Gui˗eu deuˬ naˇ haˬ˗eu jeˬ

“Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ” Gaˬlaˬtiˆ 5:22, 23 laꞈ kʼoeˇ ahˇ˗eu seuˆ dzeuꞈ aˇ gʼehˇ heu deuˬ tehꞈ nga laˬ?

Jaˇliꞈ heu nyiˬ deuˆ˗ahˇ Ka li zaˬ˗euˬ seuˆ dzeuꞈ aˇ gʼehˇ 9 jeˬ˗ahˇ ngehˬ keuˆ taˬ˗euˬ meh. ‘Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ deuˬ˗aˬ, gʼoeˇ˗eu gaˬ˗eu jeˬ, laˬ kʼaˬ cehˇ˗eu jeˬ, nui saˇ oꞈ˗eu jeˬ, nui ma gʼawˬ mahˇ ni taˬ˗eu jeˬ, gʼawˬ shaˬ gaˬ˗eu jeˬ, yaw muiˬ jeˬ mˇ˗eu jeˬ, jah˗eu jeˬ, nui nahˬ nui yu ahˇ˗eu jeˬ, yawˬ ha˗euˬ nui ma˗ahˇ gʼaˬ leˇ˗eu jeˬ’ heu deuˬ pyeuꞈ meh. Ehˇ kʼawꞈ Miˬyehˇ˗euˬ muiˬ˗eu shawˇ˗eu yaw sahˇ aˬ dui˗ahˇ seuˆ dzeuꞈ aˇ gʼehˇ heu deuˬ tehꞈ˗ehˇ huiˬ laˇ mahˇ laˇ ni caw ba nehˬ˗eu maˬ ngeuˇ˗a.

Gʼaˬ kʼehˇ Pawˇluˆ neh teu nyiˬ deuˆ˗euˬ jeˬ hu boꞈ taˬ˗euˬ jeˬ˗ahˇ shaˇ noeˬ haw. Teu gaˇ “shiˬ shaˬ jiˇ nui kʼahˇ neh mˇ˗euˬ gaˇ deuˬ˗aˬ, . . . kʼaˬ miˬ sheu˗eu, maˬ muiˬ maˬ shawˇ˗eu, maˬ tsaˬ maˬ dawˇ˗eu laꞈ kʼoeˇ yuꞈ taꞈ joe taꞈ˗eu, tahˬ pahˬ aˬ ma mawˇ kawˇ˗ahˇ uˬ duˬ tahˬ˗eu, maw loˬ ja maw˗ahˇ gʼoe˗eu, tiˬ gʼaˬ tiˇ gʼaˬ muiˇ˗eu, dawꞈ˗eu ceh˗eu, mehˇ juiˇ juiˇ˗eu, nui ma pehˇ˗eu, yawˬ ha gʼaˇ duˬ tehꞈ˗ehˇ shaˇ noeˬ˗eu, gʼawˬ˗iˇ gʼehˇ˗iˇ˗eu, aˇ muˇ muˇ paˆ˗eu nui ma ahˇ˗eu, myaˆ naˆ˗eu, dzaˬ yehꞈ dawˇ yehꞈ˗eu, maˬ tsaˬ maˬ dawˇ˗eu bawˬ˗iˬ gʼeh˗eu, heu loꞈ˗ehˇ gʼeh˗eu deuˬ mˇ doˆ laꞈ˗eu meh” lehˇ ehˇ˗eu meh. (Gaˬlaˬtiˆ 5:19-21) Pawˇluˆ, jiˇ leˇ dzaˬ˗ahˇ “heu loꞈ˗ehˇ gʼeh˗eu deuˬ mˇ doˆ laꞈ˗eu meh” lehˇ ehˇ gaˇ haw ngeh, aˬ yawꞈ shiˬ shaˬ jiˇ nui kʼahˇ neh mˇ˗euˬ gaˇ deuˬ˗euˬ, yawˬ jeˬ na luꞈ˗ahˇ ehˇ keuˆ˗eu maˬ ngeuˇ nga lehˇ siˬ laˇ˗eu meh. (Gawˇlawˇsehˇ 3:5) Teu gaˇ duˇ ni, Pawˇluˆ muiˬ˗eu seuˆ dzeuꞈ aˇ gʼehˇ deuˬ˗ahˇ ehˇ gʼaˬ ngeh, aˬ yawꞈ “heu deuˬ˗ahˇ laˆ tsoeˬ˗eu zahˇ dawˬ kʼoꞈ dawˬ tiˬ dawˬ˗iˬ maˬ jaˆ˗a” lehˇ ehˇ˗eu meh. Teu miˇ neh, Pawˇluˆ teu loꞈ˗ehˇ ehˇ gaˇ haw ngeh, muiˬ˗eu shawˇ˗eu yaw sahˇ caw ba˗eu laꞈ kʼoeˇ, huiˬ lahˇ mahˇ laˇ nya˗eu seuˆ dzeuꞈ aˇ gʼehˇ teu myaˆ tehꞈ maˬ ngeuˇ nga lehˇ siˬ laˇ˗eu meh.

Aˬ dui gaˇ kawˆ heu˗ahˇ Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ hawˇ˗eu Pawˇluˆ neh Eˇpeˇsu aˇ muˇ˗ahˇ yaw shehꞈ laꞈ kʼoeˇ neh doˆ le˗euˬ jeˬ˗ahˇ sheu cehˆ haw ngeh siˬ laˇ˗eu meh. Aˬ yawꞈ “yaw muiˬ yawˬ jeˬ na luꞈ, yaw tsaˬ yaw dawˇ yawˬ jeˬ na luꞈ hawˇ˗eu, maˇ jawˆ ni gʼeh˗eu yawˬ jeˬ na luꞈ, yaw shehꞈ laꞈ kʼoeˇ neh doˆ le˗euˬ tehꞈ meh” lehˇ ehˇ˗eu meh. (Eˇpeˇsu 5:8, 9) Ngeuˇ meh, “yaw muiˬ” jeˬ hawˇ˗eu yaw tsaˬ yaw dawˇ˗eu jeˬ teu naˇ “yaw shehꞈ laꞈ kʼoeˇ neh doˆ le˗euˬ” jeˬ pyeuꞈ˗awˇ, ‘Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ’ deuˬ jiˇ pyeuꞈ˗eu meh.

Teu gaˇ duˇ ni, aˬ dui Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ, Pawˇluˆ neh Tiˆmoˇseˬ˗ahˇ “yaw tsaˬ yaw dawˇ jeˬ, Miˬyehˇ˗ahˇ yaw zeu baw˗eu jeˬ, jah˗eu jeˬ, gʼoeˇ˗eu gaˬ˗eu jeˬ, daˬ coeˇ oˇ coeˇ˗eu jeˬ, nui nahˬ nui yu ahˇ˗eu jeˬ” seuˆ dzeuꞈ aˇ gʼehˇ heu 6 jeˬ˗ahˇ huiˬ laˇ mahˇ laˇ ni leh jeh lehˇ ehˇ nehˬ˗euˬ gaˇ haw ngeh jiˇ siˬ laˇ˗eu meh. (1 Tiˆmoˇseˬ 6:11) Teu gaˇ ‘Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ’ 3 jeˬ˗ahˇ tehꞈ˗ehˇ ngehˬ keuˆ taˬ˗euˬ meh. Teu naˇ, (jah˗eu jeˬ, gʼoeˇ˗eu gaˬ˗eu jeˬ, nui nahˬ nui yu ahˇ˗eu jeˬ) heu deuˬ pyeuꞈ meh. Ehˇ kʼawꞈ Tiˆmoˇseˬ yaw tsaˬ yaw dawˇ jeˬ, Miˬyehˇ˗ahˇ yaw zeu baw˗eu jeˬ, hawˇ˗eu daˬ coeˇ oˇ coeˇ˗eu jeˬ, heu deuˬ huiˬ laˇ mahˇ laˇ ni ya leh jeh˗eu meh. Aˬ yawꞈ seuˆ dzeuꞈ aˇ gʼehˇ heu deuˬ ahˇ nya˗eu gʼaˇ duˬ, muiˬ˗eu shawˇ˗eu yaw sahˇ neh ya bi caw ba nga lehˇ siˬ nya˗eu meh.—Gawˇlawˇsehˇ 3:12; 2 Beˬtuˆluˆ 1:5-7-ahˇ sheu cehˆ.

Teu miˇ neh, Gaˬlaˬtiˆ 5:22, 23-ahˇ Ka li zaˬ deuˬ huiˬ laˇ mahˇ laˇ ni ya leh jeh˗eu seuˆ dzeuꞈ aˇ gʼehˇ dawˬ tawˆ luꞈ˗ahˇ maˬ ngehˬ keuˆ taˬ˗aˬ. Miˬyehˇ˗euˬ muiˬ˗eu shawˇ˗eu yaw sahˇ aˬ dui˗ahˇ, ‘Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ’ deuˬ huiˬ laˇ mahˇ laˇ nya ni caw ba nya˗eu meh. Ehˇ kʼawꞈ, aˬ dui huiˬ loˆ laˇ˗eu Ka li zaˬ pyeuꞈ˗eu gʼaˇ duˬ, muiˬ˗eu seuˆ dzeuꞈ aˇ gʼehˇ nui jeˬ˗ahˇ jiˇ huiˬ laˇ mahˇ laˇ ni ya leh jeh˗a siˬ. Aˬ dui ‘maˇ maˇ ni gʼeh˗eu yaw tsaˬ yaw dawˇ hawˇ˗eu yaw muiˬ yaw shawˇ laꞈ kʼoeˇ Miˬyehˇ˗euˬ aˇ gʼehˇ˗ahˇ duˇ leˇ ni beh taˬ˗euˬ yaw dehꞈ dehꞈ˗eu yaw shuiꞈ jeˬ˗ahˇ ya dm˗eu meh.’—Eˇpeˇsu 4:24.