Jaˇliꞈ˗euˬ yaw tsaˬ yaw dawˇ, aˬ joˆ˗ehˇ poˆ mawˇ kʼoꞈ˗euˬ nga?

Yeˬsuˇ shiˇ dzeuˇ naˇ, Ka li zaˬ aˇ maꞈ laꞈ kʼoeˇ neh, mehˬ bahˬ˗eu deuˬ doˆ laˇ meh lehˇ, Jaˇliꞈ laꞈ kʼoeˇ maˬ keuˆ laˇ mi na˗ehˇ ehˇ taˬ˗euˬ meh. (Gʼaˬkʼehˇ 20:29, 30) Gaˇ kawˆ heu ehˇ taˬ˗euˬ loꞈ˗ehˇ pyeuꞈ laˇ˗euˬ meh. Mehˬ bahˬ˗eu deuˬ naˇ, Yeˬsuˇ neh mehˬ˗euˬ loꞈ˗ehˇ maˬ mehˬ ni, laꞈ nyiˇ paw˗euˬ zahˇ jiˇ mehˬ keuˬ˗eu miˇ neh, Ka li zaˬ aˇ kʼawꞈ lehˇ doˆ laˇ˗euˬ meh. (2 Tiˆmoˇseˬ 4:3, 4) Nymˇ iˬ nah Jaˇliꞈ maˇ maˇ ni mehˬ˗eu jeˬ˗ahˇ, nga maꞈ gʼoˆ shaw taˬ maˬ lehˇ, aˬ joˆ˗ehˇ jahˇ neh siˬ duˬ˗eu nga?

Yaw tsaˬ yaw dawˇ jeˬ˗ahˇ, Yeˬhawˇbaˬ pah mehˬ nehˬ˗eu aˇ yamˬ tsaˬ laˇ˗euˬ meh. “Aˇ saˬ saˬ˗eu aˇ yamˬ˗ahˇ, maˇ maˇ ni gʼeh˗eu nui gahˇ byah laˇ tehꞈ˗a” lehˇ, Miˬyehˇ maˬ keuˆ laˇ mi na˗ehˇ ehˇ taˬ˗euˬ meh. (Daˬyeˬlaˇ 12:4 Miˇ shuiꞈ Dawˬ paˇ Jaˇliꞈ) 1870 kʼoꞈ˗ahˇ yaw tsaˬ yaw dawˇ jeˬ˗ahˇ poˆ tseˇ˗eu aˇ muˇ muˇ zaˬ tiˬ muˇ, uˬ duˬ tahˬ nymˇ yaw myaˬ gaˇ mehˬ luꞈ˗eu jeˬ, Jaˇliꞈ nehˬ˗ehˇ maˬ tsaˬ gaˇ ya mawˇ˗euˬ meh. Kʼoeˇ miˇ neh, Jaˇliꞈ maˇ maˇ ni mehˬ˗eu jeˬ˗ahˇ gʼoˆ shaw nya˗eu gʼaˇ duˬ, aˬ yawꞈ maꞈ dahˬ beh˗awˇ poˆ tseˇ˗euˬ meh. Yeˬhawˇbaˬ kʼawꞈ, aˬ yawꞈ maꞈ˗ahˇ guiˬ lahˬ biꞈ nehˬ˗euˬ meh.

Nui ma yaw dawˇ deuˬ, Jaˇliꞈ˗ahˇ yaw duˬ duˬ˗ehˇ pyehˆ tseˇ˗euˬ meh. Gaˇ hu˗euˬ Jaˇliꞈ Dzaw zaˬ deuˬ neh zmˬ yaꞈ˗euˬ, pyehˆ tseˇ jeˬ pyehˆ tseˇ kawˆ˗ahˇ, iˬ nah keuˆ ni nga maꞈ zmˬ luꞈ ma. Aˬ yawꞈ maꞈ Jaˇliꞈ˗euˬ gaˇ kawˆ, aˬ yawꞈ kawˆ aˬ yawꞈ˗ehˇ ja sawˇ˗euˬ meh. Gʼoˆ shaw˗eu yaw shaˬ tsahˇ˗ahˇ tahˬ puˬ ngeh jawˇ, yawˬ deuˆ yawˬ˗ahˇ haw iˇ˗awˇ tsaˬ leˇ naˇ boꞈ doˆ taˬ˗eu meh. Kʼoeˇ naˇ, Jaˇliꞈ aˬ yawꞈ neh paˇ pah mehˬ nehˬ laꞈ˗euˬ miˇ neh, Miˬyehˇ˗euˬ tsawˇ myahˇ hawˇ˗eu Miˬyehˇ Miˇ kʼahˬ gaˇ kawˆ, tsawˇ haˬ zaˬ nehˬ˗ehˇ taꞈ leˇ˗awˇ Miˬyehˇ neh noeˬ taˬ˗euˬ jeˬ, shiˇ dzeuˇ˗euˬ deuˬ˗euˬ gaˇ kawˆ hawˇ˗eu gʼoꞈ dehꞈ laˇ˗eu deuˬ˗euˬ gaˇ kawˆ, heu deuˬ nehˬ˗ehˇ taꞈ leˇ˗eu yaw tsaˬ yaw dawˇ jeˬ˗ahˇ, paˇ ya siˬ nya˗euˬ meh. Aˬ yawꞈ maꞈ neh poˆ tseˇ˗euˬ baˬ da neh, maˬ tsaˬ˗eu zahˇ hawˇ˗eu maˬ tsaˬ˗eu mˇ jeˬ shaˇ kawˆ deuˬ˗ahˇ neh doˆ laˇ nya˗euˬ ma.—Yoˇhaˬ 8:31, 32.

1879 kʼoꞈ˗ahˇ Jaˇliꞈ Dzaw zaˬ deuˬ, tsawˇ haˬ zaˬ˗ahˇ, yaw tsaˬ yaw dawˇ bi siˬ˗eu aˇ yamˬ tsaˬ laˇ ngaˇ lehˇ gʼoˆ shaw˗euˬ meh. Kʼoeˇ ngeh kʼoꞈ˗ahˇ neh naˇ, Loꞈ˗eu nymˇgoˇ Yeˬhawˇbaˬ˗euˬ Miˇ kʼahˬ gaˇ kawˆ tsaꞈ gaˬ˗eu paˇ dmˬ jahˇ doˆ˗euˬ meh. Iˬ nah keuˆ ni jahˇ doˆ luꞈ ma. Nymˇ iˬ nah Jaˇliꞈ˗euˬ yaw tsaˬ yaw dawˇ, miˇ kʼahˬ 240 kʼahˬ˗ahˇ iˇ keuˆ taˬ˗awˇ, tsawˇ jeuˬ˗euˬ dawˬ 750 jeˬ dzehˬ ni biˇ kʼawˬ luꞈ ma. Maˇ maˇ ni gʼeh˗eu zaˬ siˬ nui gahˇ, miˇ tsaˬ kʼoeˇ taˆ nymˇ poˆ loꞈ˗ehˇ, tiˬ jawˇ˗iˬ maˬ jaˆ byah laˇ haw˗aˬ.

• Yeˬsuˇ shiˇ dzeuˇ naˇ, Jaˇliꞈ˗euˬ yaw tsaˬ yaw dawˇ, aˬ jeˬ pyeuꞈ iˇ˗euˬ nga?

• Jaˇliꞈ˗euˬ yaw tsaˬ yaw dawˇ, aˬ joˆ˗ehˇ paˇ poˆ mawˇ kʼoꞈ˗euˬ nga?