Aˬ dui Yeˬhawˇbaˬ nehˬ˗ehˇ cawˬ cawˬ nya

Yeˬhawˇbaˬ nawˬ˗ahˇ aˬ yawꞈ˗euˬ gaˇ kawˆ yaw muiˬ˗ehˇ bi siˬ nya mawꞈ˗eu meh. Aˬ jeˬ miˇ neh nga? Nawˇ aˬ yawꞈ˗ahˇ ngehˬ˗ehˇ siˬ nya laˇ naˇ ngehˬ˗ehˇ, aˬ yawꞈ˗euˬ cawˬ pyeuꞈ mawꞈ laˇ meh lehˇ noeˬ˗eu miˇ neh meh. Nawˇ Miˬyehˇ nehˬ˗ehˇ maˇ maˇ ni cawˬ cawˬ nya ngaˇ laˬ? (Ja ceuˬ 25:14-ahˇ gui.) Miˬyehˇ nehˬ˗ehˇ cawˬ cawˬ nya˗eu gʼaˇ duˬ, aˬ jeˬ ya jahˇ˗eu nga? Jaˇliꞈ laꞈ kʼoeˇ gaˇ kawˆ heu ehˇ nehˬ taˬ˗awˇ, Yeˬhawˇbaˬ aˬ jeˬ miˇ neh kʼaˇ muiˬ˗eu cawˬ pyeuꞈ˗eu lehˇ jiˇ ehˇ nehˬ taˬ˗euˬ meh.

1. Yeˬhawˇbaˬ nawˬ˗ahˇ aˬ jeˬ jahˇ lehˇ kuˇ˗eu nga?

“Miˬyehˇ˗euˬ dawˬ peh jiˆ laˇ˗awˬ. Naw maꞈ˗euˬ dawˬ peh Miˬyehˇ jiˆ le tehꞈ˗a” lehˇ Jaˇliꞈ ehˇ˗eu meh. (Yaˬkoˆ 4:8) Heu aˬ jeˬ˗ahˇ ehˇ mawꞈ˗eu nga? Yeˬhawˇbaˬ nawˬ˗ahˇ aˬ yawꞈ nehˬ˗ehˇ cawˬ cawˬ laˇ lehˇ kuˇ˗eu meh. Tiˬ deuˬ na maˬ mawˇ nya˗eu Miˬyehˇ nehˬ˗ehˇ cawˬ cawˬ˗eu heu naˇ, maˬ pyeuꞈ leˇ nya˗a lehˇ noeˬ˗eu meh. Ehˇ kʼawꞈ Yeˬhawˇbaˬ aˬ yawꞈ˗euˬ dawˬ peh bi jiˆ peh laˇ˗eu gʼaˇ duˬ, aˬ yawꞈ nehˬ˗ehˇ taꞈ leˇ˗awˇ siˬ nya paˬ˗ehˇ gʼeh˗eu gaˇ kawˆ deuˬ Jaˇliꞈ laꞈ kʼoeˇ bi boꞈ ahˇ taˬ˗euˬ meh. Aˬ dui Yeˬhawˇbaˬ˗ahˇ maˬ mawˇ haw˗euˬ kʼawꞈ, Jaˇliꞈ gui naˇ aˬ yawꞈ nehˬ˗ehˇ gʼoeˇ leˇ nya˗eu meh.

2. Yeˬhawˇbaˬ aˬ jeˬ miˇ neh kʼaˇ muiˬ˗eu cawˬ pyeuꞈ nga?

Yeˬhawˇbaˬ naˆ ni nawˬ˗ahˇ gaˬ˗eu tiˬ gʼaˬ˗iˬ maˬ jawˇ˗a. Aˬ yawꞈ nawˬ˗ahˇ laˬ kʼaˬ bi cehˇ mawꞈ˗awˇ, nawˇ caw ba˗eu jeˬ kʼaˇ loˬ ngeh aˬ yawꞈ˗ahˇ bi ehˇ nehˬ mawꞈ˗eu meh. “Naw maꞈ noeˬ shaˬ noeˬ zahˬ˗eu dawˬ tawˆ luꞈ Miˬyehˇ˗ahˇ a nehˬ˗awˬ. Aˬ jeˬ miˇ neh ehˇ naˇ, aˬ yawꞈ naw maꞈ˗ahˇ ngehˬ gʼeh bo saˆ luꞈ˗eu meh” lehˇ Jaˇliꞈ ehˇ˗eu meh. (1 Beˬtuˆluˆ 5:7) Yeˬhawˇbaˬ aˬ yawꞈ˗euˬ cawˬ deuˬ˗ahˇ caw ba˗awˇ gʼaˬ biꞈ˗eu uˬ taꞈ, aˬ yawꞈ maꞈ ngehˬ gaˇ naˇ haˬ˗eu lehˇ jiˇ lehˬ hmˬ deuˇ taˬ˗euˬ meh.—Ja ceuˬ 94:18, 19-ahˇ gui.

3. Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ jeˬ bi jahˇ mawꞈ˗eu nga?

Yeˬhawˇbaˬ yawˬ gʼaˬ na luꞈ˗ahˇ gaˬ kʼawꞈ ni, aˬ yawꞈ˗euˬ ehˇ dawˬ naˇ haˬ˗eu tsawˇ haˬ deuˬ nehˬ˗ehˇ tehꞈ˗ehˇ cawˬ cawˬ˗eu meh. (Ja ceuˬ 25:14) Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ yawꞈ neh yaw muiˬ meh lehˇ ehˇ˗eu jeˬ˗ahˇ bi mˇ mawꞈ˗awˇ, maˬ muiˬ˗a lehˇ ehˇ˗euˬ jeˬ˗ahˇ bi yahˇ mawꞈ˗eu meh. Tiˬ deuˬ na Miˬyehˇ˗euˬ zahˇ dawˬ˗ahˇ maˬ dehꞈ caw nya nya lehˇ noeˬ˗eu meh. Ehˇ kʼawꞈ Yeˬhawˇbaˬ gʼoˆ shaw nehˬ nya meh. Aˬ yawꞈ˗ahˇ gaˬ˗awˇ kʼaˇ gʼeh nya gaˇ neh aˬ yawꞈ ya leˇ˗eu jeˬ˗ahˇ leh jeh˗awˇ mˇ˗eu deuˬ˗ahˇ ha geuꞈ˗eu meh.—Ja ceuˬ 147:11; Gʼaˬkʼehˇ 10:34, 35.

Naꞈ suiˇ ni dzaw

4. Aˬbyaˬhaˬ Yeˬhawˇbaˬ˗euˬ cawˬ pyeuꞈ

Jaˇliꞈ laꞈ kʼoeˇ ahˇ˗eu (Aˬbyaˬ lehˇ kuˇ˗eu) Aˬbyaˬhaˬ˗euˬ gaˇ kawˆ heu naˇ, Miˬyehˇ nehˬ˗ehˇ cawˬ cawˬ˗eu lehˇ ehˇ˗eu heu aˬ jeˬ˗ahˇ ehˇ mawꞈ˗eu lehˇ bi siˬ laꞈ˗eu meh. Aˬbyaˬhaˬ˗euˬ gaˇ kawˆ nehˬ˗ehˇ taꞈ leˇ˗awˇ Aˇdahˬbeh˗eu 12:1-4-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ Aˬbyaˬhaˬ˗ahˇ aˬ jeˬ jahˇ lehˇ ehˇ nehˬ˗euˬ nga?

• Yeˬhawˇbaˬ Aˬbyaˬhaˬ˗ahˇ aˬ jeˬ lehˇ saˇ jaˇ dzaˬ˗euˬ nga?

• Aˬbyaˬhaˬ aˬ joˆ˗ehˇ jahˇ˗euˬ nga?

5. Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ jeˬ noeˬ tmˬ˗eu nga?

Aˬ dui cawˬ deuˬ˗ahˇ neh tiˬ jeˬ na noeˬ tmˬ˗eu meh.

• Nawˇ nawˬ˗euˬ cawˬ deuˬ˗ahˇ neh aˬ jeˬ noeˬ tmˬ de?

1 Yoˇhaˬ 5:3-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ jeˬ noeˬ tmˬ˗eu nga?

Aˬ dui Yeˬhawˇbaˬ˗euˬ ehˇ dawˬ˗ahˇ naˇ haˬ˗eu gʼaˇ duˬ, nui ma hawˇ˗eu dehꞈ jeˬ dehꞈ kawˆ tiˬ jeˬ na ya laˆ paˇ˗eu meh. Iˇsaˬyaˇ 48:17, 18-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗euˬ cawˬ deuˬ˗ahˇ tiˬ jeˬ na aˬ jeˬ miˇ neh bi laˆ paˇ mawꞈ˗eu nga?

6. Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ jeˬ mˇ nehˬ˗eu nga?

Biˬdiˬoˬ: Yeˬhawˇbaˬ ngaˬ˗ahˇ caw ba dui dui˗eu meh (3:20)

• Biˬdiˬoˬ heu˗ahˇ haw ngeh, Yeˬhawˇbaˬ zaˬ miˬ aˬ buˇ tiˬ gʼaˬ˗ahˇ maˬ muiˬ˗eu nui noeˬ˗ahˇ gʼaˬ leˇ nya ni aˬ joˆ˗ehˇ caw ba nehˬ˗euˬ nga?

Iˇsaˬyaˇ 41:10, 13-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ jeˬ mˇ nehˬ ma lehˇ saˇ jaˇ dzaˬ taˬ˗euˬ nga?

• Yeˬhawˇbaˬ muiˬ˗eu cawˬ pyeuꞈ˗eu lehˇ nawˬ˗ahˇ noeˬ miˇ˗a laˬ? Aˬ jeˬ miˇ neh?

7. Yeˬhawˇbaˬ nehˬ˗ehˇ cawˬ cawˬ˗eu jeˬ, dawˬ ngehˬ cawˬ˗eu jeˬ nehˬ˗ehˇ jiˇ taꞈ

Tiˬ gʼaˬ tiˇ gʼaˬ tiˬ kʼehˬ maˬ kaˬ ngehˬ cawˬ naˇ, gʼoeˇ dzehˬ laˇ˗eu meh. Ja ceuˬ 86:6, 11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui Yeˬhawˇbaˬ nehˬ˗ehˇ aˬ joˆ˗ehˇ ngehˬ cawˬ nya˗eu nga?

• Yeˬhawˇbaˬ aˬ dui nehˬ˗ehˇ aˬ joˆ˗ehˇ ngehˬ cawˬ˗eu nga?

Kawˆ shawˆ

Yeˬhawˇbaˬ nawˬ nehˬ˗ehˇ cawˬ cawˬ mawꞈ˗awˇ, nawˬ˗ahˇ aˬ yawꞈ˗euˬ dawˬ peh jiˆ laˇ nya ni jiˇ caw ba nehˬ˗eu meh.

Ja sawˇ poˆ˗eu

• Yeˬhawˇbaˬ aˬ yawꞈ˗euˬ cawˬ deuˬ˗ahˇ aˬ joˆ˗ehˇ caw ba nehˬ˗eu nga?

• Yeˬhawˇbaˬ aˬ jeˬ miˇ neh aˬ yawꞈ˗euˬ cawˬ deuˬ˗ahˇ tiˬ jeˬ na bi beˬ paˇ mawꞈ˗eu nga?

• Yeˬhawˇbaˬ aˬ yawꞈ˗euˬ cawˬ deuˬ˗ahˇ aˇ dzehˬ dzeuˇ ni noeˬ tmˬ ngaˇ laˬ, nawˬ˗ahˇ aˬ joˆ˗ehˇ noeˬ nya? Aˬ jeˬ miˇ neh?

Haw lahˬ

Miˬyehˇ nehˬ˗ehˇ cawˬ cawˬ˗eu jeˬ, nawˬ˗euˬ dehꞈ ziˇ˗ahˇ aˬ joˆ˗ehˇ gaˇ dahˇ tsoeˬ˗eu nga?

“Yeˬhawˇbaˬ aˬ dui siˬ nya paˬ˗ehˇ gʼeh˗eu Miˬyehˇ pyeuꞈ” (Loꞈ˗eu nymˇgoˇ, 2003 Nyiˬ siˬ ba la 15)

Miˬyehˇ nehˬ˗ehˇ cawˬ aˬ joˆ˗ehˇ cawˬ nya˗eu nga lehˇ haw.

“Ngaˇ Miˬyehˇ˗euˬ cawˬ aˬ joˆ˗ehˇ pyeuꞈ nya˗eu nga?” (Zaˬ guˬ deuˬ naˇ haˬ˗eu jeˬ—Maˇ diˇ zmˬ nya˗eu dawˬ kʼoꞈ, Dmˬ 2, gaˇ kawˆ 35)

Yeˬhawˇbaˬ nehˬ˗ehˇ cawˬ cawˬ˗eu heu naˇ, zaˬ miˬ aˬ buˇ tiˬ gʼaˬ˗euˬ dehꞈ ziˇ˗ahˇ aˬ joˆ˗ehˇ bi muiˬ daˆ laˇ˗euˬ nga lehˇ haw.

“Ngaˬ˗ahˇ maˬ paˇ shiˇ mawꞈ miˇ˗a” (Loꞈ˗eu nymˇgoˇ, 2017 Dahˬ beh˗eu dmˬ)

Zaˬ guˬ deuˬ Yeˬhawˇbaˬ nehˬ˗ehˇ taꞈ leˇ˗awˇ aˬ joˆ˗ehˇ noeˬ nya lehˇ ehˇ nehˬ laꞈ˗euˬ meh.

Miˬyehˇ nehˬ˗ehˇ cawˬ cawˬ˗eu heu naˇ, aˬ jeˬ˗ahˇ ehˇ mawꞈ nga? (1:46)

6. Iˇ cuꞈ shawˇ˗euˬ deuˬ Yeˬhawˇbaˬ˗euˬ nymˇ jiˇ laꞈ kʼoeˇ˗euˬ tiˬ gʼaˬ pyeuꞈ laˇ

Aˬ dui iˇ cuꞈ shawˇ ngeh, miˇ tsaˬ kʼoeˇ taˆ mehˬ bawˬ gm˗eu huiˬ˗eu nymˇ jiˇ laꞈ kʼoeˇ˗euˬ tiˬ gʼaˬ pyeuꞈ laˇ˗eu meh. Iˇ cuꞈ shawˇ dzeuˇ˗euˬ Yeˬhawˇbaˬ˗euˬ Saˇ kiˇ deuˬ aˬ gaˇ jawˇ˗awˇ aˬ joˆ˗ehˇ dehꞈ yaꞈ˗euˬ kʼawꞈ, aˬ yawꞈ maꞈ jah˗eu jeˬ hawˇ˗eu dehꞈ caw mˇ caw luꞈ˗eu jeˬ tiˬ gaˇ duˇ leˇ˗eu meh. Ja ceuˬ 25:14 hawˇ˗eu 1 Beˬtuˆluˆ 2:17-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Iˇ cuꞈ shawˇ˗eu heu naˇ, Yeˬhawˇbaˬ hawˇ˗eu aˬ yawꞈ˗ahˇ uˬ duˬ tahˬ deuˬ nehˬ˗ehˇ aˬ joˆ˗ehˇ bi gʼoeˇ leˇ˗eu nga?

2. Nymˬ˗mˇ aˬ dui laˬ kʼaˬ tiˬ cehˇ aˬ joˆ˗ehˇ dehꞈ nya˗eu nga?

Yeˬhawˇbaˬ aˬ dui˗ahˇ ‘aˬ yawꞈ˗euˬ dawˬ gaˬ˗awˇ naˇ haˬ geuꞈ’ nya ni beh taˬ˗euˬ meh. Teu miˇ neh aˬ dui aˬ yawꞈ˗ahˇ siˬ nya laˇ nya˗awˇ uˬ duˬ tahˬ nya˗eu meh. (Luˇkaꞈ 11:28-ahˇ gui.) Yeˬhawˇbaˬ Miˬyehˇ aˬ dui˗ahˇ aˬ yawꞈ nehˬ˗ehˇ bi gʼoeˇ mawꞈ˗awˇ ‘aˬ yawꞈ neh dawˬ kʼaˇ biꞈ taˬ˗euˬ jeˬ bi mˇ’ mawꞈ˗eu uˬ taꞈ, aˬ yawꞈ˗ahˇ gaˬ˗awˇ, ‘nui ma dawˬ tawˆ luꞈ aˬ yawꞈ˗euˬ gaˇ bi mˇ’ mawꞈ˗eu meh. (Dawˬmehˬmehˬ˗eu 10:12; Ja ceuˬ 25:14) Aˬ dui teu loꞈ˗ehˇ jahˇ naˇ shaˬ˗eu zahˬ˗eu jeˬ jaˆ kʼawꞈ maˇ maˇ ni laˬ kʼaˬ cehˇ˗eu meh. Yeˬhawˇbaˬ˗ahˇ uˬ duˬ tahˬ˗eu heu naˇ, aˬ dui˗euˬ dehꞈ ziˇ˗ahˇ aˇ poeˬ bi baw˗awˇ, aˬ dui˗ahˇ aˬ jeˬ˗euˬ gʼaˇ duˬ dehꞈ luꞈ˗eu lehˇ jiˇ bi siˬ laꞈ˗eu meh.