Yeˬsuˇ miˇ tsaˬ kʼoeˇ taˆ jawˇ ngeh aˬ jeˬ jeˇ jahˇ˗euˬ nga?

Tsawˇ haˬ deuˬ Yeˬsuˇ˗euˬ gaˇ kawˆ˗ahˇ gaˬ haw˗euˬ meh. Tsawˇ haˬ gʼawˬ mya gʼaˬ Yeˬsuˇ zaˬ nahˬ ngeh˗euˬ gaˇ kawˆ˗ahˇ maˬ ehˇ, zaˬ siˬ nui gahˇ ahˇ˗eu Miˬyehˇ˗euˬ gʼaˇ duˬ ngehˬ dah˗eu tiˬ gʼaˬ pyeuꞈ˗eu lehˇ maˬ ehˇ, Yeˬsuˇ shiˇ˗euˬ gaˇ kawˆ˗ahˇ maˬ ehˇ, siˬ nya˗eu meh. Aˬ dui aˬ yawꞈ˗ahˇ heu naˆ maˬ tseˇ siˬ nya laˇ˗eu gʼaˇ duˬ, aˬ yawꞈ neh miˇ tsaˬ kʼoeˇ taˆ dehꞈ yaꞈ˗euˬ gaˇ kawˆ˗ahˇ yaw muiˬ˗ehˇ ya pyehˆ tseˇ˗eu meh. Aˬ dui heu kawˆ laꞈ kʼoeˇ Yeˬsuˇ neh mˇ yaꞈ˗euˬ aˇ yeˇ huiˬ dui dui˗eu tiˬ jeˬ na˗ahˇ ja sawˇ˗awˇ, teu aˬ dui nehˬ˗ehˇ aˬ joˆ˗ehˇ taꞈ˗eu nga lehˇ jiˇ ja sawˇ ma.

1. Yeˬsuˇ˗euˬ aˇ yeˇ kʼaˇ huiˬ˗eu gaˇ naˇ, aˬ jeˬ nga?

Yeˬsuˇ˗euˬ aˇ yeˇ kʼaˇ huiˬ˗eu gaˇ naˇ, ‘Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ mehˬ˗eu’ heu meh. (Luˇkaꞈ 4:43-ahˇ gui.) Aˬ yawꞈ Yeˬhawˇbaˬ tsawˇ haˬ zaˬ˗euˬ shaˬ zahˬ dawˬ tawˆ luꞈ˗ahˇ laˆ byoˆ jiˇ nehˬ˗eu gʼaˇ duˬ, Miˬyehˇ Miˇkʼahˬ beh˗eu gaˇ kawˆ laˬ kʼaˬ cehˇ laˇ paˬ˗ehˇ gʼeh˗eu guiˬ lahˬ dawˬ tsaꞈ gaˬ˗eu meh.a Yeˬsuˇ smˇ kʼoꞈ taꞈ tiˬ paˆ yaw kʼaˆ˗ehˇ leh jeh˗awˇ, laˬ kʼaˬ cehˇ˗eu guiˬ lahˬ dawˬ heu mehˬ˗euˬ meh.—Maꞈtehˬ 9:35.

2. Yeˬsuˇ aˬ jeˬ miˇ neh zahˬ leˇ paˬ˗ehˇ gʼeh˗eu jeˬ jahˇ˗euˬ nga?

Jaˇliꞈ laꞈ kʼoeˇ ‘Yeˬsuˇ˗ahˇ gʼoe˗eu laꞈ kʼoeˇ Miˬyehˇ neh mˇ˗euˬ zahˬ leˇ paˬ˗ehˇ gʼeh˗eu gaˇ’ gʼawˬ mya jeˬ˗ahˇ ngehˬ keuˆ taˬ˗euˬ meh. (Gʼaˬkʼehˇ 2:22) Yeˬsuˇ Miˬyehˇ˗euˬ baoˬ˗ahˇ gʼoe˗awˇ jaˬ lehˇ lehˇ ma˗ahˇ laˆ naˬ nya˗euˬ meh. Kʼoeˇ naˇ tsawˇ haˬ aˇ heˇ gʼaˬ˗ahˇ bi dzaˬ bi dawˇ nya˗awˇ, naˇ˗eu deuˬ˗ahˇ jiˇ laˆ taˬ nehˬ nya˗euˬ uˬ taꞈ, shiˇ˗euˬ deuˬ˗ahˇ jiˇ bi gʼoꞈ dehꞈ laˇ nya˗euˬ meh. (Maꞈtehˬ 8:23-27; 14:15-21; Maˬkuˆ 6:56; Luˇkaꞈ 7:11-17) Yeˬsuˇ zahˬ leˇ paˬ˗ehˇ gʼeh˗eu jeˬ jahˇ gaˇ haw ngeh, aˬ yawꞈ˗ahˇ Miˬyehˇ neh bi oe˗euˬ lehˇ siˬ laˇ˗awˇ, aˬ dui shaˬ zahˬ dawˬ tawˆ luꞈ˗ahˇ Yeˬhawˇbaˬ laˆ byoˆ nehˬ nya˗eu baoˬ ahˇ˗eu lehˇ jiˇ siˬ laˇ˗eu meh.

3. Yeˬsuˇ˗euˬ dehꞈ jeˬ dehꞈ kawˆ˗ahˇ neh, aˬ dui aˬ jeˬ dzaw geuꞈ nya˗eu nga?

Yeˬsuˇ aˬ myah luꞈ Yeˬhawˇbaˬ˗euˬ ehˇ dawˬ naˇ haˬ˗eu meh. (Yoˇhaˬ 8:29-ahˇ gui.) Aˬ yawꞈ aˬ joˆ˗ehˇ gʼeh˗eu kʼehˬ laˇ kʼaˆ laˇ˗eu jeˬ˗ahˇ ya tahˬ puˬ kʼawꞈ, shiˇ ngeh keuˆ ni saˇ jaˇ ziꞈ˗eu laꞈ kʼoeˇ aˬ yawꞈ˗euˬ Aˬda bi mˇ mawꞈ˗eu jeˬ mˇ˗euˬ meh. Teu naˇ tsawˇ haˬ zaˬ aˬ joˆ˗ehˇ gʼeh˗eu shaˬ zahˬ˗ahˇ ya tahˬ puˬ kʼawꞈ, Miˬyehˇ˗euˬ gaˇ mˇ nya ngaˇ lehˇ siˬ laˇ˗eu meh. Yeˬsuˇ ‘aˬ yawꞈ˗euˬ pehˬ zaˇ˗ahˇ caw teh nya ni, aˬ yawꞈ˗ahˇ bi dzaw geuꞈ˗eu lehˇ’ aˬ dui˗ahˇ mˇ mehˬ yaꞈ˗euˬ meh.—1 Beˬtuˆluˆ 2:21.

5. Yeˬsuˇ aˇ poeˬ baw dui dui˗eu yaw tsaˬ yaw dawˇ jeˬ mehˬ

Yeˬsuˇ Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ tsaꞈ gaˬ˗eu tehꞈ˗ehˇ maˬ gʼaˬ ni, dehꞈ ziˇ laꞈ kʼoeˇ maˇ diˇ zmˬ˗iˇ nya˗eu jeˬ jiˇ mehˬ˗euˬ meh. Yeˬsuˇ neh gawˬ jawˬ kʼoeˇ taˆ mehˬ˗euˬ yaw jeˬ ma jeˬ tiˬ kawˆ na˗ahˇ haw ma. Maꞈtehˬ 6:14, 34 hawˇ˗eu 7:12˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ aˇ deuˆ heu deuˬ laꞈ kʼoeˇ, aˬ jeˬ jeˇ˗euˬ gaˇ kawˆ mehˬ nehˬ taˬ˗euˬ nga?

• Aˬ yawꞈ neh mehˬ˗euˬ jeˬ heu, nymˬ˗mˇ iˬ nah keuˆ ni zmˬ nya ngaˇ loˇ?

6. Yeˬsuˇ zahˬ leˇ paˬ˗ehˇ geh˗eu jeˬ jahˇ

Yeˬhawˇbaˬ Yeˬsuˇ˗ahˇ zahˬ leˇ paˬ˗ehˇ gʼeh˗eu gʼawˬ mya jeˬ jahˇ nya˗eu baoˬ biꞈ˗euˬ meh. Yaw jeˬ ma jeˬ tiˬ kawˆ na˗ahˇ haw˗eu gʼaˇ duˬ, Maˬkuˆ 5:25-34-ahˇ gui. Maˬ ngeuˇ naˇ biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Naˇ gawˇ naˇ luꞈ˗eu zaˬ miˬ zaˬ taˬ leˇ (5:10)

• Biˬdiˬoˬ laꞈ kʼoeˇ˗euˬ zaˬ miˬ zaˬ teu gʼaˬ, aˬ jeˬ˗ahˇ jah˗eu nga?

• Zahˬ leˇ paˬ˗ehˇ gʼeh˗eu jeˬ heu laꞈ kʼoeˇ, nawˬ˗ahˇ aˬ geu jeˬ˗ahˇ ya leˇ nya?

Yoˇhaˬ 5:36-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬsuˇ neh mˇ˗euˬ zahˬ leˇ paˬ˗ehˇ gʼeh˗eu jeˬ, aˬ yawꞈ nehˬ˗ehˇ taꞈ leˇ˗awˇ aˬ jeˬ “saˇ kiˇ kamˬ˗eu” nga?

Kawˆ shawˆ

Yeˬsuˇ Miˬyehˇ Miˇkʼahˬ gaˇ kawˆ tsaꞈ gaˬ˗awˇ zahˬ leˇ paˬ˗ehˇ gʼeh˗eu jeˬ jahˇ˗euˬ uˬ taꞈ, aˬ geu jeˬ˗ahˇ ya tahˬ puˬ kʼawꞈ Yeˬhawˇbaˬ˗euˬ ehˇ dawˬ naˇ haˬ˗euˬ meh.

Ja sawˇ poˆ˗eu

• Miˇ tsaˬ kʼoeˇ taˆ jawˇ ngeh, Yeˬsuˇ˗euˬ aˇ yeˇ kʼaˇ huiˬ˗eu gaˇ naˇ aˬ jeˬ nga?

• Yeˬsuˇ neh jahˇ˗euˬ zahˬ leˇ paˬ˗ehˇ gʼeh˗eu jeˬ, aˬ yawꞈ nehˬ˗ehˇ taꞈ leˇ˗awˇ aˬ jeˬ bi siˬ laꞈ˗eu nga?

• Yeˬsuˇ dehꞈ ziˇ laꞈ kʼoeˇ maˇ diˇ zmˬ iˇ nya˗eu aˬ jeˬ jeˇ gaˇ kawˆ mehˬ˗eu ngaˬ?

Haw lahˬ

Yeˬsuˇ aˬ jeˬ˗euˬ gaˇ kawˆ˗ahˇ myaˬ myaˬ ni ngehˬ keuˆ˗euˬ nga?

“Miˬyehˇ˗euˬ Miˇkʼahˬ, Yeˬsuˇ˗euˬ gʼaˇ duˬ aˬ jeˬ miˇ neh aˇ yeˇ huiˬ˗eu nga?” (Loꞈ˗eu nymˇgoˇ, 2014 Tseˇ siˬ ba la 1)

Yeˬsuˇ zahˬ leˇ paˬ˗ehˇ gʼeh˗eu jeˬ maˇ diˇ jahˇ˗euˬ lehˇ aˬ jeˬ miˇ neh jah nya˗eu nga lehˇ haw.

“Yeˬsuˇ neh jahˇ˗euˬ zahˬ leˇ paˬ˗ehˇ gʼeh˗eu jeˬ˗ahˇ neh aˬ dui aˬ jeˬ ya siˬ˗eu nga?” (Loꞈ˗eu nymˇgoˇ, 2004 Shiꞈ siˬ ba la 15)

Yawˬ ha˗euˬ gʼaˇ duˬ maˬ shaˇ noeˬ ni Yeˬsuˇ neh dehꞈ yaꞈ˗euˬ jeˬ, zaˬ yo aˬ li tiˬ gʼaˬ˗ahˇ aˬ joˆ˗ehˇ bi gʼeh leˇ˗euˬ nga lehˇ haw.

“Ngaˇ yawˬ ha˗euˬ gʼaˇ duˬ tehꞈ˗ehˇ shaˇ noeˬ˗euˬ ma” (Loꞈ˗eu nymˇgoˇ, 2014 Tseˇ siˬ ba la 1)

Yeˬsuˇ aˇ yeˇ huiˬ˗eu Miˬyehˇ˗euˬ gaˇ aˬ jeˬ jeˇ mˇ˗euˬ nga lehˇ haw.

“Yeˬsuˇ miˇ tsaˬ kʼoeˇ taˆ jawˇ ngeh, mˇ yaꞈ˗euˬ aˇ yeˇ huiˬ˗eu gaˇ deuˬ” (Miˇ shuiꞈ dawˬ paˇ Jaˇliꞈ, Dzaw lahˬ A7)