Maˬ tsaˬ maˬ dawˇ˗eu jeˬ˗ehˇ mˇ nehˬ laꞈ gaˇ ya daˬ˗eu zaˬ miˬ aˬ buˇ deuˬ˗ahˇ caw ba

Dawˬ heu naˇ, jw.org gʼoeˇsaiˇ laꞈ kʼoeˇ˗euˬ “Zaˬ miˬ aˬ buˇ deuˬ˗euˬ dehꞈ ziˇ aˇ poeˬ baw—Jaˇliꞈ˗euˬ nui noeˬ” lehˇ ehˇ˗eu gaˇ kawˆ laꞈ kʼoeˇ˗euˬ dahˬ beh laˇ dzaˬ˗ahˇ neh yuˇ leꞈ˗euˬ meh. Teu kawˆ˗euˬ jiˇ leˇ dzaˬ˗ahˇ sahˬ boꞈ PDF jeˬ˗ehˇ daoˇloˆ nya˗eu liˆ˗kuiꞈ bi jaˆ taˬ˗euˬ meh. Teu yaˬ doˆ leꞈ˗awˇ, yaw tsaꞈ tsaꞈ lehˇ gʼeh˗eu sahˬ boꞈ aˇ taꞈ oeˬ taꞈ byawˆ doˆ nya˗eu meh. Aˬmeˬliˇkaˬ miˇ kʼahˬ˗ahˇ jawˇ˗eu mehˇ nmˇ Saꞈteˇsiˬ heu loꞈ˗ehˇ ehˇ˗eu meh. “Ngaˇ hawˇ˗eu dzaˇ˗i mehˇ nmˇ zaˬ miˬ aˬ buˇ tiˬ gʼaˬ sahˬ boꞈ aˇ taꞈ teu yaˬ doˆ˗awˇ, nga maꞈ˗euˬ aˇ muˇ˗euˬ tsaꞈ gaˬ duˬ˗ahˇ jaˆ˗eu zaˬ miˬ aˬ buˇ deuˬ jawˇ˗eu jawˇ duˬ tiˬ tsahˇ˗ahˇ yuˇ taˬ˗iˇ˗euˬ ma.”

Teu gaˇ haw saˆ˗eu tiˬ gʼaˬ sahˬ boꞈ aˇ taꞈ teu, teu gaˇ jawˇ˗eu deuˬ˗ahˇ biˇ nehˬ mawꞈ˗eu miˇ neh sahˬ boꞈ aˇ taꞈ paˇ shaˇ lahˬ˗eu meh. Mehˇ nmˇ zaˬ miˬ aˬ buˇ heu nyiˬ gʼaˬ sahˬ boꞈ aˇ taꞈ teu 40 taꞈ paˇ ya biˇ lahˬ nehˬ˗awˇ, jw.org gʼoeˇsaiˇ˗euˬ aˇ taꞈ taꞈ zaˬ dzaˇ˗i 30 taꞈ paˇ ya biˇ nehˬ˗euˬ meh. Aˇ nah naˇ, teu gaˇ˗euˬ aˬ yuiꞈ Yeˬhawˇbaˬ˗euˬ Saˇ kiˇ deuˬ˗ahˇ teu gaˇ jawˇ˗eu zaˬ miˬ aˬ buˇ deuˬ˗ahˇ Jaˇliꞈ aˬ joˆ˗ehˇ dzaw˗eu lehˇ aˇ baˇ bi jahˇ mawˇ laˇ mawꞈ˗eu meh.

Mehˇ nmˇ Saꞈteˇsiˬ hawˇ˗eu dzaˇ˗i mehˇ nmˇ aˬ buˇ nyiˬ gʼaˬ sahˬ boꞈ aˇ taꞈ teu ngaˬ taꞈ yuˇ˗awˇ, teu loꞈ˗ehˇ gʼeh˗eu jawˇ duˬ dzaˇ˗i tiˬ tsahˇ˗ahˇ paˇ yuˇ taˬ˗iˇ˗euˬ meh. Teu gaˇ haw saˆ˗eu deuˬ jiˇ sahˬ boꞈ aˇ taꞈ teu gʼawˬ mya taꞈ paˇ shaˇ lahˬ˗eu meh. Teu gaˇ haw saˆ˗eu tiˬ gʼaˬ heu loꞈ˗ehˇ ehˇ˗eu meh. “Sahˬ boꞈ aˇ taꞈ heu naˇ, heu gaˇ jawˇ˗eu zaˬ miˬ aˬ buˇ deuˬ˗ahˇ maˇ diˇ caw ba nehˬ nya˗eu miˇ neh sahˬ boꞈ aˇ taꞈ heu˗ahˇ loˬ nya” lehˇ ehˇ˗eu meh. Teu gaˇ tiˬ poˆ paˇ gʼa kʼoꞈ˗iˇ ngeh, zaˬ miˬ aˬ buˇ gʼawˬ mya gʼaˬ Jaˇliꞈ aˬ joˆ˗ehˇ dzaw˗eu lehˇ aˇ baˇ jahˇ byaˬ gaˇ haw le˗euˬ meh. Kʼoeˇ naˇ teu laꞈ kʼoeˇ neh zaˬ miˬ aˬ buˇ nyiˬ gʼaˬ, koꞈ nah jawˇ nah˗euˬ mehˬ bawˬ˗ahˇ oe mawꞈ nya lehˇ jiˇ ehˇ˗eu meh.

Mehˇ nmˇ Saꞈteˇsiˬ heu loꞈ˗ehˇ ehˇ˗eu meh. “Sahˬ boꞈ aˇ taꞈ heu˗ahˇ gui˗eu deuˬ laˬ kʼaˬ cehˇ gaˇ ya mawˇ˗eu miˇ neh nga maꞈ˗ahˇ laˬ kʼaˬ cehˇ˗eu lehˇ miˇ˗a. Sahˬ boꞈ aˇ taꞈ heu yaˬ doˆ leꞈ˗awˇ, tsaꞈ gaˬ˗eu aˇ taꞈ laˆ pyeuꞈ˗awˇ zaˬ miˬ aˬ buˇ deuˬ˗ahˇ ya biˇ nehˬ˗eu heu naˇ, Miˬyehˇ Miˇkʼahˬ gaˇ kawˆ tsaꞈ gaˬ˗eu muiˬ dui dui˗eu jeˬ pyeuꞈ meh. Gʼawˬ mya gʼaˬ sahˬ boꞈ aˇ taꞈ heu˗ahˇ ya leˇ gaˇ ya mawˇ ngeh, nga maꞈ˗ahˇ laˬ kʼaˬ cehˇ˗eu lehˇ˗aˬ lehˇ maˬ paˇ ehˇ jiˇ coeˇ miˇ˗a. Nga maꞈ neh zaˬ miˬ aˬ buˇ heu deuˬ˗ahˇ laˬ kʼaˬ cehˇ˗eu guiˬ lahˬ dawˬ tsaꞈ gaˬ˗euˬ gaˇ Yeˬhawˇbaˬ guiˬ lahˬ aˬ joˆ˗ehˇ biꞈ˗eu nga lehˇ ya mawˇ gaˇ loꞈ luꞈ˗eu ma.”