Zahˇ kʼawꞈ deuˬ Miˬyehˇ˗euˬ tsawˇ myahˇ˗ahˇ laˆ cawˆ

Miˬyehˇ˗aˬ, gʼoeˇ˗eu gaˬ˗eu jeˬ pyeuꞈ˗eu jeˬ miˇ, Miˬyehˇ˗ahˇ jah ma lehˇ ehˇ˗eu zahˇ deuˬ aˬ jeˬ miˇ neh yaw haiˬ yaw doeˇ jeˬ mˇ˗eu nga? Zahˇ teu deuˬ naˇ, Miˬyehˇ˗euˬ tsawˇ myahˇ˗ahˇ laˆ cawˆ˗eu zahˇ kʼawꞈ pyeuꞈ˗eu miˇ neh meh. Aˬ yawꞈ maꞈ Miˬyehˇ˗euˬ tsawˇ myahˇ˗ahˇ aˬ joˆ˗ehˇ laˆ cawˆ˗eu nga? Miˬyehˇ zahˇ kʼawꞈ deuˬ˗ahˇ aˬ joˆ˗ehˇ noeˬ˗awˇ, aˬ jeˬ jahˇ˗eu lehˇ gʼeh˗eu nga?

1. Zahˇ kʼawꞈ deuˬ aˬ yawꞈ maꞈ mehˬ˗eu jeˬ neh Miˬyehˇ˗euˬ tsawˇ myahˇ˗ahˇ aˬ joˆ˗ehˇ laˆ cawˆ˗eu nga?

Zahˇ kʼawꞈ deuˬ “Miˬyehˇ˗euˬ gaˇ kawˆ tsaˬ˗eu dawˇ˗eu jeˬ yuˇ˗awˇ, maˬ tsaˬ maˬ dawˇ˗eu jaˬ myawꞈ myawꞈ˗eu jeˬ˗ahˇ paˇ geuꞈ˗euˬ meh.” (Loˇmaˆ 1:25) Yaw jeˬ ma jeˬ, zahˇ deuˬ myaˬ tiˬ paˆ zaˬ lahˇ deuˬ˗ahˇ Miˬyehˇ˗euˬ tsawˇ myahˇ maˬ mehˬ nehˬ˗a. Jaˇliꞈ laꞈ kʼoeˇ naˇ, aˬ dui Miˬyehˇ˗euˬ tsawˇ myahˇ ya zmˬ meh lehˇ ehˇ taˬ˗euˬ meh. (Loˇmaˆ 10:13, 14) Zahˇ˗euˬ aˬ yuiꞈ tiˬ deuˬ na, maˬ muiˬ˗eu gaˇ kawˆ pyeuꞈ laˇ ngeh, teu naˇ Miˬyehˇ neh bi pyeuꞈ laˇ˗euˬ meh lehˇ ehˇ˗eu meh. Ehˇ kʼawꞈ maˇ diˇ naˇ teu loꞈ˗ehˇ maˬ ngeuˇ˗a, Miˬyehˇ maˬ muiˬ˗eu jeˬ˗ahˇ tiˬ jawˇ˗iˬ maˬ bi pyeuꞈ laˇ haw˗aˬ. (Yaˬkoˆ 1:13-ahˇ gui.) Zahˇ deuˬ neh mehˬ bahˬ˗euˬ jeˬ, tsawˇ haˬ deuˬ˗ahˇ Miˬyehˇ nehˬ˗ehˇ bi kaˬ˗iˇ˗eu meh.

2. Zahˇ kʼawꞈ deuˬ neh mˇ˗euˬ jeˬ Miˬyehˇ˗euˬ tsawˇ myahˇ˗ahˇ aˬ joˆ˗ehˇ laˆ cawˆ˗eu nga?

Zahˇ kʼawꞈ deuˬ tsawˇ haˬ deuˬ˗ahˇ Yeˬhawˇbaˬ mˇ˗eu loꞈ˗ehˇ maˬ mˇ nehˬ˗a. ‘Aˬ yawꞈ maꞈ˗euˬ iˬ baˇ mˬ˗ahˇ tuˆ˗eu’ meh lehˇ Jaˇliꞈ ehˇ˗eu meh. (Pah mehˬ˗eu 18:5) Zahˇ deuˬ miˇ kʼahˬ˗ahˇ uˆ lahˇ˗eu gaˇ kawˆ˗ahˇ maˬ ehˇ, guiˇ deuˆ gaˇ maˬ ehˇ, tsawˇ haˬ gʼawˬ mya ni˗ahˇ sehꞈ gaˇ maˬ ehˇ, taꞈ leˇ gm leˇ luꞈ˗eu yaw myaˬ yaˇ kʼoꞈ byah laˇ˗euˬ meh. Zahˇ˗euˬ aˬ yuiꞈ tiˬ deuˬ na˗aˬ, aˬ yawꞈ maꞈ˗euˬ zaˬ lahˇ deuˬ˗ahˇ pyuˇ taꞈ taꞈ˗ehˇ saˇ lehˆ ni dehꞈ˗eu meh. Aˬ yawꞈ maꞈ neh mˇ˗euˬ jeˬ teu naˇ, Miˬyehˇ˗euˬ tsawˇ myahˇ˗ahˇ laˆ cawˆ˗eu uˬ taꞈ, aˬ yawꞈ maꞈ Miˬyehˇ˗ahˇ tiˬ pawꞈ˗iˬ maˬ siˬ nya˗eu lehˇ siˬ laˇ˗eu meh.—1 Yoˇhaˬ 4:8-ahˇ gui.

3. Miˬyehˇ zahˇ kʼawꞈ deuˬ˗ahˇ aˬ joˆ˗ehˇ noeˬ˗eu nga?

Zahˇ kʼawꞈ deuˬ neh mˇ˗euˬ jeˬ˗ahˇ nawˇ nui daˆ daˆ luꞈ naˇ, Yeˬhawˇbaˬ˗ahˇ ngehˬ˗ehˇ dzehˬ aˬ joˆ˗ehˇ gʼeh leˇ paˬ nga? Miˬyehˇ tsawˇ haˬ zaˬ˗ahˇ gaˬ kʼawꞈ, aˬ yawꞈ˗euˬ tsawˇ myahˇ˗ahˇ laˆ cawˆ˗eu uˬ taꞈ, zaˬ lahˇ deuˬ˗ahˇ jaˬ myawꞈ myawꞈ˗eu zahˇ˗euˬ aˬ yuiꞈ deuˬ˗ahˇ dehꞈ laˇ taˬ˗euˬ meh. Yeˬhawˇbaˬ zahˇ kʼawꞈ deuˬ˗ahˇ laˆ cawˆ jiˇ˗awˇ, teu˗ahˇ “tiˬ jawˇ˗iˬ maˬ paˇ ya mawˇ˗aˇ” lehˇ saˇ jaˇ dzaˬ taˬ˗euˬ meh. (Pah mehˬ˗eu 18:21) Gʼawˬ myahˇ maˬ gʼeh˗ehˇ, Miˬyehˇ zahˇ kʼawꞈ dawˬ tawˆ luꞈ˗ahˇ laˆ cawˆ jiˇ˗eu meh.—Pah mehˬ˗eu 18:8.

Naꞈ suiˇ ni dzaw

4. Miˬyehˇ zahˇ yawˬ zahˇ na luꞈ˗ahˇ laꞈ maˬ daˬ˗a

Tsawˇ haˬ gʼawˬ mya gʼaˬ zahˇ deuˬ naˇ, Miˬyehˇ jawˇ gaˇ sheuˬ gʼeh˗eu gaˇ ma gʼawˬ mya kahˇ˗ahˇ duˇ˗eu meh lehˇ jah˗eu meh. Teu tsaˬ ngaˇ laˬ? Maꞈtehˬ 7:13, 14-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Dehꞈ˗eu jeˬ biꞈ˗eu gaˇ ma nehˬ˗ehˇ taꞈ leˇ˗awˇ, Jaˇliꞈ aˬ joˆ˗ehˇ ehˇ taˬ˗euˬ nga?

Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Miˬyehˇ zahˇ yawˬ zahˇ na luꞈ˗ahˇ nui ma tsaˬ ngaˇ loˇ?—Tiˬ tsahˇ na (3:22)

• Miˬyehˇ zahˇ yawˬ zahˇ na luꞈ˗ahˇ nui ma tsaˬ meh lehˇ Jaˇliꞈ ehˇ ngaˇ laˬ?

5. Zahˇ kʼawꞈ deuˬ laꞈ kʼoeˇ Miˬyehˇ˗euˬ gʼoeˇ˗eu gaˬ˗eu jeˬ maˬ mawˇ laˇ

Zahˇ deuˬ Miˬyehˇ˗euˬ tsawˇ myahˇ˗ahˇ gʼawˬ mya paw neh laˆ cawˆ˗eu meh. Kʼaˇ doeˇ˗eu tiˬ jeˬ naˇ guiˇ deuˆ gaˇ gʼaˬ biꞈ˗eu heu meh. Yaw jeˬ ma jeˬ tiˬ hmˬ˗ahˇ haw˗eu gaˇ duˬ, biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Miˇ tsaˬ guiˇ nyiˬ poˆ aˬ yawꞈ poˆ˗ahˇ zahˇ˗euˬ aˬ yuiꞈ deuˬ neh mˇ˗euˬ jeˬ (2:22)

• Miˇ tsaˬ guiˇ nyiˬ poˆ aˬ yawꞈ poˆ˗ahˇ zahˇ˗euˬ aˬ yuiꞈ deuˬ aˬ jeˬ jahˇ˗euˬ nga?

• Aˬ yawꞈ maꞈ neh jahˇ˗euˬ jeˬ˗ahˇ nawˇ aˬ joˆ˗ehˇ noeˬ nya?

Yoˇhaˬ 13:34, 35 hawˇ˗eu 17:16˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Zahˇ deuˬ guiˇ deuˆ gaˇ taꞈ leˇ gm leˇ ngeh, Yeˬhawˇbaˬ aˬ joˆ˗ehˇ noeˬ˗eu nga?

• Maˬ muiˬ˗eu gʼawˬ mya jeˬ zahˇ kʼawꞈ deuˬ˗ahˇ neh pyeuꞈ laˇ˗euˬ meh. Zahˇ kʼawꞈ deuˬ Miˬyehˇ˗euˬ gʼoeˇ˗eu gaˬ˗eu jeˬ˗ahˇ maˬ caw teh˗eu lehˇ nawˬ˗ahˇ mawˇ laˇ˗eu aˬ jeˬ jeˇ jaˆ nya?

6. Miˬyehˇ tsawˇ haˬ deuˬ˗ahˇ zahˇ kʼawꞈ deuˬ˗ahˇ neh bi doˆ le mawꞈ

Pah mehˬ˗eu 18:4a˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Zahˇ kʼawꞈ deuˬ neh mehˇ shuiˇ bi shuiˇ tawˆ taˬ˗euˬ tsawˇ haˬ yawˬ gʼaˬ na luꞈ˗ahˇ Miˬyehˇ caw ba nehˬ mawꞈ˗eu lehˇ ya siˬ ngeh, nawˬ˗ahˇ aˬ joˆ˗ehˇ gʼeh laˇ nya?

7. Maˇ maˇ ni gʼeh˗eu Miˬyehˇ˗euˬ gaˇ kawˆ dzaw daˆ leꞈ

Zahˇ kʼawꞈ deuˬ baˬ da neh nawˇ Miˬyehˇ˗ahˇ siˬ nya mawꞈ˗eu nui ma bi paˇ˗iˇ paˬ˗ehˇ gʼeh ngaˇ laˬ? Yaw jeˬ ma jeˬ heu˗ahˇ shaˇ noeˬ haw sheˇ. Aˬ li tiˬ gʼaˬ aˬ yawꞈ˗euˬ aˬ da˗euˬ ehˇ dawˬ maˬ naˇ haˬ ni iˇ kahˇ˗ahˇ neh doˆ˗iˇ˗awˇ lehˬ laˇ ca laˇ˗euˬ lehˇ ehˇ˗awˬ. Aˬ da gʼaˬ aˬ yawꞈ˗ahˇ teu loꞈ˗ehˇ maˬ bi mˇ mawꞈ˗eu yaw duˬ baw meh. Toˆ˗ehˇ naˇ aˬ li gʼaˬ neh mˇ˗euˬ maˬ muiˬ˗eu jeˬ teu, aˬ jeˬ miˇ neh aˬ da gʼaˬ˗ahˇ iˬ baˇ maˬ taˬ nya˗eu nga?

• Zahˇ kʼawꞈ deuˬ neh mˇ˗euˬ jeˬ baˬ da neh Yeˬhawˇbaˬ˗ahˇ iˬ baˇ taˬ˗awˇ, aˬ yawꞈ˗euˬ gaˇ kawˆ maˬ paˇ dzaw ni byehˇ˗eu teu naˇ, tsaˬ ngaˇ loˇ?

Kawˆ shawˆ

Zahˇ kʼawꞈ deuˬ neh mehˬ bahˬ˗euˬ jeˬ hawˇ˗eu aˬ yawꞈ maꞈ neh mˇ˗euˬ yaw haiˬ yaw doeˇ jeˬ heu naˇ, Miˬyehˇ˗euˬ tsawˇ myahˇ˗ahˇ laˆ cawˆ˗eu meh. Teu miˇ neh Miˬyehˇ zahˇ kʼawꞈ deuˬ˗ahˇ laˆ cawˆ˗eu lehˇ gʼeh˗eu meh.

Ja sawˇ poˆ˗eu

• Zahˇ kʼawꞈ deuˬ neh mehˬ˗euˬ jeˬ hawˇ˗eu mˇ˗euˬ jeˬ˗ahˇ, nawˇ aˬ joˆ˗ehˇ noeˬ nya?

• Zahˇ kʼawꞈ deuˬ˗ahˇ Yeˬhawˇbaˬ aˬ joˆ˗ehˇ noeˬ˗eu nga?

• Yeˬhawˇbaˬ zahˇ kʼawꞈ deuˬ˗ahˇ aˬ jeˬ jahˇ˗eu lehˇ gʼeh˗eu nga?

Haw lahˬ

Zahˇ deuˬ myaˬ tiˬ paˆ˗ahˇ Miˬyehˇ aˬ jeˬ miˇ neh laꞈ maˬ daˬ˗eu nga lehˇ, gaˇ kawˆ nyiˬ kawˆ˗ahˇ haw.

“Zahˇ yawˬ zahˇ na luꞈ tiˬ kawˆ ngaˇ laˬ? Miˬyehˇ yawˬ zahˇ na luꞈ˗ahˇ laꞈ daˬ ngaˇ loˇ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Yeˬhawˇbaˬ aˬ jeˬ miˇ neh aˬ dui˗ahˇ tiˬ kawˆ loꞈ˗ehˇ uiˬ leˇ˗awˇ, aˬ yawꞈ˗ahˇ uˬ duˬ bi tahˬ mawꞈ˗eu nga?

“Zahˇ tiˬ zahˇ tawˬ˗eu loˬ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˬ bawˇ koꞈ dawˬ tiˬ gʼaˬ aˬ yawꞈ tawˬ luꞈ˗eu zahˇ˗ahˇ nui ma jiˇ laˇ taˬ˗euˬ kʼawꞈ, Miˬyehˇ˗euˬ gaˇ kawˆ dzaw daˆ leꞈ˗euˬ meh.

“Aˬ bawˇ koꞈ dawˬ tiˬ gʼaˬ aˬ jeˬ miˇ neh uˬ duˬ tahˬ nymˇ˗ahˇ maˬ paˇ˗iˇ˗euˬ nga?” (Noeˬlaˇ˗awˬ!, 2015 Nyiˬ siˬ ba la)

Zahˇ deuˬ Miˬyehˇ˗aˬ tsawˇ haˬ deuˬ˗ahˇ kʼahˬ maˬ lahˇ˗a, haiˬ˗eu Miˬyehˇ pyeuꞈ˗a lehˇ mehˬ laꞈ˗euˬ yaw myaˬ yaˇ kʼoꞈ byah laˇ˗euˬ meh. Mehˬ bahˬ˗eu yaw jeˬ ma jeˬ smˬ kawˆ˗ahˇ haw.

“Miˬyehˇ˗ahˇ maˬ bi gaˬ ni laˆ tsoeˬ˗eu jaˬ myawꞈ mehˇ shuiˇ dawˬ” (Loꞈ˗eu nymˇgoˇ, 2013 Tseˇ tiꞈ siˬ ba la 1)