Nawˇ aˇ yamˬ siˬ nya ma loˇ?

Nawˇ nymˬ˗mˇ aˇ myaˆ laꞈ byah laˇ˗euˬ lehˇ siˬ nya mawꞈ naˇ aˬ joˆ˗ehˇ jahˇ le? Kaˇ pyawˇ˗ahˇ ceuˬ˗eu naˬ liˬ, maˬ ngeuˇ naˇ aˬ laꞈ˗ahˇ paꞈ taˬ˗euˬ naˬ liˬ˗ahˇ haw˗eu paˬ. Cawˬ deuˬ nawˬ˗ahˇ naˬ liˬ aˇ laꞈ naˇ haˬ laˇ naˇ teu neh, nawˇ aˬ joˆ˗ehˇ ehˇ nehˬ le? “Aˇ myaˆ laꞈ byah laˇ˗euˬ” lehˇ yaw myaˬ jeˬ˗ehˇ ehˇ nehˬ nya meh. Aˬ jeˬ jeˇ lehˇ ehˇ nehˬ nya˗eu nga?

Aˬ joˆ˗ehˇ ehˇ nehˬ˗eu lehˇ yawˬ ha˗euˬ jawˇ kʼahˬ˗ahˇ neh iˇ˗eu tehꞈ meh. Yaw jeˬ ma jeˬ, nymˬ˗mˇ naˬ liˬ 1:30 pyeuꞈ naˇ, aˬ dui “1 laꞈ 30 peu” lehˇ ehˇ nya˗awˇ, tiˬ gaˇ na “13 laꞈ 30 peu” lehˇ ehˇ˗awˇ, tiˬ gaˇ na naˇ “nyaˆ taꞈ 30 peu naˇ 2 laꞈ” byah laˇ meh lehˇ kʼawꞈ ehˇ nya˗eu meh.

Jaˇliꞈ saˇ ka˗ahˇ˗euˬ tsawˇ haˬ deuˬ aˇ yamˬ aˬ joˆ˗ehˇ ehˇ nehˬ˗eu nga? Aˬ yawꞈ maꞈ kʼawꞈ yaw myaˬ jeˬ lehˇ ehˇ nehˬ˗eu meh. Heˬbyehˇ Jaˇliꞈ laꞈ kʼoeˇ ‘uˬ shawˬ,’ “nah gʼahˇ,” “nah gʼahˇ nah gaˆ,” “uˬ ciꞈ uˬ taw” lehˇ ehˇ˗eu aˇ yamˬ heu deuˬ ahˇ˗eu meh. (Aˇdahˬbeh˗eu 8:11; 19:27; 43:16; Dawˬmehˬmehˬ˗eu 28:29; 1 Sahˬpaˬ 18:26) Ehˇ kʼawꞈ tiˬ poˆ na aˇ yamˬ yaw duˬ duˬ lehˇ jiˇ ehˇ nehˬ taˬ˗euˬ meh.

Gaˇ hu˗euˬ Iˇsaˬleˬlaˆ tsawˇ haˬ deuˬ, uˬ ciˬ paw ngehˬ˗ehˇ dzehˬ loꞈ˗eu tsawˇ haˬ bi jawˇ˗eu heu naˇ zahˬ leˇ paˬ˗ehˇ gʼeh˗eu jeˬ maˬ ngeuˇ˗a. Iˇsaˬleˬ laˆ deuˬ uˬ ciꞈ paw aˇ yamˬ 3 yamˬ lehˇ biˇ paˆ˗euˬ meh. (Ja ceuˬ 63:6) Yaˇkʼaˬdaˇ˗eu 7:19 laꞈ kʼoeˇ “sehˇ gʼahˇ ceh” lehˇ ehˇ taˬ˗euˬ meh. Ehˇ kʼawꞈ, Yeˬsuˇ˗euˬ saˇ ka˗ahˇ naˇ, Yuˇdaˆ tsawˇ haˬ deuˬ aˇ yamˬ Gaˬliˇ hawˇ˗eu Loˇmaˆ deuˬ loꞈ˗ehˇ zmˬ caw˗eu miˇ neh, uˬ ciꞈ paw aˇ yamˬ 4 yamˬ lehˇ biˇ paˆ˗euˬ meh.

Laꞈ kʼaˬ cehˇ˗eu guiˬ lahˬ dawˬ sahˬ boꞈ aˇ yamˬ˗ahˇ yaw myaˬ poˆ ngehˬ keuˆ taˬ˗euˬ meh. Yaw jeˬ ma jeˬ, “ya poeˇ doeˇ taw paw Yeˬsuˇ iˇ cuꞈ kʼoeˇ taˆ cah˗awˇ, zaˬ lahˇ deuˬ jawˇ gaˇ oe˗euˬ meh.” (Maꞈtehˬ 14:25) Yeˬsuˇ neh ngehˬ keuˆ˗euˬ yaw jeˬ maˬ jeˬ laꞈ kʼoeˇ, “Smˇ kʼoeˬ kʼoeˬ laˇ˗eu aˇ yamˬ˗ahˇ nymˇ sahˇ gʼaˬ siˬ nya law nmˇ˗aˬ, smˇ kʼoeˬ˗ahˇ iˇ kahˇ laꞈ kʼoeˇ maˬ bi uˇ keuˆ laˇ ni, yaw beuˇ beuˇ˗ehˇ jawˇ˗awˇ loꞈ kʼmˬ taˬ˗eu yaw duˬ baw tehꞈ˗a” lehˇ ehˇ˗eu meh.—Maꞈtehˬ 24:43.

Yeˬsuˇ aˬ yawꞈ˗euˬ gʼaˬ kʼehˇ deuˬ˗ahˇ “Yaw muiˬ˗ehˇ loꞈ de lehˇ dawˬ biꞈ yaꞈ˗euˬ meh. . . . nymˇ sahˇ gʼaˬ gʼoꞈ laˇ˗eu˗aˬ, uˬ ciꞈ maˬ siˬ, sehˇ gʼahˇ ceh laˇ ngeh maˬ siˬ, ya poeˇ doeˇ laˇ ngeh maˬ siˬ, uˬ shawˬ maˬ siˬ, aˬ myah gʼoꞈ keuˆ laˇ˗eu nga lehˇ naw maꞈ maˬ siˬ nya”˗a lehˇ ehˇ nehˬ ngeh, aˇ yamˬ 4 yamˬ˗ahˇ ngehˬ keuˆ˗euˬ meh. (Maˬkuˆ 13:35, YS 97) Dahˬ beh˗eu yamˬ naˇ “uˬ ciꞈ” pyeuꞈ meh. Heu naˇ, uˬ ciꞈ paw nah ma ga uˇ˗awˇ 9 laꞈ˗ahˇ keuˆ ni ehˇ mawꞈ˗awˇ, nyiˬ yamˬ aˬ yawꞈ yamˬ pyeuꞈ˗eu, “sehˇ gʼahˇ ceh laˇ”˗eu lehˇ ehˇ˗eu heu naˇ, uˬ ciꞈ 9 laꞈ˗ahˇ neh uˬ ciꞈ sehˇ gʼahˇ˗ahˇ keuˆ ni ehˇ mawꞈ˗eu meh. Smˇ yamˬ aˬ yawꞈ yamˬ naˇ, “uˬ bya bya shawˇ” maˬ ngeuˇ naˇ, “ya poeˇ doeˇ” ngeh meh. Heu naˇ, uˬ ciꞈ sheˇ gʼahˇ˗ahˇ neh smˇ laꞈ˗ahˇ keuˆ ni meh. Yeˬsuˇ bi nyehꞈ ngeh miˇ ya poeˇ doeˇ dui dui laˇ˗euˬ yamˬ kʼawꞈ pyeuꞈ nya meh. (Maˬkuˆ 14:72) Oeˬ yamˬ aˬ yawꞈ yamˬ naˇ, naˬ liˬ smˇ laꞈ˗ahˇ neh nahˇ ma doˆ laˇ ngeh keuˆ ni pyeuꞈ˗eu “uˬ shawˬ” meh.

Teu miˇ neh, teu ngeh˗euˬ tsawˇ haˬ deuˬ aˬ dui loꞈ˗ehˇ kaˇ pyawˇ˗ahˇ ceuˬ˗eu naˬ liˬ, maˬ ngeuˇ naˇ aˬ laꞈ˗ahˇ paꞈ taˬ˗euˬ naˬ liˬ maˬ jaˆ kʼawꞈ, aˬ yawꞈ maꞈ jiˇ naˬ liˬ aˇ myaˆ laꞈ byah laˇ˗euˬ lehˇ tiˬ paw dzeˇ neh ehˇ nehˬ nya˗eu meh.