔ nɛ waa pee ní komɛ nɛ dɛ. Nɛ e ma nyɛ maa sisi wɔ hulɔ nɛ wa yi mi nɛ pee wɔ enyɔɔnyɔ ngɛ suɔmi nɛ Mawu ngɛ kɛ ha wɔ ɔ he.—w25.10, bf. 16.
Mɛni ji ní etɛ komɛ nɛ ma nyɛ maa ye bua wɔ konɛ wa sɔlemi nɛ nu tso?
(1) Wa ma nyɛ ma pue wa yi mi tɛ ngɛ Yehowa su ɔmɛ a he. (2) Wa ma nyɛ ma susu nɔ́ ko nɛ ngɛ wa nya gbae ɔ he nɛ wa de lɛ. Kaa nɔ hyɛmi nɔ́ ɔ, wa ma nyɛ ma de lɛ nɛ e ye bua wɔ nɛ waa ngɔ ni kpahi a he yayami kɛ ke mɛ. (3) E sa nɛ waa to wa tsui si kɛ sɔle. Enɛ ɔ ma ha nɛ waa je wa tsui mi nɛ wa de lɛ bɔ nɛ wa ngɛ he nue ha tutuutu.—w25.10, bf. 19-20.
Mɛni wa ma nyɛ maa pee kɛ ye bua nihi nɛ a wa ngɛ jeha mi ɔ?
Wa ma nyɛ ma ya slaa mɛ loo waa fia mɛ ngɛ tɛlifoo nɔ. Ke a maa ya hiɔ tsami he ɔ, wa ma nyɛ maa piɛɛ a he kɛ ya. Aloo waa kɛ mɛ ma nyɛ ma bla kɛ tsu fiɛɛmi ní tsumi ɔ fã slɔɔto ɔmɛ eko.—w25.11, bf. 6-7.
Mɛni ji ni titli komɛ nɛ haa nɛ Kristofohi a yo kpeemi hɛ mi baa nyami?
A kɛ ma mlaa nɛ kɔɔ yo kpeemi he ɔ tsuɔ ní. A bɔɔ mɔde kaa níhi nɛ maa ya nɔ ngɛ yo kpeemi ɔ kɛ okplɔɔ ngmɛmi ɔ sisi ɔ maa tsɔɔ kaa a ngɛ Mawu mumi ɔ yiblii ɔ kpo jee. A kɛ humi peemi dlaa a he, nɛ a bɔɔ mɔde kaa a ma kua kusumihi nɛ kɛ Baiblo sisi tomi mlaahi kɔ we. Ke nyɛ ngɛ yo kpeemi he blɔ nya toe ɔ, nyɛɛ je nyɛ tsui mi kɛ sɛɛ ní.—w25.12, bf. 21-24.
?