Aˬ da aˬ ma deuˬ˗euˬ gʼaˇ duˬ

Nawˇ nawˬ˗euˬ zaˬ˗ahˇ biꞈ nehˬ nya˗eu laꞈ sawˬ deuˬ laꞈ kʼoeˇ neh, muiˬ dzehˬ˗eu aˬ geu jeˬ nga? Zaˬ nawˬ˗euˬ laꞈ kʼoeˇ neh gʼawˬ mya jeˬ˗ahˇ za mawꞈ˗eu meh. Teu naˇ, gʼoeˇ˗eu gaˬ˗eu jeˬ, mehˬ˗eu tsoˆ˗eu jeˬ, loꞈ piˇ haw piˇ˗eu jeˬ, heu deuˬ pyeuꞈ meh. Ehˇ kʼawꞈ, nawˇ siˬ nya ma loˇ, zaˬ deuˬ˗euˬ gʼaˇ duˬ, Yeˬhawˇbaˬ˗ahˇ siˬ nya˗eu jeˬ hawˇ˗eu Jaˇliꞈ˗euˬ yaw tsaˬ yaw dawˇ˗ahˇ siˬ nya˗eu jeˬ taꞈ˗ehˇ muiˬ dzehˬ˗eu laꞈ sawˬ maˬ jaˆ˗a. (Yoˇhaˬ 17:3) Zaˬ siˬ nui gahˇ heu deuˬ naˇ, nawˬ˗euˬ zaˬ yaw nyiˇ ngeh neh Yeˬhawˇbaˬ˗ahˇ gaˬ˗awˇ, nui ma gʼawˇ mawˇ dawˬ tawˆ luꞈ aˬ yawꞈ˗euˬ gaˇ mˇ mawꞈ ni caw ba nehˬ˗eu meh.—Maꞈtehˬ 21:16.

Zaˬ yaw nyiˇ deuˬ˗ahˇ yaw nymˇ nymˇ lehˇ mehˬ˗awˇ yaw awˬ awˬ lehˇ gʼeh˗eu jeˬ mˇ mehˬ nehˬ naˇ, zaˬ deuˬ noeˬ taˬ nya dzehˬ ngaˇ lehˇ aˬ da aˬ ma yaw myaˬ gʼaˬ ehˇ˗eu meh. Teu miˇ neh, nga maꞈ˗ahˇ Jaˇliꞈ˗ahˇ neh ngaˬ neh ya siˬ˗euˬ jeˬ lehˇ ehˇ˗eu paˇ dmˬ ya jahˇ doˆ laꞈ˗euˬ laꞈ kʼaˬ cehˇ miˇ˗a. Heu dmˬ laꞈ kʼoeˇ yawˬ kawˆ na luꞈ˗ahˇ yaw awˬ awˬ lehˇ mehˬ nehˬ taˬ˗awˇ, aˇ baˇ hawˇ˗eu gaˇ kawˆ deuˬ kʼawꞈ, zaˬ smˇ kʼoꞈ maˬ ngeuˇ naˇ heu taꞈ˗ehˇ nyiˇ dzehˬ˗eu deuˬ nehˬ˗ehˇ tsaˬ leˇ ni jahˇ doˆ laꞈ˗euˬ ma. Yawˬ kawˆ na luꞈ aˇ saˬ saˬ iˇ ngeh, nawˇ nawˬ˗euˬ zaˬ nehˬ˗ehˇ mˇ nya˗eu jeˬ ahˇ˗eu meh. Jaˇliꞈ˗ahˇ neh ngaˬ neh ya siˬ˗euˬ jeˬ lehˇ ehˇ˗eu paˇ dmˬ heu dmˬ zaˬ˗ahˇ bi mui niˇ gʼa˗eu jeˬ maˬ ngeuˇ˗a. Nawˇ zaˬ nehˬ˗ehˇ bi gui˗eu gʼaˇ duˬ hawˇ˗eu, zaˬ nehˬ˗ehˇ yaw lmˇ lmˇ˗ehˇ bi jawˇ˗eu gʼaˇ duˬ meh.

Boˬloˬshaˬ heu dmˬ, zaˬ˗ahˇ “nyiˇ ngeh neh” Jaˇliꞈ˗euˬ yaw tsaˬ yaw dawˇ˗ahˇ mehˬ nehˬ nya ni, nawˬ˗ahˇ caw ba nehˬ meh lehˇ nga maꞈ noeˬ tmˬ˗eu ma.—2 Tiˆmoˇseˬ 3:14, 15.

Nawˬ˗euˬ mehˇ nmˇ,

Yeˬhawˇbaˬ˗euˬ Saˇ kiˇ deuˬ˗euˬ Uˆ lahˇ˗eu aˇ muˇ

[Myaˆ pyawˬ 3 laꞈ kʼoeˇ˗euˬ aˇ baˇ]